Dawiq Lé Garai Gasang Htûm Tô É Danghtum
7
Ahkuî, Hkóhkâm Dawiq gi, yhâng é lhînghkyùq mâ é yhâng é gye pé bànshoq chyáng mai, haû Yhûmsîng Garaî èq yhang lé bánno nhâng bê nghut luî, yhâng é hkóhkâm wâng má nyì ngón yùqyo nyi é hkûn, 2 myìqhtoi Nahtan lé, “Wú aq, haû Garai Gasâng é sàksé dò gi, zúm hkaû má jòq tô nyi é u, ngò gi, kyám gâm sik eq saî é hkóhkâm wâng má lúng nyi é nghut ri.” ga taî ri.3 Haú hkûn, Nahtan gi, hkóhkâm lé, “Haû Yhûmsîng Garai gi, nàng eq rahá nghut nyi é yánmai, nàng wó myìt jé é eq rajung za kut àq.” ga tû taî ri.
4 Haú myîn, Yhûmsîng Garaî é mungdang Nahtan chyáng jé é gi,
5 “Ngá é duìnhâng zoshâng Dawiq chyáng ê mù, shî su nghû ê taí aq; ‘Haû Yhûmsîng Garai shî su ga taî ri; nàng gi, Ngò nyì râ yhûm saí râ sû nghut lhê lhû? 6 Ngò gi, Isira-elaq byu pé lé, Egutuq ming mai shuî htoq dòq lo é hkûn mai, hkû-nyí jé shoq, yhûm má a nyi wú é nghut lhê. Ngò gi, zúm lé Ngá é nyì jowò dông kut luî, jowò rawò mai rawò shut htòt lhing wún é nghut lhê. 7 Isira-elaq byu pé bànshoq bang eq rahá Ngò htòt wún é jowò hkangmó má, Ngá é Isira-elaq byu pé lé wú zúng râ matú, Ngò hkunmó hkyô tô é zau wuî hká yùq lé, “Nàng gi, haî mù, Ngá matú kyám gâm sik yhûm a saí byî é lhú?” nghû Ngò taî wú é lhú?’ nghû àq.
8 Haû mù, ahkuî, Ngá é duìnhâng zoshâng Dawiq lé, ‘Wum-o a-tsam dìk shoq bò Sû Yhûmsîng Garai shî su ga taî ri; Ngò gi, nang lé, Ngá é Isira-elaq byu pé lé ùp râ matú, mhan nú nghâróng yô mai le, sau bainám hpúng lé zúng nyi é mai le, shuî yu é nghut lhê. 9 Ngò gi, Nàng jé é jowò hkangmó má, nàng eq rahá nghut nyî mù, náng é gyè pé bànshoq lé, náng é hí mai lhoqhtûm pyám byi bê nghut lhê. Ahkuî, Ngò gi, myìdàm htoq má kô hkìk htâng é byu pê é myìng hû é su, náng é myìng lé hu nhâng râ nghut lhê. 10 Hau htoq agó, Ngò gi, Ngá é Isira-elaq byu pê é matú nyì jowò hên byi mù, yhángmòq lé lhoq gingtíng byi râ nghut lhê; haú hkûn, yhángmòq gi, ó yùq èq le gunjâng é a hui zo lô é za, yhûmsing é yhûm wó bûm kôrâ nghut lhê. Haû agè ashop é byu pé gi, sânghi má yhángmòq kut é su le, 11 Ngò, Ngá é Isira-elaq byu pé lé ùp râ ushuq pé hkyin masàt tô é hkûn mai kut kô é su le, htângnùng má yhángmòq lé zìk zo râ a nghut lo. Ngò gi, nang lé, náng é gyè pé bànshoq bâng chyáng mai bánno nhâng râ nghut lhê.
Haû Yhûmsîng Garai yhang, náng é matú yhûmhtu ralhum lhoq gingtîng to byi râ ga, Yhûmsîng Garai, nang lé shî su ga taî pyo kyô ri; 12 náng é i-pyàt buìnyì htum luî, náng é îchyí îwâ pé eq rahá nàng ló bánnô byùq jáng, Ngò gi, náng é hkô má zùng nhâng râ matú, náng ûng mai gyó é awùt ashín lhoqtoq byi mù, yhâng é mîngdán lé lhoq gingtíng byi râ nghut lhê. 13 Yhang gi, Ngá é mying é matú yhûm saí râ sû nghut mù, Ngò gi, yhâng é mîngdán é hkóhkâm tángmyhâng lé ahtum abyùq lhoq gingtîng to byi râ nghut lhê. 14 Ngò gi, yhâng wa dùt râ nghut mù, yhang gi, Ngá zo dùt râ nghut lhê. Yhang mara kut shut jáng, Ngò gi, yhang lé, byu pê é dumbáng èq mara dam byi mù, byu pé nhuq bàt é su nhuq bàt râ nghut lhê. 15 Nghut kôlhang, Ngò gi, náng é hí mai hkat htoq pyâm é Sholuq chyáng mai, Ngá é chyit myìt lé wùp yu pyám byî é su, yhâng chyáng mai Ngá é chyitdàp myìt hkâ-nhám le wùp yu pyám byi râ a nghut. 16 Náng é yhûmbyù wuì eq náng é mîngdán gi, Ngá é hí má hkâ-nhám le ru joq gîng nyì râ nghut mù, náng é hkóhkâm tángmyhâng le, ahtum abyùq lhoq gingtîng tô é hui râ nghut lhê.’ nghû taí aq.” ga taî ri. 17 Nahtan gi, Dawiq lé, yhâng é shing-rán dang shî bànshoq shit kyo bê nghut ri.
Dawiq É Kyûdung Dang
18 Haú hkûn, Hkóhkâm Dawiq gi, ahkaû shut wang lé mù, haû Yhûmsîng Garaî é hí má zùng luî,
“Ahko Ahkáng lhúnglháng wó Sû Yhûmsîng Garai ê, ngò gi, ó wá nghut luî, ngá é yhûmhtu gi, haî nghut luî, Nàng, ngo lé shî í wàq toq tô lhê lhú? 19 Ahko Ahkáng lhúnglháng wó Sû Yhûmsîng Garai ê, haú hkyô gi, Náng é myòq hí má a gé lùq shî é dông, Náng é duìnhâng zôshang é yhûmbyù wui chyáng dùt lò râ hkyô lé le Nàng taí bê nghut ri. Ahko Ahkáng lhúnglháng wó Sû Yhûmsîng Garai ê, haû gi, Nàng, xângzo byu pé lé lhaq kut byî é hkyô nghut lhê lhú?
20 Ngò Dawiq gi, Nang lé haî wá wó taî jàt râ lhú? Hkâsu mù gâ le, Ahko Ahkáng lhúnglháng wó Sû Yhûmsîng Garai ê, Nàng gi, Náng é duìnhâng zoshâng ngo lé sê nyi ri. 21 Nàng gi, Náng é mungdâng é yánmai le, Nàng ô nau é hkyô má cháng luî le, múzó mó shî lé kut mù, Náng é duìnhâng zoshâng ngo lé haú hkyô sé nhâng bê nghut ri.
22 Ahko Ahkáng lhúnglháng wó Sû Yhûmsîng Garai ê, Nàng gi, hkâ-í yhang gyaú Sû nghut ri myhî-nhung! Ngá-mòq é nohkyap èq wó gyô wú é má, Nàng eq du é ó a nyì; Nàng mai lai luî, gótû Garai Gasang a nyì nghut ri. 23 Garai Gasâng èq, Yhâng é myìng lhoqhu râ matú le, Egutuq ming mai Nàng hkyi htoq yu é, Náng é byu pê é hí mai, byu myû wuì eq yhángmòq é hparà pé lé hkat htoq pyâm é dông, hkìk é eq gyùq nhô zâ é maúhpo múzó kut shit râ matú le, Yhâng é byu myû dùt râ matú hkyi htoq yu tô é, haû myìdàm htoq má byu myû ra-myû nghut é, Náng é Isira-elaq byu pé su dùt é byù ó nyi lhê lhú? 24 Nàng gi, Náng é Isira-elaq byu pé lé, ahtum abyùq Náng é byu pé dông lhoq gingtîng to bê nghut mù, Yhûmsîng Garai ê, Nàng gi, yhángmòq é Garai Gasang dùt bê nghut ri.
25 Haû mù, ahkuî, Yhûmsîng Garai Gasang ê, Náng é duìnhâng zoshâng ngò eq ngá é yhûmbyù wuì lé, Nàng danghtum htûm tô é lé ahtum abyùq lhoq gingtîng to byi aq. Nàng danghtum htûm tô é eq rajung za kut byi aq; 26 haû jáng, Náng é myìng gi, ahtum abyùq hkya-on wàq toq é huî nyì râ nghut lhê. Haú hkûn, byu pé gi, ‘Wum-o a-tsam dìk shoq bò Sû Yhûmsîng Garai gi, Isira-elaq byu pé lé ùp é Garai Gasang nghut nyi ri!’ ga taí kôrâ nghut lhê. Haú hkûn, Náng é duìnhâng zoshâng Dawiq é yhûmbyù wuì gi, Náng hí má lhoq gingtîng tô é hui râ nghut lhê.
27 Isira-elaq byu pê é Garai Gasang, Wum-o a-tsam dìk shoq bò Sû Yhûmsîng Garai ê, Nàng gi, Náng é duìnhâng zoshâng ngo lé, ‘Ngò gi, náng é matú, náng é a-myû hkûngxoq xuq to byi râ nghut lhê.’ ga taî htoq shit bê nghut é yánmai, Náng é duìnhâng zoshâng ngò gi, Náng hí má shî su nghû kyû wám dûng nyi é nghut lhê. 28 Ahko Ahkáng lhúnglháng wó Sû Yhûmsîng Garai ê, Nàng gi, Garai Gasang nghut nyi ri ô! Náng é dang pé gi, lùm gíng é dang pé nghut ri; Nàng gi, Náng é duìnhâng zoshâng ngo lé, ge é hkyô shí pé byi râ danghtum htûm to bê nghut ri. 29 Ahkuî, Náng é duìnhâng zôshang é yhûmbyù wuì gi, Náng é myòq hí má ahtum abyùq wó nyi nyì kó sháng gàq, gabú myìt mai yhángmòq lé shimân byi aq ô. Hkâsu mù gâ le, Ahko Ahkáng lhúnglháng wó Sû Yhûmsîng Garai ê, Nàng gi, haû su ga taí bê nghut é yánmai, Náng é shimân jeju gi, náng é duìnhâng zôshang é yhûmbyù wui é ahtoq má, ahtum abyùq ru joq nyî sháng gàq ô.” ga kyûdûng ri.