Dawiq Wó É Ûngmyuq Hkyô
8
Hau htâng, Dawiq gi, Hpilisiti byu pé lé majan ê zân ûng mù, yhángmòq lé ùp sing yù luî, Hpilisiti byu pê é wà chyûng mâ é ùphkâng hkyô lé le sing yu pyám byi bê nghut ri.2 Dawiq gi, Moba byu pé lé le zân ung yù bê nghut ri; yhang gi, mingbyû wuì lé, myigùng htoq má lèq yán to nhâng luî, tui rahkat èq lâng ké mù, sum ké mâ é í ké nghû râ mâ é bang lé sat pyám pyám kut luî, myìt tô é raké nghû râ bang lé chyungxe lhut to to kut ri. Haû mù, Moba byu pé gi, Dawiq é a-ô má nyi byùq kômù, yhang lé hkán kat byî akô nghut ri.
3 Hau htâng, Dawiq gi, Uhprat Wuìlàng yàm mâ é maumyî lé wó dum ùp sing yù râ matú e ló é hkûn, Zoba mau mâ é hkóhkâm, Rehoba é yhang zo Hadadezara lé majan ê zân ung ri. 4 Dawiq gi, gyèlhêng rahkyîng, myangji jî é sarhê nyhit hkyîng eq hkyî so gyèzo í mun lé chyup yû mù, gyèlhêng rashô châm é matú za myang nyhi to mù, gótû myang bànshoq lé lahkàp hpyit pyám byi bê nghut ri.
5 Zoba mau mâ é hkóhkâm Hadadezara lé garúm râ matú, Damasikuq wà mó mâ é Aram byu pé lé lô kôjáng, Dawiq gi, yhángmòq mâ é gyè í mûn í hkyîng yùq lé lhom sat pyám bê nghut ri. 6 Hau htâng, yhang gi, Damasikuq wà mó má Aram mau lé zúng é gyèzô pé nyhi to luî, Aram byu pé gi, Dawiq é a-ô má nyi byùq kômù, hkán kat byî akô nghut ri. Haû Yhûmsîng Garai gi, Dawiq ê jé é jowò hkangmó má ûngmyuq hkyô byi bê nghut ri.
7 Dawiq gi, Hadadezara é zaugun wuì chung é hîng gòlong pé lé sing yù luî, Yerusalem wà mó má tsing yu lo ri. 8 Hkóhkâm Dawiq gi, Hadadezara ùphkang é Teba wà eq Berohtai wà mâ é gyi myo myo lé le sing yu pyám byî ri.
9 Hadadezara é gyèzo lhúnglháng lé, Dawiq èq zân ung yu pyám bê hkyô lé, Hamat mau mâ é hkóhkâm To-i wó gyo jáng, 10 yhang gi, yhang eq majan zân laî lo é Hadadezara lé Dawiq majan wó zân ung yu é ûngmyuq hkyô lé, ê bo gabú lôm râ matú, yhang zo Yoram lé, Hkóhkâm Dawiq chyáng nhang kat ri. Yoram gi, ngùn, hîng eq gyi pê èq saî é zèhkoq pé yu lé byî ri.
11 Hkóhkâm Dawiq gi, zèhkoq haú pé lé, yhang zân ung é byù myû wuì bànshoq bâng chyáng mai wó sing yu é hîng eq ngùn pé lé kut é su, haû Yhûmsîng Garai lé àp nhông byi bê nghut ri; byù myû haú pé gi, 12 Edom, Moba, Ammon, Hpilisiti eq Amalek byù myû pé nghut ri. Hau htoq agó, yhang gi, Zoba mau mâ é hkóhkâm, Rehoba é yhang zo Hadadezara chyáng mai wó yu é zè lé le, àp nhông byî ri.
13 Dawiq gi, Xo Langhkaû mâ é Edom byù ramûn shit hkyîng lé sat kyop pyâm é mai dum taû lo é htâng, myìng hû byùq bê nghut ri.
14 Yhang gi, Edom mau gón má zúng é gyèzô pé nyhi tô é nghut mù, Edom byù bànshoq gi, Dawiq é a-ô má nyi byùq bekô nghut ri. Haû Yhûmsîng Garai gi, Dawiq ê jé é jowò hkangmó má ûngmyuq hkyô byi bê nghut ri.
Dawiq É Zaugun Wuì
15 Dawiq gi, Isira-elaq mau gón lé ùp mù, yhâng byu pé bànshoq é matú, târâ ràp-rá é hkyô eq jo têng é hkyô kut bê nghut ri. 16 Zerui-a é yhang zo Yo-ap gi, gyèzau mó nghut ri. Ahiluda é yhang zo Yehoshahpat gi, kâ xûm sû nghut ri; 17 Ahitup é yhang zo Zadok eq Abi-ahta é yhang zo Ahimelek nhik gi, hkyangjong nghut akô; Serai-a gi, sùt zum kâ xûm sû nghut ri; 18 Yehoi-ada é yhang zo Benai-a gi, Hkerehti byu pé eq Pelehti byu pé lé ùp ri; Dawiq é yhang zo yùqzô pé gi, hkyangjông péa nghut bum akô.