Dawiq Eq Mehpiboshet
9
Dawiq gi, “Yonahtan é myòqdong lé tê mù ngò jeju wó shit râ matú, Sholuq é akoq mai nyi myìt gyó tô é byù rayùq yùq nyi akô lhú?” ga myî ri.2 Sholuq é yhûmbyù mâ é Ziba gâ é duìnhâng zoshâng rayùq nyi ri. Haú yùq lé, Dawiq hí má ê htoq shit râ matú ji yu akô nghut ri. Hkóhkâm gi, yhang lé, “Nàng gi, Ziba a nghut lhí?” ga myî ri.
Yhang gi, “Náng é duìnhâng zoshâng ngò nghut lhê.” ga tû taî ri.
3 Haú hkûn, hkóhkâm gi, “Haû Garai Gasâng é jeju lé ngò wó tûn shit râ matú, Sholuq é akoq mai nyi myìt gyó tô é byù rayùq yùq a nyì lo lhú?” ga myî ri.
Ziba gi, hkóhkâm lé, “Yonahtan é yhang zo, hkyî yun é byù rayùq nyi ashî nghut ri.” ga tû taî ri.
4 Haú hkûn, hkóhkâm gi, “Yhang hkâ má nyi ri lhú?” ga myi jáng, Ziba gi, “Lo Debara wà mâ é Ami-ela é yhang zo Mahkira yhûm má nyi ri.” ga tû taî ri.
5 Haû mù, Hkóhkâm Dawiq gi, byù nhâng luî, Lo Debara wà mâ é Ami-ela é yhang zo Mahkira é yhûm mai yhang lé ê shuî lò nhâng bê nghut ri.
6 Sholuq é yhang shu, Yonahtan é yhang zo Mehpiboshet gi, Dawiq chyáng jé jáng, yhang lé hkúngga hpautap é mai ngóm gòp bê nghut ri.
Dawiq gi, “Mehpiboshet ê!” ga wùt jáng, yhang gi, “Náng é duìnhâng zoshâng nyi tô lhê ô.” ga tû taî ri.
7 Dawiq gi, yhang lé, “Hkâ gyùq, náng wa Yonahtan é myòqdong lé tê mù, ngò, teng za nang lé jeju shit râ nghut lhê. Ngò gi, nángchyí Sholuq sing laî é maumyî bànshoq lé le, nang lé dum tau byi râ nghut mù, nàng gi, ngá é zangbó má ayang myàng zô nyì râ nghut lhê.” ga taî ri.
8 Haú hkûn, Mehpiboshet gi, ngóm gòp mù, “Shi byùq bê hkui radu su nghut é ngò gi, haî wá nghut luî, nàng yhûmsîng byu myàng byî é nghut lhê lhú?” ga taî ri.
9 Haú hkûn, hkóhkâm gi, Sholuq é duìnhâng zoshâng Ziba lé ji yù mù, yhang lé, “Ngò gi, Sholuq eq yhâng é yhûmbyù wuì sing laî é zè bànshoq lé, náng é yhûmsîng hpô é yhang shu Mehpiboshet lé àp byi bê nghut lhê. 10 Nàng eq nungzô pé, náng é duìnhâng zoshâng wuì gi, náng é yhûmsîng hpô é yhang shû é matú, maumyî haú pé má yò mú saí luî, gùqzò muishi pé yu lò byi keq; haú hkûn, yhang gi, zoshuq wó râ nghut lhê. Hau htoq agó, náng yhûmsîng hpô é yhang shu Mehpiboshet gi, ngá zangbó má ayang myàng zô nyì râ nghut lhê.” ga taî ri. (Ziba gi, yùqzo raxe ngo yuq eq duìnhâng zoshâng í xê yùq wó sû nghut ri.)
11 Haú hkûn, Ziba gi, hkóhkâm lé, “Ngá é yhûmsîng hkóhkâm mai, náng é duìnhâng zoshâng lé kut râ matú hkyô é hkunmó haî lé le, náng é duìnhâng zoshâng ngò kut râ nghut lhê.” ga taî ri. Haû mù, Mehpiboshet gi, hkóhkam é yhang zo yùqzô pé mâ é rayùq su, Dawiq é zangbó má zo bê nghut ri.