Ammon Byu Pé Lé Dawiq Majan Zân Ung Yu É Hkyô
10
Hau htâng, Ammon byu pê é hkóhkâm shi byùq luî, yhang zo Hanun gi, yhâng wâ é hkóhkâm hkô má zùng bê nghut ri. 2 Dawiq gi, “Yhâng wa ngo lé jeju shit bê é eq rajung za, Ngò le, Nahashi é yhang zo Hanun lé jeju shit râ nghut lhê.” ga myìt yu ri. Haû mù, Dawiq gi, yhâng wâ é yánmai, Hanun lé nhiktíng byi râ matú lagyô pé nhang kat ri.Dawiq é byu pé gi, Ammon byu pê é mau má jé kô é hkûn, 3 Ammon byu pê é gyèzaû pé gi, yhángmòq é yhûmsing Hanun lé, “Nàng gi, Dawiq mai, nhik lé tíng byi râ matú náng chyáng lagyô pé nhang kat é dông náng wa lé hkúngga hpautap é su ngam ri lhú? Dawiq gi, wa é hkyô lé gôn wú, jó wú luî, haû wà lé lhoqhtên pyám râ matú, byù haú bang lé nhang kat é a nghut lhí?” ga taî akô nghut ri. 4 Haû mù, Hanun gi, Dawiq é lagyô pé lé chyup yû mù, yùq hkangmó é nhutmui rahkyam lé wùq pyám byi luî, yhángmòq é chû-naúshi mâ é mèbu lé nyhâm htông pyám byi kômù, yhángmòq lé taû nhang kat bê nghut ri.
5 Dawiq lé haú hkyô taî kyo kôjáng, yhang gi, haú bang gyai yhang hoq hpû é hui bekô nghut é yánmai, yhángmòq lé ê tê râ matú, duìnhâng zoshâng wuì lé nhang kat ri. Hkóhkâm gi, “Núngmòq é nhutmui dum hing byùq é hkûn jé shoq Yerihko wà má nyi nyi mù, taû lò keq.” ga taí nhang kat ri.
6 Ammon byu pé gi, yhángmòq lé Dawiq èq nhikhko zô byùq bê nghut é hkyô lé bûn sé kôjáng, Bet Rehoba wà eq Zoba wà mâ é Aram byù hkyî so gyèzo í mun lé le, Mahka hkóhkam chyáng mâ é byù rahkyîng yùq lé le, Toba wà mó mâ é byù ramûn í hkyîng lé le, nghô yù bekô nghut ri.
7 Dawiq gi, haú hkyô lé wó gyo jáng, Yo-ap lé, sârhe pé bànshoq eq rahá nhang htoq kat bê nghut ri. 8 Ammon byu pé gi, htoq lé lô mù, wà hkúmdong hí má majan zan râ matú hen to bekô nghut ri. Haú u má, Zoba wà eq Rehoba wà mâ é Aram byu pé, Toba wà mâ é byu pé eq Mahka mâ é byu pé gi, pá má yhángmòq san kut nyi tô akô nghut ri.
9 Yo-ap gi, yhâng é hí shut htâng shut majan zan râ matú gyè yán yàp tô bum é lé myàng jáng, Isira-elaq byu pé mâ é, majan je kûng é sarhê hpúng pé ra-am lé hkyin yù mù, Aram byu pê é hkyam shut hen to bê nghut ri. 10 Yhang gi, myìt gyó tô é byu pé lé, yhang gu Abishai é lòq má àp to mù, Ammon byu pê é hkyam shut htuqhtíng râ matú, yhángmòq lé hen to nhâng bê nghut ri. 11 Haû mù, Yo-ap gi, “Ngo lé Aram byu pé ung lò kôjáng, nàng, ngo lé lé garúm yû àq; nghut kôlhang, nang lé Ammon byu pé ung lò jáng, ngò náng chyáng lé garúm yû râ nghut lhê. 12 Wum-o lhoqkíng luî, ngá-nhûng byu pé eq ngá-nhûng é Garai Gasâng é wà pê é matú, a gyùq a kyûm majan zan sháng. Haû Yhûmsîng Garai gi, Yhâng é myòq hí má ge é hkyô lé kut râ nghut lhê.” ga taî ri.
13 Haû mù, Yo-ap gi, yhâng é gyè hpúng pé eq rahá, Aram byu pé lé majan zan râ matú htîm e ló jáng, Aram byu pé gi, yhâng é hí mai hpâng bekô nghut ri. 14 Aram byu pé hpang bùm kô é lé, Ammon byu pé myàng kôjáng, yhángmòq le, Abishai é hí mai hpâng kômù, wà hkaû shut hpang wang ló byùq bekô nghut ri. Haû mù, Yo-ap gi, Ammon byu pé lé majan zân é mai, Yerusalem wà mó shut taû lò bê nghut ri.
15 Aram byu pé gi, Isira-elaq byu pê é hí mai majan sûm byùq bê hkyô lé myàng kô é htâng, yhángmòq radàm dum zùp zing bekô nghut ri. 16 Haû mù, Hadadezara gi, Uhprat Wuìlàng buìhtoq hkyam mâ é Aram byu pé lé ê ji yu râ matú byù nhang é nghut mù, yhángmòq gi, Helam jowò má jé akô nghut ri; Hadadezara é gyè hpúng mâ e gyèzau Shobak gi, haú bang lé shuî-û é nghut ri.
17 Dawiq gi, haú hkyô lé wó gyo jáng, Isira-elaq byù bànshoq lé shuî tsîng yù mù, Yodan làng laî byìt luî, Helam jowò má jé akô nghut ri. Aram byu pé gi, Dawiq lé majan lhom zan râ matú hên mù, majan lhom zân akô nghut ri. 18 Nghut kôlhang, yhángmòq gi, Isira-elaq byu pê é hí mai hpang akô nghut mù, Dawiq gi, Aram byu pê é gyèlhêng kon bang nyhit shô yùq eq hkyî so gyèzo myî mun lé sat pyám bê nghut ri. Hau htoq agó, yhang gi, yhángmòq é gyèzau Shobak lé le bàt kyop é nghut mù, Shobak gi, haú jowò má yhang shi byùq bê nghut ri. 19 Haû Hadadezara zuî tô é hkóhkâm pé bànshoq bang gi, yhángmòq, Isira-elaq byu pê é hí má majan sûm byùq bê nghut é lé myàng kôjáng, Isira-elaq byu pé eq nguì ngón hkyô xoq yu bùm kômù, Isira-elaq byu pê é a-ô má nyì byùq bekô nghut ri.
Haû mù, Aram byu pé gi, Ammon byu pé lé garúm yû râ matú gyùq byùq bekô nghut ri.