Dawiq Eq Batsheba
11
Zàn htaí luî, hkóhkam pé majan zan râ ahkyíng dum jé é hkûn, Dawiq gi, Yo-ap eq hkóhkam é zaugun wuì, Isira-elaq gyèzô pé lhúnglháng lé nhang kat ri. Yhángmòq gi, Ammon byu pé lé zân ung pyám mù, Raba wà lé lhom hkyuq to bekô nghut ri. Nghut kôlhang, Dawiq gi, Yerusalem wà mó má nyi gyó tô ri.2 Ra-nyí lhê é myínhtâng zó má, Dawiq gi, yhâng é yhuphpyang mai toq luî, hkóhkâm yhûm mâ é yhûmhkûng htoq má sô lhing nyi é u lé, gyai yúng é myiwe myhí rayùq gùng chî nyi é lé myang kat ri. 3 Haû mù, Dawiq gi, myiwe myhí haú yùq é hkyô lé ê myî gôn wú râ matú byù rayùq nhang kat ri. Haú yùq gi, “Myiwe myhí haû gi, Eli-am é yhang zo byìzo, Hiti byù Uri-a é yhang myi Batsheba nghut ri.” ga taî kyô ri. 4 Haû mú, Dawiq gi, myiwe myhí haú lé ê shuî lò râ matú duìnhâng zoshâng wuì lé nhang kat ri. Myiwe myhí haû yhâng chyáng jé jáng, yhang gi, shuî yhup pyám bê nghut ri. (Haú u, myiwe myhí haû gi, yhâng é lhôhking hkîng é mai a sansêng é hkyô lé lhoqsan lhoqyúng nyi é nghut ri.) Hau htâng, myiwe myhí haû gi, yhûm shut ló byùq bê nghut ri. 5 Myiwe myhí haû gi, zogûng wun byùq mù, Dawiq chyáng, “Ngò zogûng dùt bê.” ga dang kyô kat ri.
6 Haû mù, Dawiq gi, Yo-ap chyáng, “Hiti byù Uri-a lé, ngá chyáng nhang kat àq.” ga dang pying kat é nghut mù, Yo-ap gi, yhang lé, Dawiq chyáng nhang kat bê nghut ri. 7 Uri-a jé lô jáng, Dawiq gi, yhang lé, Yo-ap hkâsu nghut nyi é hkyô, gyèzô pé le hkâsu nghut nyi bum é hkyô eq majan hkâsu nghut nyi é hkyô lé lhom myî ri. 8 Hau htâng, Dawiq gi, Uri-a lé, “Náng é yhûm má gyó ló mù, hkyî chi nô yù àq.” ga taî ri. Haû mù, Uri-a gi, hkóhkâm wâng mai htoq ló jáng, hkóhkâm hpó gi, yhâng htâng má chyûnghuq châng dé kat byî ri. 9 Nghut kôlhang, Uri-a gi, hkóhkâm wâng hkúmdong má, yhâng é yhûmsîng hpô é duìnhâng zoshâng wuì bànshoq eq rahá yhup mù, yhâng é yhûm má a gyó ló nghut ri.
10 “Uri-a yhûm shut a ló.” ga Dawiq lé taî kyo kôjáng, yhang gi, Uri-a lé, “Nàng gi, mau we mai lo é a nghut lhí? Haî mù yhûm má a ló é lhú?” ga myî ri.
11 Haú hkûn, Uri-a gi, Dawiq lé, “Haû sàksé dò le, Isira-elaq eq Yudaq byu pé le, zúm pé má za jòq to nyi tô bùm mù, ngá zau hpó Yo-ap eq ngá é yhûmsîng náng é byu pé le, pá pé mâ é gyèwap má nyi tô bùm kô é u, ngò gi, yhûm má ló mù, ló zo ló shuq luî, ngá yhûmsîng myhí eq ló yhup râ hkyô, hkâsu wó kut râ lhú? Nàng chyungxe rû dui nyi é eq rajung za, ngò gi, haú sû é hkyô kut râ a nghut!” ga taî ri.
12 Haû mù, Dawiq gi, Uri-a lé, “Hkû-nyí shi-má nyi yù shi aq. Nàpmá shèq ngò nang lé nhang kat râ nghut lhê.” ga taî ri. Haû mù, Uri-a gi, haú nyí le, htang nyí le, Yerusalem wà mó má nyi yù bê nghut ri. 13 Dawiq ji é nghut mù, Uri-a gi, yhang eq rahá zo shuq luî, Dawiq gi, yhang lé shuq wùt nhâng bê nghut ri. Nghut kôlhang, yhang gi, myín lé, yhâng é yhûm má a ló é za, yhâng é yhûmsîng hpô é duìnhâng zoshâng wuì eq rahá, yhâng e yhuphpú má yhup râ matú htoq ló bê nghut ri.
14 Htang nàpkyó, Dawiq gi, Yo-ap lé laiká ká mù, Uri-a é lòq má àp kat bê nghut ri. 15 Haû laiká má yhang kâ tô é gi, “Majan jé htan é jowò shut Uri-a lé nhang kat àq. Haú hkûn, yhang gi, gye é lòq má wàng mù shi byùq sháng gàq, gyèzô pé lé zùt tau nhâng àq.” gâ ri.
16 Haû mù, Yo-ap gi, wà mó lé lhom hkyuq tô é u lé, yhang sê tô é gyèwum je htan é jowò má, Uri-a lé nhang kat ri. 17 Wà hkaû mâ é byu pé htoq lé lò kômù, Yo-ap lé majan lé zan kô é hkûn, Dawiq é gyè hpúng mâ é byù ra-am gi, shi byùq bê; Hiti byù Uri-a le shi byùq bê nghut ri.
18 Hau htâng, Yo-ap gi, Dawiq chyáng majan zân é lùdang bànshoq shit kat bê nghut ri. 19 Yhang, lagyo lé châng sang kat é dang gi, “Nàng, hkóhkâm hpó lé majan zân é lùdang ban shit jáng, 20 hkóhkâm hpó nhikjum yô lò mù, yhang gi, nang lé, ‘Núngmòq gi, haî mù wà eq lûm chyáng shoq majan ê zan kô é lhú? Wàhkûm mai yhángmòq myoshi bik kat râ nghut é lé, núngmòq a sé kó lhí? 21 Yerup-Beshet é yhang zo Abimelek lé, ó yùq sat é nghut lhê lhú? Myiwe rayùq gi, lùqlíng long racham wàq yù mù, wàhkûm mai yhâng é ahtoq má dú hkyô kat é nghut mù, yhang gi, Htebeza wà má shi byùq é a nghut lhí? Núngmòq gi, haî mù wàhkûm eq haú í chyâng htèp ê kô é lhú?’ ga lhom myi âbe. Yhang haú su ga nang lé myi jáng, nàng gi, ‘Náng é duìnhâng zoshâng Hiti byù Uri-a le shi byùq bê nghut ri.’ nghû yhang lé taî kyo aq.” gâ ri.
22 Haû mù, lagyo hpó gi, htoq ê mù, ê jé jáng, Yo-ap mai yhang lé taí nhang kat é bànshoq, Dawiq lé taî kyô ri. 23 Lagyo hpó haû gi, Dawiq lé, “Gyè pé shèq ngá-mòq lé lhom ûng mù, pá jé shoq ngá-mòq lé châng htîm akô; nghut kôlhang, ngá-mòq le, yhángmòq lé wà hkum jé shoq dum taû htîm hkat hkyut é nghut lhê. 24 Haú hkûn, lai bik sarhê pé gi, wàhkûm mai náng é duìnhâng zoshâng wuì shut lai bik kat kô é nghut mù, hkóhkam é byù ra-am shi byùq bê nghut ri. Hau htoq agó, náng é duìnhâng zoshâng Hiti byù Uri-a le shi byùq bê nghut ri.” ga taî kyô ri.
25 Haû jáng, Dawiq gi, lagyo hpó haú lé, “Yo-ap lé shî su nghû ló taí aq; ‘Hau é yánmai za myìt wum hkâgyui; majan má ó yùq shî râ gi, ó le a sé; wà haú lé wum kat htim mù, lhoqhtên pyám aq.’ nghû àq. Dang shí hkûn èq Yo-ap lé wum-o ló lhoqkíng byi aq.” ga taî ri.
26 Uri-a é yhûmsîng myhí gi, yhâng é yhûmsîng hpó shi byùq bê hkyô lé wó gyo jáng, yhâng é yhûmsîng hpô é matú ngaùhkyûng ngaùyang kut bê nghut ri. 27 Yhang ngaùhkyûng ngaùyang kut é ahkyíng lai jáng, Dawiq gi, myiwe haú lé, yhâng é hkóhkâm wâng yhûm má ê shuî lò nhang é nghut mù, yhang gi, Dawiq é yhûmsîng myhí dùt luî, yùqzo rayùq hkû byi bê nghut ri. Nghut kôlhang, Dawiq kut é hkyô gi, haû Yhûmsîng Garaî é hí má ashop é múzó dùt bê nghut ri.