Dawiq Lé Nahtan Tân É Hkyô
12
Hau htâng, haû Yhûmsîng Garai gi, myìqhtoi Nahtan lé, Dawiq chyáng nhang kat ri. Nahtan gi, yhâng chyáng jé jáng, “Wà rawà má, byù í yùq nyi akô; rayùq gi, wó sû, rayùq gi, myùng sû nghut ri. 2 Haû wó sû gi, sau hpúng eq no hpúng gyai myo shoq wó ri. 3 Nghut kôlhang, haû myùng sû gi, yhang wui yu é sauzîng zo radu mai lai luî, gótû haî a wó nghut ri. Yhang gi, sau zo haú lé hku kô é nghut mù, sau zo haû gi, yhang eq le, yhâng é zoshâng wuì eq le, rahá nyi kô lo é nghut ri. Sau zo haû gi, yhâng é zoshuq le bo zo, hkoq mai bo shuq, yhâng é lòqyìn hkaû má lháng yhup é nghut mù, yhâng é matú byìzo rayùq su nghut nyi ri.4 Ahkuî, gyung so sû rayùq gi, wó su chyáng lé jé ri; nghut kôlhang, haû wó sû gi, yhâng chyáng jé lé lo é bíng lé zoshuq hen lajang byi râ matú, yhang wó é sau hpúng eq no hpúng mâ é lé ha bun luî, a yu sat é za, myùng su é sauzîng zo lé she yù mù, yhâng chyáng lé bíng su é matú, zoshuq hen lajang byi bê nghut ri.” ga taî ri.
5 Haú hkûn, Dawiq gi, haû wó sû yùq lé gyai yhang nhikjum gyô yo mù, Nahtan lé, “Haû Yhûmsîng Garai rû dui nyi é eq rajung za, haú su kut é byù gi, shî ra râ nghut lhê! 6 Yhang gi, shogyo nhikmyîn myìt a bò mù, haú hkyô lé kut bê nghut é yánmai, sauzîng zo hau é matú, myi tú xap ra râ nghut lhê.” ga taî ri.
7 Haû jáng, Nahtan gi, Dawiq lé, “Haú yùq gi, nàng yhang nghut nyi ri! Isira-elaq byu pê é Garai Gasang nghut é, haû Yhûmsîng Garai shî su ga taî ri; ‘Ngò gi, nang lé, Isira-elaq byu pê é hkóhkâm kut râ matú, sô kat namngón xû bùt byi bê nghut é htoq agó, Sholuq é lòq mai hkyi yù bê nghut lhê. 8 Ngò gi, náng é yhûmsing hpô é yhûmbyù wuì lé le, náng é yhûmsîng hpô é yhûmsîng myhí pé lé le, náng é lòq hkaû má àp byi bê nghut lhê. Ngò gi, Isira-elaq a-myû eq Yudaq a-myû bànshoq lé le, nang lé byi bê nghut lhê. Haú pé bànshoq gyai shaû ashî nghut jáng, Ngò, nang lé jàt byi shirâ nghut lhê. 9 Nàng gi, haû Yhûmsîng Garaî é hí má agè ashop é hkyô kut é dông, haî mù Yhâng é dang lé wú myhuq pyâm lhê lhú? Nàng gi, Hiti byù Uri-a lé sham èq sat pyám mù, yhâng é yhûmsîng myhí lé, náng é yhûmsîng myhí kut yu pyám bê nghut ri. Nàng gi, yhang lé, Ammon byu pê é sham èq sat pyám bê nghut ri. 10 Haû mù, ahkuî, nàng gi, Ngo lé wú myhuq pyám mù, Hiti byù Uri-a é yhûmsîng myhí lé, nàng sing yu pyám bê nghut é yánmai, náng é yhûmbyù wui chyáng, sham eq sat shi lhûm é hkyô ayang jòq nyì râ nghut lhê.’ gâ ri.
11 Haû Yhûmsîng Garai shî su ga taî ri; ‘Ngò gi, náng é yhûmbyù wuì mai yhang, náng chyáng ihkyùp she hâng é byù nyi htoq nhâng râ nghut lhê. Ngò gi, náng é myòq hí mai náng é yhûmsîng myhî pé lé shuî yù mù, nàng eq je chyáng sû lé àp byi râ nghut mù, yhang gi, nyí káng má yhang, náng é yhûmsîng myhî pé eq yhup shit râ nghut lhê. 12 Nàng gi, haú hkyô lé haq kut é nghut kôlhang, Ngò gi, Isira-elaq byù bànshoq bâng é hí má, nyí gûng má haú hkyô lé kut htoq râ nghut lhê.’ gâ ri.” ga taî ri.
13 Haú hkûn, Dawiq gi, Nahtan lé, “Haû Yhûmsîng Garai lé, ngò mara shut bê.” ga taî ri.
Nahtan gi, “Haû Yhûmsîng Garai gi, náng é mara lé hkyut pyám byi bê nghut ri. Nàng shî râ a nghut lo. 14 Nghut kôlhang, nàng gi, haú hkyô lé kut shut é dông, haû Yhûmsîng Garai lé wú tiq pyám nhâng bê nghut é yánmai, ahkuî, hku to bê é zoshâng gi, teng za shî râ nghut lhê.” ga tû taî ri.
15 Nahtan yhûm taû ló byùq é htâng, haû Yhûmsîng Garai gi, Uri-a é yhûmsîng myhí mai Dawiq é matú hkû byî é zoshâng lé dam byi mù, hpu zo nhâng bê nghut luî, zoshâng haû gi, gyai yhang no byùq bê nghut ri. 16 Haû mù, Dawiq gi, zoshâng hau é matú Garai Gasang lé dûng tôngbán bê nghut ri. Yhang gi, zoshuq túm mù, myín pé lé, jimê tû wut luî myigùng htoq má lèq yù yù kut ri. 17 Yhâng é yhûmbyù wuì mâ é sûwún wuî gi, yhang lé myigùng mai ê tu toq kôrâ ga nàm má ê jé kôlhang, yhang gi, he-ngìk pyám luî, yhángmòq eq rahá haí jung zoshuq le a zo nghut ri.
18 Nyhit nyí nyí má, zoshâng haû gi, shi byùq bê nghut ri. Haú hkûn, Dawiq é zaugun wuì gi, yhang lé zoshâng haû shi byùq bê hkyô a wám taî kyo kó nghut ri. Hkâsu mù gâ le, yhángmòq gi, “Zoshâng haû chyungxe dui nyi ashî u má, yhang lé ngá-nhúng taí kôlhang, yhang ngá-nhúng lé a gyo byi nghut ri. Ahkuî, ngá-nhúng, yhang lé zoshâng haû shi byùq bê hkyô hkâsu nghû taî kyo râ lhú? Yhânggùng yhang je zing-rî lò âbe.” ga myìt kô é yánmai nghut ri.
19 Nghut kôlhang, Dawiq gi, yhâng é duìnhâng zoshâng wuì dangsoq soq lhûm nyì kô é lé myàng mù, zoshâng shi byùq bê nghut é hkyô lé sê wú htoq luî, “Zoshâng shî bê a nghut kó lhú?” ga myî ri.
Yhángmòq gi, “Nghut ri; yhang shî bê nghut ri.” ga tû taî akô nghut ri.
20 Haú hkûn, Dawiq gi, myigùng mai toq bê nghut ri. Yhang gi, gùng chî pyám mù, xû but luî, mèbu pé ban htaî wùt é htâng, haû Yhûmsîng Garaî é yhûm má wang ê mù, noqkuq bê nghut ri. Hau htâng, yhang gi, yhâng é hkóhkâm yhûm má ló mù, zoshuq htûng nhâng jáng, yhángmòq gi, zoshuq htûng byi kô é nghut luî, yhang gi, zoshuq zo bê nghut ri.
21 Yhâng é duìnhâng zoshâng wuì gi, yhang lé, “Nàng haî mù shî su kut lhê lhú? Zoshâng kângsoq bo nyi é u, nàng gi, zoshuq túm mù, ngaùbyi ngaùnhap kut ri; nghut kôlhang, ahkuî, zoshâng haû shi byùq jáng gi, nàng zang toq zo bê nghut ri mhaî!” ga myî akô nghut ri.
22 Haû jáng, yhang gi, “Zoshâng kângsoq bo nyi é u, ngò gi, zoshuq túm mù, ngaùbyi ngaùnhap kut é nghut lhê. Haû gi, ‘Haû Yhûmsîng Garai, ngo lé shogyo nhikmyîn yù mù, zoshâng lé chyungxe duì nhang to âbe.’ nghû ngò wó myìt é yánmai nghut lhê. 23 Nghut kôlhang, ahkuî, yhang gi, shi byùq bê nghut luî, ngò gi, haî mù zoshuq tûm nyì lo râ lhú? Yhang lé ngò wó dum shuî taû yù râ nghut lhê lhú? Ngò gi, yhâng chyáng châng ló râ nghut lhê. Nghut kôlhang, yhang gi, ngá chyáng dum taû lé lo râ a nghut.” ga tû taî ri.
Sholumon Hku Lé Lo É Hkyô
24 Hau htâng, Dawiq gi, yhâng é yhûmsîng myhí Batsheba lé nhiktíng byi mù, yhâng chyáng ê luî, zùm yàp bekô nghut ri. Yhûmsîng myhí gi, yùqzo rayùq hku é nghut mù, yhángmòq gi, yùqzo haú lé Sholumon ga myìng myhíng byî akô nghut ri. Haû Yhûmsîng Garai le, zoshâng haú lé chyitdàp ri; 25 haû Yhûmsîng Garai gi, yhang lé chyitdàp é yánmai, zoshâng hau é myìng lé, Jedidi-aa ga myìng myhíng byi râ matú, myìqhtoi Nahtan dông dang kyô kat ri.
Raba Wà Mó Lé Zân Ung Yu É Hkyô
26 Haú u lé, Yo-ap gi, Ammon byu pê é wà mó Raba lé majan zân nyì mù, haû hkóhkam é gingtíng wà mó lé wó zân ung yù bê nghut ri. 27 Hau htâng, Yo-ap gi, Dawiq chyáng lagyô pé lé nhâng mù, “Ngò gi, Raba wà mó lé majan zan mù, wà haú lé wuì byî nyi é wuì lé wó sing yù bê nghut lhê. 28 Ahkuî, nàng gi, myìt gyó tô é gyè hpúng pé lé shuî tsîng yù mù, wà mó haú lé lhom hkyuq to luî, zân yù àq. Haû a nghut jáng, ngò gi, wà mó haú lé zân ung yù mù, ngá é myìng lé wà myìng myhîng pyám râ nghut lhê.” ga taí nhang kat ri.
29 Haû mù, Dawiq gi, gyèzô pé lhúnglháng lé shuî tsîng yù luî, Raba wà mó shut shuî ê mù, wà mó haú lé ê htim luî, wó sing yù bê nghut ri. 30 Yhang gi, yhángmòq é hkóhkam é ulhum mâ é hkóhkâm mùq lé hkyut yû mù, yhâng é ulhum má tsûng ri. Hkóhkâm mùq haú mâ é hîng gi, raxe rajoí kô bo ri; haú má hpaudap lungsêng pé le tsing tap tô bum ri. Yhang gi, wà mó haú mai wó lú yu é azíng zê myo myo lé le yu ri. 31 Hau htoq agó, yhang gi, haú má nyi é shiwa byu pé lé le shuî htoq yû luî, sik-yìk pé yik nhang é le, yò hkop jòqtoq long pê èq yò hkop nhang é le, wazûng pê èq jìk nhang é le, tsohtung pé hput nhang é le kut bekô nghut ri. Dawiq gi, Ammon byu pê é wà bànshoq lé haú dông chyat kut pyám bê nghut ri. Hau htâng, Dawiq eq yhâng é gyèzô pé bànshoq gi, Yerusalem wà mó shut taû ló bekô nghut ri.