Amnon Eq Tamari
13
Ahkuî, Dawiq é yhang zo Apsalom chyáng, Tamari ga myhîng é gùnghkyâng gyai chyoî é, yhang gu myiwe zo rayùq nyi ri. Dawiq é yhang zo Amnon gi, myiwe zo haú lé wú chyit nyi ri.2 Amnon gi, yhang gu Tamari é yánmai, a wángzán shoq myìt tuî nyi ri; myiwe haû le, zo-myi gyíng nghut mù, Amnon gi, yhang eq wó hui râ matú, wuî dik nyi ri.
3 Nghut kôlhang, Amnon chyáng, Dawiq é yhang mang Shime-a é yhang zo Yonadap ga myhîng é luzúm rayùq wó tô ri. Yhang gi, gyai zen sû nghut ri. 4 Yhang gi, Amnon lé, “Hkóhkam é yhang zo ê, nàng haî mù ra-nyí eq ra-nyí je gyí lo lhê lhú? Ngo lé a wó taî kyo râ lhí?” ga myi jáng, Amnon gi, yhang lé, “Ngò, ngá gu Apsalom é yhang gu, Tamari lé chyit nyi lhê.” ga taî ri.
5 Yonadap gi, yhang lé, “Yhuphpú shut ló mù, nò mhaú ló mhaû lèq to aq. Náng wa nang lé, kûm wú râ ga lé lô jáng, yhang lé, ‘Âgu Tamari lé, lé lô nhâng mù, ngo lé zoshuq rajung jung lé byi nhâng àq. Yhang zoshuq gaí é lé ngò wó myàng mù, yhâng é lòq èq ngo lé wó húm sháng gàq, yhang lé, ngá é hí má lé chyoq râ ahkáng byi laq.’ nghû dung aq.” ga taî ri.
6 Haû mù, Amnon gi, nò mhaú mhaû lèq to bê nghut ri. Yhang lé kûm wú râ ga, hkóhkâm lé lô jáng, Amnon gi, “Jeju mai, âgu Tamari lé, yhâng é lòq èq ngo lé wó húm sháng gàq, ngá hí má mùk í long lé saí râ matú, lé lô nhâng àq.” ga yhang lé taî ri.
7 Hau htâng, Dawiq gi, hkóhkâm wâng má nyi é Tamari chyáng, “Nungmang Amnon é yhûm shut ê mù, yhâng é matú zoshuq rajung jung ê hen lajang byi aq.” ga ê taí nhang kat ri. 8 Haû mù, Tamari gi, lèq nyi é yhang mang Amnon é yhûm shut ê bê nghut ri. Yhang gi, súngsô mùn ra-tsuí yù mù, ne rhín luî, yhang mâng é hí má, mùk long saí mù, nyhín bê nghut ri. 9 Hau htâng, yhang gi, auhpyén mai mùk lé yù mù, yhang mang lé to byî ri; nghut kôlhang, yhang mang gi, a zo byi kut ri.
Amnon gi, “Bànshoq bang lé htoq ló nhâng àq.” ga taî ri. Haû mù, yùq hkangmó gi, yhâng hí mai htoq ló bekô nghut ri. 10 Hau htâng, Amnon gi, Tamari lé, “Náng lòq èq hûm é lé ngò myàng zo sháng gàq, zoshuq lé ngá é yhup wàp hkaû má yu wang lô àq.” ga taî ri. Haû mù, Tamari gi, yhang hen lajâng é mùk lé chûng mù, wàp hkaû mâ é, yhang mang Amnon chyáng yu wang ló byî ri. 11 Nghut kôlhang, Tamari gi, mùk haú lé, yhang mang zo râ matú yù byî é hkûn, yhang mang gi, yhang lé kyaq zing to mù, “Ngá gu ê, ngò eq rahá yhup gòq.” ga taî ri.
12 Tamari gi, yhang mang lé, “Âmang ê, hkâkut ô! Ngo lé siri hkâ lhoqhpoi byi! Shî sû é hkyô lé Isira-elaq a-myû má ge kut é a nghut! Shî sû é agè ashop hkyô hkâkut. 13 Nàng haû su kut jáng, ngò hkâsu ung hoq hpû nyì râ lhú? Nàng le, Isira-elaq a-myû má, agè ashop kut é byù ngòk pé mâ é rayùq su dùt byùq râ a nghut lhí? Jeju mai, hkóhkâm lé taí aq; yhang gi, ngo lé, náng chyáng a byi tsô é kut râ a nghut.” ga taî ri. 14 Nghut kôlhang, Amnon gi, Tamari taî é dang lé a gyô é za he-ngìk pyám luî, Tamari htoq yhang wum je bo é nghut mù, yhang lé rhoi yù bê nghut ri.
15 Hau htâng, Amnon gi, yhang gu Tamari lé gyai yhang nhik nòq byùq ri. Haû mù, yhang gi, hí lé yhang lé chyit é htoq má a naù a wôm é myìt gi, je kô byùq luî, yhang lé, “Toq mù, htoq ló byùq àq!” ga taî ri.
16 Tamari gi, yhang lé, “A nghut ô! Nàng ngo lé ahkuî kut é mara htoq má, ngo lé kôn htoq pyâm é mara gi, je kô byùq râ nghut lhê.” ga taí kôlhang, Amnon gi, yhang taî é dang lé a gyo byî é za he-ngìk pyâm ri. 17 Yhang gi, yhâng é duìnhâng zoshâng lé ji yù mù, “Myiwe myhí shî lé hkat htoq pyám mù, hkumkyáng kyâng pyám aq.” ga taî ri. 18 Haû mù, yhâng é duìnhâng zoshâng gi, Tamari lé hkat htoq pyám mù, hkumkyáng kyâng pyám bê nghut ri. Tamari gi, zo-myi gyíng nghut hkûn hkóhkam é byìzô pé wùt é, làklaí shoq kâ yúng é buhîng wùt tô é nghut ri. 19 Tamari gi, yhâng é ulhum má hpuílup kyâ gyun mù, yhang wùt tô é làklaí shoq kâ yúng é buhîng lé lâng cheq pyám luî, uhtoq má lòq ke mù, ngau garu uchyang htoq ló bê nghut ri.
20 Haú hkûn, yhang mang Apsalom gi, yhang lé, “Nungmang Amnon, nang lé rhoi yù bê a nghut lhí? Ngá gu ê, ahkuî zim za nyi to aq; yhang gi, nungmang nghut ri. Haú hkyô lé myìt má hkâkat to.” ga taî ri. Haû mù, Tamari gi, yhang mang Apsalom é yhûm má zim za san kut nyi nyi ri.
21 Haú hkyô bànshoq lé hkóhkâm Dawiq wó gyo jáng, yhang gi, gyai yhang nhikjum yo bê nghut ri. 22 Apsalom gi, yhang mang Amnon lé, ge é dang le, a ge é dang le, hkâ-nhám a taí kut ri; nghut kôlhang, yhang gi, yhang gu Tamari lé hoq lhoqhpu byî é yánmai, Amnon lé a naù a wom dùt bê nghut ri.
Amnon Lé Apsalom Sat É Hkyô
23 Hau htâng, í zân lai jáng, Apsalom gi, Ehprim wà nàm mâ é Balaq Hazora wà má, saumaú yam ugó lùng mù, hkóhkam é yhang zo yùqzô pé bànshoq lé jì bê nghut ri. 24 Apsalom gi, hkóhkâm chyáng ê mù, “Náng é duìnhâng zoshâng ngò gi, saumaú yam ugó lung nyi lhê. Haû mù, nàng hkóhkâm hpó eq náng é zaugun sûwún wuî, jeju mai lé wó bo lòm kôrâ lhú?” ga taî ri.
25 Nghut kôlhang, hkóhkâm hpó gi, Apsalom lé, “Ngá zo ê, haú dông a gè râ; ngá-mòq bànshoq bang a lé râ nghut lhê. Lé jáng, nang lé wòlai jàt byî é za dùt râ nghut lhê.” ga taî ri. Apsalom gi, wum kat taî wú kôlhang, hkóhkâm gi, a cháng nho é za, yhang lé shimân byî kat ri.
26 Haû jáng, Apsalom gi, “Haû nghut jáng, jeju mai, ngá mang Amnon lé ngá-mòq eq rahá nhâng byi aq.” ga taî ri. Hkóhkâm hpó gi, yhang lé, “Yhang gi, haî mù nàng eq rahá ê râ ri lhú?” ga myî ri. 27 Nghut kôlhang, Apsalom gi, yhang a gyo gyo taî nyi é yánmai, hkóhkâm hpó gi, Amnon eq hkóhkâm yùqzô pé góbang bànshoq lé, yhang eq rahá nhang kat bê nghut ri.
28 Apsalom gi, yhâng é byu pé lé, “Gyo keq! Amnon tsibyiq wing lé shuq mù, myìt ngón myìt toq nyi é hkûn, ‘Amnon lé sat pyám keq.’ nghû, ngò núngmòq lé taî kat jáng, yhang lé sat keq. Hkâgyùq kó; ngò, núngmòq lé dangmó hkyô é nghut lhê, a nghut kó lhí? Wum-o lhoqhtân luî, myìt wum lhoqkíng keq.” ga dangmó hkyô ri. 29 Haû mù, Apsalom é byu pé gi, Apsalom dangmó hkyô tô é eq rajung za Amnon lé kut bekô nghut ri. Haû jáng, hkóhkam é yùqzô góbang bànshoq gi, toq mù, yhángmòq é loze pé má dòq ji luî, hpang ló bekô nghut ri.
30 Yhángmòq hkyô má ru nghut nyi bum ashî hkûn, “Apsalom gi, hkóhkam é yhang zo yùqzô pé bànshoq lé sat pyám bê nghut ri; yhángmòq mâ é rayùq lháng a myìt to lo.” gâ é lùdang Dawiq chyáng jé bê nghut ri. 31 Hkóhkâm gi, toq yàp mù, yhâng é mèbu lâng cheq pyám luî, myì htoq má lèq yâng to bê nghut ri; yhâng chyáng jé nyi tô é duìnhâng zoshâng wuì bànshoq le, yhángmòq é mèbu pé lé lâng cheq pyám kômù, yhâng é a-nàm má yàp tô bum akô nghut ri.
32 Nghut kôlhang, Dawiq é yhang mang, Shime-a é yhang zo Yonadap gi, “Ngá é yhûmsîng ê, yhángmòq gi, hkóhkam é yhang zo yùqzô pé bànshoq bang lé sat pyám bê nghû hkâ-myìt; Amnon rayùq za shi byùq é ru nghut lhê. Apsalom gi, yhang gu Tamari lé Amnon rhoi é buìnyì mai, haú hkyô lé kut râ myìt to gû nghut ri. 33 Haû mù, ngá é yhûmsîng hkóhkâm ê, hkóhkam é yhang zo yùqzô pé bànshoq bang shi byùq bê gâ é danglù eq séng mù, myìt myo nó a ra nghut ri. Amnon rayùq baú za shi é ru nghut lhê.” ga taî ri.
34 Haú u, Apsalom gi, hpang byùq bê nghut ri. Ahkuî, haû wú zúng sû zorâm hpó wú kat le, yhâng é buìwàng hkyam mâ é kong mai byù myo myo gyó lo nyi bum é lé myang kat ri. Wú zúng sû haû gi, hkóhkam chyáng ló mù, “Kong yâm mâ é Horona-im wà hkyô mâ é byu pé lé myang ri.” ga taî kyô ri.
35 Yonadap gi, hkóhkâm lé, “Wú aq, hkóhkam é yhang zo yùqzô pé jé lo bum bekô nghut ri; náng é duìnhâng zoshâng ngò taî é eq rajung za nghut bê nghut ri.” ga taî ri.
36 Yhang dang ban taí eq yhang, hkóhkam é yhang zo yùqzô pé jé wang lò kômù, ngau garû bum akô. Hkóhkâm eq yhâng é duìnhâng zoshâng wuì bànshoq le, gyai yhang ngaùhkyûng ngaùyang dùt bekô nghut ri.
37 Apsalom gi, hpâng mù, Geshuri hkóhkâm Amihut é yhang zo Talamai chyáng e ri. Nghut kôlhang, Hkóhkâm Dawiq gi, yhang zô é yánmai buìnyì myo myo yón ngau ri.