Yerusalem Wà Mó Má Apsalom Dum Taû Lo É Hkyô
14
Zerui-a é yhang zo Yo-ap gi, Apsalom lé hkóhkâm myìt tuî nân tô é hkyô lé sê ri. 2 Haû mù, Yo-ap gi, Teko-a wà mâ é hpàqchyî bo é myiwe myhí rayùq lé ê ji lò nhâng mù, myiwe myhí haú lé, “Nàng gi, yón kuq ngaùhkyang sang nyi é myiwe myhí su kut mhaú luî, hai xû le a but é za, yón kuq ngaùhkyang sang é mèbu wùt chûng mù, shi byùq su é matú buìnyì myáng myáng yón kuq ngau nyi é myiwe myhí rayùq su kut àq. 3 Haû mù, hkóhkam chyáng ê luî, yhang lé shî su nghû taí aq.” ga taî ri. Haú u, Yo-ap gi, myiwe myhí hau é nhut má, taí râ dang pé kat byi bê nghut ri.4 Teko-a wà mâ é myiwe myhí haû, hkóhkam chyáng e é hkûn, yhang gi, yhang lé hkúnggâ é dông myigùng htoq má myòqdong ngóm gòp luî, “Hkóhkâm mó ê, ngo lé garúm yùq laq ô!” ga taî ri.
5 Hkóhkâm gi, myiwe myhí haú lé, “Nàng, haî wuîhkê nyi ri lhú?” ga myî ri. Haú hkûn, myiwe myhí haû gi, “Ngò gi, ngá é yhûmsîng hpó shi byùq bê nghut mù, chuimó rayùq nghut lhê. 6 Náng é duìnhâng zoshâng myhí ngò gi, yùqzo í yùq wó lhê. Yùqzo haú nhiktâng gi, yò má mabyòq htoq lhûm ri; haú hkûn, yháng nhiktâng lé pyîn râ rayùq le a nyì nghut mù, rayùq gi, góyùq lé bàt sat pyám bê nghut ri. 7 Ahkuî, a-myû koq mâ é lhúnglhâng bang gi, toq mù, náng é duìnhâng zoshâng myhí ngo lé chôm htuqhtîng bum akô; yhángmòq gi, ‘Gu-mang hpó lé sat pyám sû lé àp byi aq; haú hkûn, ngá-mòq gi, yhang sat pyâm é yhâng é gu-mang hpô é chyungxê é matú, yhang lé wó sat pyám râ nghut lhê; haú dông mai, ngá-mòq gi, awùt ashîn pé lé le wó lhoqhtûm pyám râ nghut lhê.’ ga taî akô. Haû su nghut jáng, yhángmòq gi, náng é duìnhâng zoshâng myhí ngá chyáng myìt gyó tô é gyúng nyi é myigye lé za lháng lhoqsat pyám byi kômù, ngá é yhûmsîng hpô é myìng lé le, awùt ashîn pé lé le, myìdàm htoq mai lhoqhtûm pyám byi kôrâ nghut lhê.” ga taî ri.
8 Haû jáng, hkóhkâm gi, myiwe myhí haú lé, “Náng é yhûm shut ló àq hkoi! Náng é mú shî lé ngò jéyáng râ nghut lhê.” ga taî ri.
9 Nghut kôlhang, Teko-a wà mâ é myiwe myhí haû gi, hkóhkâm lé, “Ngá é yhûmsîng hkóhkâm ê, yubàk mara haû gi, ngò eq ngá é a-myû wui ahtoq má gyó ke sháng gàq; hkóhkâm eq yhâng é tángmyhâng má kúm gi, mara a bò sháng gàq ô.” ga taî ri.
10 Hkóhkâm gi, “Rayùq yùq, nang lé mara hûn dang taî é nghut jáng, haú yùq lé ngá chyáng shuî lé lô àq; yhang gi, nang lé dum gunjang lo râ a nghut.” ga tû taî ri.
11 Hau htâng, myiwe myhí haû gi, “Haû jáng, hkóhkâm ê, ngá zo sat pyâm é a hui sháng gàq, haû htên byòq hkyô lhoqjàt é sui yuichyîn lató hpuq râ bang lé hkûm pyám byi râ matú, náng é Garai Gasang nghut é, haû Yhûmsîng Garai lé bo dung byi laq.” ga taî ri.
Hkóhkâm gi, “Haû Yhûmsîng Garai rû dui nyi é eq rajung za, nungzô é ulhum mâ é xâm rahkat lháng myigùng shut wó gyó râ a nghut.” ga taî ri.
12 Haú hkûn, myiwe myhí haû gi, “Jeju mai, náng é duìnhâng zoshâng myhí ngò, nàng ngá é yhûmsîng hkóhkâm lé dang rahkun taí nhâng shilaq.” ga taî ri.
Hkóhkâm gi, “Taí aq.” ga tû taî ri.
13 Myiwe myhí haû gi, “Haû nghut jáng, hkóhkâm nàng gi, Garai Gasâng é byu pé lé, múzó shí hkat su haî mù haq htung nyi lhê lhú? Hkóhkâm nàng gi, múzó shí hkat lé taî nyi é hkûn, hkat htoq pyám bê é nungzo lé a dum shuî taû yù shi nghut é hkyô lé, yhûmsing gùng yhûmsîng a lhoqpûn yu é lhú? 14 Myigùng má hut hpyûn kat bê wuì lé a wó dum taû gòt yu é su, ngá-nhúng gi, shî ra râ chyat nghut lhê. Nghut kôlhang, Garai Gasang gi, haú dông ô nau é a nghut; Yhang gi, Yhâng chyáng mai hkat lhâm kat é sû, a jâng byùq byùq é za, dum taû lò râ hkyô pé htong byî nyi ri.
15 Ahkuî, ngò, ngá é yhûmsîng hkóhkâm lé shí hkyô lé taî é gi, byu pé ngo lé kyuq kô é yánmai nghut lhê. Náng é jùn myhí gi, shî su nghû myìt é nghut lhê; ‘Ngò, hkóhkâm lé taî kyo râ nghut lhê; haû jáng, yhang gi, yhâng é jùn myhí ngò taî é hkyô lé lhom gyo byi âbe. 16 Ngáme lé, Garai Gasang byî tô é silî wunlî maumyî mai lhoqhtûm pyám râ matú shi-kùt nyì su é lòq mai, hkóhkâm náng é duìnhâng zoshâng myhí ngo lé nàng hkyi xe yù râ matú myìt lhom hui âbe.’ nghu é nghut lhê.
17 Haû mù, ahkuî, náng é duìnhâng zoshâng myhí ngò gi, ‘Ngá é yhûmsîng hkóhkâm gi, Garai Gasâng é maumang lagyo rayùq su, ge é eq a ge é hkyô lé sê gam hkoq lhê nghut é yánmai, ngá yhûmsîng hkóhkam é dang gi, ngá é silî wunlî maumyî lé magûm byi sháng gàq. Náng é Garai Gasang nghut é, haû Yhûmsîng Garai gi, nàng eq rahá nghut nyî sháng gàq ô.’ nghû taî é nghut lhê.” ga taî ri.
18 Haû jáng, hkóhkâm gi, myiwe myhí haú lé, “Nang lé ngò myi râ hkyô lé, a zaú to lô é za tû taí byi aq.” ga taî ri.
Myiwe myhí haû gi, “Ngá é yhûmsîng hkóhkâm ê, myi aq.” ga taî ri.
19 Haú hkûn, hkóhkâm gi, “Shí hkyô bànshoq má, Yo-ap bo lom lhê a nghut lhí?” ga myi jáng, myiwe myhí haû gi, “Ngá é yhûmsîng hkóhkâm ê, nàng rû dui nyi é eq rajung za, ó yùq le, ngá é yhûmsîng hkóhkâm nàng taî é hkyô mai lòqyò lòqpai a ge jau ló é nghut lhê. Nghut lhê, shí hkyô kut râ matú, náng é duìnhâng zoshâng myhí ngo lé hkyô shit é eq dang shí pé bànshoq taí râ matú ngo lé laháng xâng é sû gi, náng é duìnhâng zoshâng Yo-ap nghut ri. 20 Haû ahkuî dùt htoq tô é hkyô lé wó htaî lhik pyám râ matú, náng é duìnhâng zoshâng Yo-ap haû su kut é nghut ri. Ngá yhûmsîng nàng gi, Garai Gasâng é maumang lagyo rayùq su hpàqchyî byéng-yá bò sû nghut mù, shí mau má dùt htoq tô é hkyô hkangmó lé sé sû nghut ri.” ga tû taî ri.
21 Haû mù, hkóhkâm gi, Yo-ap lé, “Gyai gê bê; haú hkyô lé ngò kut râ nghut lhê. Ê mù, zorâm Apsalom lé, ê shuî lò àq.” ga taî ri.
22 Haû mù, Yo-ap gi, hkóhkâm lé hkúnggâ é dông myigùng má myòqdong ngóm gòp mù, yhang lé shî su ga hkya-ôn ri; “Ngá é yhûmsîng hkóhkâm ê, náng é duìnhâng zoshâng ngò taî é hkyô lé nàng gyo byi bê nghut é yánmai, náng é hí má ngò myòqdong wó bê hkyô lé, hkû-nyí, náng é duìnhâng zoshâng ngò sé bê ô.” gâ ri.
23 Hau htâng, Yo-ap gi, Geshuri wà shut ê mù, Apsalom lé, Yerusalem wà mó shut ê shuî taû lò bê nghut ri. 24 Nghut kôlhang, hkóhkâm gi, “Yhang gi, yhâng é yhûm shut ló ra râ nghut lhê; ngá é myòqdong lé, yhang ge myàng râ a nghut.” ga taî ri. Haû mù, Apsalom gi, yhâng é yhûm shut ló bê nghut mù, hkóhkam é myòqdong lé a myàng nghut ri.
25 Isira-elaq a-myû wuì bànshoq má, Apsalom su gùnghkyâng isâm yúng mù, hkya-on wàq toq huî é byù rayùq lháng a nyì nghut ri. Yhâng é ují lagùng mai yhâng é hkyîwa jé shoq râ é hkyô haî a bò nghut ri. 26 Yhâng é xâm gi, yhâng é matú lûm htû lûm laî é yánmai, yhang gi, razàn má radàm nyham nyham kut é nghut mù, yhâng é xâm nyham hkangmó, hkóhkâm wâng mâ é jàng mai chîn wú wú kut é nghut luî, xâm haû í xe shit rûng kô bò bò dùt ri.
27 Apsalom gi, yùqzo sum yuq eq byìzo rayùq wó ri; byìzô é myìng gi, Tamari gâ ri; yhang gi, gyai yúng é myiwe zo dùt bê nghut ri.
28 Apsalom gi, hkóhkam é myòqdong lé a myang é za, í zân yhang Yerusalem wà mó má nyì bê nghut ri. 29 Haû mù, Apsalom gi, Yo-ap lé, hkóhkam chyáng ê nhâng râ ga ê jî nhâng kôlhang, Yo-ap gi, lhom he pyâm ri. Haû mù, í dâm nghû râ dàm ê dum jì nhâng kôlhang, dum lhom he pyâm ri. 30 Haû mù, Apsalom gi, yhâng é duìnhâng zoshâng wuì lé, “Wú keq, Yo-ap é yò gi, ngá é yò eq yòkyo nghut ri; yò haú má mùk-yó gùq yùq tô bum ri. Yò haú lé ê nyhê pyám keq.” ga taî ri; haû mù, Apsalom é duìnhâng zoshâng wuì gi, yò haú lé ê nyhê pyám bekô nghut ri.
31 Haû mù, Yo-ap gi, Apsalom é yhûm má ê mù, yhang lé, “Náng é duìnhâng zoshâng wuì gi, haî mù ngá é yò lé nyhê pyám byî akô lhú?” ga taî ri.
32 Haú hkûn, Apsalom gi, Yo-ap lé, “Wú aq, ngò gi, náng chyáng, ‘Nang lé, ngò, hkóhkam chyáng nhâng mù, “Ngò gi, haî mù Geshuri wà mai lé lô râ dùt é lhú? Ngò gi, haú má, ahkuî jé shoq ru jâng nyi tô le, ngá é matú je gè râ nghut lhê wá!” nghû taí nhâng râ nghut lhê; ngá chyáng lé lô àq.’ nghû dang hun kat é nghut lhê. Haû mù, ahkuî, ngò, hkóhkam é myòqdong lé myàng nau ri; ngá chyáng mara bo é nghut jáng gi, yhang, ngo lé sat pyám sháng gàq.” ga taî ri.
33 Haû mù, Yo-ap gi, hkóhkam chyáng ê mù, haú hkyô lé taî kyô ri. Haû mù, hkóhkâm gi, Apsalom lé ji kat jáng, Apsalom gi, jé wang lé mù, hkóhkam é hí má, yhâng é myòqdong myigùng má ngóm gòp bê nghut ri. Haú hkûn, hkóhkâm gi, Apsalom lé bo-puq puq byi bê nghut ri.