Ashop É Dông Apsalom Haq Hen É Hkyô
15
Hau htâng má, Apsalom gi, yhâng é matú gyèlhêng eq myang pé lé le, yhâng hí má dìn râ byù ngo xê yùq lé le, hen to bê nghut ri. 2 Yhang gi, noq noq mai toq luî, wà mó hkúmdong shut e ló é hkyô yàm má yàp to to kut ri. Rayùq yùq, mû hpyit nhâng râ hkóhkam é hí má e ló hkangmó, Apsalom gi, haú yùq lé lhom wùt yù mù, “Nàng gi, hká wâ mâ é lhú?” ga myi râ nghut lhê; haû jáng, haú yùq gi, “Náng é duìnhâng zoshâng gi, Isira-elaq a-myû up ra-up mâ é nghut lhê.” ga tû taí râ nghut lhê. 3 Haú hkûn, Apsalom gi, yhang lé, “Wú aq, náng é mû pé gi, târa é eq tengmán é nghut nyi ri; nghut kôlhang, hkóhkam é gùnglik dông náng é mû lé gyo byi râ a nyì nghut ri.” ga taî ri. 4 Hau htoq agó, Apsalom gi, “Ngò, shí mau mâ é târâ agyì ru lhû nghut râ lé! Haú hkûn, mû htoq tô é bang yùq hkangmó ngá chyáng lé kôjáng, ngò gi, târâ ràp-rá é dông mû lhom hpyit byi râ nghut lhê.” ga xoq taí taí kut ri.5 Hau htoq agó, Apsalom gi, rayùq yùq yhâng é hí má ngóm gòp râ ga lé lô jáng, haú yùq lé yhâng lòq èq lhom po yù mù, bo-puq puq byi byi kut ri. 6 Apsalom gi, hkóhkam chyáng târâ ràp-rá é dông mû hpyit byî é hkam yù râ matú jé lé lo é Isira-elaq byù bànshoq lé, haú dông chyat lhom kut é nghut mù, Isira-elaq byu pê é i-myìt lé, yhâng shut hkaû lâng yu nyì bê nghut ri.
7 Myi zân lai jáng, Apsalom gi, hkóhkâm lé, “Ngo lé Hebron wà má ê nhâng mù, haû Yhûmsîng Garai lé ngò dâkam tô é dang lé ê lhoqdìk nhâng laq. 8 Náng é duìnhâng zoshâng ngò gi, Aram mau mâ é Geshuri wà mó má nyi é hkûn, ‘Haû Yhûmsîng Garai gi, ngo lé Yerusalem wà mó má dum taû ló nhang é nghut jáng, ngò gi, Hebron wà má Yhûmsîng Garai lé noqkuq râ nghut lhê.’ nghû dâkam tô é nghut lhê.” ga taî ri.
9 Haû jáng, hkóhkam gi, yhang lé, “Ngón za e ló aq.” ga taî ri. Haû mù, yhang gi, Hebron wà shut ê bê nghut ri.
10 Hau htâng, Apsalom gi, duìnhâng zoshâng wuì lé, Isira-elaq a-myû up hkangmó shut haq nhang kat mù, “Núngmòq gi, tut mùt é htê lé wó gyo jáng, ‘Apsalom gi, Hebron wà má hkóhkâm nghut bê.’ nghû taí keq.” ga ê tsing taí nhang ri. 11 Apsalom gi, Yerusalem wà mó mâ é byù í shô yùq lé le, yhang eq rahá shuî chung ri. Haú bang gi, bíng dông ji yu é hui kô é nghut mù, haî dut nyi é hkyô lé a sé kô é za, ge é i-myìt mai cháng kô é nghut ri. 12 Apsalom gi, yhang hkungga pé nhông byî nyi é u, Dawiq é hpàqchyî byi sû, Gilo wà byù Ahihtohpela lé, yhâng é yhummau mai lé lô râ matú ê jî nhang ri. Apsalom é htâng má châng é bang je myô jàt lo nyì mù, gumlau toq é múzó gi, wúm htan lò bê nghut ri.
Dawiq Hpang É Hkyô
13 Lagyo rayùq gi, lé lô mù, Dawiq lé, “Isira-elaq byu pê é i-myìt nhiklhum gi, Apsalom chyáng jé byùq bê nghut ri.” ga taî kyô ri.
14 Haû mù, Dawiq gi, Yerusalem wà mó má yhang eq rahá nyi tô é yhâng é zaugun wuì bànshoq lé, “Toq keq! Ngá-nhúng hpâng ra bê nghut ri; haû a nghut jáng, ngá-nhúng ó yùq le Apsalom chyáng mai wó lùt râ a nghut. Ngá-nhúng ahkuî yhang htoq ló râ dùt bê; haû a nghut jáng, yhang gi, ngá-nhúng lé hân za lé châng hkyit mù, ngá-nhúng lé sat pyám luî, wà mó lé le, sham èq hpyoq hpyi pyám râ nghut lhê.” ga taî ri.
15 Hkóhkam é zaugun wuì gi, yhang lé, “Yhûmsîng hkóhkâm nàng htung é hkyô lhúnglháng lé, náng é zaugun wuì ngá-mòq kut râ rì rì nghut bê.” ga tû taî bum akô nghut ri.
16 Haû mù, hkóhkâm gi, yhâng é hkóhkâm wâng yhûmbyù wuì bànshoq bang eq rahá htoq ló bê nghut ri; nghut kôlhang, hkóhkâm wâng zúng râ matú myi-ngê raxê yùq lé nyhi hkyô tô ri. 17 Haû mù, hkóhkâm gi, yhâng htâng châng é shiwa byù bànshoq bang eq rahá htoq e ló mù, wà yàm ló htâng é yhûm má nò yu ri. 18 Hkóhkam é zaugun wuì le mù, bo châng tô é Hkerehti byù eq Pelehti byu péa bànshoq le, Gahta wà mâ é, yhang eq rahá bo lom lo é Giti byù hkyuq shô yùq le, hkóhkam é hí má laî e ló bum akô nghut ri.
19 Hkóhkâm gi, Giti byù I-tai lé, “Nàng gi, haî mù ngá-mòq eq rahá châng lé râ dùt é lhú? Taû ló mù, Hkóhkâm Apsalom eq ló nyî aq. Hkâsu mù gâ le, nàng gi, yhûmsing é yhum mau mai shúm zûng huî é maigan byù rayùq ru nghut lhê. 20 Anyí-nàp za jé lé sû nghut nyi le wá, ngò yhang lháng hká shut e ló é lé a sé shi-má, hkû-nyí, ngò, nang lé, ngá-mòq eq rahá shuî yông lhing wún râ lhú? Náng é byu pé lé shuî chûng mù, taû ló aq. Haû Yhûmsîng Garai gi, nang lé, jeju eq jujúm hkyô shit nyî sháng gàq ô.” ga taî ri.
21 Nghut kôlhang, I-tai gi, hkóhkâm lé, “Haû Yhûmsîng Garai rû dui nyi é eq rajung za le, ngá é yhûmsîng hkóhkâm nàng rû dui nyi é eq rajung za le, shî râ nghut kôlhang, byùn râ nghut kôlhang, ngá yhûmsîng hkóhkâm nàng hká jowò má jé nyî nyî, náng é duìnhâng zoshâng ngò le châng jé nyî râ nghut lhê.” ga tû taî ri.
22 Haû jáng, Dawiq gi, I-tai lé, “Nghut bê, laî e ló keq.” ga taî ri. Haû mù, Giti byù I-tai gi, yhâng é byù bànshoq eq yhâng htâng châng é tiq é kô é yhûmbyù bànshoq eq rahá laî yán ê bê nghut ri.
23 Byù haû bànshoq bang laî ló kôjáng, yòsô wà pé mâ é lhúnglhâng bang gi, htê mó èq châng wùt ngau bum akô nghut ri. Hkóhkâm eq yhâng htâng châng é bànshoq bang gi, Kidron Langhkaû mai laî byìt mù, yòso shut e ló akô nghut ri.
24 Hkyangjong Zadok le, yhang eq rahá nghut é, Garai Gasâng é dangshikaq sàksé dò wàq é Lewiq byù bànshoq le haú má jé nyi bum akô nghut ri. Yhángmòq gi, Garai Gasâng é sàksé dò lé hkyô to kô é nghut mù, Abi-ahta gi, shiwa byù bànshoq bang wà mó mai ban htoq ló kô é hkûn jé shoq, hkungga nhông byî nyi ri.
25 Haû jáng, hkóhkâm gi, Zadok lé, “Haû Garai Gasâng é sàksé dò lé, wà hkaû shut wàq taû ló keq. Ngò gi, haû Yhûmsîng Garaî é myòq hí má myòqdong wó é nghut jáng, Yhang gi, ngo lé dum shuî taû lò mù, sàksé dò haú lé le, Yhang nyi é jowò lé le, dum myàng nhâng râ nghut lhê. 26 Nghut kôlhang, Yhang gi, ngo lé, ‘Nang lé, ngò a-ô naù lo.’ ga taí jáng, Yhang myìt ô nau é dông ngo lé kut sháng gàq, ngò gi, rì rì nghut to bê.” ga taî ri.
27 Hau htoq agó, hkóhkâm gi, hkyangjong Zadok lé, “Nàng gi, myìqhtoi rayùq nghut lhê, a nghut lhí? Nungzo Ahimazi eq Abi-ahta é yhang zo Yonahtan nhik lé shuî chûng mù, ngón za wà mó shut taû ló aq. Nàng eq Abi-ahta gi, núngnhik é zoshâng nhik eq rahá taû ló keq. 28 Ngò gi, núngnhik chyáng mâ é danglù jé shoq, yòso mâ é guhkan má láng nyî râ nghut lhê.” ga le taî ri. 29 Haû mù, Zadok eq Abi-ahta gi, haû Garai Gasâng é sàksé dò lé, Yerusalem wà mó shut dum taû dé mù, haú má nyi nyì bekô nghut ri.
30 Nghut kôlhang, Dawiq gi, ngaù uchyang, ulhum nghop chûng luî, hkyîchîn kut mù, Tsanlun Bùm shut xoq dòq e ló ri. Yhang eq rahá nghut é shiwa byù bànshoq bang le, yhángmòq é ulhum nghop chûng luî, ngaù uchyang bo châng dòq e ló bum akô nghut ri. 31 Ahkuî, “Ahihtohpela le, Apsalom eq gumlau toq é hpúng má bo lom ri.” ga Dawiq lé taî kyo jáng, yhang gi, “Yhûmsîng Garai ê, Ahihtohpela htoq byî é hpàqchyî lé lhoqngòk pyám byi aq.” ga kyûdung ri.
32 Dawiq gi, bùm nyuq mâ é Garai Gasang lé noqkuq kuq kut é jowò má jé é hkûn, Arihki byù Hushai gi, yhâng é buhîng lâng cheq pyám mù, yhâng é ulhum má hpuílhup kyâ gyûn to gû nghut é, yhang lé lé huî ri. 33 Haû jáng, Dawiq gi, yhang lé, “Nàng, ngò eq rahá châng é nghut jáng, ngo lé wò lai dùt nhâng râ nghut lhê. 34 Nghut kôlhang, nàng wà shut taû ló mù, Apsalom lé, ‘Yhûmsîng hkóhkâm ê, ngò, náng é duìnhâng zoshâng kut râ nghut lhê; laî ló bê ahkyíng má, ngò gi, náng wâ é duìnhâng zoshâng nghut lhê; nghut kôlhang, ahkuî, ngò náng é duìnhâng zoshâng kut râ nghut lhê.’ nghû ló taí aq. Haû jáng, nàng gi, Ahihtohpela htoq byî é hpàqchyî lé lhoqhpyoq pyám byî é dông, ngo lé wó garúm yû râ nghut lhê. 35 Wà hkaû má nàng eq rahá hkyangjong Zadok eq Abi-ahta nhik nyì râ nghut lhê, a nghut lhí? Hkóhkâm wâng má nàng wó gyô é bànshoq lé, yhángnhik lé taî kyo aq. 36 Zadok é yhang zo Ahimazi eq Abi-ahta é yhang zo Yonahtan gi, yhángnhik eq rahá nghut nyi akô. Nàng wó gyô é bànshoq lé, haú nhik dông mai ngá chyáng dé kat àq.” ga taî ri.
37 Haû mù, Dawiq é luzúm hpó Hushai Yerusalem wà mó má jé ló é u, Apsalom gi, wà hkaû shut wang ló nyî bê nghut ri.