Dawiq Eq Ziba
16
Dawiq gi, bùm nyuq mai ra-tsuí lùt e ló é hkûn, Mehpiboshet é duìnhâng zoshâng Ziba gi, zè htô tô é loze í du eq rahá, yhang lé lhom hui râ matú láng tô ri; loze haû í du má, mùk í shô long, tsibyiq shi-kyuq rashô long, hkohúm shi-kyuq rashô long eq tsibyiq wing sho-kuq htûng rahtûng htô tô ri.2 Hkóhkâm hpó gi, Ziba lé, “Nàng, haî mù zè shí pé htô lé lo lhê lhú?” ga myî ri.
Ziba gi, “Haû loze í du lé gi, hkóhkam é yhûmbyù wuì ji râ matú, mùk eq shi-kyuq pé lé gi, náng é byu pé zo râ matú, tsibyiq wing lé gi, yòso má ngú myûng byùq é bang wum shuq bô râ matú nghut lhê.” ga tû taî ri.
3 Haû jáng, hkóhkâm gi, “Náng é yhûmsîng hpô é gashu gi, hká má nyi ri lhú?” ga myî ri.
Ziba gi, “Yhang, Yerusalem wà mó má nyi tô ri; hkâsu mù gâ le, yhang gi, ‘Hkû-nyí, Isira-elaq byu pé gi, ngo lé, ngá chyî é mîngdán lé dum byi kôrâ nghut lhê.’ ga myìt yu é yánmai nghut lhê.” ga taî kyô ri.
4 Haû jáng, hkóhkâm gi, Ziba lé, “Mehpiboshet eq sêng é bànshoq gi, ahkuî náng é chyat nghut bê.” ga taî ri.
Haú hkûn, Ziba gi, “Ngá é yhûmsîng hkóhkâm ê, ngò gi, myìt lhoqnyhûm mù ngóm gòp nyi lhê. Náng é myòq hí má ngò myòqdong wó nyî sháng gàq.” ga taî ri.
Dawiq Lé Shimi Ga Sû Nhîng É Hkyô
5 Hkóhkâm Dawiq gi, Bahurim wà má jé ló é hkûn, wà haú mai, Sholuq é i-kun byù mâ é rayùq htoq lé lo ri. Yhâng é myìng gi, Shimi gâ ri; yhang gi, Gera é yhang zo nghut ri; yhang gi, nhîng htoq lé lo ri. 6 Hkóhkâm Dawiq é lòqpai lòqyò má gyè hpúng bànshoq eq chyungxe zúng bang nyi tô bùm kôlhang, Shimi gi, Dawiq eq hkóhkam é zaugun sûwún wuî lé lùqgòk èq dú ri. 7 Shimi gi, nhing uchyang, “Byù sat sû ê, byù gang mó ê! Hkâlé, taû ló byùq àq! 8 Nàng, Sholuq é mîngdán lé lú yù mù, yhâng é a-myû wuì lé sat pyâm é sui yuichyîn bànshoq lé, haû Yhûmsîng Garai gi, nang lé lató hpuq byi bê nghut ri. Yhûmsîng Garai gi, mîngdán haú lé, nungzo Apsalom é lòq má àp byi bê nghut ri. Nàng gi, byù sat sû nghut é yánmai, lató hpuq é hui zô nyì bê nghut ri.” ga taî ri.
9 Haú hkûn, Zerui-a é yhang zo Abishai gi, hkóhkâm lé, “Hkui mâng hê gi, haî mù, ngá é yhûmsîng hkóhkâm lé nhîng nyi lhê laq? Ngò ê mù, yhâng é ulhum lé ê hpyit pyám bá.” ga taî ri.
10 Nghut kôlhang, hkóhkâm gi, “Zerui-a é yhang zô pé ê, haû gi, núngmòq eq haî sêng lhê lhú? Yhang gi, haû Yhûmsîng Garaî èq, ‘Dawiq lé nhing aq.’ ga yhang lé taî é yánmai, nhîng nyi é nghut jáng, ‘Nàng, haî mù haû su kut lhê lhú?’ nghû, ó yùq ge myi râ lhú?” ga taî ri.
11 Hau htâng, Dawiq gi, Abishai eq yhâng é zaugun wuì bànshoq bang lé, “Ngá é suisho, ngá zo lháng ngá é chyungxe lé gyám nyi é nghut jáng, haû Ben-yamin ûp mâ é byù shí yùq gi, hau htoq je dùt râ a nghut kó lhí? Yhang lé haî hkâ-nghû kó; nhîng nyì sháng gàq; hkâsu mù gâ le, yhang haû su kut râ matú, haû Yhûmsîng Garai mai yhang lé taî tô é yánmai ru nghut ri. 12 Haû Yhûmsîng Garai gi, ngò hpû nyì shô nyi é hkyô lé myàng byi mù, hkû-nyí, yhang nhîng é hkyô gi, jeju tau byî é shèq ru nghut âbe.” ga taî ri.
13 Haû mù, Dawiq eq yhâng é byu pé hkyô xoq sô e ló nyî kô é u, Shimi gi, Dawiq eq tû-tap bùm yàm cháng luî e ló uchyang, yhang lé, nhîng lhê, lùqgòk èq dú lhê, hpuílhup kyaq gyûn lhê kut ri. 14 Hkóhkâm eq yhâng é byù bànshoq bang gi, Yodan làng má jé kôjáng, ngú myûng byùq bùm kôluî, haú jowò má nô yù bekô nghut ri.
Hushai Eq Ahihtohpela Nhik Hpàqchyî Byî É Hkyô
15 Haú u lé, Apsalom eq Isira-elaq byù bànshoq bang gi, Yerusalem wà mó má jé lé bum akô; haú má, Ahihtohpela le bo ri. 16 Hau htâng, Dawiq é luzúm Arihki byù Hushai gi, Apsalom chyáng ê mù, yhang lé, “Hkóhkâm chyung hîng xê hing nyì sháng gàq ô! Hkóhkâm chyung hîng xê hing nyì sháng gàq ô!” ga taî ri.
17 Apsalom gi, Hushai lé, “Náng é luzúm hpó lé nàng tûn shit é chyitdàp myìt gi, shî nghut lhê lhú? Yhang gi, náng é luzúm nghut é nghut jáng, haî mù yhang eq rahá a châng ló é lhú?” ga myî ri.
18 Haû jáng, Hushai gi, Apsalom lé, “Haú su a nghut; ngò gi, haû Yhûmsîng Garaî èq le, shiwa byù shí bang eq Isira-elaq byù bànshoq èq le, hkyin yù su é byù kut râ nghut lhê; ngò gi, haú yùq eq rahá nyi nyì râ nghut lhê. 19 Hau htoq agó, ngò gi, ó yùq lé dójaú râ lhú? Ngò gi, yhang zo lé ge dójaú lhê a nghut lhí? Ngò gi, náng wa lé dójaú é su, nang lé le dójaú râ nghut lhê.” ga taî ri.
20 Apsalom gi, Ahihtohpela lé, “Nàng, ngá-mòq lé hpàqchyî byî wú laq; ngá-mòq hkâsu kut râ lhú?” ga taî ri.
21 Ahihtohpela gi, “Hkóhkâm wàng wú gon râ matú náng wa nyhi hkyô tô é yhâng é myi-ngê wuì eq gùngsho ê zùm yàp aq. Haú hkûn, nang lé náng wâ èq a ngui byùq râ matú, nàng kut é hkyô haú lé Isira-elaq byù bànshoq wó gyo kôrâ nghut mù, náng é hkyam shut nyi é yùq hkangmó gi, myìt wum wó bûm kôrâ nghut lhê.” ga tû taî ri. 22 Haû mù, yhángmòq gi, yhûmhkûng htoq má, Apsalom é matú zúm ralhum saí byi kôjáng, yhang gi, Isira-elaq byù bànshoq bâng é hí má, yhâng wâ é myi-ngê wuì eq gùngsho zùm yàp shit bê nghut ri.
23 Haú buìnyì pé má, Ahihtohpela byî é hpàqchyî dang gi, Garai Gasâng chyáng myî yù su é dang su nghut nyi ri. Hau é yánmai, Dawiq eq Apsalom hpe gi, Ahihtohpela byî é hpàqchyî bànshoq lé gùq yu akô nghut ri.