17
Hau htâng, Ahihtohpela gi, Apsalom lé, “Ngò gi, byù ramûn í hkyîng yùq lé hkyin yù mù, Dawiq lé châng hkat râ matú hkû-myîn yhang htoq ê bá. 2 Ngò gi, yhang ngú myung mù, wum nyhôm tô é u, yhang lé htim luî, kyuq nhán râ nghut lhê. Haú hkûn, yhang eq rahá nghut é byù bànshoq bang gi, hpang byùq kôrâ nghut lhê. Ngò gi, hkóhkâm lé za sat pyám mù, 3 shiwa byù bànshoq lé, náng chyáng shuî lò râ nghut lhê. Nàng ho é sû shi byùq jáng gi, góbang bànshoq dum taû lò râ nghut lhê; shiwa byù haú bang bànshoq ngón za dùt bùm kôrâ nghut lhê.” ga taî ri. 4 Dang haú lé, Apsalom eq Isira-elaq byu pê é sûwún wuî bànshoq bang gyô htuk bum akô nghut ri.5 Nghut kôlhang, Apsalom gi, “Arihki byù Hushai lé le ji lo wú keq. Yhâng é dang lé le, ngá-nhúng gyô wú sháng.” ga taî ri. 6 Apsalom gi, yhâng chyáng Hushai jé lé jáng, yhang lé, “Ahihtohpela byî é hpàqchyî gi, shî nghut ri. Yhang taî é dông ngá-mòq kut râ lhú? Haú dông a nghut jáng, ngá-mòq lé, nàng byu myang é hkyô taî kyô wú aq.” ga taî ri.
7 Haú hkûn, Hushai gi, Apsalom lé, “Haû Ahihtohpela byî é hpàqchyî gi, shí jín dâm a htuk nghut ri. 8 Nàng sê é eq rajung za, náng wa eq yhâng é byu pé gi, gyè zan kûng é bang chyat nghut akô; yhángmòq gi, yòso mâ é wàm zìng radu yhang zo lé hung kyaq zuî to mù, nhikmó-yô é su, nhikmó-yô nyi bum akô nghut ri. Hau htoq agó, náng wa gi, gyè zân lo wú bê é sarhê hpó nghut mù, myín lé gyè hpúng pé eq rahá yhup râ a nghut. 9 Ahkuî lháng, yhang gi, lùqhkyûng hkaû má, haû a nghut jáng, gótû jowò rawò wò má haq nyi to râ nghut lhê. Náng é gyè hpúng pé lé yhang hí lhom htîm é nghut jáng, haú hkyô lé wó gyô é sû gi, ‘Apsalom é htâng châng é gyè hpúng pé gi, sat pyâm é hui bekô râ nghut lhê.’ ga taí râ nghut lhê. 10 Hkanghkyî é i-myìt nhiklhum sû é myìt nhiklhum bò mù, a gyùq a wam é gyèzo lháng gi, gyùq luî ròp ròp za gâ byùq râ nghut lhê. Hkâsu mù gâ le, náng wa gi, gyè zan sarhê rayùq nghut é hkyô lé le, yhang eq rahá nghut é bang gi, sârhe pé nghut é hkyô lé le, Isira-elaq byù bànshoq bang sê bum akô nghut ri.
11 Haû mù luî, ngò nang lé hpàqchyî byí nau é gi, Dan wà mai Berasheba wà jé shoq mâ é, wuimau yàm mâ é se-muî su myô é Isira-elaq byù bànshoq bang lé, náng chyáng lé zing nhâng mù, nàng yhang, haú bang lé majan shuî zân le ge ri. 12 Haú hkûn, ngá-mòq gi, yhang lé myang é jowò hká má le, myigùng htoq má nghân gyó é su, yhang lé chôm htim râ nghut lhê. Yhang le, yhâng byu pé le, rayùq lháng chyungxe wó lùt to râ a nghut. 13 Yhang, rawà wà má wang ló é nghut jáng, Isira-elaq byù bànshoq bang tui tsing yu lé mù, wà mó haú lé, lùqgòk zo racham lháng a lèq to loshoq, langhkaû shut chôm she hkyut hâng pyám râ nghut lhê.” ga tû taî ri.
14 Apsalom eq Isira-elaq byù bànshoq bang gi, “Arihki byù Hushai byî é hpàqchyî gi, Ahihtohpela byî é hpàqchyî htoq jé ge ri.” ga taî akô. Hkâsu mù gâ le, haû Yhûmsîng Garai gi, Apsalom má ihkyùp she háng byi râ dông, Ahihtohpela byî é ge é hpàqchyî lé lhoqhtên pyám râ matú hen lajâng é nghut ri.
15 Hau htâng, Hushai gi, hkyangjong Zadok eq Abi-ahta nhik lé, “Ahihtohpela gi, Apsalom eq Isira-elaq byu pê é sûwún wuî lé, shî su su ga hpàqchyî byî ri. Nghut kôlhang, ngò gi, shí dông dông kut keq nghû hpàqchyî byi bê nghut lhê. 16 ‘Myín lé, yòso mâ é guhkan pé má hkâ-nô yu nyi lo kó; hân laî byìt ló keq; haû a nghut jáng, hkóhkâm eq shiwa byù bànshoq bang sûm byùq kôrâ nghut lhê.’ nghû, ahkuî radá dâm Dawiq chyáng dang kyô kat nhâng keq.” ga taî ri.
17 Yonahtan eq Ahimazi gi, wà hkaû shut wang ló jáng, byu pé lhom myàng râ lé myìt chiq kô é yánmai, En Rogela wuìbúm yâm má láng nyi akô; duìnhâng zoshâng myiwe rayùq, yhángnhik lé dang haû lé shit kyo jáng, yhángnhik gi, Hkóhkâm Dawiq lé ê taî kyo râ ga e ló bekô nghut ri. 18 Nghut kôlhang, zorâm zo rayùq gi, yhángnhik lé myàng luî, Apsalom lé taî kyô ri. Haû mù, yhángnhik gi, hân za htoq ló mù, Bahurim wà mâ é byù rayùq é yhûm má e akô nghut ri; haú yùq gi, yhâng é yhûm wàng hkaû má wuìhtúng ralhum wó é nghut mù, yhángnhik gi, wuìhtúng haú má haq gyó wang lúng tô akô nghut ri. 19 Haú yùq é yhûmsîng myhí gi, htân rahkyap yù mù, wuìhtúng donghkun má hpyi hkâng nghop to luî, hau é ahtoq má gùq lhap tô ri. Haú hkyô lé ó yùq le a sé kó nghut ri.
20 Apsalom é byu pé gi, yhûm haú má nyi tô é myiwe myhí haú yùq chyáng jé lé kô é hkûn, “Ahimazi eq Yonahtan nhik hká má lhú?” ga myî akô.
Haú hkûn, myiwe myhí haû gi, haú bang lé, “Yhángnhik, wuìlàng hé hpoq shut gû dàp ló bekô nghut ri.” ga tû taî ri. Byù haú bang gi, ho wú kôlhang, a myang hô kô é nghut mù, Yerusalem wà mó shut dum taû ló bekô nghut ri.
21 Byù haú bang ló byùq é htâng má, Ahimazi eq Yonahtan nhik gi, wuìhtúng mai lâng dòq lò mù, Hkóhkâm Dawiq lé hkyang shit râ ga ê bekô nghut ri. Yhángnhik gi, hkóhkâm lé, “Ahihtohpela gi, núngmòq lé hkâsu kut htuqhtíng râ hpàqchyî shî su su ga htoq byi bê nghut ri; haû mù, htoq luî, radá dâm wuìlàng he hpoq shut gû dàp ló keq.” ga taî akô nghut ri. 22 Haû mù, Dawiq eq yhâng htâng châng é shiwa byù bànshoq bang gi, htoq mù, Yodan làng lé gû dàp bekô nghut ri. Myòq myàng zó má, Yodan làng a gû dàp é za nyi myìt gyó tô é byù rayùq lháng a nyi to lo nghut ri.
23 Ahihtohpela gi, yhang htoq byî é hpàqchyî lé a cháng byî bùm kô é lé myàng jáng, yhâng é loze lé buí chûng mù, yhâng é yhummau mâ é yhâng é yhûm shut ló luî, i-kun múzó hkyô lé rago htung to byi mù, yhânggùng yhang tuî lhâng shi byùq bê nghut ri. Haû mù, yhang gi, shi byùq luî, yhâng wâ é lùp má myhup yhûm pyâm é hui bê nghut ri.
Apsalom Shi Byùq É Hkyô
24 Dawiq gi, Mahana-im wà má ló jé ri; Apsalom gi, Isira-elaq byù bànshoq bang eq rahá Yodan làng gû dàp ri. 25 Apsalom gi, gyèzô pé lé ùp râ matú, Amasa ga sû lé Yo-ap é jowò má wò byî ri. Amasa gi, Yo-ap é yhâng nu Zerui-a é yhang gu le nghut mù, Nahashi é yhang zo byìzo nghut é Abigela eq yu lhûm é sû, Isira-elaq byù Yehtera é yhang zo nghut ri. 26 Isira-elaq byu pé eq Apsalom gi, Gile-at mau má gyèwap xuq tô akô nghut ri.
27 Dawiq, Mahana-im wà má jé é hkûn, Ammon byu pê é Raba wà mai Nahashi é yhang zo Shobi, Lo Debara wà mai Ami-ela é yhang zo Mahkira eq Rogelim wà mai Gile-at byù Barazilai pé gi, 28-29 yhupgyàp pé, hkoq pé eq gótû zèhkoq pé yu lé lo bum akô; hau htoq agó, yhángmòq gi, “Shiwa byu pé, yòso má zò-mut wuìshit luî, ngú myûng byùq bùm bekô râ nghut lhê.” ga taí kômù, Dawiq eq yhâng byu pé zo râ matú, súngsô, mùk-yó gùq, súngsô mún, gùqshin, nùqmó, nùqpup nùq, byo-î, no-naú chyîn, sau, no naú mai lhoqgyám yu é no-naú pé lé yu lé byî akô nghut ri.