18
Dawiq gi, yhâng htâng châng é byu pé lé zùp zing nhâng mù, haú bang lé ùp râ matú, rahkyîng ùp gyèzaû pé eq rashô ùp gyèzaû pé hkyin htoq yu ri. 2 Hau htâng, Dawiq gi, gyè hpúng sum hpúng hkoq mù, rahpúng lé gi, Yo-ap é lòq má àp, rahpúng lé gi, Zerui-a é yhang zo, Yo-ap é yhang gu Abishai é lòq má àp, rahpúng lé gi, Giti byù I-tai é lòq má àp byi kut luî, nhang htoq kat ri. Hkóhkâm gi, gyè hpúng haú pé lé, “Ngò yhang le, núngmòq eq rahá teng za bo châng htoq lé râ nghut lhê.” ga taî ri.3 Nghut kôlhang, byù haú bang gi, “Nàng yhang gi, a ge htoq ê râ nghut lhê; ngá-mòq hpâng kôle, ngá-mòq lé yhángmòq haî su a ngàm kôrâ nghut lhê. Ngá-mòq mâ é rawuí gû shi byùq é nghut kôlhang, yhángmòq haî su ngàm kôrâ a nghut; nghut kôlhang, nàng gi, ngá-mòq ra-mun yùq htoq hpau je dàp é sû nghut ri. Haû mù, nàng gi, ngá-mòq lé wà mó mai htuqbáng byî nyi é nghut jáng je gè râ nghut lhê.” ga taî akô nghut ri.
4 Haú hkûn, hkóhkâm gi, “Núngmòq ge dik é su ngam é hkyô haî lé le, ngò kut râ nghut lhê.” ga tû taî ri.
Haû mù, yhâng é byù bànshoq bang, rashô shô nghut é gyè hpúng pé le, rahkyîng hkyîng nghut é gyè hpúng pé le, yán htoq ló bûm kô é u lé, hkóhkâm gi, wà hkum yàm má yàp tô ri. 5 Haú hkûn, hkóhkâm gi, Yo-ap, Abishai eq I-tai pé lé, “Ngá é myòqdong lé tê mù, zorâm zo Apsalom lé nú nhâm é dông kut keq.” ga hkunmó hkyô ri. Apsalom eq séng mù, hkóhkâm mai gyèzaû pé lé hkunmó hkyô é dang lé, gyè hpúng bànshoq bang wó gyô akô nghut ri.
6 Haû mù, Dawiq é gyèzô pé gi, Isira-elaq byu pé lé htim râ matú wà hkaû mai pá shut yán htoq e ló kômù, Ehprim yòso má majan zân lhum bekô nghut ri. 7 Isira-elaq gyè hpúng pé gi, Dawiq é byu pê é lòq má sûm byùq kômù, haú nyí má, yhángmòq mâ é byù í mun yhang shi byùq luî, sum mó gyó byùq bekô nghut ri. 8 Majan gi, ra-mau gón má byo myín ló byùq é nghut mù, haú nyí má, sham èq shi é byù htoq yòso má shi é byù je myô byùq ri.
9 Ahkuî, Apsalom gi, Dawiq é byu pé eq htûng huî ri. Yhang gi, yhâng é loze má jî tô é nghut mù, loze haû gi, wàqmyòq gàm mó mâ é a-kung a-kik htu é akoq ahkaû shut din wang ló luî, Apsalom é uxâm sikkoq má ló wé byùq mù, loze ru din nyi é nghut luî, Apsalom gi, alat má lhâng to bê nghut ri.
10 Byu pé mâ é rayùq, haú lé myàng jáng, yhang gi, Yo-ap lé, “Apsalom, wàqmyòq gàm má tuî lhâng tô é lé, ngò myang to hkó bê.” ga taî ri.
11 Yo-ap gi, yhang lé haú hkyô taî kyo sû lé, “Nàng gi, yhang lé myang é nghut lhê lhî! Haî mù, haú jowò mâ é myigùng htoq má, yhang lé a sat lheq pyâm to hkô é lhú? Haú su ru kut le gi, ngò, nang lé, ngùnhkyí rarung èq ngo che kô eq sârhe é hpyihit byi berâ nghut lhê.” ga taî ri.
12 Nghut kôlhang, byù haú yùq gi, “Ngá é lòq má ngùnhtung myi joí kat byi kôlhang, hkóhkam é yhang zo lé, ngá lòq èq záng râ a nghut. Hkóhkâm gi, ‘Ngá myòqdong lé tê mù, zorâm Apsalom lé mâgum yù keq.’ ga, ngá-mòq wó gyô tô é má, nàng lé le, Abishai eq I-tai lé le hkunmó hkyô to bê nghut ri. 13 Ngò yhang, yhâng é chyungxe lé yu pyám byi mù, ngá é chyungxe lé shut pyâm é nghut lé gi, hkóhkâm a wó sé râ hkyô haî le jòq râ a nghut; nàng le, ngo lé tô pyám râ nghut lhê.” ga tû taî ri.
14 Yo-ap gi, “Ngò gi, nàng eq ahkyíng lhoqpân nyì râ a nghut lo.” ga taí mù, lhâm sum hkat yu chûng luî, wàqmyòq gàm má chyungxe dui nyi ashî nghut é Apsalom é nhiklhum lé htaû kyâng kat byi bê nghut ri. 15 Hau htâng, Yo-ap é shâm lhâm chung é gyèzo raxê yùq gi, Apsalom é lhînghkyùq má yàp lhing to kômù, sat kyop pyám bekô nghut ri.
16 Hau htâng, Yo-ap tutmó mùt kat jáng, gyè hpúng pé gi, Isira-elaq byu pé lé châng hkat é mai no kômù, dum taû lò bekô nghut ri. 17 Yhángmòq gi, Apsalom é màng lé yù mù, yòso mâ é donghkong mó ralhum má dú hkyô kat pyám luî, hau é ahtoq má lùqgòk bùm mó wàq bum tô akô. Isira-elaq byu pé bànshoq le, yhángmòq é yhûm shut hpang ló byùq bum bekô nghut ri.
18 Apsalom gi, yhang chyungxe dui nyi é u má, “Ngá é myìng wó xoq jòq gyó ló nhâng râ awùt ashín, ngò a wó.” ga myìt yu é yánmai, Hkóhkam é Langhkaû jàng má masàt lùqzìng ralhum xuq to mù, masàt lùqzìng haú lé, yhâng é myìng má cháng luî myìng myhîng tô é nghut mù, hkû-nyí jé shoq, haú lé Apsalom é masàt lùqzìng ga taî akô nghut ri.
Dawiq Yón Ngau É Hkyô
19 Ahkuî, Zadok é yhang zo Ahimazi gi, “Hkóhkâm lé, yhâng é gye pê é lòq mai haû Yhûmsîng Garaî èq hkyi yù bê nghut é hkyô lùdang lé, hkóhkam chyáng ló din shit kyô kat bá.” ga taî ri.
20 Haû jáng, Yo-ap gi, yhang lé, “Hkû-nyí, lùdang haú lé ló shit kyo râ sû gi, nàng a nghut. Hkû-nyí gi, hkóhkam é yhang zo shi byùq é buìnyì nghut mù, lùdang haú lé nàng ge yu ló râ a nghut; htang dàm pé má shèq lùdang lé ló ge shit kyo râ nghut lhê.” ga taî kyô ri.
21 Hau htâng, Yo-ap gi, Hkusha byù rayùq lé, “Nàng myàng é gû hkóhkâm lé ló taî kyo aq.” ga taî ri. Hkusha byù haú yùq gi, Yo-ap hí má ngóm gòp luî, din htoq ló bê nghut ri.
22 Dum Zadok é yhang zo Ahimazi gi, Yo-ap lé, “Haî dut le dùt, jeju mai ngo lé haû Hkusha é htâng má châng din ló nhâng laq.” ga taî ri.
Nghut kôlhang, Yo-ap gi, “Ngá zo ê, nàng gi, shigyaú chyûnghuq wó nhang é lùdang le a nghut é wá, haî mù ló nau ri lhú?” ga tû taî ri.
23 Ahimazi gi, “Haî dut le dùt, ngò châng din ló nau ri.” ga taî ri.
Haû mù, Yo-ap gi, “Dìn àq!” ga taî ri. Haû mù, Ahimazi gi, pá hkyô mai din ló é nghut luî, Hkusha byù haú yùq lé din lai bê nghut ri.
24 Dawiq gi, wà wàng hkum eq ahkaû hkum gyoro má zung tô é u, wú zúng sû gi, wàhkûm nàm mâ é wâng hkúmdong mâ é hkûng htoq má dòq ló ri. Yhang gi, wú kat le, byù rayùq baú din lo nyi é lé myang kat ri. 25 Wú zúng sû gi, hkóhkâm lé wùt kat mù, haú hkyô lé shit kyo bê nghut ri.
Hkóhkâm gi, “Yhang rayùq baú nghut jáng, hkyak gabú lùdang wùn râ nghut lhê.” ga taî ri. Haú yùq gi, je din chyâng lo nyì bê nghut ri.
26 Hau htâng, wú zúng sû gi, góyùq yhang baú dum din lo nyi é lé myang kat mù, hkum zúng sû lé, “Wú aq, gótû byù rayùq le yhang baú dum din lo nyi ri.” ga wùt taî kat ri.
Hkóhkâm gi, “Haú yùq le lùdang wun lò râ nghut lhê.” ga taî ri.
27 Wú zúng sû gi, “Din lo é sânghî yùq gi, Zadok é yhang zo Ahimazi su wú htoq ri.” ga taí jáng, hkóhkâm hpó gi, “Yhang gi, byù gè rayùq nghut mù, gabú lùdang wun lò râ nghut lhê.” ga taî ri.
28 Hau htâng, Ahimazi gi, hkóhkâm lé, “Nguì ngón yùqyò bê ô!” ga wùt garû taî kat mù, hkóhkam é hí má, myigùng jé shoq myòqdong ngóm gòp luî, “Náng é Garai Gasang nghut é, haû Yhûmsîng Garai gi, hkya-ôn é huî nyì sháng gàq ô! Yhang gi, yhûmsing lòq èq htuqhtîng é bang lé, ngá é yhûmsîng hkóhkâm náng chyáng àp byî pyám bê nghut ri.” ga taî ri.
29 Hkóhkâm gi, “Zorâm Apsalom gi, wángzán nyi ri lhú?” ga myi jáng, Ahimazi gi, “Zau hpó Yo-ap mai, hkóhkam é duìnhâng zoshâng ngo lé nhang kat é hkûn, hai hûháng le a sé gabyông tô é lé za myang to hkô é nghut mù, haî dùt é lé, ngò a sé.” ga tû taî ri.
30 Haú hkûn, hkóhkâm gi, “Shî rahkyam shut yàp mù láng to shi aq.” ga taí jáng, Ahimazi gi, hui mù yàp to bê nghut ri.
31 Hau htâng, Hkusha byù jé lô mù, “Ngá é yhûmsîng hkóhkâm ê, gabú lùdang lé gyo laq. Hkû-nyí, haû Yhûmsîng Garai gi, nang lé gumlau toq é bang bànshoq é lòq mai hkyi xe yù mù, náng é matú lató hpuq byi bê nghut ri.” ga taî ri.
32 Hkóhkâm gi, Hkusha byù haú lé, “Zorâm Apsalom gi, wángzán nyi ri lhú?” ga myi jáng, Hkusha byù haû gi, “Ngá yhûmsîng hkóhkâm lé gyè kut bang eq nang lé gumlau toq é bang bànshoq gi, zorâm haú yùq su dùt byùq bum ko sháng gàq.” ga tû taî ri.
33 Haú hkûn, hkóhkâm gi, sing nán byùq mù, wâng hkúmdong htoq mâ é wàp shut dòq ló luî, ngaù bê nghut ri. Yhang gi, dòq ló uchyang, “Ngá zo Apsalom ê! Ngá zo ê, ngá zo Apsalom ê! Náng malaî ngò rû shi le gê râ wá! Apsalom ê, ngá zo ê, ngá zo ê!” ga taî ngau ri.