Hkóhkâm Lé Yo-ap Tân É Hkyô
19
“Hkóhkâm gi, Apsalom é yánmai, ngaùbyi ngaùnhap dùt é eq yón kuq nyi ri.” ga Yo-ap lé taî kyô akô. 2 Haú nyí wó é ûngmyuq hkyô gi, gyèzo lhúnglháng bâng matú yón kuq hkyô dùt byùq bê nghut ri. Hkâsu mù gâ le, gyè hpúng pé gi, haú nyí má, “Hkóhkâm gi, yhang zô é matú yón kuq ngau nyi ri.” ga wó gyô bùm kô é yánmai nghut ri. 3 Yhángmòq gi, majan mai hpang é byu pé su hoq bun mù, wà hkaû shut haq wang lo bum akô nghut ri. 4 Hkóhkâm gi, yhâng é myòqdong nghop pyám mù, “Ngá zo Apsalom ê! Apsalom ê, ngá zo ê, ngá zo ê!” ga wùt ngau garû ri.5 Haû jáng, Yo-ap gi, yhûm hkaû shut wàng mù, hkóhkam chyáng jé luî, “Náng é chyungxe lé le, náng é yùqzo byìzô pê é chyungxe lé le, náng é yhûmsîng myhî pé eq myi-ngê wui é chyungxe lé le, ahkuî za hkyi yu é náng é byù bànshoq bang lé, hkû-nyí, nàng hoq lhoqhpu nhâng bê nghut ri. 6 Nàng gi, nang lé a ngui é bang lé chyitdàp mù, nang lé chyitdàp é bang lé, a nguì kut bê nghut ri. Gyèzaû pé eq yhángmòq é byu pé gi, náng é matú hai a-kyû a bo é hkyô lé, hkû-nyí, nàng san za tûn shit bê nghut ri. Hkû-nyí, Apsalom chyungxe dui nyì mù, ngá-mòq bànshoq bang shi byùq é nghut jáng, nàng myìt nguì râ nghut é hkyô lé, ngò wó myâng bê nghut ri. 7 Ahkuî, htoq ê mù, náng é byu pé lé myìt wum ê byi aq. Nàng a htoq e é nghut jáng, hkû-myîn náng nàm má byù rayùq le nyi gyó to lo râ a nghut nghû, ngò, haû Yhûmsîng Garaî é myìng lang luî dâkam lhê. Haû gi, náng zorâm pyàt mai ahkuî jé shoq hpu zô é wuîhke jamjau bànshoq htoq má je wuîhkê é hkyô dùt râ nghut lhê.” ga taî ri.
8 Haû mù, hkóhkâm gi, toq luî, wâng hkúmdong má zung tô ri. Shiwa byu pé gi, “Wâng hkúmdong má hkóhkâm zung tô ri.” gâ é lé wó gyo kôjáng, bànshoq bang, hkóhkam é hí má lé lo bum akô nghut ri.
Haú u má, Isira-elaq byu pé gi, yhûmsing é yhûm shut hpang ló byùq bekô nghut ri.
Yerusalem Wà Mó Shut Dawiq Taû Lo É Hkyô
9 Isira-elaq a-myû up hkangmó má shiwa byu pé gi, yhángmòq ahkaû má, “Hkóhkâm gi, ngá-nhúng lé, ngá-nhûng é gyè pê é lòq mai hkyi yù bê nghut ri; yhang gi, ngá-nhúng lé, Hpilisiti byu pê é lòq mai le hkyi xe yù bê sû nghut lhê. Nghut kôlhang, ahkuî, yhang gi, Apsalom chyáng mai wó lùt râ matú, mîngdán mai hpâng bê nghut ri; 10 Ngá-mòq lé ùp râ matú ngá-mòq mai sô kat namngón xû bùt byî é sû Apsalom gi, majan má shi byùq bê nghut ri. Haû mù, hkóhkâm lé ê shuî yù râ hkyô eq séng luî, haî mù zim za nyi tô akô lhú?” ga taî dùqbàq lhûm nyi akô nghut ri.
11 Hkóhkâm Dawiq gi, hkyangjong Zadok eq Abi-ahta nhik chyáng shî su ga dang hun kat ri; “Yudaq sûwún wuî lé, ‘Hkóhkâm lé, yhâng é hkóhkâm wâng má dum shuî taû yù râ matú, Isira-elaq byù bànshoq bang taî nyì kô é dang, hkóhkam chyáng jé hkyâng bê nghut ri. Núngmòq gi, haî mù htâng gyó nyi akô lhú? 12 Núngmòq gi, ngá é gu-mang wuì, ngá é suisho pé nghut akô. Haû sû é nhîng, hkóhkâm lé dum shuî taû yù râ matú, haî mù núngmòq htâng gyó nyi akô lhú?’ nghû myi keq. 13 Hau htoq agó, Amasa lé le, ‘Nàng gi, ngá é suisho nghut lhê, a nghut lhí? Ngò gi, nàng lé, Yo-ap é jowò má ayang gyèzau a kut nhang nyi é nghut jáng, Garai Gasang gi, ngo lé je htan é dông jéyáng sháng gàq ô.’ nghû taí keq.” gâ ri.
14 Dawiq gi, Yudaq byù bànshoq bang i-myìt rahkat za wó dùt kôrâ matú, yhángmòq é i-myìt lé, yhâng shut wó lâng lhing yu ri. Yhángmòq gi, hkóhkâm lé, “Nàng eq náng é byù bànshoq bang taû lò keq.” ga dang pying kat akô nghut ri. 15 Haû mù, hkóhkâm gi, taû lò luî, Yodan làng jé shoq lò bê nghut ri.
Yudaq byu pé gi, hkóhkâm lé ê te yù râ matú Giligala wà mai htoq ê kômù, yhang lé Yodan làng shuî gû dàp bekô nghut ri. 16 Haú hkûn, Bahurim wà mâ é, Ben-yamin ûp byù Gera é yhang zo Shimi gi, Hkóhkâm Dawiq lé ê te yù râ matú, Yudaq byu pé eq rahá hân za bo gyó e ri. 17 Ben-yamin ûp mâ é byù rahkyîng yùq le, Sholuq é i-kun mâ é duìnhâng zoshâng Ziba le, yhang zo yùqzô pé raxe ngo yuq eq duìnhâng zoshâng í xê yùq le, yhang eq rahá bo lé akô; haú bang gi, hkóhkâm nyi tô é jowò Yodan làng shut chyûn yán lé bum akô nghut ri. 18 Yhángmòq gi, hkóhkam é yhûmbyù wuì lé shuî gû dàp râ eq yhang o é dông kut byi râ matú, wuì nìk é jang mai gû dàp akô nghut ri.
Gera é yhang zo Shimi gi, Yodan làng lé laî byìt é hkûn, hkóhkam é hí má ngóm gòp luî, yhang lé, 19 “Ngá yhûmsîng, ngo lé mara a byi sháng gàq. Yerusalem wà mó mai ngá yhûmsîng hkóhkâm htoq ló byùq é buìnyì má, náng é duìnhâng zoshâng ngò kut shut é hkyô lé hkâ myìtbun byi. Hkóhkâm gi, haú hkyô lé yhâng é myìt hkaû mai lhoqhtoq pyám byi sháng gàq. 20 Náng é duìnhâng zoshâng ngò gi, mara kut shut bê nghut é hkyô lé sê lhê; nghut kôlhang, hkû-nyí, ngò gi, Yosep up bang mâ é, ngá yhûmsîng hkóhkâm lé, lé gyó te yu é sânghî yùq dông shí má jé nyi to bê nghut lhê.” ga taî ri.
21 Hau htâng, Zerui-a é yhang zo Abishai gi, “Shimi gi, haû Yhûmsîng Garaî é xû bùt hui sû hkóhkâm lé nhîng é yánmai, sat pyâm é hui râ lhê, a nghut lhí?” ga taî ri.
22 Haú hkûn, Dawiq gi, “Zerui-a é yhang zô pé ê, shí hkyô gi, núngmòq eq haî sêng lhê lhú? Hai ahko ahkáng mai haú hkyô má lé bo wang lom akô lhú? Hkû-nyí, Isira-elaq byù rayùq yùq shî jáng shèq gè râ lhí? Hkû-nyí, ngò, Isira-elaq é hkóhkâm nghut é lé, ngò a sê é nghut lhê lhú?” ga tû taî ri. 23 Haû mù, hkóhkâm gi, Shimi lé, “Nàng, shî râ a nghut.” ga taí luî, yhang lé dakâm danghtum htûm to bê nghut ri.
24 Sholuq é yhang shu Mehpiboshet le, hkóhkâm lé te yù râ matú, gyó ló ri. Yhang gi, hkóhkâm htoq ló é buìnyì mai ngón za wó dum taû jé lo é buìnyì jé shoq, hkyî le a chi, nhutmui le a wùq, mèbu le a chi kut nyi tô ri. 25 Hkóhkâm lé te yù râ matú, yhang, Yerusalem wà mó mai jé lé é hkûn, hkóhkâm gi, yhang lé, “Mehpiboshet, nàng haî mù ngò eq rahá a châng é lhú?” ga myì ri.
26 Haû jáng, yhang gi, “Ngá é yhûmsîng hkóhkâm ê, náng é duìnhâng zoshâng ngò gi, hkyî htên é nghut mù, ‘Hkóhkâm eq rahá wó cháng râ matú, loze buí mù, haú má ji râ nghut lhê.’ nghû taî é nghut lhê; nghut kôlhang, ngá é duìnhâng zoshâng Ziba gi, ngo lé mhaú zô pyâm ri. 27 Yhang gi, ngá é yhûmsîng hkóhkâm náng é hí má ngo lé gumlau toq é dang taí bê nghut ri. Ngá é yhûmsîng hkóhkâm nàng gi, Garai Gasâng é maumang lagyo rayùq su nghut nyi ri; haû mù, nàng ô nau é dông kut àq. 28 Ngá chyî é awùt ashín bànshoq bang gi, ngá é yhûmsîng hkóhkâm náng é hí má, shî byùq gíng é bang chyat nghut lhê. Nghut kôlhang, nàng gi, náng é duìnhâng zoshâng ngo lé, náng é zangbó má zo bang eq rahá jowò byî to bê nghut lhê. Haû mù, ngò gi, hkóhkâm lé gótû dung râ ahko ahkáng haî joq lo râ lhú?” ga taî ri.
29 Hkóhkâm gi, yhang lé, “Náng é hkyô haî mù taí râ ashî lhú? Ngò gi, Sholuq é maumyî lé gàm râ matú, nàng eq Ziba lé dangmó hkyô lhê.” ga taî ri.
30 Haú hkûn, Mehpiboshet gi, hkóhkâm lé, “Ahkuî, ngá é yhûmsîng hkóhkâm nàng ngón za yhûm má dum taû jé lô bê nghut é yánmai, lhúnglháng lé Ziba yu pyám sháng gàq.” ga taî ri.
31 Ahkuî, Gile-at byù Barazilai le, hkóhkâm lé Yodan làng shuî gû dàp mù yhâng é hkyôwuì shut dé kat râ matú, Rogelim wà mai gyó lé lo é nghut ri. 32 Barazilai gi, chyungxe zànwut shit xê zàn bò bê nghut mù, gyai mang bê sû nghut ri. Yhang gi, gyai wó sû nghut é yánmai, hkóhkâm, Mahana-im wà má nyi tô é u, zoshuq htuqbáng byî ri. 33 Hkóhkâm gi, Barazilai lé, “Ngò eq rahá Yerusalem wà mó shut châng lò àq; ngò, nang lé baú râ nghut lhê.” ga taî ri.
34 Nghut kôlhang, Barazilai gi, hkóhkâm lé, “Ngò gi, chyungxe hkâ-myháng jé wó dui nyì shirâ nghut mù, nàng hkóhkâm eq rahá Yerusalem wà mó shut bo châng ló râ dùt lhê lhú? 35 Ngò gi, ahkuî, shit xê zàn bò bê nghut lhê. Gè a ge é hkyô lé, ngò wó gam hkoq kyo shirâ lhú? Náng é duìnhâng zoshâng ngò gi, zô jung shuq jung pé lé màn wó mhân yù shirâ lhú? Ngò gi, mahkôn hkon é myiwe yùqgè wui e htê lé wó gyô nyì shirâ lhú? Náng é duìnhâng zoshâng ngò gi, ngá é yhûmsîng hkóhkâm nang lé haî mù wòlai jàt byi shirâ lhú? 36 Náng é duìnhâng zoshâng ngò gi, hkóhkâm nàng eq rahá, Yodan làng gû dàp mù, hé hpoq shut radun zo bo châng lé râ nghut lhê. Nghut kôlhang, Hkóhkâm nàng gi, haî mù shî su kut shigyaú byî lhê lhú? 37 Náng é duìnhâng zoshâng ngo lé, yhummau mâ é ngá nu ngá wâ é lùp nàm má wó shi byùq sháng gàq, taû ló nhâng laq. Nghut kôlhang, shí yùq gi, náng é duìnhâng zoshâng Kimham nghut lhê. Yhang lé, ngá é yhûmsîng hkóhkâm nàng eq rahá Yodan làng gû dàp nhâng laq. Nàng ô nau é dông yhang lé kut byi aq.” ga tû taî ri.
38 Hkóhkâm gi, “Kimham gi, ngò eq rahá gû dàp ló râ nghut lhê. Nàng ô nau é eq rajung za, ngò, yhang lé kut byi râ nghut lhê. Nàng, ngá chyáng mai myìt ô nau é haî lé le, náng é matú ngò kut râ nghut lhê.” ga taî ri.
39 Haû mù, shiwa byu pé bànshoq bang gi, Yodan làng gû dàp bekô; hkóhkâm le châng gû dàp mù, Barazilai lé bo-puq puq byi luî, yhang lé shimân byi bê nghut ri. Hau htâng, Barazilai gi, yhâng é yhûm shut taû ló byùq bê nghut ri.
40 Hkóhkâm gi, Giligala shut dàp ló é hkûn, Kimham le, yhang eq rahá bo châng ló ri. Yudaq gyè hpúng pé bànshoq eq Isira-elaq byu pê é gyè hpúng rawuí gû gi, hkóhkâm lé châng dé akô nghut ri.
41 A myáng má, Isira-elaq byu pé bànshoq bang gi, hkóhkam chyáng jé lé kômù, yhang lé, “Ngá-mòq é gu-mang wuì, haû Yudaq byu pé gi, haî mù, hkóhkâm nang lé hkaû shuî yu pyám luî, nàng eq náng é yhûmbyù wuì lé le, náng é byù bànshoq bang lé le, Yodan làng shuî gû dàp akô lhú?” ga taî akô nghut ri.
42 Haú hkûn, Yudaq byù bànshoq bang gi, Isira-elaq byu pé lé, “Hkóhkâm gi, ngá-mòq eq je chyáng sû nghut é yánmai, ngá-mòq shí hkyô kut é nghut lhê. Ngá-mòq haû su kut é hkyô lé, núngmòq haî mù nhikjum yô akô lhú? Ngá-mòq gi, hkóhkam é gàmbùm haî lé zô záng mù, yhûmsing é matú haí jung yu záng bê nghut lhê lhú?” ga tû taî akô nghut ri.
43 Haû jáng, Isira-elaq byu pé gi, Yudaq byu pé lé, “Ngá-mòq gi, raxê tú yhang hkóhkâm eq sêng é bang nghut lhê; haû mù, ngá-mòq gi, núngmòq htoq, Dawiq eq jé sêng é nghut lhê. Haû nghut le nhîng, haî mù, ngá-mòq lé núngmòq wú shôm pyâm akô lhú? Ngá-nhûng é hkóhkâm lé dum shuî yù râ matú, sânghi taî é bang gi, ngá-mòq nghut lhê, a nghut lhí?” ga tû taî akô nghut ri.
Nghut kôlhang, Yudaq byu pé taî é dang gi, Isira-elaq byu pé taî é htoq má jé htan akô nghut ri.