Dawiq Lé Sheba Gumlau Toq É Hkyô
20
Ahkuî, Ben-yamin a-myû up byù, Bihkri é yhang zo Sheba gâ é ashop sû rayùq haú má nyi záng tô ri. Yhang gi, tutmó mùt luî,“Isira-elaq byu pé ê, ngá-nhúng gi, Dawiq eq haî le a sêng lhum;
Yese é yhang zo chyáng mai, hai silî wunlî le a wó wú é nghut lhê!
Yùq hkangmó ó le ô é zúm shut taû ló keq.” ga garû taî ri.
2 Haû mù, Isira-elaq byù bànshoq gi, Dawiq lé tô pyám kômù, Bihkri é yhang zo Sheba htâng châng ló bum akô. Nghut kôlhang, Yudaq byu pé gi, Yodan làng mai Yerusalem wà mó jé shoq, yhángmòq é hkóhkâm htâng châng tô bum akô nghut ri.
3 Dawiq gi, Yerusalem wà mó mâ é yhâng é hkóhkâm wâng má dum jé é hkûn, hkóhkâm wâng lé wú gon râ matú nyhi hkyô to hkô é, yhâng é myi-ngê raxê yùq lé shuî yù mù, zúng sû nyhi tô é yhûm ralhum má yhángmòq lé nyhi tô ri. Yhang gi, yhángmòq lé zoshuq htuqbáng byi kôlhang, yhángmòq eq gùngsho a zùm nghut ri. Yhángmòq gi, shi é buìnyì jé shoq lhûng tô é hui mù, chuimó myhî pé su nyi nyi akô nghut ri.
4 Hau htâng, hkóhkâm gi, Amasa lé, “Sum nyí gyoro má, Yudaq byu pé lé ngá chyáng ji tsîng yù mù, nàng le haú má lé bo lòm aq.” ga taî ri. 5 Nghut kôlhang, Amasa gi, Yudaq byu pé lé ê ji tsîng é hkûn, hkóhkâm ding tô é ahkyíng lhoqlhaî pyám bê nghut ri.
6 Haû mù, hkóhkâm gi, Abishai lé, “Ahkuî, Bihkri é yhang zo Sheba gi, ngá-nhúng lé Apsalom èq kut é htoq je kut râ nghut lhê. Náng é yhûmsîng hpô é byu pé lé shuî chûng mù, yhang lé châng hkat àq; haû a nghut jáng, yhang gi, gingtîng é wà pé lé myang hô luî, haú pé má hpang wàng mù, ngá-nhûng é lòq mai lùt byùq râ nghut lhê.” ga taî ri. 7 Haû mù, Yo-ap é byu pé, Hkerehti byu pé, Pelehti byu pé eq wum-o mó bo é sarhê pé bànshoq gi, Abishai shuî-û é a-ô má, Bihkri é yhang zo Sheba lé châng hkat râ matú, Yerusalem wà mó mai yán htoq ló bûm bekô nghut ri.
8 Yhángmòq gi, Gibe-on mâ é lùqmó zìng má jé nyi to kô é u, Amasa gi, yhángmòq lé hui râ matú lé lo ri. Yo-ap gi, yhâng é gyèhking lé wùt chûng mù, shâm lé shámbyâng má xáng luî, yhâng é hpyidum mâ é hpyihit má tuî tap chung ri. Yhang gi, hí shut sô e ló é u, shâm haû shámbyâng mai chyut gyó byùq ri.
9 Haú hkûn, Yo-ap gi, Amasa lé, “Ngá gu-mang hpó ê, wángzán nyi lhê lhú?” ga myi mù, bo-puq puq byi râ ga, yhâng é lòqyo lòq èq Amasa é nhutmui lé zuî ri. 10 Amasa gi, Yo-ap é lòqpaî lòq chung tô é sham èq haî kut lô nhô a ngàm nghut ri; haú hkûn, Yo-ap gi, shâm hau èq Amasa é wamdau má htaû kyâng kat é nghut luî, wamdau hkaû mâ é û pé lháng, myigùng htoq má gyó myín kat bê nghut ri. Dum saî htau nó lháng a ra lô é za, Amasa gi, shi byùq bê nghut ri. Hau htâng, Yo-ap eq yhang gu Abishai nhik gi, Bihkri é yhang zo Sheba lé, châng hkat akô nghut ri.
11 Yo-ap é byu pé mâ é rayùq gi, Amasa é màng yàm má yàp luî, “Yo-ap lé myìt nguì mù, Dawiq htâng dàp é sû ó yùq nghut kôle, Yo-ap htâng cháng keq.” ga taî ri. 12 Amasa gi, sui lhu lhu dùt mâ é hkyô gùng má lèq tô ri. Yo-ap é byù haú yùq gi, gyè hpúng pé bànshoq, haú jowò má lé yàp nô tô bum é lé myang ri. Amasa é màng jòq jang má jé é yùq hkangmó gi, haú má yàp no kôrâ nghut é lé bûn sé jáng, yhang gi, Amasa é màng lé hkyô mai yò shut she hkyut ê mù, bûhing èq nghop pyâm ri. 13 Amasa é màng lé, hkyô mai huî pyâm é htâng má, yùq hkangmó gi, Bihkri é yhang zo Sheba lé châng hkat râ matú, Yo-ap htâng châng bùm bekô nghut ri.
14 Sheba gi, Bet Mahka mau Abela wà jé shoq Isira-elaq a-myû up bànshoq bâng chyáng mai sô lai mù, Bihkri byu pê é mau gón sô lhing é nghut luî, Bihkri byu pé gi, zùp zing mù, yhâng htâng châng bum akô nghut ri. 15 Yo-ap é gyè hpúng pé bànshoq gi, lé kômù, Sheba nyi tô é Bet Mahka mau mâ é Abela wà lé lhom hkyuq tô akô. Yhángmòq gi, wà má wó jé hkap é zùmhtâng saí kômù, gingtíng jowò shinggan shut nghe tsung tô akô nghut ri. Yhángmòq gi, wàhkûm lé hpyoq hkyó râ ga, wàhkûm pûn lé htûng hput nyi akô nghut ri. 16 Haú hkûn, hpàqchyî bo é myiwe myhí rayùq gi, wà hkaû mai, “Gyo keq! Gyo keq! Ngò, Yo-ap lé dang wó nyô râ matú, yhang shi-má lé lô sháng gàq, bo taî kyo keq.” ga wùt taî kat ri. 17 Yo-ap gi, yhâng shut e ló é hkûn, myiwe myhí haû gi, “Nàng, Yo-ap nghut lhê lhú?” ga myî ri.
Yo-ap gi, “Nghut lhê.” ga tû taî ri.
Haû jáng, myiwe myhí haû gi, “Náng é duìnhâng zoshâng myhí ngò taî é dang lé gyo byi laq.” ga taî ri.
Yo-ap gi, “Ngò gyô nyi lhê.” ga taî ri.
18 Myiwe myhí haû gi, shî su ga xoq taî ri; “Góhkûn gi, ‘Abela wà má hpyê ge yù sháng.’ ga lhaq taí kôjáng, mû haû wó hpyê nyòq yù bekô nghut ri. 19 Ngá-mòq gi, Isira-elaq a-myû má, nguì ngón yùqyò é eq jujúm é bang nghut lhê. Nàng gi, Isira-elaq a-myû má, înu rayùq dông nghut é wà shî lé, lhoqhpyoq pyám râ matú shi-kùt nyi ri nhung. Haû Yhûmsîng Garaî é silî wunlî lé, haî mù myhui pyám nau ri lhú?” gâ ri.
20 Haû jáng, Yo-ap gi, “Myhui pyám râ nghu é eq hpyoq pyám râ nghu é gi, ngò eq wê gâng byùq sháng gàq! Haú hkyô gi, ngò eq wê gâng byùq sháng gàq! 21 Haú su a nghut. Ehprim bum mau mâ é Bihkri é yhang zo Sheba ga sû gi, yhâng lòq tû mù, Hkóhkâm Dawiq lé htuqhtíng bê nghut ri. Haú yùq lé àp byi keq; haû jáng, ngò, wà shî mai htoq ló râ nghut lhê.” ga tû taî ri.
Myiwe myhí haû gi, Yo-ap lé, “Haú yùq é ulhum lé, wàhkûm mai náng chyáng dú hkyô kat byi râ nghut lhê.” ga taî ri.
22 Hau htâng, myiwe myhí haû gi, shiwa byù bànshoq bâng chyáng ê mù, ge é hpàqchyî htoq byi bê nghut luî, yhángmòq gi, Bihkri é yhang zo Sheba é ulhum lé hpyit mù, Yo-ap chyáng dú hkyô kat byi bekô nghut ri. Haû mù, Yo-ap gi, tutmó mùt kat jáng, yhâng é byu pé gi, wà haû mai htoq ló mù, yhûmsing é yhûm shut taû ló bekô nghut ri. Yo-ap le, Yerusalem wà mó má nyi é hkóhkam chyáng taû ló bê nghut ri.
Dawiq É Zaugun Wuì
23 Yo-ap gi, Isira-elaq gyèzo lhúnglháng lé ùp é zau nghut ri; Yehoi-ada é yhang zo Benai-a gi, Hkerehti byù eq Pelehti byu pé lé ùp é zau nghut ri. 24 Adoniram gi, mú zui wum kat nhâng hpúng bang lé wú gon sû nghut ri; Ahiluda é yhang zo Yehoshahpat gi, kâ xûm sû nghut ri. 25 Shewa gi, mûsîng nghut ri; Zadok eq Abi-ahta gi, hkyangjông nhik nghut akô. 26 Ya-ira wà byù Ira gi, Dawiq é hkyangjong nghut ri.