Gibe-on Byu Pé Lató Hpuq É Hkyô
21
Dawiq ùp é u má, sum zân yhang mùtmó gyó ri; haû mù, Dawiq gi, haú Yhûmsîng Garai lé myî wú jáng, haû Yhûmsîng Garai gi, “Gibe-on byu pé lé sat pyâm é Sholuq eq byù sui lhoqshun pyâm é yhâng é i-kun byu pê é yánmai nghut ri.” ga taî ri.2 Hkóhkâm gi, Gibe-on byu pé lé, ji tsîng yù mù, yhángmòq lé dáng nyo ri. (Gibe-on byu pé gi, Isira-elaq a-myû mâ é a nghut; Amori byu pé mai nyi myìt gyó tô é bang shèq nghut akô. Isira-elaq byu pé gi, yhángmòq lé lhut to râ ga dâkam tô é nghut kôlhang, Sholuq gi, Isira-elaq byù eq Yudaq byu pé lé myìt zìng zùq é yánmai, yhángmòq lé sat htûm pyám râ matú shi-kùt bê nghut ri.) 3 Dawiq gi, Gibe-on byu pé lé, “Núngmòq é matú ngò haî kut byi râ lhú? Núngmòq gi, haû Yhûmsîng Garaî é silî wunlî byù lé wó shimân byi râ matú, ngò, hkâsû é mara hkô htaí hkungga chûng ra râ lhú?” ga myî ri.
4 Gibe-on byu pé gi, yhang lé, “Ngá-mòq gi, Sholuq eq yhâng é i-kun byu pê chyáng mai, hîng ngùn dûng yù râ ahkáng a wó; Isira-elaq byù ó yùq lé sat râ matú le, ngá-mòq ahkáng a wó é nghut lhê.” ga tû taî akô.
Dawiq gi, “Núngmòq é matú, ngo lé haî kut byi nhâng nau akô lhú?” ga myî ri.
5 Haû mù, yhángmòq gi, hkóhkâm lé, “Ngá-mòq lé zing-ri mù, Isira-elaq mîngdán hká má le ngá-mòq nyì jang a jòq loshoq, ngá-mòq lé lhoqhtûm pyám râ matú haq htung é sû gi, Sholuq nghut ri. 6 Haû mù, yhâng é awùt ashín mâ é yùqgè nyhit yùq lé, ngá-mòq wó sat pyám râ matú, ngá-mòq lé àp byi keq. Ngá-mòq gi, haû Yhûmsîng Garai hkyin yu é sû Sholuq nyi é Gibe-a wà mó, haû Yhûmsîng Garaî é hí má, haú bâng é màng lé tuî lhâng to râ nghut lhê.” ga tû taî akô nghut ri.
Haû mù, hkóhkâm gi, “Ngò àp byi râ nghut lhê.” ga taî ri.
7 Hkóhkâm gi, yhang eq Sholuq é yhang zo Yonahtan gyoro má, haû Yhûmsîng Garaî hí má dâkam tô é yánmai, Sholuq é yhang shu, Yonahtan é yhang zo Mehpiboshet lé chyungxe lhut to bê nghut ri. 8 Nghut kôlhang, hkóhkâm gi, Ai-a é yhang zo byìzo Rizipa mai Sholuq lé hkû byî é yùqzô nhik Arimoni eq Mehpiboshet nhik lé le, Sholuq é yhang zo byìzo Merap mai, Mehola wà byù Barazilai é yhang zo Adari-ela lé hkû byî é yùqzo ngo yuq lé le, shuî yu ri. 9 Yhang gi, haú bang lé Gibe-on byu pê é lòq má àp byî é nghut luî, yhángmòq gi, haú bang lé, bùm htoq má, haû Yhûmsîng Garaî hí má sat pyám mù, màng pé lé tuî lhâng pyâm akô nghut ri. Haû nyhit yùq gón gi, radá dâm rahá shi byùq bekô nghut ri; yhángmòq gi, mùk-yó gùq yâm hi ló é, kyô shu yòq sânghî buìnyì pé má sat pyâm é huî akô nghut ri.
10 Haú hkûn, Ai-a é yhang zo byìzo Rizipa gi, jimê yù mù, yhâng é matú lùqgòk htoq má hkâng tô ri. Yhang gi, kyô shu yòq hi é mai, màng haú pê é ahtoq má mauhkûng mai maú wo gyûn é hkûn jé shoq, màng haú pé má, nyí lé maulat nghoq zô pé a lé wó záng shoq le, myín lé yòso gaunyhaú pé a wó lé záng shoq le, wú gôn nyi ri. 11 Dawiq gi, Sholuq é myi-ngê, Ai-a é yhang zo byìzo Rizipa kut é hkyô lé wó gyo jáng, 12 ê luî, Gile-at mau mâ é Yabesha byù myû wui chyáng mai, Sholuq eq yhang zo Yonahtan é showui pé lé ê yu ri. (Yabesha byu pé gi, Gilabo-a kong má, Hpilisiti byu pê èq Sholuq lé sat pyám mù, yhángmòq é màng pé lhâng to kô é, Bet Shan wà mâ é byù zîng é jowò mai yhángmòq é màng lé ê haq yu lò kô é bang nghut ri.) 13 Dawiq gi, haú jowò mai, Sholuq eq yhang zo Yonahtan é showui pé lé le, sat lhâng pyám huî é haû nyhit yùq é showui pé lé le, yu tsîng lo ri.
14 Hau htâng, yhángmòq gi, Sholuq eq yhang zo Yonahtan é showui pé lé, Ben-yamin mau, Zela wà mâ é, Sholuq é yhâng wa Kisha é lùp má, myhup yhûm pyâm akô. Yhángmòq gi, hkóhkâm hkunmó hkyô é bànshoq lé kut akô nghut ri. Haú hkûn, Garai Gasang gi, mîngdán é matú kyûdûng é dang lé gyo byi bê nghut ri.
Hpilisiti Byu Pé Lé Majan Zân É Hkyô Pé
15 Hpilisiti byu pé eq Isira-elaq byu pê é gyoro má, majan radàm dum htoq bê nghut ri. Dawiq gi, yhâng é byu pé eq rahá, Hpilisiti byu pé lé majan zan râ matú gyó e ri; haú hkûn, yhang gi, ngú myûng byùq bê nghut ri. 16 Rahpa é awùt ashín rayùq nghut sû Ishabi-Benop gi, rajoí èq sum rûng kô bo é gyi lhâm mó chûng luî, gyèhking nghut é shâm sik wun to mù, Dawiq lé sat pyám râ matú haq gyám nyi ri. 17 Nghut kôlhang, Zerui-a é yhang zo Abishai gi, Dawiq lé hkyi xe yù râ matú jé lé mù, Hpilisiti hpó lé zân sat pyám bê nghut ri. Haû mù luî, Dawiq é byu pé gi, yhang lé, “Isira-elaq byu pê é myibung a shum byùq sháng gàq, nàng, hkâ-nhám le, ngá-mòq eq rahá majan pá shut wó cháng râ a nghut lo.” ga dakâm dang taî akô nghut ri.
18 Hau htâng, Goba jowò má, Hpilisiti byu pé eq majan dum htoq ri. Haú u má, Husha wà byù Sibehkai gi, Rahpa é awùt ashín mâ é Sahpa ga sû lé sat pyâm ri.
19 Goba jowò má, Hpilisiti byu pé eq gótû radàm majan htoq é hkûn, Betlehem wà byù Ya-ira é yhang zo Elihanan gi, wòqmó long í lo é lhâm chung é Giti byù Goli-at é yhang gua lé sat pyâm ri.
20 Hau htâng, Gat wà má gótû majan radàm dum htoq é hkûn, lòq má lòqnyhui hkyuq nyhui nyhui dàp mù, hkyî má hkyî-nyhui hkyuq nyhui nyhui dàp luî, bànshoq í xe myî nyhui dàp é, gyai kô myhang é byù rayùq nyi ri. Haú yùq le, Rahpa é awùt ashín nghut ri. 21 Haú yùq gi, Isira-elaq byu pé lé gyáng é dang lé taî é hkûn, Dawiq é yhang mang Shime-a é yhang zo Yonahtan gi, haú yùq lé sat pyám bê nghut ri.
22 Byù shí bang myi yuq gi, Gat wà mâ é Rahpa é awùt ashín pé chyat nghut akô; yhángmòq gi, Dawiq eq yhâng é byu pê é lòq má shi htûm byùq bekô nghut ri.