Sholuq Eq Yhang Zô Pé Shi Byùq É Hkyô
31
Ahkuî, Hpilisiti byu pé gi, Isira-elaq byu pé lé majan zân ri; Isira-elaq byu pé gi, Hpilisiti byù haú bâng é hí mai hpâng mù, Gilabo-a Bùm má myo myo sat pyâm é huî bum akô nghut ri. 2 Hpilisiti byù haú bang gi, Sholuq eq yhang zô pé lé tsuq tsuq châng hkat kômù, Sholuq é yhang zo Yonahtan, Abinadap eq Malihkishu-a pé lé sat pyâm akô nghut ri. 3 Sholuq é awui ayàm má, majan gyaí htan to mù, lai bik bang yhang lé châng hkyit luî, yhang lé dam mó tap byi bekô nghut ri.4 Sholuq gi, yhâng é shâm lhâm wàq sû lé, “Náng é shâm shê mù, ngo lé htaû sat aq, haû a nghut jáng, ahpyo-kuq a hpyit é bang gi, ngo lé lé htau luî, rhoî jihkyoî kôrâ nghut lhê.” ga taî ri.
Nghut kôlhang, yhâng é shâm lhâm wàq sû gi, gyai yhang gyùq nán byùq luî, a htau nghut ri. Haû mù, Sholuq gi, yhûmsing é shâm lé she yu mù, haú má lèq ròt shi byùq bê nghut ri. 5 Haû shâm lhâm bo wàq sû gi, Sholuq shi byùq bê lé myàng jáng, yhang le, yhûmsing é shâm má lèq ròt mù, Sholuq eq rahá shi byùq bê nghut ri. 6 Haû mù, Sholuq eq yhang zô pé sum yuq le, yhâng é shâm lhâm wàq sû eq yhâng é byu pé bànshoq bang le, haú nyí má za rahá shi byùq bekô nghut ri.
7 Langhkaû cháng luî nyi é eq Yodan làng hé hpoq má nyi é Isira-elaq byu pé gi, Isira-elaq gyèzô pé hpang byùq bê hkyô lé le, Sholuq eq yhang zô pé shi byùq bê hkyô lé le myàng kôjáng, yhûmsing é wà mó pé lé tô pyâm to kôluî, hpâng bekô nghut ri. Haû mù, Hpilisiti byu pé gi, wà haú pé lé, lé sing yù bekô nghut ri.
8 Htang nyí, Hpilisiti byu pé gi, shî màng pé mâ é zè pé lé hkyut shang yù râ matú, lé lô kô é hkûn, Gilabo-a Bùm má, Sholuq eq yhang zô pé sum yuq shi lèq to láng é lé le, lé myang akô nghut ri. 9 Haû mù, yhángmòq gi, Sholuq é ulhum lé hpyit yû luî, yhâng é gyèhking lé hkyut yû mù, yhángmòq é hparà jong eq yhángmòq é byu pê chyáng lùdang haû taî pyô râ matú, Hpilisiti mau gón shut byù nhang kat akô nghut ri. 10 Yhángmòq gi, Sholuq é gyèhking lé, Ashatoret hparà jong má tô to kômù, yhâng é màng lé, Bet Shan wàhkûm má lhâng tô akô nghut ri.
11 Gile-at mau mâ é Yabesha wà byu pé gi, Sholuq lé, Hpilisiti byu pé èq hkâsu kut kô é hkyô lé wó gyo kôjáng, 12 yhángmòq é sârhe pé bànshoq bang, ra-myin mau, Bet Shan wà shut yán ê kômù, Bet Shan wàhkûm mai Sholuq eq yhang zô pê é màng lé yu hkyó kômù, Yabesha wà shut yu ló kôluî, myî èq hput pyám bekô nghut ri. 13 Hau htâng, yhángmòq gi, showui pé lé yù mù, Yabesha wà mâ é wàqmyòq gàm ô má myhup yhum kôluî, nyhit nyí yhang zoshuq tûm akô nghut ri.