Amalek Byu Pé Lé Dawiq Sat Pyâm É Hkyô
30
Dawiq eq yhâng é byu pé gi, sum nyí laî é htâng, Ziklak wà má jé ló kô é hkûn, Amalek byu pé gi, Maupyî Mau eq Ziklak wà lé majan ê zan kômù, Ziklak wà lé hpyoq luî, nyhê hkyô pyâm to láng kô é htoq agó, 2 wà mâ é myiwe wuì lé le, haû má nyi é tiq zo ko zo yùq hkangmó lé le, shúm dông chyup yû kômù, rayùq lé lháng a sat pyâm é za, yhángmòq é hkyôwuì shut hkyom shuî ló byùq láng bê nghut ri.3 Dawiq eq yhâng é byu pé gi, Ziklak wà má ló jé kô é hkûn, wà haû myî èq lhoqhtên pyâm to láng é lé le, yhángmòq é yhûmsîng myhî pé eq yùqzo byìzo pé lé shúm dông chyup shuî ló byùq é hkyô lé le, ló myang akô nghut ri. 4 Haû mù, Dawiq eq yhâng é byu pé gi, ngaù wum a bò lo dùt shoq wùt garû ngau bum akô nghut ri. 5 Dawiq é yhûmsîng myhî nhik nghut é Yezirela wà mâ é Ahino-am eq Hkarimela wà mâ é Nabala é chuimó myhí Abigela le, chyup shuî ló é bang má bo lom ló byùq bê nghut ri. 6 Dawiq gi, yhâng é byu pé, yhángmòq é yùqzo byìzô pé é yánmai nhikmó-yo kômù, yhang lé lùqgòk èq dú sat râ ga taî nyi bùm kô é yánmai, myìt myo ûng wôm nyi ri. Nghut kôlhang, Dawiq gi, yhâng é Garai Gasang nghut é, haû Yhûmsîng Garaî chyáng mai wum-o wó lhoqkîng yu ri.
7 Hau htâng, Dawiq gi, Ahimelek é yhang zo, hkyangjong Abi-ahta lé, “Ngá chyáng hkyangjong bu-kó yu lé lô àq.” ga taî ri. Abi-ahta le, haû lé yhâng chyáng yu ê byi bê nghut ri. 8 Haú hkûn, Dawiq gi, Yhûmsîng Garai lé, “Haû gyèhpúng mó lé, ngò châng hkat râ lhú? Ngò, yhángmòq lé châng hkyit shirâ lhú?” ga myi jáng, haû Yhûmsîng Garai gi, “Yhángmòq lé châng hkat àq; nàng, yhángmòq lé teng za châng hkyit râ nghut mù, chyup shuî ló byùq é bang lé le, ê dum wó hkyi taû yù râ nghut lhê.” ga tû taî ri.
9 Haû mù, Dawiq eq yhâng htâng châng é byù hkyuq shô yùq gi, Besora Wuìlàng má ê jé kô é hkûn, ra-am gi, haû má nyi gyó tô akô nghut ri. 10 Haú mâ é byù í shô yùq gi, lûm ngú byùq kômù, wuìlàng a wó gu luî, nyi gyó tô akô. Nghut kôlhang, Dawiq eq gótû myi shô yùq gi, xoq xoq châng hkat akô nghut ri.
11 Dawiq htâng châng é bang gi, Egutuq byù rayùq lé pá má myàng kôluî, Dawiq chyáng shuî ló akô. Yhángmòq gi, haú yùq lé, shuq râ wuì eq zo râ zoshuq nghut é 12 hkohúm-shi kyuq ralong eq tsibyiq shi hkyuq í paû lé byî akô. Haú yùq gi, haú pé lé zo mù, wúm dum bo lò bê nghut ri. Hkâsu mù gâ le, yhang gi, sum nyí sum myîn yhang, haî le a myàng zo, haî le a myàng shuq nghut ri.
13 Dawiq gi, yhang lé, “Nàng gi, ó yùq é byù nghut lhê? Hkâ mâ é sû nghut lhê?” ga myî ri.
Haû jáng, yhang gi, “Ngò gi, Amalek byù rayùq é jùn, Egutuq byù nghut lhê. Laî ló bê sum nyí má, ngò no byùq luî, ngá yhûmsîng hpó ngo lé pyâm tô é nghut lhê. 14 Ngá-mòq gi, Hkerehti byu pê é Maupyî, Yudaq mau eq sêng é maumyî eq Hkalep é mau mâ é maupyî shut majan ê zan mù, Ziklak wà lé nyhê pyâm to hkô é nghut lhê.” ga taî ri.
15 Dawiq gi, yhang lé, “Nàng, ngo lé, gyè hpúng mó haû nyi é jang má wó shuî gyó ê râ lhú?” ga myî ri.
Haú hkûn, yhang gi, “Nàng, ngo lé a sat pyám râ matú le, ngá é yhûmsîng hpô é lòq má ngo lé a àp pyám râ matú le, haû Garai Gasâng é hí má dakâm àq. Haú jáng, ngò, gyè hpúng mó nyi é jang má nang lé shuî ê râ nghut lhê.” ga tû taî ri.
16 Haû mù, yhang gi, Dawiq lé shuî gyó é hkûn, Amalek byu pé gi, Hpilisiti mau eq Yudaq mau mai wó sîng yu lo é azíng zê pé abùm azàng é yánmai, zo yê shuq yê kut luî, gó kún uchyang, haú jowò ra-mîng é má nyi myín bum akô nghut ri. 17 Dawiq gi, mauchut zó mai htang nyí myínhtâng jé shoq, haú bang lé majan zan mù, Gola-uk ji luî, wó hpang ló é zorâm myi shô yùq mai lai mù, wó hpang lùt é byù rayùq lháng a bò nghut ri. 18 Dawiq gi, Amalek byu pé hkyom yu ló é zè bànshoq lé dum wó taû yu é htoq agó, yhâng é yhûmsîng myhî nhik lé le dum wó hkyi yù bê nghut ri. 19 Byù tiq zo ko zo, yùqzo byìzo, yhángmòq hkyom yu ló é azíng zê lhúnglháng lé, haî lháng a byùq é za, Dawiq dum wó yu tau bê nghut ri. 20 Dawiq gi, yhâng é byu pé mai gótû shigu gaunyhaú pê é hí má kôn lo é sau bainám hpúng pé eq no hpúng pé bànshoq lé, yhâng é kut yû mù, “Shî gi, Dawiq wó sing yu é nghut lhê.” ga taî ri.
21 Hau htâng, Dawiq gi, lûm ngú byùq kômù, yhâng htâng a wó cháng lo luî, Besora Wuìlàng yàm má nyi gyó to hkô é byù í shô yùq chyáng jé é hkûn, haú bang le, Dawiq eq yhâng htâng châng é byu pé lé lhom te yu râ ga, htoq lé lo bum akô. Dawiq eq yhâng é byu pé jé ló kô é hkûn, Dawiq gi, yhángmòq lé shi-kyâm yu ri. 22 Nghut kôlhang, Dawiq htâng châng é bang mâ é, agè ashop é bang eq byù lé gunjâng é bang bànshoq gi, “Yhángmòq gi, ngá-nhúng eq rahá a bo htoq ê kô é yánmai, ngá-nhúng dum wó taû sing yu lo é zè pé lé, yhángmòq lé a wó gàm byi râ nghut lhê. Nghut kôle, yùq hkangmó gi, ó le ô é yhûmsîng myhî pé eq zodù wuì lé kúm ge shuî yu ló kôrâ nghut lhê.” ga taî akô nghut ri.
23 Haú hkûn, Dawiq gi, “Ngá é gu-mang wuì ê, haû Yhûmsîng Garai mai ngá-nhúng lé byî é lé, núngmòq haú dông a ge kut râ nghut lhê. Yhûmsîng Garai gi, ngá-nhúng lé wú mâgum yù mù, ngá-nhúng lé htuqhtîng é gyè hpúng mó lé, ngá-nhûng é lòq má àp byî ri. 24 Haû núngmòq taî é lé, ó yùq wá gyo râ lhú? Majan ê bo gyó zan sû wó gam yu é myhó, zè zúng nyî su le wó yù sháng. Í yùq é, rawuí wuí za myang gàm yù kó sháng gàq.” ga tû taî ri. 25 Dawiq gi, haú nyí mai hkû-nyí jé shoq, Isira-elaq byu pê é matú, cháng ra târâ eq hkyô tô é hkunmó shî lé tô to bê nghut lhê.
26 Dawiq gi, Ziklak wà má jé é hkûn, wó sing yu é zè ra-am lé, yhâng é luzúm Yudaq byù sûwún wui chyáng hun kat mù, “Shî gi, núngmòq é matú, haû Yhûmsîng Garaî é gye pê chyáng mai wó sing yu lo é zè mâ é chyûnghuq nghut lhê.” ga taí nhang kat ri.
27 Dawiq hun kat byî é bang gi, Behtela, Ramot Maupyî eq Yatira má nyi é bâng chyáng le; 28 Aro-era, Sihpamot, Eshitemo-a eq 29 Rahkala má nyi é bâng chyáng le; Yeramela wà mó pé eq Keni wà mó pé má nyi é bâng chyáng le; 30 Horama, Bora Ashan, Ahtak eq 31 Hebron wà pé má nyi é bâng chyáng le; Dawiq eq yhâng byu pé nô laî wú é gótû jowò bànshoq má nyi é bâng chyáng le nghut ri.