Ahkisha Ziklak Wà Shut Dawiq Lé Taû Ló Nhang É Hkyô
29
Hpilisiti byu pé gi, yhángmòq é gyè hpúng pé bànshoq lé, Ahpek wà má tsîng tô akô; Isira-elaq byu pé le, Yezirela langhkaû mâ é wuìbúm nàm má jowò hkyô tô akô nghut ri. 2 Hpilisiti gyèzaû pé gi, rashô bo é gyè hpúng, rahkyîng bo é gyè hpúng eq rahá yán e ló bum akô; Dawiq eq yhâng é byu pé gi, hkóhkâm Ahkisha eq rahá htâng má châng yán tô bum akô nghut ri. 3 Hpilisiti byu pê é gyèzaû pé gi, “Hebre byù shí bang, shí má haî lé kut nyi akô làq?” ga myi kôjáng, Ahkisha gi, “Shí yùq gi, Isira-elaq hkóhkâm Sholuq é duìnhâng zoshâng Dawiq nghut lhê, a nghut kó lhí? Yhang gi, ngò eq razàn chyân kô nyì bê nghut lhê; yhang, Sholuq chyáng mai hpang htoq lé lo é buìnyì mai hkû-nyí jé shoq, yhang lé mara hûn râ hkyô ngò haî a myàng nghut ri.” ga tû taî ri.4 Nghut kôlhang, Hpilisiti gyèzaû pé gi, Ahkisha lé nhik-yo naû kômù, “Nàng, yhâng é matú masàt to byî é jowò shut, yhang lé taû ló nhâng àq. Yhang lé, ngá-mòq eq rahá majan pá shut hkâcháng nhâng; yhang gi, majan zân nyi é u, ngá-nhúng lé dum taû zân lò sê lhê. Yhang gi, yhâng é yhûmsing é hí má myòqdong dum wó râ hkyô lé, ngá-nhûng é byu pê é ulhum lé hpyit ló byî é mai lai luî, gótû haî joq shirâ lhú? 5 Yhángmòq gó uchyang,
‘Sholuq sat é gi, hkyîng dông nghut,
Dawiq sat é gi, mun dông dùt.’ ga hkôn kô é gi, shî Dawiq lé lhoq-ang luî, hkôn kô é a nghut lhú?” ga taî akô nghut ri.
6 Haû mù, Ahkisha gi, Dawiq lé ji yù luî, “Haû Yhûmsîng Garai rû dui nyi é eq rajung za, nàng gi, wó lum é dông nyi nyì bê nghut ri. Ngò eq rahá gyèhpúng má nàng bo lom le gi, ngò gabú myìt ngón râ nghut lhê. Nàng, ngá chyáng jé lé é buìnyì mai hkû-nyí jé shoq, nang lé mara hûn râ hkyô, ngò a myàng. Nghut kôlhang, gyèzaû pé gi, nàng cháng râ lé myìt a huî bùm kó nghut ri. 7 Haû mù, nàng ngón za dum taû ló aq. Hpilisiti gyèzaû pé myìt a ngón é hkyô, haî hkâkut.” ga taî ri.
8 Haú hkûn, Dawiq gi, “Ngò, haî kut shut bê lhú? Ngò, náng chyáng jé lé é buìnyì mai hkû-nyí jé shoq má, náng é duìnhâng zoshâng ngò lé hai mara myang ri lhú? Ngá é yhûmsîng hkóhkam é gye pé lé, haî mù, ngò a ê wó bo zan râ lhú?” ga myî ri.
9 Ahkisha gi, “Nàng gi, Garai Gasâng é maumang lagyo su, ngá é myòq hí má byù gè rayùq nghut é lé, ngò sê lhê; nghut kôlhang, Hpilisiti gyèzaû pé gi, ‘Yhang lé, ngá-mòq eq rahá majan pá shut hkâcháng nhâng.’ ga taî akô. 10 Haû mù, nàng eq châng lé lo é náng é yhûmsîng hpô é duìnhâng zoshâng wuì eq rahá, toq mù, nàpsûn noq le maubó eq yhang taû ló keq.” ga tû taî ri.
11 Haû mù, Dawiq eq yhâng é byu pé gi, nàpsûn noq le toq kômù, Hpilisiti mau shut dum taû ló bùm bekô. Hpilisiti byu pé gi, Yezirela shut dòq e ló bùm bekô nghut ri.