28
Buìnyì haú yòq haú bun má, Hpilisiti byu pé gi, Isira-elaq byu pé lé majan zan râ matú, yhángmòq é gyè hpúng pé lé ji tsîng tô akô. Ahkisha gi, Dawiq lé, “Nàng eq náng é byu pé le, ngò eq rahá gyè hpúng má bo lòm râ nghut é hkyô lé, sê to ra kôrâ nghut lhê.” ga taî ri.2 Dawiq gi, “Haû jáng, náng é duìnhâng zoshâng ngò wó kut é hkyô lé, nàng yhang wó sé râ nghut lhê.” ga taî ri.
Haú hkûn, Ahkisha gi, “Nghut bê; ngò, nang lé, ngá é chyungxe gón lé zúng sû kut nhâng râ nghut lhê.” ga tû taî ri.
Sholuq Eq Endora Wà Mâ É Sôbyô Dàt Ji É Myiwe Myhí
3 Haú u lé, Samu-elaq shî byùq mù, Isira-elaq byù bànshoq bang gi, yhâng é yánmai iyon yon kôluî, yhâng é gùngsôm lé, yhâng é wà Rama má myhup yhûm pyâm akô nghut ri. Sholuq gi, sôbyô dàt ji é bang eq bùt hpyit bang lé, haú mau mai hkat htoq pyâm láng bê nghut ri.
4 Sholuq gi, Isira-elaq byu pé bànshoq lé ji tsing mù, Gilabo-a bùm má gyèwap xuq nyi é u lé, Hpilisiti byu pé gi, Shunem wà má lé zùp zing kômù, gyèwap xuq akô nghut ri. 5 Sholuq gi, Hpilisiti gyè hpúng lé myàng jáng, gyai yhang gyùq nán nyî bê nghut ri. 6 Sholuq gi, Yhûmsîng Garai lé myî wú kôlhang, haû Yhûmsîng Garai gi, yhupmòq dông le, Urima dông le, myìqhtoî pé dông le, yhang lé a tû taí nghut ri. 7 Haû mù, Sholuq gi, yhâng é duìnhâng zoshâng wuì lé, “Ngá é matú, sôbyô dàt ji é myiwe myhí rayùq ê hô keq; ngò, yhang lé ê myî wú râ.” ga taî ri.
Haú hkûn, yhángmòq gi, “Endora wà má rayùq nyi ri.” ga taî kyô akô nghut ri.
8 Haû mù, Sholuq gi, yhang nghut é a wú sé loshoq, gótû mèbu htaî wùt chûng mù, myín lé, yhâng é byù í yùq eq rahá, haû sôbyô dàt ji su chyáng ê luî, “Nàng zum nyi é so èq, ngò myìng wùt su é sôbyô lé, ji toq byi aq.” ga taî ri.
9 Nghut kôlhang, myiwe myhí haû gi, yhang lé, “Sôbyô dàt ji é bang eq bùt hpyit bang lé, Sholuq èq haú mau mai hkat htoq pyâm é lé, nàng, hkyak sê nyì luî nhîng, haî mù, ngò shi byùq râ matú dumzo lé htung lhê lhú?” ga taî ri.
10 Sholuq gi, “Haû Yhûmsîng Garai rû dui nyi é eq rajung za, múzó shí hkat é yánmai, nàng dam byî é hui zo râ a nghut.” ga, haû Yhûmsîng Garaî é myìng lang luî, myiwe myhí haú lé dâkam ri.
11 Hau htâng, myiwe myhí haû gi, “Ngò, náng é matú, ó yùq lé ji toq byi râ lhú?” ga myi jáng, Sholuq gi, “Samu-elaq lé ji toq byi laq.” ga taî ri.
12 Myiwe myhí haû gi, Samu-elaq lé myàng jáng, htê mó èq wùt garu mù, Sholuq lé, “Nàng, ngo lé haî mù mhaû lhê lhú? Nàng gi, Sholuq nghut ri!” ga taî ri.
13 Haú hkûn, hkóhkâm gi, yhang lé, “Hkâgyùq. Nàng, haî myàng ri lhú?” ga taî ri.
Myiwe myhí haû gi, “Myigùng mai hparà htoq lo é lé myang ri.” ga taî ri.
14 Hkóhkâm hpó gi, “Haû, haî eq du ri lhú?” ga myî jáng, myiwe myhí haû gi, “Buhîng wùt tô é mangzo rayùq htoq lé lo ri.” ga taî ri.
Haú hkûn, Sholuq gi, Samu-elaq nghut é lé sé luî, myigùng jé shoq yhâng é myòqdong paî gòp ri.
15 Samu-elaq gi, Sholuq lé, “Haî mù, nàng, ngo lé ji toq yû luî, gunjâng nyi lhê lhú?” ga taî ri.
Sholuq gi, “Ngò gyai yhang myìt myo ûng wôm nyi ri. Hpilisiti byu pé gi, ngo lé majan lé zân nyi akô. Garai Gasang le, ngo lé tô pyâm to luî, myìqhtoi dông le, yhupmòq dông le, ngo lé a tû taî byùq lo nghut ri. Haû mù, ngò hkâsu kut râ hkyô lé, nàng taî kyo râ matú ji toq yu é nghut lhê.” ga taî ri.
16 Samu-elaq gi, “Ahkuî, haû Yhûmsîng Garai, nang lé tô pyâm to luî, náng é gyè dùt bê le nhîng, haî mù, nàng, ngo lé lé myî lhê lhú? 17 Yhûmsîng Garai gi, ngo lé taí nhang tô é eq rajung za kut bê nghut ri. Yhûmsîng Garai gi, náng é lòq mai mîngdán haú lé wùp yù mù, náng é chyáng nâm mâ é sû Dawiq lé byî pyám bê nghut ri. 18 Nàng gi, Yhûmsîng Garaî é jì-no a gyô é htoq agó, Yhang, Amalek byu pé lé nhikmó-yô é hkyô lé le, nàng a wó lhoqdìk byî é yánmai, Yhûmsîng Garai gi, hkû-nyí, nang lé haú dông kut é nghut ri. 19 Haû Yhûmsîng Garai gi, nàng eq Isira-elaq a-myû lé, Hpilisiti byu pê é lòq má àp pyám râ nghut lhê. Nàpmá, nàng eq nungzô pé gi, ngò eq rawò má za nyì berâ nghut lhê. Yhûmsîng Garai gi, Isira-elaq byu pê é gyè hpúng lé le, Hpilisiti byu pê é lòq má àp pyám râ nghut lhê.” ga taî ri.
20 Haû mù, Sholuq gi, Samu-elaq é dang pê é yánmai, gyai yhang gyô gyùq mù, radá dâm myigùng htoq má a-nghop dông lèq ngòp byùq ri. Yhang gi, ra-nyí ra-myìn yhang haî le a zô é yánmai, wúm yom byùq bê nghut ri.
21 Myiwe myhí haû gi, gyai yhang gyùq nyi é Sholuq lé lé myàng mù, “Wú aq, náng é duìnhâng zoshâng myhí ngò gi, náng é dang gyo mù, yhûmsing é chyungxe lé lháng a ha loshoq, nàng taî é dông châng kut bê nghut lhê. 22 Ahkuî, jeju mai, náng é duìnhâng zoshâng myhî é dang lé gyo byi laq. Ngò zoshuq ra-tsuí hên byi bá; nàng, gyunghkyô shut e ló le wum bô râ matú zô yù àq.” ga taî ri.
23 Sholuq gi, “Ngò a zo.” ga he-ngìk pyâm ri.
Nghut kôlhang, yhâng é duìnhâng zoshâng wuì eq myiwe myhí haû, yhang lé chôm taí kô é nghut mù, yhang gi, haú bâng é dang lé gyo bê. Yhang gi, myigùng mai toq mù, yhupgyàp má zùng bê nghut ri.
24 Myiwe myhí haû gi, yhûm má tsô myum tô é no zo radu lé radá dâm sat lajang bê nghut ri. Hau htoq agó, yhang gi, súngsô mún lé le yù mù, haú lé múnchi a kat é za myhik nyhó luî, bung bê nghut ri. 25 Hau htâng, myiwe myhí haû gi, Sholuq eq yhâng é duìnhâng zoshâng wui é hí má, zoshuq htûng byî ri; yhángmòq gi, zô yù kôluî, haú myîn yhang, toq so bekô nghut ri.