Hpilisiti Byù Pê Chyáng Dawiq Nyi Tô É Hkun Lhê Hkyô
27
Dawiq gi, yhânggùng yhang, “Ra-nyí nyí má gi, ngò, Sholuq é lòq èq sat pyâm é hui râ nghut lhê. Haû mù, Hpilisiti byu pê é mau shut hpang e é gi, ngá é matú je ge é hkyô nghut bê. Haû jáng, Sholuq gi, Isira-elaq mau mâ é jowò hkangmó má ngo lé châng ho é hkyô nô pyám râ nghut lhê; haú hkûn, ngò gi, yhâng é lòq mai wó lùt berâ nghut lhê.” ga myìt yu ri.2 Haû mù, Dawiq eq yhâng htâng châng é byù hkyuq shô yùq gi, Mohka é yhang zo, Gat hkóhkâm Ahkisha chyáng htoq e ló akô nghut ri. 3 Dawiq eq yhâng é byu pé gi, Hkóhkâm Ahkisha eq rahá Gahta wà mó má nyi nyi bum akô; yùq hkangmó gi, yhûmsing é i-kun byu pé eq rahá nghut kômù, Dawiq é yhûmsîng myhî nhik nghut é, Yezirela wà mâ é Ahino-am eq Hkarimela wà mâ é Nabala shi chuî tô é Abigela le bo akô nghut ri. 4 Sholuq gi, Dawiq, Gat wà mó shut hpang e byùq é hkyô lé wó gyo jáng, yhang lé a châng hô lo nghut ri.
5 Hau htâng, Dawiq gi, Ahkisha lé, “Ngò, náng é hí má myòqdong wó é nghut jáng, ngò ló wó nyî râ matú, shí mau mâ é wà rawà lé masàt byi laq. Náng é duìnhâng zoshâng ngò gi, haî mù hkóhkâm wà mó shí má nàng eq rahá nyi to râ lhú?” ga taî ri.
6 Haû mù, Ahkisha gi, haú nyí yhang, Dawiq lé Ziklak wà byi bê nghut ri. Hau é yánmai, Ziklak wà haû gi, hkû-nyí jé shoq, Yudaq hkóhkâm pé sing é wà dùt bê nghut ri. 7 Dawiq gi, Hpilisiti mau má, razan eq lha-mó myi hkyap nyi ri.
8 Haú ayòq abun má, Dawiq eq yhâng é byu pé gi, Geshuri byù, Gerazi byù eq Amalek byu pé lé majan ê dòq zân akô nghut ri. (Byù haú bang gi, góhkûn mai, Egutuq ming yâm mâ é Shura wà mó jé shoq nyì tô é bang nghut akô.) 9 Dawiq gi, jowò rawò wò lé ê hpyoq hkangmó, myiwe yùqgè rayùq lé lháng a myhit loshoq sat pyâm ri; nghut kôlhang, sau, nojûng, loze pé, gola-uk pé eq mèbu pé lé kúm gi, tsîng yù luî, Ahkisha chyáng taû ló ri.
10 Ahkisha gi, “Núngmòq, hkû-nyí majan hká má ê zan kô é lhú?” ga lom myi jáng, Dawiq gi, “Yudaq mau Maupyî má,” a nghut jáng, “Yeramela mau Maupyî má,” a nghut jáng, “Keni mau Maupyî má, ê zân é nghut lhê.” ga tû taí taí kut ri. 11 Yhang gi, Gat wà má lùdang dé râ byù a nyì loshoq, yùqgè myiwe rayùq lháng a myhit tô é za sat pyám bê nghut ri. Hkâsu mù gâ le, yhang gi, “‘Shî hkyô Dawiq kut é nghut ri.’ ga hkyang shit kôrâ nghut lhê.” ga myìt yu é yánmai, Hpilisiti mau má nyi é ayòq abun má, haú dông chyat kut laî lo ri. 12 Ahkisha gi, Dawiq lé lum to mù, “Yhang gi, yhâng é byù nghut é Isira-elaq byu pê èq gyai yhang a naù a wôm é sû dùt bê nghut é yánmai, ra-pyàt gón ngá é duìnhâng zoshâng dùt nyì berâ nghut lhê.” ga taî ri.