Sholuq É Chyungxe Lé Dawiq Dum Lhut Kat É Hkyô
26
Zihpa byu pé gi, Gibe-a wà má nyi tô é Sholuq chyáng ê kômù, “Dawiq gi, Yeshimun tû-tap mâ é Hahkila kong htoq má haq nyi tô lhê a nghut lhú?” ga taî akô nghut ri. 2 Haú mù, Sholuq gi, hkyin yu to huî é Isira-elaq gyèzo sum hkyîng yùq eq rahá, Dawiq lé ê hô râ matú, Zihpa yòso shut gyó e ló akô nghut ri. 3 Sholuq gi, Yeshimun tû-tap mâ é Hahkila kong htoq hkyô yàm má jowò ê hkyô ri. Nghut kôlhang, Dawiq gi, yòso má nyi nyi ri. Sholuq, yhang lé châng ho wún é hkyô lé, Dawiq wó sé jáng, 4 yhang gi, jówú bang lé nhâng luî, Sholuq jé tô é hkyô têng é lé sê bê nghut ri.5 Haû mù, Dawiq gi, toq luî, Sholuq jowò hkyô tô é jang má le, Sholuq eq Nera é yhang zo gyèzau Apna hká má yhup tô é lé ê myang ri. Sholuq gi, yhâng é gyèzô pé lhînghkyùq jowò yu tô bum é gyèwap ahkaû má yhup tô ri.
6 Hau htâng, Dawiq gi, Hiti byù Ahimelek eq, Zerui-a é yhang zo, Yo-ap é yhang gu Abishai lé, “Ngò gi, gyèwap má nyi é Sholuq chyáng gyó ê râ nghut lhê; hká yùq cháng kôrâ lhú?” ga myi jáng, Abishai gi, “Ngò cháng râ.” ga taî ri.
7 Haû mù, Dawiq eq Abishai gi, myín lé, gyèwap má ê jé kô é hkûn, Sholuq gi, gyèwap hkaû má, yhâng é lhâm lé, umhtúng nâm mâ é myigùng má gun xuq to luî, yhup tô ri. Apna eq gyèzô pé gi, yhâng é lhînghkyùq má yhup tô bum akô nghut ri.
8 Abishai gi, Dawiq lé, “Garai Gasang gi, hkû-nyí, náng é gyè lé, náng é lòq má àp byi bê nghut ri. Ahkuî, ngò, yhang lé, í dâm a gùn ra loshoq, radàm za myigùng záng shoq lham èq gun ròt kat bá.” ga taî ri.
9 Nghut kôlhang, Dawiq gi, “Yhang lé hkâzáng! Haû Yhûmsîng Garaî é namngón xû bùt hui sû lé sat mù, mara a bo é, ó yùq wó nyi lhê lhú?” ga Abishai lé taî ri. 10 Haû htoq agó, Dawiq gi, “Yhûmsîng Garai rû dui nyi é eq rajung za, Yhûmsîng Garai yhang, Sholuq lé sat pyám râ nghut lhê; haû a nghut jáng, yhang shî râ buìnyì jé râ nghut lhê; haû a nghut jáng, majan má shî râ nghut lhê. 11 Yhûmsîng Garaî é namngón xû bùt hui sû lé ngá lòq a záng râ matú, haû Yhûmsîng Garai hkûm tô ri. Ahkuî, yhâng é umhtúng nàm mâ é lhâm eq wuì ûm lé yu chûng mù, ló lo gòq.” ga dum taî ri.
12 Haû mù, Dawiq gi, Sholuq é umhtúng nâm mâ é lhâm eq wuì ûm lé yù mù, Abishai eq rahá ló byùq bekô. Haú hkyô lé, ó yùq le a châng sê kat kó; rayùq lháng yhup a bun kó nghut ri. Hkâsu mù gâ le, haû Yhûmsîng Garai gi, yhángmòq lé yhup mó myí nhang é nghut mù, yhángmòq bànshoq bang yhup ngón nyi bum akô nghut ri.
13 Hau htâng, Dawiq gi, lam é langhkaû laî byìt luî, tû-tap shut dàp ló mù, tsómra wê é kong htoq má yàp tô ri; 14 Dawiq gi, gyèzô pé eq Nera é yhang zo Apna lé, “Apna ê, nàng gi, ngo lé a tû taí râ lhú?” ga wùt garû kat jáng, Apna gi, “Hkóhkâm hpó lé wùt garu sû nàng gi, ó wá nghut lhê lhú?” ga tû taî kat ri.
15 Dawiq gi, Apna lé, “Nàng gi, wàqngân rayùq nghut lhê lhú? Isira-elaq a-myû má nàng sû é ó nyi lhê lhú? Haî mù, náng é yhûmsîng, haû hkóhkâm lé a zúng é lhú? Náng é yhûmsîng, haû hkóhkâm lé sat râ ga, byù rayùq yùq laî wang lò bê ô. 16 Nàng haû su kut é gi, a gè. Haû Yhûmsîng Garaî é namngón xû bùt hui sû, náng é yhûmsîng lé, nàng a zúng é yánmai, Yhûmsîng Garai rû dui nyi é eq rajung za, nàng eq náng é byu pé gi, shî yhang shî gíng bê nghut ri. Ahkuî, nàng, hkóhkam é umhtúng nâm mâ é lhâm eq wuì ûm lé wú wú aq; hkâ má lhú?” ga taî ri.
17 Sholuq gi, Dawiq é htê lé sê gyô kat mù, “Ngá zo Dawiq ê, htê shî gi, náng é htê a nghut lhú?” ga myi jáng, Dawiq gi, “Ngá é yhûmsîng, hkóhkâm ê, haû gi, ngá é htê nghut lhê.” ga tû taî ri. 18 Hau htoq agó, Dawiq gi, “Ngá é yhûmsîng nàng, haî mù, náng é duìnhâng zoshâng ngo lé châng hkat ho wún lhê lhú? Ngò haî kut shut bê lhú? Ngò hai mara bo ri lhú? 19 Ahkuî, ngá é yhûmsîng, hkóhkâm ê, náng é duìnhâng zôshang é dang lé gyô wú laq. Haû Yhûmsîng Garai gi, ngo lé, náng é gyè dùt nhâng bê nghut jáng, Yhang hkungga hàp yù sháng gàq. Haû a nghut mù, haú hkyô byu pé kut kô é nghut jáng, yhángmòq gi, haû Yhûmsîng Garaî é hí má dâkam é hui kó sháng gàq! Yhángmòq gi, ngo lé, ‘Ló aq; gótû hparà pé lé ê noq àq.’ ga taí kômù, hkû-nyí, haû Yhûmsîng Garaî é silî wunlî maumyî mai hkat htoq kat bekô. 20 Haû mù, ngá é sui gi, haû Yhûmsîng Garaî hí mai wê gâng é myigùng má a gyó sháng gàq. Isira-elaq hkóhkâm rayùq wá, bùm pé má nghoq lé châng bìk wún é su, hkôlhai dông nghut é ngo lé châng ho wún ri nhung.” ga xoq taî ri.
21 Hau mù, Sholuq gi, “Ngò shut bê. Ngá zo Dawiq ê, taû lò àq. Hkâsu mù gâ le, nàng, hkû-nyí, ngá é chyungxe lé gù to byî é yánmai, ngò, nang lé dum zing-ri râ a nghut lo. Ngò gi, gè gè yhang, byù na su kut, mara mó kut shut pyám bê nghut ri.” ga taî ri.
22 Haú hkûn, Dawiq gi, “Hkóhkam é lhâm shí má nghut lhê. Náng é zorâm rayùq lé, lé yû nhâng àq. 23 Haû Yhûmsîng Garai gi, ó yùq lé le, yhángmòq díngmán é eq jujúm é má cháng mù, jeju byî ri. Hkû-nyí, haû Yhûmsîng Garai gi, nang lé, ngá lòq má àp byî é nghut kôlhang, Yhûmsîng Garaî é namngón xû bùt hui sû lé, ngá lòq a záng é nghut lhê. 24 Hkû-nyí, ngò, náng é chyungxe lé gù tô é eq rajung za, Yhûmsîng Garai gi, ngá é chyungxe lé gù to byi mù, wuîhke jamjau bànshoq mai ngo lé hkyi yù sháng gàq ô!” ga tû taî ri.
25 Haú hkûn, Sholuq gi, Dawiq lé, “Ngá zo Dawiq ê, nàng gi, hkungsô wó nyî sháng gàq; nàng gi, mú mó pé kut mù, teng za ûngmyuq râ nghut lhê.” ga taî ri.
Haû mù, Dawiq gi, ló byùq bê nghut mù, Sholuq le, yhûm shut taû ló bê nghut ri.