Dawiq, Nabala Eq Abigela Pê É Hkyô
25
Ahkuî, Samu-elaq shi byùq bê nghut luî, Isira-elaq byu pé bànshoq bang gi, zùp zîng bùm kômù, yhâng é matú, yón ngau bum akô; yhángmòq gi, Samu-elaq lé, Rama jowò mâ é yhâng é yhûm má, myhup to bekô nghut ri. Hau htâng, Dawiq gi, toq mù, Paran yòso shut gyó ló bê nghut ri.2 Haú hkûn, Hkarimela wà má sùtzè gyai ê wó é, Ma-on wà byù rayùq nyi ri. Haú yùq gi, bainám rahkyîng eq sau sum hkyîng wó é sû nghut mù, Hkarimela wà má saumaú wùq nyi ri. 3 Yhâng é myìng gi, Nabala gâ ri; yhâng yhûmsîng myhî é myìng gi, Abigela gâ ri. Haû yhûmsîng myhí gi, hpàqchyî bò mù, isâm chyoî é myiwe nghut ri. Nghut kôlhang, yhâng é yhûmsîng hpó gi, myìt htan é htoq agó, agè ashop é múzó lhoqhtoq sû nghut ri. Yhang gi, Hkalep up mâ é byù nghut ri.
4 Dawiq gi, yòso má nyi tô é u, Nabala saumaú wùq nyi é hkyô lé wó gyô ri. 5 Haû mù, yhang, zorâm raxê yùq lé nhâng luî, châng sang kat é gi, “Hkarimela wà má nyi é Nabala chyáng ê mù, ngá é matú yhang lé ê bo shi-kyám keq. 6 Núngmòq gi, yhang lé, ‘Yhûmsîng nàng, chyung hîng xê hing nyi sháng gàq! Nàng eq náng é yhûmbyù wuì le, nguì ngón wángzán nyî sháng gàq! Nàng eq sêng é lhúnglháng le, nguì ngón nyî sháng gàq ô!
7 Ahkuî, saumaú wùq nám nghut é lé, ngò wó gyô ri. Náng é sau zúng bang, ngá-mòq eq rahá nghut nyi é hkûn, yhángmòq lé, ngá-mòq a gunjang. Yhángmòq, Hkarimela wà má nyi é yòq lé, yhángmòq é zè haî lháng a byùq wú é nghut lhê. 8 Náng é duìnhâng zoshâng wuì lé yhang, myî wú aq; yhángmòq, nang lé taî kyo kôrâ nghut lhê. Haû mù, buìnyì gè má ngá-mòq jé lé bê nghut mù, ngá é zorâm wuì gi, náng é hí má myòqdong wó nyî kô sháng gàq. Náng é duìnhâng zoshâng wuì eq nungzo Dawiq lé, jeju mai, nàng wó dùt é myhó byî kat laq.’ nghû taí keq.” gâ ri.
9 Dawiq é byu pé gi, Nabala chyáng ê jé kô é hkûn, yhang lé, Dawiq shit kat é dang taî kyo kôluî, láng tô akô nghut ri.
10 Nabala gi, Dawiq é duìnhâng zoshâng wuì lé, “Dawiq haû gi, ó wá nghut ri lhú? Yese é yhang zo haû gi, ó wá nghut ri lhú? Buìnyì shí pé má, duìnhâng zoshâng wuì myo myo gi, yhángmòq é yhûmsîng wuì lé gumlau toq nyi bum akô nghut ri. 11 Ngò gi, hen tô é mùk eq wuì lé le, ngá é saumaú yam bâng é matú, sat lajâng tô é sho lé le yù mù, hká mai lé lo é le a sê é byu pé lé byî pyám râ lhú?” ga tû taî ri.
12 Haû mù, Dawiq é byu pé gi, dum taû ló kômù, ló jé kôjáng, dang haú pé bànshoq lé ló shit kyô akô nghut ri. 13 Dawiq gi, yhâng é byu pé lé, “Núngmòq yùq hkangmó, ó le ô é shâm lé yu wùn keq!” ga taí jáng, yhángmòq gi, shâm yu wùn bekô nghut ri. Dawiq le, yhâng é shâm lé yu wùn bê nghut ri. Byù myi shô kô gi, Dawiq htâng bo châng htoq e ló akô; byù í shô yùq gi, zè zúng râ matú nyi gyó tô akô nghut ri.
14 Duìnhâng zoshâng wuì mâ é rayùq gi, Nabala é yhûmsîng myhí Abigela lé, “Dawiq gi, ngá-mòq é yhûmsîng hpó lé, lé shi-kyám nhâng râ matú, yòso mai lagyô pé lé nhang kat ri. Nghut kôlhang, ngá-mòq é yhûmsîng hpó gi, haú bang lé rhoî jihkyoî lhom kut kat ri. 15 Nghut kôlhang, byù haú bang gi, ngá-mòq ahtoq má gyai gê bang nghut akô. Yhángmòq gi, ngá-mòq lé a jo a âng é hkyô a kut kô é htoq agó, yòso má, yhángmòq eq rahá nyi nyi é buìnyì pé bànshoq má, haî lháng a byùq wú é nghut lhê. 16 Yhángmòq é nàm má, ngá-mòq, ngá-nhûng é sau pé lé zúng nyi é buìnyì pé bànshoq má, yhángmòq gi, ngá-mòq lé nyí myín wú mâgum yu akô nghut ri. 17 Ahkuî, hkâsu kut le gè râ hkyô lé, yhûmsîng myhí nàng myìt wú aq; hkâsu mù gâ le, ngá-nhûng é yhûmsîng hpó eq yhâng é yhûmbyù wuì bànshoq bâng é ahtoq má, ihkyùp jé lô râ za nghut bê. Ngá-nhûng é yhûmsîng hpó gi, ashop é byù wui nghut é yánmai, ó le yhang lé a wám taí kó nghut ri.” ga shit kyô ri.
18 Abigela gi, mùk í shô long, tsibyiq wing kat tô é sho-kuq htûng í htûng, sat lajâng to bê sau ngo du, gùqshin í xe gau joí, tsibyiq shi-kyuq rashô paû eq hkohúm-shi kyuq í shô long pé lé, hân hân tsîng yù mù, haú pé lé loze pê htoq má buí luî, 19 yhâng é duìnhâng zoshâng wuì lé, “So láng keq, ngò châng lé lô râ.” ga taî ri. Nghut kôlhang, yhang gi, yhâng é yhûmsîng hpó Nabala lé a taî to nghut ri.
20 Yhang gi, yhâng é loze ji luî, bùm mâ é langhkung shut ló é hkûn, Dawiq eq yhâng é byu pé gyó lô kômù, yhang eq huî lhûm akô nghut ri. 21 Hau hí má za, Dawiq gi, “Yhâng é sùtzè haî lháng a byùq loshoq, yòso má ngò bo wú zúng byî é bànshoq gi, akôm za dùt byùq bu-nhung. Yhang gi, ngò kut byî é ge é hkyô lé, ashop é dông taû kut byi bê nghut ri. 22 Nàpkyó maubó shoq, Nabala eq sêng é bang bànshoq mâ é yùqgè rayùq yùq lé, ngò, chyungxe duì nhang tô é ru nghut le gi, ngo lé, Garai Gasang htân htân je dam byi sháng gàq!” ga taî ri.
23 Abigela gi, Dawiq lé myàng jáng, loze htoq mai hân gyó mù, Dawiq é hí má, myigùng jé shoq myòqdong ngóm gòp bê nghut ri. 24 Yhang gi, Dawiq é hkyîwang má ngóm gòp luî, “Ngá é yhûmsîng ê, ngò náng é jùn myhî é mara lé hkyut byi laq. Nang lé dang rahkun nyò nhâng laq; náng é jùn myhí ngò taí râ dang lé le tâm gyo byi laq. 25 Ngá yhûmsîng ê, haû agè ashop é byù Nabala é dang lé ahkyàk hkâkut. Yhang gi, yhâng é myìng byù ngòk gâ é lichyúm bo é eq rajung za, byù ngòk dùt byùq bê nghut ri. Nghut kôlhang, náng é duìnhâng zoshâng ngò gi, ngá é yhûmsîng nàng nhang kat é byu pé lé a lhom myang kat é nghut lhê. 26 Ahkuî, ngá é yhûmsîng ê, haû Yhûmsîng Garai gi, byu é chyungxe sat râ hkyô mai le, yhûmsing lòq èq lató hpuq râ hkyô mai le, nang lé hkûm tang pyám bê nghut é yánmai, Yhûmsîng Garai rû dui nyì mù, nàng le dui nyi é eq rajung za, náng é gye pé eq ngá é yhûmsîng nang lé lhoqhpyoq lhoqhten nau é bang bànshoq gi, Nabala su dùt byùq kó sháng gàq. 27 Náng é jùn myhí ngò, ngá é yhûmsîng náng chyáng yu lé lo é chyûnghuq shî lé, náng htâng châng é byu pé lé tsing gàm byi bá lhê.
28 Jeju mai, náng é jùn myhí ngò shut é hkyô bo le gi, mara hkyut pyám byi laq. Náng é Garai Gasang nghut é, haû Yhûmsîng Garai gi, teng za, ngá é yhûmsîng náng é matú, gingtîng é hkóhkâm awùt dùt nhang nyi râ nghut lhê; hkâsu mù gâ le, nàng gi, Yhûmsîng Garaî é majan pé zân nyi é yánmai nghut ri. Nàng chyungxe rû dui nyì nyì gi, náng chyáng kut shut é hkyô myàng râ a nghut. 29 Náng é chyungxe gyám râ ga, byù rayùq yùq nang lé châng hkat nyi é nghut kôlhang, náng é Garai Gasang nghut é, haû Yhûmsîng Garai gi, ngá é yhûmsîng náng é chyungxe lé, kângsoq achyuq má, gau shoq tuî kîng to râ nghut lhê. Nghut kôlhang, náng é gyè pê é chyungxe lé kúm gi, laidán mâ é tseshi lé su bìk htoq pyám râ nghut lhê. 30 Yhûmsîng Garai gi, ngá é yhûmsîng nàng eq séng luî, danghtum htûm tô é ge é hkyô hkat hkangmó lé, náng é matú lhoqdìk byi mù, nang lé, Isira-elaq byu pé lé ùp râ ayá byî é hkûn, 31 ngá é yhûmsîng nàng gi, mara a bo é byu é chyungxe lé záng sat é yánmai le, yhûmsîng yhang lató hpuq é yánmai le, yhûmsing gùng yhûmsîng mara a hûn sháng gàq. Ngá é yhûmsîng nang lé, náng é Garai Gasang nghut é, haû Yhûmsîng Garai jeju byî é hkûn, náng é jùn myhí ngo lé myìtbun byi laq ô.” ga taî ri.
32 Dawiq gi, Abigela lé, “Hkû-nyí, ngò lé lé hui râ matú, nang lé nhang kat é, Isira-elaq byu pê é Garai Gasang, haû Yhûmsîng Garai gi, hkungsô wó nyî sháng gàq. 33 Nàng hpàqchyî byî é yánmai le, hkû-nyí, ngò, byu é chyungxe lé záng sat râ eq, ngá lòq èq lató hpuq râ mai, ngo lé hkûm zing yu é yánmai le, nàng gi, hkungsô wó nyî sháng gàq. 34 Nang lé hpuzo nhâng râ mai ngo lé hkûm zing yu é, Isira-elaq byu pê é Garai Gasang, haû Yhûmsîng Garai, teng za rû dui nyi é eq rajung za ngò taí bá, nàng, ngò lé hân a lé huî é ru nghut le gi, nàpmá myòq myàng zó má, Nabala eq sêng é yùqgè wuì rayùq lháng wó myhit hkyô to râ a nghut lo.” ga taî ri.
35 Hau htâng, Dawiq gi, Abigela yu lé lo é chyûnghuq pé lé, yhâng é lòq mai hàp yù mù, yhang lé, “Ngón za yhûm shut ló lo àq hkoi. Nàng taî é dang pé lé ngò wó gyo bê nghut mù, náng myòqdong lé tê luî, nàng dûng é lé gyo byi bê nghut lhê.” ga taî ri.
36 Abigela gi, Nabala chyáng dum ló é hkûn, Nabala gi, yhûm má, hkóhkâm rayùq é zoshuq poî su kut nyî láng ri. Yhang gi, î shuq wùt mù, gyai hkye ngón nyi ri. Haû mù, Abigela gi, htang nàpkyó myòq myang lò shoq, yhang lé haî le a taî kyo nghut ri. 37 Htang nàpkyó, Nabala î byán byùq jáng, yhâng é yhûmsîng myhí gi, haú hkyô bànshoq yhang lé taî kyô ri. Haú hkûn, Nabala gi, nhiklhum dui é yom ló byùq mù, lùqgòk su htan byùq bê nghut ri. 38 Raxê nyí kô laî é htâng má, Nabala lé Yhûmsîng Garai dam byî é nghut luî, yhang shi byùq bê nghut ri.
39 Dawiq gi, Nabala shî byùq bê hkyô lé wó gyo jáng, “Ngo lé rhoî jihkoî kut é Nabala lé lató hpuq byî é htoq agó, yhâng é duìnhâng zoshâng lé, mara a kut shut nhang é, haû Yhûmsîng Garai gi, hkungsô wó nyî sháng gàq. Yhang gi, Nabala kut shut é mara lé, Nabala é u htoq má gyó jé nhâng bê nghut ri.” ga taî ri.
Hau htâng, Dawiq gi, byù nhâng mù, yhâng é yhûmsîng myhí kut râ matú Abigela chyáng dang ê yû nhang ri. 40 Yhâng é duìnhâng zoshâng wuì gi, Hkarimela wà má ê kômù, Abigela lé, “Dawiq gi, nang lé yhâng é yhûmsing myhí kut râ ga, ngá-mòq lé, nang lé lé shui nhang ri.” ga taî akô nghut ri.
41 Abigela gi, myigùng jé shoq yhâng é myòqdong ngóm gòp luî, “Ngò gi, náng é jùn myhí nghut mù, nang lé dójaú râ nghut é htoq agó, ngá é yhûmsing é duìnhâng zoshâng wui é hkyî chi byi râ rì rì nghut nyi lhê.” ga taî ri. 42 Abigela gi, loze htoq má hân hân dòq ji luî, yhâng é duìnhâng zoshâng myiwe wuì ngo yuq le mù, Dawiq é lagyô pé eq rahá châng ló luî, Dawiq é yhûmsîng myhí dùt bê nghut ri. 43 Dawiq gi, Yezirela wà mâ é Ahino-am lé le yu é nghut mù, yháng í yùq gi, Dawiq é yhûmsîng myhí dùt bekô nghut ri. 44 Nghut kôlhang, Sholuq gi, Dawiq é yhûmsîng myhí, yhang zo byìzo Mihkala lé, Galim wà mâ é Laishi é yhang zo Palati lé byi tsô pyâm ri.