Sholuq É Chyungxe Lé Dawiq Lhoqlhut Kat É Hkyô
24
Sholuq gi, Hpilisiti byu pé lé châng hkat é mai dum taû lò jáng, “Dawiq gi, En Gedi yòso má nyi nyi ri.” ga lhom taî kyô akô nghut ri. 2 Haû mù, Sholuq gi, Isira-elaq a-myû bànshoq mai hkyin yu é byù sum hkyîng lé shuî chûng mù, Yo Lùqpyoq nàm má, Dawiq eq yhâng é byu pé lé, ê châng hô râ matú htoq e ló akô nghut ri.3 Sholuq gi, hkyô yàm mâ é sau hkup mó má jé ri; haú nâm má lùqhkyûng ralhum jòq tô ri. Yhang gi, nghê htoq pyám râ ga, haú shut wang e ri. Dawiq eq yhâng é byu pé gi, lùqhkyûng hau é ahkaû má haq lúng tô akô nghut ri. 4 Dawiq é byu pé gi, “Nang lé, Yhûmsîng Garaî èq, ‘Ngò, náng é gyè lé, náng é lòq má àp byi râ nghut lhê. Haû mù, nàng ô nau é su yhang lé kut àq.’ ga taî é dang gi, hkû-nyí jé bê nghut ri.” ga taî akô. Haú hkûn, Dawiq gi, toq mù, Sholuq é buhtâng lé, tsik za ê yâm hpyit yu ri.
5 Hau htâng, Dawiq gi, Sholuq é buhtâng lé yàm hpyit yu é yánmai, nùngngham wó nyî bê nghut ri. 6 Haû mù, yhang gi, yhâng é byu pé lé, “Haû Yhûmsîng Garaî é namngón xû bùt hui sû, ngá é yhûmsîng lé, haû su kut é eq ngá é lòq nò nhâng râ lé gi, Yhûmsîng Garai hkûm tûm pyám byi sháng gàq. Hkâsu mù gâ le, yhang gi, haû Yhûmsîng Garaî é namngón xû but é hui sû nghut ri.” ga taî ri. 7 Dawiq gi, dang haú pê èq yhâng é byu pé lé tan luî, Sholuq lé a ê htim nhâng nghut ri. Haú u, Sholuq gi, toq mù, lùqhkyûng mai htoq luî, yhâng é hkyôwuì shut e ló bê nghut ri.
8 Hau htâng, Dawiq gi, lùqhkyûng mai htoq ê luî, “Ngá é yhûmsîng hkóhkâm ê!” ga Sholuq lé ê châng wùt kat ri. Haû hkûn, Sholuq, nùnghtáng shut lhing wú kat é hkûn, Dawiq gi, yhâng é myòqdong myigùng jé shoq paî gòp tô ri. 9 Hau htâng, Dawiq gi, Sholuq lé, “‘Dawiq, náng é kâng hkyó râ haq htung ri.’ gâ é danglám lé, nàng, haî mù jíng lhê lhú? 10 Hkû-nyí, haû Yhûmsîng Garai gi, lùqhkyûng hkaû má, nang lé ngá lòq má àp byi bê nghut é lé, náng é myòq èq yhang myàng bê nghut lhê. Ra-am gi, nang lé sat àq ga ngo lé wum taî tsuq kôle, ngò gi, ‘Ngá é yhûmsîng lé, ngá é lòq èq nò nhâng râ a nghut; hkâsu mù gâ le, yhang gi, haû Yhûmsîng Garaî é namngón xû but é hui sû nghut ri.’ nghû taí luî, nang lé lhoqlhut kat é nghut lhê. 11 Ngá wa ê, ngá é lòq má chung tô é náng é buhtâng pán jàp lé wú wú aq! Ngò gi, náng é buhtâng lé za hpyit yû mù, nang lé a sat kut é nghut lhê. Ahkuî, nàng gi, ngò gumlau a toq é hkyô lé le, hai mara a shut é hkyô lé le, wó sê wó byu-myàng lo aq. Ngò gi, nang lé a shut é nghut kôlhang, nàng gi, ngo lé sat râ ga gyám nyi ri. 12 Haû Yhûmsîng Garai gi, nàng eq ngá é gyoro má jéyáng byi sháng gàq. Nàng, ngo lé kut shut é mara lé, haû Yhûmsîng Garai lató hpuq sháng gàq. Nghut kôlhang, ngá é lòq èq nang lé záng râ a nghut. 13 Myhîhpô sânghkyang má, ‘Agè ashop bâng chyáng mai agè ashop hkyô htoq lo lhê.’ gâ é bo tô é nghut mù, ngá é lòq èq nang lé záng râ a nghut.
14 Isira-elaq hkóhkâm wá nhîng, ó yùq é yánmai dui nún wún lhê lhú? Nàng gi, ó yùq lé châng hkat wún lhê lhú? Hkui mâng lé lhú? Hkôlhai lé lhú? 15 Haû Yhûmsîng Garai gi, nàng eq ngá é gyoro má, târâ agyì kut mù, târâ hpyit byi sháng gàq. Yhang, ngá é hkyô lé gôn wú mù, ngo lé magûm byi luî, náng é lòq mai ngo lé lhoqlhut yû sháng gàq.” ga taî ri.
16 Haû su ga Dawiq ban taí jáng, Sholuq gi, “Ngá zo Dawiq ê, haû gi, náng é htê nghut lhê lhú?” ga myi mù, garû ngaù bê nghut ri. 17 Hau htâng, Sholuq gi, Dawiq lé, “Nàng gi, ngá htoq je díngmán sû nghut ri. Ngò gi, nang lé a ge é dông kut kôlhang, nàng gi, ngo lé ge é dông kut bê nghut ri. 18 Nàng, ngo lé ge é hkyô kut é lé, hkû-nyí, nàng tûn shit bê nghut ri; hkâsu mù gâ le, haû Yhûmsîng Garai gi, náng é lòq má ngo lé àp byi kôlhang, nàng, ngo lé a sat pyám nghut ri. 19 Byù gi, yhûmsing é gyè lé htûng hui jáng, gyè haú lé ngón za dum nhang kat râ lhú? Hkû-nyí, nàng, ngo lé kut byî é gè hkyo é yánmai, haû Yhûmsîng Garai gi, nang lé jeju tau byi sháng gàq. 20 Nàng gi, gè gè yhang, hkóhkâm dùt râ nghut é hkyô lé le, Isira-elaq mîngdán gi, náng lòq má gîng nyì râ nghut é hkyô lé le, ngò sê lhê. 21 Ahkuî, nàng gi, ngá é awùt ashîn pé lé a sat htûm pyám râ eq, ngá wâ é up mai, ngá é myìng lé a bùt sut pyám byi râ matú, haû Yhûmsîng Garai é hí má, ngo lé dakâm àq.” ga taî ri.
22 Haû mù, Dawiq gi, Sholuq é matú dakâm bê nghut ri. Hau htâng, Sholuq gi, yhûm taû ló byùq bê; nghut kôlhang, Dawiq eq yhâng é byu pé gi, gingtîng é nghêhkaû jowò shut dòq ló bekô nghut ri.