Kila Wà Lé Dawiq Hkyi Yu É Hkyô
23
Ra-nyí lé, Dawiq gi, “Wú keq, Kila wà lé, haû Hpilisiti byu pé ê htim luî, chyârâng mâ é gùqzò muilhum pé lé lú yu nyi bum akô.” gâ é lé wó gyo jáng, 2 haû Yhûmsîng Garai lé, “Ngò, haû Hpilisiti byu pé lé, majan ê zan râ lhú?” ga myî ri.Haú hkûn, haû Yhûmsîng Garai gi, Dawiq lé, “Hpilisiti byu pé lé majan ê zan mù, Kila wà lé ê hkyi yù àq.” ga tû taî ri.
3 Nghut kôlhang, Dawiq é byu pé gi, yhang lé, “Ngá-nhúng gi, Yudaq mau má lháng gyùq mù za rû nyi nyi le nhîng, Kila wà shut ê mù, Hpilisiti gyè hpúng mó lé majan ê zan râ gi, je riyhang gyùq chiq hpo a nghut lhú?” ga taî akô nghut ri.
4 Dawiq gi, Yhûmsîng Garai lé radàm dum myi jáng, haû Yhûmsîng Garai gi, yhang lé, “Kila wà shut ê àq; hkâsu mù gâ le, Ngò, haû Hpilisiti byu pé lé náng lòq má àp byi râ nghut lhê.” ga tû taî ri. 5 Haû mù, Dawiq eq yhâng é byu pé gi, Kila wà shut gyó ê kômù, Hpilisiti byu pé lé majan ê zan kôluî, shigu gaunyhaû pé lé kôn yu pyám byi kômù, Hpilisiti byu pé lé sat kyop pyám kôluî, Kila wá mâ é byu pé lé wó hkyi yù bekô nghut ri. 6 (Ahimelek é yhang zo Abi-ahta gi, Kila wà má Dawiq chyáng hpang lé lo é hkûn, hkyangjong bu-kó le yu lé lo ri.)
Dawiq Lé Sholuq Châng Hkat É Hkyô
7 Sholuq gi, Kila wà má Dawiq jé nyi tô é hkyô lé wó gyo jáng, “Garai Gasang gi, Dawiq lé ngá é lòq má àp pyám bê nghut ri. Hkâsu mù gâ le, yhang gi, wà wàng hkum eq hkumkyáng pé bo é wàhkaû shut wàng bê nghut mù, yhûmsing gùng yhûmsîng htóng lhûng tô é dùt bê nghut ri.” ga taî ri. 8 Haû mù, Sholuq gi, majan zan râ matú, Kila wà shut gyó ê mù, Dawiq eq yhâng é byu pé lé ê lóm to râ ga, yhâng é gyè hpúng bànshoq lé wùt tsîng yu ri.
9 Dawiq gi, Sholuq myìt goí bò mù, yhang lé haq gyám nyi é hkyô lé wó sé jáng, hkyangjong Abi-ahta lé, “Hkyangjong bu-kó yu lò àq.” ga taî ri. 10 Hau htâng, Dawiq gi, “Isira-elaq é Garai Gasang, Yhûmsîng Garai ê, náng é duìnhâng zoshâng ngò gi, Sholuq, Kila wà má lé mù, ngá é yánmai, haú wâ lé lhoqhtên pyám râ hen nyi é hkyô lé, hkyak wó gyo bê nghut lhê. 11 Kila wà byù wuì gi, ngo lé, Sholuq é lòq má àp byî pyám kôrâ nghut lhê lhú? Náng é duìnhâng zoshâng wó gyô é eq rajung za, Sholuq gi, gyó lé lô râ nghut lhê lhú? Isira-elaq é Garai Gasang, Yhûmsîng Garai ê, náng é duìnhâng zoshâng ngo lé taî kyo laq.” ga taî ri.
Haú hkûn, haû Yhûmsîng Garai gi, “Yhang gyó lé lô râ nghut lhê.” ga taî ri.
12 Dawiq gi, “Ngò eq ngá é byu pé lé, Kila wà byù wui èq, Sholuq é lòq má àp byî pyám kôrâ nghut lhê lhú?” ga dum myi jáng, haû Yhûmsîng Garai gi, “Yhángmòq àp byî pyám kôrâ nghut lhê.” ga taî ri.
13 Haû mù, Dawiq eq yhâng é byù hkyuq shô yùq kô gi, Kila wà mai htoq mù, jowò rawò mai rawò shut htòt lhing wún bekô nghut ri. Sholuq gi, Dawiq, Kila wà mai hpang htoq ló byùq bê hkyô lé wó gyo jáng, haû Kila wà shut a ê lo kut bê nghut ri.
14 Dawiq gi, yòso mâ é gingtîng é nghêhkaû jowò pé eq Zihpa yòso bùm pé má nyi nyi ri. Sholuq gi, yhang lé, nyí wuî châng hô kôlhang, Garai Gasang gi, Sholuq é lòq má, Dawiq lé a àp byi nghut ri.
15 Dawiq gi, Zihpa yòso mâ é Horesha jowò má jé nyi tô é hkûn, yhâng lé sat pyám râ ga, Sholuq htoq lé lo é lé wó sê ri. 16 Haú hkûn, Sholuq é yhang zo Yonahtan gi, Horesha má nyi é Dawiq chyáng ê mù, Garai Gasâng chyáng je wó nghêhkau nyì râ matú wum-o ê byî ri. 17 Yonahtan gi, “Hkâgyùq; ngá wa Sholuq é lòq gi, nang lé wó záng râ a nghut. Nàng gi, Isira-elaq é hkóhkâm dùt râ nghut mù, ngò gi, náng é a-ô mâ é zau dùt râ nghut lhê; haú hkyô lé, ngá wa Sholuq lháng sê tô ri.” ga taî ri. 18 Yhángnhik gi, Yhûmsîng Garaî é hí má dangshikaq chôm to bekô nghut ri. Hau htâng, Yonahtan gi, yhûm shut taû ló byùq bê; Dawiq kúm gi, Horesha jowò má nyi gyó ri.
19 Zihpa byu pé gi, Gibe-a wà má nyi é Sholuq chyáng dòq ê kômù, “Dawiq gi, ngá-mòq é mau hkaû, Yashimun jowo é maupyî, Hahkila kong mâ é Horesha má jòq é gingtîng é nghêhkaû jowò má haq nyi wún lhê, a nghut lhí? 20 Haû mù, hkóhkâm hpó ê, nàng, yhang lé ho nyi é eq rajung za gyó lé lô àq. Yhang lé, nàng hkóhkam é lòq má àp byi râ gi, ngá-mòq é wò nghut sháng.” ga taî akô.
21 Haú hkûn, Sholuq gi, “Núngmòq, ngo lé nhik hkyik byi kô é yánmai, haû Yhûmsîng Garai gi, núngmòq lé shimân byi sháng gàq. 22 Ló mù, rago ló hen lajang keq. Dawiq lhaq haq nyi é jowò lé le, haú jowò má yhang lé ó yùq myàng é lé le, ló gôn yù keq. Yhang gi, gyai zen sû nghut lhê ga, ngo lé taî kyô bum akô nghut ri. 23 Haû mù, yhang haq nyi é jowò bànshoq lé rago wú ge to luî, ngá chyáng dum lé lô keq. Haû jáng, ngò, núngmòq eq rahá bo cháng râ nghut lhê. Yhang, jowò haú pé má nyi tô é nghut jáng, Yudaq a-myû koq bànshoq mai, ngò, yhang lé ho htoq yû râ nghut lhê.” ga tû taî ri.
24 Haû mù, yhángmòq gi, toq luî, Sholuq é hí má, Zihpa shut htoq e ló láng bekô nghut ri. Ahkuî, Dawiq eq yhâng é byu pé gi, Ma-on yòso, Yeshimun maupyî mâ é Araba pá má nyi bum akô nghut ri. 25 Sholuq eq yhâng é byu pé gi, Dawiq lé ê ho akô. Haú hkyô lé, Dawiq wó gyo jáng, yhang gi, lungmó zîng shut gyó ê mù, Ma-on yòso má haq nyi tô ri. Haú hkyô lé, Sholuq wó gyo jáng, yhang gi, Ma-on yòso má Dawiq lé châng hkat ho ri.
26 Sholuq gi, bùm ralùt shut sô lé lô jáng, Dawiq eq yhâng é byu pé gi, gólùt shut, Sholuq chyáng mai wó hpang lùt râ matú, han nyi akô nghut ri. Sholuq eq yhâng é gyèzô pé gi, chyâng htèp lô kômù, Dawiq eq yhâng é byu pé lé wó chyup yù râ za nghut é hkûn, 27 lùdang dé sû rayùq gi, Sholuq chyáng lé jé mù, “Hân lò keq! Hpilisiti byu pé gi, ngá-nhûng é maumyî má majan zân wang lo nyi bum bekô.” ga lé kyô ri. 28 Haû mù, Sholuq gi, Dawiq lé a châng hkat lô é za, Hpilisiti byu pé lé ló htuqhtíng râ matú, htoq ló byùq bê nghut ri. Haû mù, jowò haú lé, Sela Hamalekota ga myhîng tô akô nghut ri. 29 Dawiq gi, haú jowò mai dòq ló mù, En Gedi mau mâ é gingtîng é nghêhkaû jowò má nyi to bê nghut ri.