Adulam Lùqhkyûng Eq Mizipa Wà Má Dawiq Jé É Hkyô
22
Dawiq gi, Gahta wà mai htoq mù, Adulam lùqhkyûng má hpang jé ri. Haú hkyô lé, yhang mâng pé eq yhâng wâ é yhûmbyù wuì wó gyo kôjáng, yhâng chyáng gyó e akô nghut ri. 2 Zìk zo huî é bang, chyîn dap é bang eq nhik no nyì bang bànshoq gi, yhâng chyáng lé zùp zîng bùm kô é nghut mù, yhang gi, haú bâng é zau dùt bê nghut ri. Yhang eq rahá nghut nyi e byù gi, myi shô yùq kô bo ri.3 Dawiq gi, haú jowò mai Moba mau mâ é Mizipa wà má ló mù, Moba hkóhkâm lé, “Ngo lé, Garai Gasang haî kut byi râ lé ngò wó sê é hkûn jé shoq, ngá nu eq ngá wâ lé, náng chyáng lé byam nyi to nhâng laq.” ga taî ri. 4 Haû mù, Dawiq gi, yhang, gingtîng é lùqhkyûng má nyi tô é ayòq gón má, yhâng nu eq yhâng wa lé, Moba hkóhkam chyáng àp tô ri.
5 Nghut kôlhang, myìqhtoi Gat gi, Dawiq lé, “Gingtîng é lùqhkyûng hkaû má hkâ-nyi to lo. Yudaq mau shut ló aq.” ga taî ri. Haû mù, Dawiq gi, haû mai htoq luî, Heret yòso má ló nyi tô ri.
Sholuq, Noba Wà Mâ É Hkyangjông Pé Lé Sat Pyâm É Hkyô
6 Ahkuî, Sholuq gi, Dawiq eq yhâng é byu pé nyi é hkyô byông htoq lo é lé wó gyô ri. Haû mù, yhang gi, yhâng é lòq má lhâm chung to mù, Gibe-a wà mâ é kong htoq má yùq é wàqmyòq gàm wang má zung tô é hkûn, yhâng é zaugun sûwún wuî bànshoq le, yhâng é lhînghkyùq má yàp bum akô nghut ri. 7 Sholuq gi, haú bang lé, “Ben-yamin a-myû wuì ê, gyô wú keq! Yese é yhang zo gi, núngmòq bànshoq bang lé, yohtung eq tsibyiq hkyâm pé wó byi nhô ngam akô lhú? Yhang gi, núngmòq bànshoq bang lé, rahkyîng ùp zau eq rashô ùp zau pé wó dùt nhâng nhô ngam akô lhú? 8 Haû mù, núngmòq bànshoq bang gi, ngo lé gumlau toq nyi lhê, a nghut kó lhú? Yese é yhang zo eq ngá zo dangshikaq tô lhum kô é hkûn lé le, núngmòq ó yùq le, ngo lé a myìt byi kô é htoq agó, ngá é duìnhâng zoshâng hkû-nyí kut nyi é su, ngo lé htim râ matú, ngá zo, yhang lé haq lhom tó nhang é hkyô lé le, núngmòq ó yùq le, ngo lé a taî kyo kó nghut ri.” ga taî ri.
9 Nghut kôlhang, Sholuq é zaugun sûwún wuî eq rahá yàp tô é, Edom byù Doga gi, “Noba wà má nyi é, Ahitup é yhang zo Ahimelek chyáng, Yese é yhang zo lé é lé, ngò myang ri. 10 Haú hkûn, Ahimelek gi, Dawiq é matú, haû Yhûmsîng Garaî chyáng myî wú mù, zoshuq lé le, Hpilisiti byù Goli-at é shâm lé le, byî kat ri.” ga taî kyô ri.
11 Hau htâng, hkóhkâm hpó gi, Ahitup é yhang zo hkyangjong Ahimelek eq, Noba wà má nyi é, yhâng wâ é yhûmbyù wuì nghut é hkyangjông pé lé, ê jî nhang é nghut mù, haú bang bànshoq gi, hkóhkâm hpô chyáng lé lo bum akô nghut ri. 12 Sholuq gi, “Ahitup é yhang zo nàng, ahkuî gyô wú aq.” ga taî jáng, Ahimelek gi, “Ngá yhûmsîng ê, gyô nyi lhê.” ga tû taî ri.
13 Sholuq gi, yhang lé, “Haî mù, nàng eq Yese yhang zo gi, ngo lé gumlau toq akô lhú? Haî mù, yhang gi, hkû-nyí kut nyi é su, ngo lé gumlau toq nhang é eq ngo lé htim râ matú haq lhom to nhâng râ dông, yhâng é matú, nàng, Garai Gasâng chyáng myi byi mù, zoshuq eq shâm lé byî kat é lhú?” ga taî ri.
14 Ahimelek gi, hkóhkâm hpó lé, “Náng é duìnhâng zoshâng wuì bànshoq má, Dawiq su jujúm é sû, ó yùq nyi ri lhú? Yhang gi, nàng hkóhkam é zo-moq hpó le nghut é htoq agó, náng é chyungxe zúng zau le nghut mù, hkóhkam é yhûmbyù wuì má, hkúngga hpautap é je yhang hui sû nghut ri. 15 Ngò, yhâng é matú, Garai Gasâng chyáng haú nyí myi byî é gi, sânghî dàm za a nghut lo! Hkóhkâm gi, náng é duìnhâng zoshâng ngò eq ngá é yhûmbyù wuì mâ é hká yùq lé lháng, mara a hûn sháng gàq. Hkâsu mù gâ le, náng é duìnhâng zoshâng ngò gi, haú hkyô eq séng mù, haî lháng a sê é nghut lhê.” ga tû taî ri.
16 Nghut kôlhang, hkóhkâm gi, “Ahimelek ê, nàng le, náng wâ é yhûmbyù wuì lhúnglhâng bang le, gè gè yhang shî ra kôrâ nghut lhê.” ga taî ri.
17 Hau htâng hkóhkâm gi, yhâng nàm má yàp tô é zúng é gyèzô pé lé, “Haû Yhûmsîng Garaî é hkyangjông pé gi, Dawiq é hkyam shut dàp kômù, yhang hpang byùq é hkyô lé sê to kôlhang, ngo lé a taî kyo kô é yánmai, yhángmòq lé yùq sat pyám keq.” ga hkunmó hkyô ri. Nghut kôlhang, hkóhkam é duìnhâng zoshâng wuì gi, haû Yhûmsîng Garaî é hkyangjông pé lé, a wám sat dùt nyi bum akô nghut ri.
18 Hau htâng, hkóhkâm gi, Doga lé, “Haû hkyangjông pé lé, nàng yùq sat pyám aq.” ga hkunmó hkyô ri. Haû mù, Edom byù Doga gi, yhángmòq lé sat pyám bê nghut ri. Haú nyí, yhang gi, nú nhâm é hkyangjong bu-kó wùt é byù 85 yùq lé sat pyám bê nghut ri. 19 Yhang gi, hkyangjông pê é Noba wà lé le, ê htim mù, haú mâ é yùqgè myiwe wuì, zoshâng wuì, nyheqnú pé, no myang pé eq sau pé lé, sham èq sat pyám bê nghut ri.
20 Nghut kôlhang, Ahitup é yhang zo Ahimelek é yhang zo Abi-ahta gi, wó lùt mù, Dawiq chyáng hpang ê bê nghut ri. 21 Yhang gi, haû Yhûmsîng Garaî é hkyangjông pé lé, Sholuq èq sat pyâm é hkyô, Dawiq lé taî kyô ri. 22 Haú hkûn, Dawiq gi, Abi-ahta lé, “Haú nyí, Edom byù Doga lé, haú má myang é hkûn mai yhang, Sholuq lé hkyak ê taî kyo berâ nghut lhê nghû, ngò sê to gû nghut bê. Náng wâ é yhûmbyù wuì lhúnglhâng bang shi byùq é gi, ngò sat nhang é dông dùt bê nghut ri. 23 Ngò eq rahá nyì gòq; hkâgyùq. Náng é chyungxe lé gyám é sû gi, ngá é chyungxe lé le gyám é sû nghut ri. Nàng gi, ngò eq rahá nghut jáng, wó lùt râ nghut lhê.” ga taî ri.