Noba Wà Má Dawiq Jé É Hkyô
21
Dawiq gi, Noba wà má nyi é hkyangjong Ahimelek chyáng e ri. Ahimelek gi, Dawiq lé hui jáng, gyùq nán luî, “Nàng gi, luzúm le a bo é, rayùq baú, haî mù lé é lhú?” ga myî ri.2 Dawiq gi, hkyangjong Ahimelek lé, “Hkóhkâm hpó gi, ngo lé ahkyàk é múzó ralhum àp mù, ‘Ngò, nang lé wùn wàq nhang é múzó hkyô lé, ó yùq lé le hkâsé nhâng.’ gâ sang kat ri. Haû mù, rawò wò má ngò eq hui sháng nghû, ngá é byu pé lé ngò taî to bê nghut lhê. 3 Ahkuî, náng chyáng haî jòq ri lhú? Mùk ngo long nghut nghut, nàng myang ho é gótû haî nghut nghut, ngo lé byî laq.” ga tû taî ri.
4 Haú hkûn, hkyangjong hpó gi, Dawiq lé, “Ngá chyáng mâyû byù zo râ mùk gi, a jòq; chyoiyúng é mùk za ru jòq lhê; náng é byu pé, myiwe wuì eq gùngsho a zùm kô é nghut le gi, wó byî ri.” ga tû taî ri.
5 Dawiq gi, “Gè gè yhang, laî lò bê shî sum nyí má, ngá-mòq, myiwe eq wê gâng nyì bê nghut lhê. Mâyû é múzó lé ngò wùn wàq htoq ló é hkûn má lháng, ngá é byu pê é zè gi, sân-yúng lhê. Hkû-nyí gi, je riyhang sân-yúng râ a nghut lhí!” ga tû taî ri. 6 Haû mù, hkyangjong hpó gi, Yhûmsîng Garaî é hí má Tô Shit é Mùk mai lai luî, gótû byi râ a jòq é yánmai, Dawiq lé, chyoiyúng é mùk haû byî ri. Haú nyí yu pyâm é mùk hkô má, nyê é mùk asik htaî nhong to bê nghut ri.
7 Haú nyí má, Sholuq é duìnhâng zoshâng wuì mâ é rayùq gi, haû Yhûmsîng Garaî hí má nyi tô ri. Yhang gi, Sholuq é sau zúng bâng é ushuq, Edom byù Doga nghut ri.
8 Dawiq gi, Ahimelek lé, “Náng chyáng shâm lhâm a jòq lhú? Ngò gi, hkóhkam é múzó lé hân yhang a kut a ge é yánmai, ngá é shâm eq gótû gyèzè lháng a wó yu chung é nghut lhê.” ga taî ri.
9 Hkyangjong hpó gi, “Ela langhkaû má, nàng sat pyâm é Hpilisiti byù Goli-at é shâm gi, jòq lhê. Haú lé, pân èq htup mù, hkyangjong bu-kô é nùnghtáng má tô tô lhê. Nàng, haú lé ô jáng gi, yu chûng aq; shâm haú hkyam mai lai luî, gótû a jòq lo.” ga tû taî ri. Dawiq gi, “Haû eq du é shâm a jòq lo; sham haû ngo lé byi aq.” ga taî ri.
Gahta Wà Má Dawiq Jé É Hkyô
10 Haú nyí má, Dawiq gi, Sholuq lé hpâng mù, Gat hkóhkâm Ahkisha chyáng hpang e ri. 11 Nghut kôlhang, Ahkisha é duìnhâng zoshâng wuì gi, “Shí yùq gi, Isira-elaq byu pê é Hkóhkâm Dawiq a nghut lhí? Shiwa byu pé mai,
‘Sholuq sat é gi, hkyîng dông nghut, Dawiq sat é gi, mun dông dùt.’ ga,
gó uchyang mahkôn hkôn kô é gi, yhang a nghut lhí?” ga, yhang lé taî akô nghut ri.
12 Dawiq gi, haû dang pé lé myìt má sê gyô kat luî, Gat hkóhkâm Ahkisha lé gyai yhang gyùq bê nghut ri. 13 Haû mù, yhang gi, yhángmòq é hí má, myìt a gying sû su kut mhaû ri; yhángmòq é lòqhkaû má nghut nyi é u lé, yhang gi, byùwu su kut mhaú luî, wâng hkum pé má hkyek mhak nyì mù, sôkan lé, yhâng é nhutmui mai achaq achyut yui gyó nhang nyi ri.
14 Ahkisha gi, yhâng é duìnhâng zoshâng wui lé, “Byù haú lé wú wú keq! Yhang gi, myìt a gying sû nghut ri! Haî mù, yhang lé ngá chyáng shuî wang lo akô lhú? 15 Ngá chyáng byùwu râ nyi ri nghû luî, ngá é hí má îsu wû shit râ matú, byùwu shî lé shuî wang lo akô lhú? Byùwu shî lé, ngá é yhum má a shuî wàng a gè kó lhú?” ga taî ri.