Dawiq Eq Yonahtan É Hkyô
20
Haú hkûn, Dawiq gi, Rama wà mó eq sêng é Nayut wà mai hpang htoq ló mù, Yonahtan chyáng ê luî, yhang lé, “Ngò haî wá kut shut bê lhú? Ngá é mara gi, haî nghut lhê lhú? Ngò gi, náng wa lé haî kut shut luî, yhang, ngá é chyungxe lé gyám shi-kùt nyi lhê lhú?” ga myî ri.2 Yonahtan gi, “Haû su a nghut! Nàng a shî râ nghut lhê! Gyô wú aq, ngá wa gi, múzó tiq é kô é haî nghut kôle, ngo lé a taî kyô é a kut wú. Yhang gi, haî mù, ngo lé haú hkyô zaú to râ lhú? Haû gi, têng é a nghut.” ga tû taî ri.
3 Nghut kôlhang, Dawiq gi, “Ngò, náng é hí má myòqdong wó sû nghut é hkyô lé, náng wa rago za sê é nghut luî, yhang gi, ‘Yonahtan yón kuq byùq âbe, shí hkyô yhang lé a ge sé nhâng.’ ga, yhânggùng yhang taî ri. Gè gè yhang, haû Yhûmsîng Garai le, nàng le, rû dui nyi é eq rajung za, ngò eq shî nò hkyô gi, hkyî rabyè che za ru wê lhûm tô alô nghut ri.” ga dakâm dang taî ri.
4 Yonahtan gi, Dawiq lé, “Nàng, ngo lé kut nhâng nau é haî lé le, ngò kut byi râ nghut lhê.” ga taî ri.
5 Haû mù, Dawiq gi, “Wú aq; nàpmá gi, Lhôxan Lhôsik poî nghut mù, ngò gi, hkóhkâm eq rahá zùng zo râ âng lhê. Nghut kôlhang, ngo gi, sânghpe-nyí myínhtâng jé shoq, yòso má ê haq to shi bá. 6 Ngò a nyi tô é lé náng wa sé jáng, yhang lé, ‘Dawiq gi, yhâng é a-myû koq bànshoq bâng é matú, zàn wui lhê é hkungga nhông buìnyì jé é yánmai, yhâng é yhummau, Betlehem wà má hân byam ló râ ga, zùq zùq ahkáng dûng chung ri.’ nghû taí aq. 7 Haú hkûn, náng wa, ‘Nghut bê.’ ga taî lò jáng, náng é duìnhâng zoshâng ngò lùt bê nghut lhê. Nghut kôlhang, yhang nhikmó-yô lo é nghut jáng, yhang, ngo lé a ge é hkyô kut râ matú myìt to bê lé, nàng teng za sé lo aq. 8 Haû mù, nàng gi, náng é duìnhâng zoshâng ngo lé shogyo nhikmyîn yù laq. Haî mù gâ le, nàng gi, haû Yhûmsîng Garaî é hí má, náng é duìnhâng zoshâng ngo lé dangshikaq shuî tô é nghut lhê. Ngò mara bo é nghut jáng, nàng yhang ngo lé sat aq! Haî mù, ngo lé náng wâ lòq má àp byi râ lhú?” ga taî ri.
9 Yonahtan gi, “Haú su a nghut! Ngá wa, nang lé a ge é hkyô kut râ matú myìt to bê lé ngò ru sê le gi, nang lé a taî kyô é nyi to râ lhú?” ga taî ri.
10 Haú hkûn, Dawiq gi, “Náng wa, nang lé, htân htân tû taî é nghut jáng, ngo lé, ó yùq hkyang lé shit kyo râ lhú?” ga myî ri.
11 Yonahtan gi, “Sâ, yòso shut ê gòq.” ga taî ri. Haû mù, yhángnhik gi, yòso shut rahá e ló akô nghut ri.
12 Hau htâng, Yonahtan gi, Dawiq lé, “Isira-elaq byu pê é Garai Gasang, haû Yhûmsîng Garai gi, sàksé nghut sháng gàq. Nàpmá, a nghut jáng, sânghpe-nyí shí u lé, ngò, teng za ngá wa lé danglap làp wú râ nghut lhê! Yhang gi, náng ahtoq má ge é i-myìt bo é nghut jáng, ngò, náng lé kyô kat râ nghut lhê. 13 Nghut kôlhang, ngá wa gi, nang lé a ge é hkyô kut râ matú myìt tô é nghut jáng, ngò, haú hkyô lé, nang lé a kyô é htoq agó, gaû é hkyô shut le a wó nhang htoq kat é nghut le gi, haû Yhûmsîng Garai, ngo lé htân htân jéyáng sháng gàq. Haû Yhûmsîng Garai gi, ngá wa eq rahá nghut nyi wú é eq rajung za, nàng eq le rahá nghut nyî sháng gàq ô. 14 Nàng gi, ngò chyungxe rû dui nyi é u má, ngo lé, Yhûmsîng Garaî é ru gîng nyi é jeju shit nyî râ za a nghut, 15 ngò shi htâng má, haû Yhûmsîng Garaî èq, náng é gyè pé lé myìdàm htoq mai chyut kut pyâm é hkûn le, ngá é i-kun byu pé lé, náng é ru gîng nyi é jeju shit byi laq.” ga taî ri.
16 Haû mù, Yonahtan gi, Dawiq é yhûmbyù wuì eq dangshikaq to mù, “Dangshikaq haú lé lhoqhtên pyám jáng gi, Dawiq lé gyè kut bâng é lòq dông, haû Yhûmsîng Garai lató hpuq sháng gàq.” ga taî ri. 17 Yonahtan gi, yhâng gùng lé chyit é su, Dawiq lé chyit é nghut mù, chyit mó noq é myìt mai, yhâng é dangshikaq lé dum lhoqging nhang ri.
18 Hau htâng, Yonahtan gi, Dawiq lé, “Nàpmá gi, Lhôxan Lhôsik poî nghut bê. Náng é zùng jang mân to râ nghut é yánmai, nàng a nyi é hkyô lé sé bekó râ nghut lhê. 19 Sânghpe-nyí jé shoq haq nyi to mù, hí lé, wuîhke hkyô htoq lo é hkûn, nàng haq nyi lai lo é jowò shut hân gyó ló luî, Ezela lùqmó nâm má ló láng to aq. 20 Ngò gi, haú shut wìng mú, bìk é su kut luî, lùqmó cham hau é a-nàm má, myoshi sum hkat bìk kat râ nghut lhê. 21 Hau htâng, ngò gi, duìnhâng zoshâng rayùq lé, ‘Myoshi ê ho lo aq.’ nghû taí mù, nhang kat râ nghut lhê. Ngò gi, yhang lé, ‘Wú aq, haû myoshi pé gi, náng nâm má lèq tô ri; shî má gùq lò àq.’ nghû taî é nghut jáng, nàng gi, htoq lò àq; hkâsu mù gâ le, haû Yhûmsîng Garai rû dui nyi é eq rajung za, náng chyáng gyùq chiq hpo a jòq é nghut mù, nàng haî a ra lo nghut ri. 22 Nghut kôlhang, ngò gi, duìnhâng zoshâng haû lé, ‘Wú aq, haû myoshi pé gi, náng é hí shut lèq tô ri.’ nghû taî é nghut jáng, haû Yhûmsîng Garai gi, nang lé htoq ló nhang bê nghut é yánmai, nàng gi, htoq ló lo àq hkoi. 23 Haû Yhûmsîng Garai gi, ahkuî, nàng eq ngò taî lhûm é hkyô má, ngá-nhik é gyoro mâ é sàksé ahtum abyùq nghut nyî sháng gàq.” ga taî ri.
24 Haû mù, Dawiq gi, yòso má ê haq nyi tô ri. Haû Lhôxan Lhôsik poî jé jáng, hkóhkâm gi, zoshuq zo râ ga zung tô ri. 25 Hkóhkâm gi, ayang kut nyi é eq rajung za, xêwâm nàm má zung ri. Yonahtan gi, tû-tap má zûng mù,a Apna gi, Sholuq é nàm má zung ri. Nghut kôlhang, Dawiq é zùng jang gi, mân tô ri. 26 Sholuq kúm gi, haú nyí haî le a taí kut ri. Hkâsu mù gâ le, yhang gi, “Htûngli dông a sansêng é hkyô rajung jung, Dawiq chyáng dùt berâ nghut lhê; yhang gi, gè gè yhang a sansêng lo.” ga myìt yu é yánmai nghut ri. 27 Nghut kôlhang, htang nyí, lhôxan í nyí nyí má, Dawiq é zùng jang gi, ru mân tô é nghut mù, Sholuq gi, yhang zo Yonahtan lé, “Haû Yese é yhang zo gi, anyí-nap le, hkû-nyí le, haî mù zoshuq a lé zo kut lhê lhú?” ga myî ri.
28 Yonahtan gi, “Dawiq, Betlehem wà má ló râ ga, ngo lé zùq zùq ahkáng dûng chung ri. 29 Yhang gi, ‘Ngo lé, ló râ ahkáng byi kat laq; hkâsu mù gâ le, ngá é yhûmbyù wuì gi, wà má hkungga nhông poî kut nyî kô é nghut kômù, haû má ló lôm râ matú, ngo lé ngá mang pying kat ri. Ngò, náng é hí má myòqdong wó é nghut jáng, ngá mâng pé eq ló hui râ matú, ngo lé ló nhâng laq.’ ga taî ri. Haû mù, yhang gi, hkóhkam é zohpoq má a jé é nghut lhê.” ga tû taî ri.
30 Haú hkûn, Sholuq gi, Yonahtan lé nhikmó-yo mù, “Nàng gi, myìt goí myìt kup bo é gumlau myhî é yhang zo nghut ri myhî-nhung! Náng gùng lé le, nang lé hku kat é înu lé le, hoq lhoqhpu mù, Yese é yhang zô hkyam shut dàp nyi é lé, ngò a sé nhô ngam ri lhú? 31 Yese é yhang zo, myìdàm htoq má chyungxe rû dui nyì nyì gi, nàng le, náng é mîngdán le, wó gingtîng nyì râ a nghut. Ahkuî, yhang lé, ngá chyáng ê shuî lò nhâng àq; yhang gi, shî yhang shî râ lhê!” ga taî ri.
32 Yonahtan gi, yhâng wa lé, “Dawiq gi, haî mù shî râ dùt ri lhú? Yhang haî kut shut bê lhú?” ga myî ri. 33 Nghut kôlhang, Sholuq gi, Yonahtan lé gun sat râ ga, yhâng é lhâm gun kat ri. Haú hkûn, Yonahtan gi, Dawiq lé, yhâng wa sat nau nyi é hkyô lé sé bê nghut ri.
34 Yonahtan gi, nhikmó-yô é eq zohpoq mai toq ló byùq ri; haû lhôxan í nyí nyí má, yhang gi, zoshuq a zo lo kut ri; haî mù gâ le, yhang gi, yhâng wâ èq Dawiq lé hoq hpu nhang nyì luî, Dawiq é matú bo yón é yánmai nghut ri.
35 Htang nàpkyó, Yonahtan gi, Dawiq eq huî lhum râ matú, ding lhûm tô é eq rajung za, zoshâng zo rayùq lé shuî chûng mù, yòso shut htoq ê luî, 36 zoshâng zo haú lé, “Nàng, din ê mù, ngò bìk kat é myoshi lé ê châng hô aq.” ga taî ri. Haû mù, yhang gi, zoshâng haû din e ló jáng, yhang htoq lai shoq myoshi rahkat châng bìk kat ri. 37 Zoshâng haû, Yonahtan bìk é myoshi gyó é jowò má jé jáng, Yonahtan gi, yhang lé, “Myoshi gi, náng é hí má a nghut lhú? 38 Dìn aq; yàng yàng kut àq! Hkâ-nô nyì!” ga châng garû taî ri. Zoshâng haû le, myoshi gùq chûng mù, yhâng é yhûmsîng hpô chyáng dum taû lò bê nghut ri. 39 (Zoshâng zo haû gi, haú hkyô haî nghut é lé a sê; Yonahtan eq Dawiq za sê ri.) 40 Hau htâng, Yonahtan gi, zoshâng zo haú lé, yhâng é lai myoshi pé lé àp byi mù, “Shí pé lé wà shut wàq ló aq.” ga taî ri.
41 Zoshâng haû ló byùq é htâng má, Dawiq gi, lùqmó é maupyî hkyam mai htoq lò mù, Yonahtan é hí má, yhâng é myòqdong lé, myigùng jé shoq shoq sum dâm ngóm gòp ri. Hau htâng, yhángnhik gi, rayùq eq rayùq bo-puq puq lhum luî, ngau akô; Dawiq gi, je riyhang ngau ri.
42 Yonahtan gi, Dawiq lé, “‘Haû Yhûmsîng Garai gi, nàng eq ngá é gyoro má le, náng é awùt ashín eq ngá é awùt ashín pê é gyoro má le, ahtum abyùq é sàksé nghut nyì sháng gàq.’ nghû, haû Yhûmsîng Garaî é myìng lang luî, ngá-nhik rayùq eq rayùq dâkam to bê nghut é yánmai, ngón za ló àq hkoi!” ga taî ri. Haû mù, Dawiq gi, ló byùq bê nghut ri; Yonahtan le, wà shut taû ló bê nghut ri.