Dawiq Lé Sholuq Sat Shi-kùt É Hkyô
19
Sholuq gi, Dawiq lé sat râ matú, yhang zo Yonahtan eq duìnhâng zoshâng wuì bànshoq lé taî tô ri. Nghut kôlhang, Yonahtan gi, Dawiq lé gyai yhang chyit é nghut mù, yhang lé, 2 “Ngá wa Sholuq gi, nang lé sat râ matú hkyô ho nyì bê. Nàpkyó, nàng sidìq mù, gaû é jowò má ê haq nyi to aq. 3 Ngò gi, htoq ê mù, nàng haq nyi tô é yòso má, ngá wa eq rahá yàp to luî, náng é hkyô, yhang lé taî kyo râ. Ngò wó sê yu é hkyô lé le, nang lé taî kyo râ nghut lhê.” ga taî ri.4 Yonahtan gi, yhâng wa Sholuq lé, Dawiq ge é hkyô taî kyo mù, yhang lé, “Hkóhkâm gi, yhâng é duìnhâng zoshâng Dawiq lé a shut sháng gàq; yhang gi, nang lé a shut wú é nghut lhê. Yhang kut é jeju gi, náng é ahtoq má gyai yhang kô nyi ri. 5 Yhang gi, Hpilisiti hpó lé sat pyâm é hkûn, yhûmsing é chyungxe lé lháng a ha bun nghut ri. Haû Yhûmsîng Garai gi, Isira-elaq byu pé lé ûngmyuq hkyô mó byî é nghut luî, nàng gi, haú lé myàng mù, gabú é nghut lhê mhaî. Haû sû é wá, nàng gi, haî mù, mara a bo é byù Dawiq lé, jumgú má sat pyám nau nyi lhê lhú?” ga taî ri.
6 Sholuq gi, Yonahtan é dang lé gyo mù, “Haû Yhûmsîng Garai rû dui nyi é eq rajung za, Dawiq lé sat râ a nghut.” ga dâkam ri.
7 Haû mù, Yonahtan gi, Dawiq lé ji yù luî, yhánghpe taî lhûm é dang bànshoq lé taî kyô ri. Hau htâng, yhang gi, Dawiq lé Sholuq chyáng shuî ló é nghut mù, Dawiq gi, hí lhê su, Sholuq eq rahá dum nyi nyì bê nghut ri.
8 Majan radàm dum htoq lô mù, Dawiq gi, Hpilisiti byu pé lé majan htoq zân ri. Yhang gi, yhángmòq lé, yhâng é hí mai hpang ló byùq bum shoq, wum mó o mó èq zân ri.
9 Nghut kôlhang, ra-nyí lé, Sholuq gi, yhâng é lòq má shâm lhâm chûng mù, yhâng é hkóhkâm yhûm mó hkaû má zung tô é hkûn, haû Yhûmsîng Garaî chyáng mâ é ashop é nàt gang gi, yhâng chyáng dum jé bê nghut ri. Dawiq gi, tíng bàt ngón byî nyi é u lé, 10 Sholuq gi, yhâng é lham èq Dawiq lé xêwâm má gun kyâng tap pyám râ matú, lhâm gun kat ri; nghut kôlhang, Dawiq gi, wó huî pyâm é nghut mù, Sholuq é lhâm haû gi, xêwâm má ló zùq to bê. Haú myîn, Dawiq gi, rago za wó hpang lùt bê nghut ri.
11 Sholuq gi, Dawiq é yhûm lé wú zúng râ eq htang nàpkyó yhang lé wó sat pyám râ matú byù nhang kat ri. Nghut kôlhang, Dawiq é yhûmsîng myhí Mihkala gi, yhang lé, “Nàng, chyungxe lùt râ matú, hkû-myîn a hpang é nghut le gi, nàpmá sat hui râ nghut lhê.” ga sidìq byî ri. 12 Haû mù, Mihkala gi, Dawiq lé hkohot mai nhang hkyô kat é nghut mù, Dawiq gi, wó hpang ló byùq bê nghut ri. 13 Hau htâng, Mihkala gi, terahpim gâ é hparà lhô ralhum lé yù mù, yhupgyàp htoq má lheq to luî, haú lé bûhing èq nghop to mù, ulhum má bainám sho-maú tsûng to byî ri.
14 Sholuq gi, Dawiq lé chyup râ matú byù nhang kat é hkûn, Mihkala gi, “Dawiq no nyi ri.” ga lhom taî ri.
15 Hau htâng, Sholuq gi, Dawiq chyáng byù dum nhang kat mù, “Ngò, yhang lé wó sat pyám râ matú, yhâng lé, yhupgyàp eq roq wàq lò keq.” ga, yhángmòq lé châng taî kat ri. 16 Nghut kôlhang, yhángmòq wang ê kô é hkûn, yhupgyàp htoq má hparà lhô jòq tô é eq ulhum má bainám sho-maú tsûng tô é za jòq tô ri.
17 Sholuq gi, Mihkala lé, “Nàng, haî mù, ngo lé îsu kut mhaú luî, ngá é gyè lé hpâng nhang lhê lhú?” ga taî ri.
Mihkala gi, yhang lé, “‘Ngo lé nhang kat àq. Haû a nghut jáng, ngò, nang lé sat pyám râ.’ ga, yhang, ngo lé taî ri.” ga taî kyô ri.
18 Dawiq gi, wó hpang lùt é hkûn, Rama wà mó má nyi é Samu-elaq chyáng ê mù, Sholuq èq yhang lé kut é hkyô bànshoq, yhang lé taî kyô ri. Hau htâng, yhang eq Samu-elaq gi, Nayut wà má ê nyi nyì bekô nghut ri. 19 “Dawiq gi, Rama mâ é Nayut wà má nyi tô ri.” gâ é dang, Sholuq chyáng jé ri. 20 Haû mù, Sholuq gi, Dawiq lé ê chyup râ matú byù nhang kat bê nghut ri. Nghut kôlhang, haú bang gi, myìqhtoi hpúng rahpúng lé, Samu-elaq shuî-u mù, myìqhtoi htoî nyì kô é lé myàng kôjáng, Garai Gasâng é Sô gi, Sholuq é byù haú bâng chyáng jé é nghut mù, yhángmòq le, myìqhtoi htoî bùm bekô nghut ri. 21 Sholuq gi, haú hkyô lé wó gyo jáng, byù je myo dum nhang kat ri; haú bang le myìqhtoi bo htoî bum akô. Sum dâm nghû râ dàm, Sholuq byù nhang kat wú kôlhang, hau bang le, myìqhtoi bo htoî bum akô nghut ri. 22 Ló htáng má, Sholuq gi, yhang yhang, Rama wà mó shut e ló mù, Sehku jowò mâ é wuì tíng dong mó má jé ri. Haú hkûn, yhang gi, “Samu-elaq eq Dawiq hká má nyi ri lhú?” ga myî ri.
Haû jáng, “Rama mâ é Nayut wà má nyi akô.” ga taî kyô akô.
23 Haû mù, Sholuq gi, Rama mâ é Nayut wà shut e ló ri. Nghut kôlhang, Garai Gasâng é Sô gi, yhâng chyáng jé mù, yhang gi, Nayut wà jé shoq myìqhtoi htoî e ló bê nghut ri. 24 Sholuq gi, yhâng é mèbu hkyut pyám mù, Samu-elaq é hí má myìqhtoi htoi bê nghut ri. Yhang gi, haú nyí haú myîn gùngchîn lèq tô ri. Haû mù, “Sholuq le, myìqhtoi pé má bo ri lhú?” gâ é a-tâm dang lé, byu pé taî gyó lo bum akô nghut ri.