Dawiq Lé Sholuq Mânon É Hkyô
18
Dawiq, Sholuq eq dáng ban nyo é htâng, Yonahtan gi, Dawiq eq i-myìt rahkat za dùt byùq mù, yhâng gùng lé chyit é su yhang, Dawiq lé chyit ri. 2 Haú nyí mai, Sholuq gi, Dawiq lé, yhâng wâ é yhûm a taû ló nhâng lô é za, yhang eq rahá shuî nyi to bê nghut ri. 3 Ahkuî, Yonahtan gi, yhâng gùng lé chyit é su yhang, Dawiq lé chyit é yánmai, Dawiq eq dangshikaq ralhum tô tô ri. 4 Yonahtan gi, yhang wùt tô é buhîng lé hkyut yû mù, yhâng é gyèhking, shâm, lai eq hpyihit pé le kut, Dawiq lé byî ri.5 Dawiq gi, Sholuq kut nhang é múzó hkangmó lé, hkyo nyàng shoq wó kut é nghut mù, Sholuq gi, yhang lé gyèzau ayá dáng byî ri. Shiwa byù bànshoq eq Sholuq é zaugun wuì le, haú hkyô lé wú ngui bùm bekô nghut ri.
6 Dawiq, Hpilisiti hpó lé sat pyâm é htâng, gyèzô pé yhûm shut dum taû lo nyì kô é hkûn, Isira-elaq byu pé nyi é wà hkangmó mâ é myiwe wuì gi, Hkóhkâm Sholuq lé te yù râ ga, zìng ut eq tíng pé bàt luî, gabú mahkôn hkôn uchyang, gó htoq lé lo bum akô nghut ri. 7 Yhángmòq gi, gó uchyang,
“Sholuq sat é gi, hkyîng dông nghut,
Dawiq sat é gi, mun dông dùt.” ga hkon bum akô nghut ri.
8 Sholuq gi, haú hkyô lé a gyô nguì mù, gyai yhang nhik hko zo luî, “Yhángmòq, Dawiq lé gi, mun dông dùt ga kôlhang, ngo lé gi, hkyîng dông za ga byî akô. Yhang lé, mîngdán za a byi lo kô le gi, gótû haí wá jòq lo râ lhú?” ga myìt yu ri. 9 Haú nyí mai, Sholuq gi, mânon é myòq èq Dawiq lé gyám wú nyî bê nghut ri.
10 Hau htang nyí, ashop é nàt gang gi, Garai Gasâng chyáng mai, Sholuq chyáng lé wang júng ri; haû mù, yhang gi, yhâng é hkóhkâm wâng má, myìqhtoi htoî byòk nyì bê nghut ri. Dawiq gi, ayang kut nyi é eq rajung za, tíng bàt ngón byî nyi ri. Sholuq gi, yhâng é lòq má lhâm rahkat chung to mù, 11 “Ngò, Dawiq lé, xêwâm má htaû kyâng tap pyám râ nghut lhê.” ga yhânggùng yhang taí luî, gun kat ri. Nghut kôlhang, Dawiq gi, í dâm lhom wó huî pyám ri.
12 Sholuq gi, Dawiq lé gyùq bê nghut ri; hkâsu mù gâ le, haû Yhûmsîng Garai gi, Sholuq eq gang luî, Dawiq eq rahá nghut nyi é yánmai nghut ri. 13 Haû mù, Sholuq gi, Dawiq lé, byù rahkyîng ùp é zau ayá byi mù, yhâng eq wê é shut nhang htoq pyâm ri. Haû mù, Dawiq gi, yhángmòq é majan gyunghkyô má, gyè hpúng lé shuî-u bê nghut ri. 14 Haû Yhûmsîng Garai gi, Dawiq eq rahá nghut nyi é yánmai, Dawiq kut é hkyô hkat hkangmó má ûngmyuq hkyô móa wó ri. 15 Sholuq gi, Dawiq kut é hkyô hkat hkangmó má ûngmyuq hkyô wó nyi é lé myàng jáng, je riyhang Dawiq lé gyùq bê nghut ri. 16 Nghut kôlhang, Isira-elaq byu pé eq Yudaq byu pé bànshoq bang gi, Dawiq lé chyitdàp bum akô nghut ri; hkâsu mù gâ le, yhang gi, yhángmòq é majan gyunghkyô má, yhángmòq lé shuî-û é yánmai nghut ri.
17 Sholuq gi, Dawiq lé, “Shî gi, ngá é zo nhammó Merap nghut lhê; ngò, nang lé byi tso râ. Nàng gi, a gyùq a kyûm ngo lé dójaú mù, haû Yhûmsîng Garaî é majan lé hí zan aq.” ga taî ri. Nghut kôlhang, Sholuq gi, “Ngá lòq èq yhang, Dawiq lé a záng râ nghut lhê; Hpilisiti byu pê é lòq má shèq shî sháng gàq!” ga haq myìt tô ri.
18 Nghut kôlhang, Dawiq gi, Sholuq lé, “Ngò eq ngá é yhûmbyù wuì, ngá wâ é a-myû koq gi, Isira-elaq ming má haî wá nghut mù, ngò, hkóhkam é zo-moq wó dùt râ lhú?” ga taî ri. 19 Nghut kôlhang, Sholuq é yhang zo byìzo Merap lé, Dawiq chyáng byi tso râ ahkyíng jé jáng, Mehola byù Adari-ela lé shèq byi tsô pyâm ri.
20 Ahkuî, Sholuq é byìzo Mihkala gi, Dawiq lé chyit nyì bê nghut ri. Haú hkyô lé Sholuq chyáng ló taî kyo kôjáng, yhang gi, gyô gabú bê nghut ri. 21 Sholuq gi, “Hpilisiti byu pê é lòq má, Dawiq lé wó kat pyám râ matú, Ngá é byìzo lé, Dawiq lé myhí râ lhaí ralhum dông, ngò, yhang lé byi tso râ nghut lhê.” ga wó myìt ri. Haû mù, yhang gi, Dawiq lé, “Ahkuî, nàng gi, ngá é zo-moq hpó kut râ ahko ahkáng lé, í dâm nghû râ dàm dum wó bê nghut ri.” ga taî ri.
22 Hau htâng, Sholuq gi, yhâng é duìnhâng zoshâng wuì lé, “‘Hkóhkâm hpó gi, nang lé nhik htûng ri; yhâng é duìnhâng zoshâng wuì bànshoq le, nang lé ngui bum akô. Haû mù, nàng gi, hkóhkam é zo-moq hpó dùt gíng ri.’ nghû, núngmòq, Dawiq lé baú tsik za ê taí keq.” ga hkunmó hkyô kat ri.
23 Yhángmòq gi, Dawiq lé dang haú pé roq ê taî akô. Nghut kôlhang, Dawiq le, “Ngò gi, haî le a nghut é myùng sû za nghut lhê. Hkóhkam é zo-moq rayùq dùt râ gi, lui é múzó su ngam akô lhú?” ga taî ri.
24 Sholuq é duìnhâng zoshâng wuì gi, yhang lé, Dawiq taî é dang ló shit kyô akô nghut ri. 25 Haú hkûn, Sholuq gi, “Núngmòq, Dawiq lé, ‘Hkóhkâm hpó gi, yhâng é gyè pé lé lató hpuq yu é, Hpilisiti byu pê é ahpyo kuq rashô kuq mai lai luî, gótû hpau wàng haî le a ô naù.’ gâ nghû ê dum taí keq.” ga tû taî ri. Haû gi, Dawiq lé, Hpilisiti byu pê é lòq má shi byùq sháng gàq ga, Sholuq haq htung é hpàqchyî nghut ri.
26 Duìnhâng zoshâng wuì haú bang, Dawiq lé haú hkyô taî kyo kôjáng, Dawiq gi, hkóhkam é zo-moq hpó gyô kut naû bê nghut ri. Haû mù, ding tô é buìnyì a jé shi-má, 27 Dawiq eq yhâng é byu pé gi, htoq e ló kômù, Hpilisiti byù í shô yùq lé ê sat pyám bekô nghut ri. Hau htâng, yhang gi, hkóhkam é zo-moq hpó wó dùt râ matú, haú bâng é ahpyo kuq lé hpyit yu lò mù, hkóhkâm hpó lé ngap shoq lo byi bê nghut ri. Haû mù, Sholuq gi, Dawiq lé, yhâng é byìzo Mihkala byi tso bê nghut ri.
28 Sholuq gi, haû Yhûmsîng Garai, Dawiq eq rahá nghut nyi é hkyô lé le, yhâng é byìzo Mihkala, Dawiq lé chyit nyi é hkyô lé le, wó sé jáng, 29 Dawiq lé je riyhang gyùq byùq mù, myìt gyó tô é yhâng é i-pyàt buìnyì pé má, yhang lé gyè dông za kut pyám bê nghut ri.
30 Hpilisiti gyèzaû pé gi, xoq mù majan lé zân nyi akô; yhángmòq majan lé zan hkangmó, Dawiq gi, Sholuq é zaugun wuì góbâng htoq má ûngmyuq hkyô je wó é nghut luî, yhâng é myìng gi, gyai hû byùq bê nghut ri.