Dawiq Eq Goli-at É Hkyô
17
Ahkuî, Hpilisiti byu pé gi, majan zan râ matú, yhángmòq é gyèwum tsîng yù mù, Yudaq mau Sohko wà mó má zùp zîng bum akô. Yhángmòq gi, Sohko eq Azeka wà mó gyoro mâ é, Ehpe Damim jowò má gyèwap xuq akô nghut ri. 2 Sholuq eq Isira-elaq byu pé le, zùp zing kômù, Ela langhkaû má gyèwap xuq luî, Hpilisiti byu pé lé majan ê zan râ matú hen nyì bekô nghut ri. 3 Hpilisiti byu pé gi, rashut mâ é kong má, Isira-elaq byu pé gi, góshut mâ é kong má jowò yu tô bum akô nghut ri. Yhángmòq é gyoro má gi, langhkaû kyo tô ri.4 Haú hkûn, Gat wà mâ é Goli-at gâ é sarhê mó rayùq gi, Hpilisiti gyèwap mai htoq lé lo ri. Yhang gi, hkyuq dúng èq rahtô kô myhâng sû nghut ri. 5 Haú yùq gi, yhâng é ulhum má gyî èq saî é mùq tsûng to mù, raxe gau joí kô laî é gyî èq saî é gyèhking wùt tô ri. 6 Yhâng é hkyî má gi, gyî èq saî é hkyîhtup htup mù, yhâng é gòqsân má gi, gyî èq saî é lhâm tuî wun to ri. 7 Yhâng é lhâmloq gi, wòqgan pyúng lhum mó í bò mù, jòqtoq lhâm hpyo gi, í joí chyân kô bo ri. Yhâng é gòlong wàq sû gi, yhâng é hí má e ló ri.
8 Goli-at gi, yàp mù, yán yàp tô é Isira-elaq gyè hpúng mó lé, “Núngmòq gi, haî mù majan zan râ matú lé htoq yán yàp bum akô lhú? Ngò gi, Hpilisiti byù, núngmòq gi, Sholuq é jùn nghut lhê a nghut kô lhú? Byù rayùq hkyin htoq yû mù, ngá chyáng gyó lé nhâng keq. 9 Haú yùq gi, ngo lé, lé wó sat ung pyâm é nghut jáng, ngá-mòq gi, núngmòq é jùn kut râ nghut lhê; nghut kôlhang, ngò gi, yhang lé wó sat ung pyâm é nghut jáng, núngmòq gi, ngá-mòq é jùn kut mù, ngá-mòq lé dójaú ra râ nghut lhê.” ga garû taî ri. 10 Hau htâng, Hpilisiti hpó haû gi, “Hkû-nyí, ngò, yán yàp tô é Isira-elaq gyè hpúng mó lé pyî ho nyi lhê! Ngò eq zân lhum râ byù rayùq nhang kat keq.” ga taî ri. 11 Sholuq eq Isira-elaq byù bànshoq bang gi, haû Hpilisiti hpô é pyî hô dang lé wó gyo kôjáng, myìt gyô htum mù, gyai yhang gyùq nán byùq bùm bekô nghut ri.
Sholuq É Gyèwap Má Dawiq Jé É Hkyô
12 Dawiq gi, Yudaq mau, Betlehem wà mâ é Ehprat byù Yese gá su é yhang zo nghut ri. Yese gi, yùqzô shit yùq wó ri; yhang gi, Sholuq é i-pyàt má, mang luî, uhpyû zuì nè bê sû nghut ri. 13 Haû Yese é yhang zo ko bang sum yuq gi, majan zan râ matú, Sholuq htâng châng akô. Zo-mún yùq é myìng gi, Eli-ap gâ ri; lanóng yùq é myìng gi, Abinadap gâ ri; lalaq yùq myìng gi, Shama gâ ri. 14 Dawiq gi, zohtáng yùq nghut ri. Yhang mâng pé sum yuq gi, Sholuq htâng châng akô; 15 nghut kôlhang, Dawiq gi, Betlehem wà má yhâng wâ é sau pé lé le zúng, Sholuq chyáng le ê kut, ê lò hkyô so kut ri.
16 Haû Hpilisiti hpó gi, buìnyì myi xê nyí yhang, nàpkyó myínhtâng hkangmó, lé htoq yàp shit shit kut nyi ri.
17 Ahkuî, Yese gi, yhang zo Dawiq lé, “Nungmâng pê é matú, shî gùqshin myi byé eq mùk raxê long yu chûng mù, yhángmòq é gyèwap shut hân ê àq. 18 Haû lhoqgyám tô é no-naú raxê hkyí lé le, yhángmòq é gyèzaû chyáng yu ê byi aq. Nungmâng pê é wángzán hkyô hkâsu nghut é lé gôn wú mù, yhángmòq chyáng mâ é sàksé rajung jung yu lò àq. 19 Nungmâng pé gi, Ela langhkaû má, Sholuq eq Isira-elaq byù bànshoq bang le mù, Hpilisiti byu pé lé majan zân nyi akô nghut ri.” ga taî ri.
20 Dawiq gi, nàpsûn noq le toq mù, sau pé lé, sau zúng sû rayùq chyáng àp pyâm to luî, yhâng wa Yese taî kyô kat é eq rajung za, zoshuq htô chûng mù, htoq e ló bê nghut ri. Yhang gi, gyèzô pé majan zan jowò yù râ matú nyho garû yán htoq ló bùm kô é hkûn, gyèwap má jé ri. 21 Isira-elaq byu pé eq Hpilisiti byu pé gi, myòqdong hu lhûm to mù, rahpúng rahkyam shut jowò yu yán yàp tô bùm bekô nghut ri. 22 Dawiq gi, yhang wun lé lo é zoshuq pé lé, zoshuq wò yù su chyáng àp pyâm to mù, yán yàp tô é gyè hpúng shut din ê luî, yhang mâng pé lé ê huî nyo ri. 23 Dawiq gi, yhang mâng pé eq dáng nyo nyi é hkûn, Gat wà mâ é Hpilisiti sarhê mó Goli-at ga sû, yhâng é jowò mai htoq lé lô mù, hí lé taî é su pyî hô dang dum garû taî kat é lé wó gyô ri. 24 Isira-elaq byu pé gi, Goli-at lé myàng kôjáng, gyai yhang gyùq byùq kômù, hpang akô nghut ri.
25 Ahkuî, Isira-elaq byu pé gi, “Byù shí yuq, hkâsu kut htoq lé lò lò kut nyi é hkyô lé, núngmòq myàng akô lhú? Yhang htoq lé lo é gi, Isira-elaq byu pé lé pyî hô dang taí râ matú nghut ri. Hkóhkâm gi, haú yùq lé wó sat é sû lé, sùtzè mó byi râ nghut lhê. Hau htoq agó, yhâng é byìzo lé le byi tso râ nghut mù, haú yùq é yhâng wâ é i-kun byù lé le, Isira-elaq ming má hkyui é jahkôn lé lhoqlhut byi râ nghut lhê.” ga taî bum akô nghut ri.
26 Dawiq gi, yhâng nàm má yàp tô é bang lé, “Haû Hpilisiti hpó lé sat pyám mù, Isira-elaq a-myû wui chyáng mai hoq hpu hkyô lé huî sêng pyám byi sû lé gi, haî kut byi râ gâ o? Rû dui nyi é Garai Gasâng é gyèzô pé lé, pyî hô dang wám taî é, haû ahpyo kuq a hpyit é Hpilisiti hpó gi, ó yùq wá nghut ri lhú?” ga myî ri.
27 Yhángmòq gi, “Haû Goli-at lé wó sat pyâm é sû gi, a-kyû myang hkâm zo râ nghut lhê.” ga hí lé taî é su dum puq taî akô nghut ri.
28 Dawiq é yhang mang mó Eli-ap gi, yhang eq byù haú bang taî lhûm nyì kô é lé wó gyo jáng, Dawiq lé gyai yhang gyô nhik-yo naû mù, “Nàng, haî mù shî má gyó lé lhê lhú? Haû a-myo ahtâm zâ é sau pé lé, yòso má ó yùq lé àp pyâm to hkô é lhú? Nàng, hkâ-í nghutbûn é eq agè ashop é myìt bo é lé, ngò sê lhê. Nàng gi, majan wú râ matú za lé é nghut ri.” ga taî ri.
29 Haú hkûn, Dawiq gi, “Ahkuî, ngò haî shut bê lhú? Dang rahkun lháng a wó taí lo lhí?” ga tû taî ri. 30 Hau htâng, yhang gi, góbâng shut dum lhîng mù, hí lhê é hkyô dum myî wú kôle, haú bang gi, hí lé tû taî é su ga, yhang lé tû taî akô nghut ri. 31 Dawiq taî é dang lé wó gyo kômù, Sholuq lé hkyang shit akô; haû mù, Sholuq gi, Dawiq lé ê jî nhâng bê nghut ri.
32 Dawiq gi, Sholuq lé, “Haû Hpilisiti hpô é yánmai, ó yùq le myìt wum a gyui kó sháng gàq; náng é duìnhâng zoshâng ngò ê sat pyám râ.” ga taî ri.
33 Sholuq gi, “Nàng, haû Hpilisiti hpó lé ê wó zân ûng râ a nghut. Nàng gi, zoshâng za ru nghut ashî; yhang gi, zorâm pyàt mai yhang majan zân lò bê sû nghut ri.” ga tû taî ri.
34 Nghut kôlhang, Dawiq gi, Sholuq lé, “Náng é duìnhâng zoshâng ngò gi, ngá wâ é sau zúng byi sû nghut lhê. Hkanghkyi, a nghut jáng, wâm lé lô mù, sau hpúng mâ é sau lé ngàt she hkyut ló é hkûn, 35 ngò gi, haû lé châng hkat bàt mù, yhâng é nhut mai sau zo lé hkyi htoq yù é nghut lhê. Yòsô zè haû ngo lé taû htîm lo é hkûn, ngò gi, yhâng é sho-maú má kyaq zui mù, bàt sat pyâm é nghut lhê. 36 Náng é duìnhâng zoshâng gi, hkanghkyi lé le, wàm lé le, sat pyâm wú bê nghut lhê; shî ahpyo kuq a hpyit é Hpilisiti hpó gi, rû dui nyi é Garai Gasâng é gyèzô pé lé pyî hô dang taí bê nghut é yánmai, haû mâ é radu su dùt byùq râ nghut lhê. 37 Haû hkanghkyi eq wam é lòq mai ngo lé hkyi yu é sû, haû Yhûmsîng Garai gi, Hpilisiti hpô é lòq mai le, ngo lé hkyi yù râ nghut lhê.” ga taî ri.
Sholuq gi, Dawiq lé, “Ê aq, haû Yhûmsîng Garai gi, nàng eq rahá nghut nyî sháng gàq.” ga taî ri.
38 Hau htâng, Sholuq gi, Dawiq lé, yhâng é gyèhking wùt nhang ri. Yhang gi, Dawiq é ulhum má, gyî èq saî é mùq tsung byi mù, jòqtoq gyèbu wùt nhang ri. 39 Dawiq gi, gyèhking htoq má, yhâng é shâm lé tuî wùn mù, sô lhing chyam wú ri; hkâsu mù gâ le, yhang gi, haú pé lé a mán shi nghut ri.
Haû mù, yhang gi, Sholuq lé, “Ngò gi, shí pé lé a mán shi nghut é yánmai, gyèhking shí pé wùt luî, wó ê râ a dùt.” ga taí mù, haú pé lé hkyut pyám bê nghut ri. 40 Hau htâng, yhang gi, yhâng é dumbáng lé yù mù, wuìlàng mâ é chyut chyut za dùt é lùqlhum ngo cham hkyin gùq yù luî, yhâng é sau zúng e-tap má kat mù, yhâng é lùqlhui pyí lé yu chûng luî, haû Hpilisiti hpô shut chyâng e ló nyî bê nghut ri.
41 Haû Hpilisiti hpó le, yhâng é gòlong wàq su é htâng má cháng mù, Dawiq shut chyâng lé lo nyì bê nghut ri. 42 Hpilisiti hpó gi, Dawiq lé wú kat é hkûn, showa ne yúng luî, gùngdu hkyangmân wú htuk é zoshâng zo za nghut é lé myàng kat mù, yhang lé byù ngè wò wú bê nghut ri. 43 Hpilisiti hpó gi, Dawiq lé, “Nàng, ngá chyáng dumbáng eq lé lo é gi, ngò, hkui nghut ri lhú?” ga taí mù, yhâng é nàt hparà pê é myìng lé lang luî, Dawiq lé nhîng ri. 44 Dum, yhang gi, Dawiq lé, “Lé aq, ngò, náng é gùngsho lé, maulat nghoqzô pé eq yòsô tân jung gaunyhaû pé lé, byi tsô pyám râ.” ga taî ri.
45 Dawiq gi, Hpilisiti hpó lé, “Nàng gi, ngo lé htim râ matú, shâm lhâm eq lé lo ri. Nghut kôlhang, ngò gi, nàng pyî hô dang taî nyi é, Isira-elaq gyèzô pê é Garai Gasang, haû Wum-o a-tsam dìk shoq bò Sû Yhûmsîng Garaî é myìng mai, náng chyáng lé lo lhê. 46 Hkû-nyí, haû Yhûmsîng Garai gi, nang lé, ngá lòq má àp byi râ nghut lhê. Haû mù, ngò gi, nang lé sat luî, náng é ulhum lé hpyit pyám râ nghut lhê. Hkû-nyí, ngò gi, Hpilisiti gyèzô pê é màng lé, maulat mâ é nghoqzô pé eq myìdàm htoq mâ é tân jung gaunyhaû pé lé byî pyám râ nghut lhê; haú hkûn, Isira-elaq byu pê chyáng Garai Gasang nyi nyi é hkyô lé, mingkan gón wó sé kôrâ nghut lhê. 47 Haû Yhûmsîng Garai hkyi yu é gi, shâm lhâm eq a nghut é hkyô lé, shî má zîng tô é bang bànshoq wó sé kôrâ nghut lhê; hkâsu mù gâ le, majan shî gi, haû Yhûmsîng Garaî é lòq má nghut mù, Yhang gi, núngmòq bànshoq lé, ngá-mòq é lòq má àp byi râ nghut lhê.” ga taî ri.
48 Hpilisiti hpó gi, Dawiq lé htim râ ga chyâng htèp lé lô jáng, Dawiq le, Hpilisiti hpó eq hui râ matú, majan zan jang má hân hân din e ló ri. 49 Dawiq gi, yhâng é e-tap hkaû mâ é lùqlhum racham làp htoq yû mù, lùqlhui pyî eq lhuî kat luî, Hpilisiti hpô é ngelang má hpok ló záng bê nghut ri. Lùqgòk haû gi, Hpilisiti hpô é ngelang má zùq wang ló é nghut mù, yhang gi, myigùng htoq má lêng nghop to bê nghut ri.
50 Haû mù, Dawiq gi, lùqlhui pyí eq lùqlhum racham èq za, haû Hpilisiti hpó lé wó ung pyâm ri. Yhang gi, lòq má shâm rahkyam lháng a chung é za, haû Hpilisiti hpó lé wó sat pyám bê nghut ri.
51 Hau htâng, Dawiq gi, din ê mù, Hpilisiti hpô é gùng yàm má yàp tô luî, Hpilisiti hpô é shámbyâng mâ é shâm she yù mù, saî sat pyám luî, lìngzing hpyit yu ri.
Hpilisiti byu pé gi, yhángmòq é sarhê hpó shi byùq é lé myàng kôjáng, hpang taû ló bekô nghut ri. 52 Haú hkûn, Isira-elaq byu pé eq Yudaq byu pé gi, chôm wùt garu kômù, Hpilisiti byu pé lé, Gahta eq Ekron wà wàng hkúmdong jé shoq châng hkat bekô nghut ri. Hpilisiti byu pê é màng gi, Sharim wà hkyô mai, Gahta eq Ekron wà jé shoq rahkyô htáng lèq myín tô bùm bê nghut ri. 53 Isira-elaq byu pé gi, Hpilisiti byu pé lé châng hkat é mai dum taû lò kômù, Hpilisiti byu pê é gyèwap mâ é zè pé lé hkyom sing yu pyám bekô nghut ri.
54 Dawiq gi, Hpilisiti hpô é ulhum lé, Yerusalem wà mó má yu lò mù, Hpilisiti hpô é gyèhking pé lé, yhâng é zúm má shung tô ri.
55 Sholuq gi, Hpilisiti hpó lé ê htim râ ga Dawiq htoq e ló é lé myàng jáng, gyèzau hpó Apna lé, “Apna, zorâm zo hê gi, ô yhang zo nghut ri lhú?” ga myî ri.
Apna gi, “Chyung hîng xê hing nyi é hkóhkâm ê, ngò a sé.” ga tû taî ri.
56 Hkóhkâm gi, “Zorâm zo haû, ô yhang zo nghut é lé gôn wú keq.” ga taî ri.
57 Dawiq, Hpilisiti hpó lé sat pyám é mai dum taû lò eq yhang, Apna gi, yhang lé shuî yù luî, Sholuq é hí má shuî wang ri. Haú u, Dawiq gi, Hpilisiti hpô é ulhum lé ru dang tô ashî nghut ri.
58 Sholuq gi, Dawiq lé, “Zorâm zo ê, nàng gi, ô yhang zo nghut lhê lhú?” ga myi jáng, Dawiq gi, “Ngò gi, Betlehem wà mâ é, náng é duìnhâng zoshâng Yese é yhang zo nghut lhê.” ga taî ri.