Samariq Wà Lé Ben Hadat Majan Zân É Hkyô
20
Aram hkóhkâm Ben Hadat gi, yhâng é gyè hpûng gón lé ji tsîng tô ri. Gótû hkóhkâm súm xe í yùq le, yhángmòq é myang pé eq gyèlhêng pé le, yhang eq rahá bo châng dòq ê mù, Samariq wà lé ê lhom hkyùq to luî, chôm htîm akô nghut ri. 2 Yhang gi, wà hkaû shut, Isira-elaq hkóhkâm Ahap chyáng lagyô pé nhang hâng kat mù, “Ben Hadat shî su ga taî ri; 3 ‘Náng é ngùn eq hîng gi, ngá é nghut lhê. Je réng é náng é yhûmsîng myhî pé eq zoshâng wuì le, ngá é nghut lhê.’ gâ ri.” ga taí nhang kat ri.4 Isira-elaq hkóhkâm gi, “Ngá é yhûmsîng hkóhkâm ê, nàng taî é eq rajung za, ngò eq ngò wó é bànshoq gi, náng é nghut ri.” ga tû taî ri.
5 Lagyô pé gi, radàm dum lé mù, “Ben Hadat shî su ga taî ri; ‘Ngò gi, náng é ngùn eq hîng lé le, náng é yhûmsîng myhí pé eq náng é zoshâng wuì lé le, byî kat râ matú taí nhang kat é nghut lhê. 6 Nghut kôlhang, ngò gi, nàpmá shí u lé, ngá é zaugun wuì lé nhang kat mù, náng é hkóhkâm yhûm eq náng é zaugun wui é yhûm pé má, ho gôn wú nhâng râ nghut lhê. Yhángmòq gi, nàng hpautap é zè jung hkangmó lé yu pyám byi kôrâ nghut lhê.’ gâ ri.” ga taî akô nghut ri.
7 Haú hkûn, Isira-elaq hkóhkâm gi, haú ming mâ é sûwún wuî bànshoq lé ji tsîng yù mù, yhángmòq lé, “Byù shí yuq, hkâ-í yhang pyî ho nyi é lé wú wú keq! Ngò gi, yhang mai, ngá é yhûmsîng myhî pé eq zoshâng wuì lé le, ngá é hîng eq ngá é ngun pé lé le, lé dung nhang é hkûn, yhang lé a lhom he-ngìk pyâm é nghut lhê.” ga taî ri.
8 Sûwún wuî eq shiwa byù bànshoq bang gi, “Yhang lé hkâgyo byi; yhang kut nhang é hkyô pé lé le myìt hkâhui.” ga tû taî akô nghut ri.
9 Haû mù, yhang gi, Ben Hadat é lagyô pé lé, “‘Sânghî dàm nàng kut nhang é bànshoq lé, náng é duìnhâng zoshâng ngò kut râ nghut lhê; nghut kôlhang, shí dâm kut nhang é lé gi, ngò kut râ a nghut.’ nghû ngá é yhûmsîng hkóhkâm lé taî kyo keq.” ga tû taî ri. Yhángmòq htoq ló mù, tû taî kat é dang haú lé Ben Hadat chyáng wun ló byi bekô nghut ri.
10 Hau htâng, Ben Hadat gi, Ahap chyáng, “Ngá htâng châng é byù yùq hkangmó é matú, Samariq wà mâ é hpuílup ra-tsup tsup ru joq tô ashî nghut jáng, hparà pé gi, ngo lé htân htân kut kó sháng gàq.” ga taí nhang ri.
11 Isira-elaq hkóhkâm gi, “‘Gyèhking wùt sû gi, gyèhking hkyut é sû su a nghutbun sháng gàq.’ nghû yhang lé taí keq.” ga tû taî ri.
12 Ben Hadat gi, hkóhkam pé eq rahá yhángmòq é zúm má î shuq nyî kô é u, hkyanglù haú lé wó gyo jáng, yhâng é gyèzô pé lé, “Ê htim râ matú hên lo keq.” ga hkunmó hkyô ri. Haû mù, yhángmòq gi, Samariq wà haú lé ê htim râ matú hên bekô nghut ri.
Ben Hadat Lé Ahap Ung É Hkyô
13 Haú u, myìqhtoi rayùq gi, Isira-elaq hkóhkâm Ahap chyáng lé jé mù, “Haû Yhûmsîng Garai shî su ga taî ri; ‘Shî myhó myô é gyè hpúng mó lé myàng ri lhú? Ngò gi, hkû-nyí haú lé náng é lòq má àp byi râ nghut lhê. Haú hkûn, Ngò gi, haû Yhûmsîng Garai nghut é lé, nàng sé râ nghut lhê.’ gâ ri.” ga taî htoq kyô ri.
14 Haú hkûn, Ahap gi, “Nghut kôlhang, haú hkyô lé ó yùq kut râ lhú?” ga myî ri.
Myìqhtoi hpó gi, “Haû Yhûmsîng Garai shî su ga taî ri; ‘Mauzaû pê é a-ô mâ é zaugun zô pé kut râ nghut lhê.’ gâ ri.” ga tû taî ri.
Ahap gi, “Ó yùq hí majan hpóng râ lhú?” ga myi jáng, myìqhtoi hpó gi, “Nàng shuî hpông hî râ nghut lhê.” ga tû taî ri.
15 Haû mù, Ahap gi, mauzaû pê é a-ô mâ é zaugun zô pé 232 yùq lé ji tsîng yu ri. Hau htâng, yhang gi, myìt gyó tô é Isira-elaq bànshoq lé ji tsîng yu le, bànshoq 7000 yùq bo ri. 16 Yhángmòq gi, nyí gûng tu é u lé, htoq ló bum akô. Haú u, Ben Hadat gi, yhang eq buìnùm du yu é hkóhkâm 32 yùq eq rahá, yhángmòq é zúm pé má î shuq wùt nyi bum akô nghut ri. 17 Mauzaû pê é a-ô mâ é zaugun zô pé hí htoq e akô nghut ri.
Haú hkûn, Ben Hadat nhang tô é jówú bang gi, “Samariq wà mai byù htoq lé lo bum akô nghut ri.” ga shit kyô akô nghut ri.
18 Ben Hadat gi, “Yhángmòq, nguì ngón hkyo é matú htoq lé lô kô é nghut jáng le, majan hpóng râ matú htoq lé lô kô é nghut jáng le, yhángmòq lé duì gù chyup to keq.” ga taî ri.
19 Mauzaû pê é a-ô mâ é zaugun zô pé gi, yhángmòq é htâng má châng tô é gyèzô pé le mù, wà mó haú mai yán htoq lé lô kôluî, 20 yùq hkangmó gi, htûng huî é gyè lé sat pyâm akô nghut ri. Haú hkûn, Aram byu pé hpang bùm kômù, Isira-elaq byu pé châng hkat akô nghut ri. Nghut kôlhang, Aram byu pê é hkóhkâm Ben Hadat gi, yhâng é myang ji bang ra-am eq rahá, myang ji luî, hpang lùt ló ri. 21 Isira-elaq hkóhkâm gi, htoq lé lô mù, myang jûm lé le, gyèlhêng pé lé le, sing yu pyám luî, Aram byu pé lé gyai yhang sat htûm pyám bê nghut ri.
22 Hau htâng, myìqhtoi hpó gi, Isira-elaq hkóhkam chyáng lé mù, “Nàng, wum-o lhoqkîng to mù, haî kut râ é hkyô lé le myìt tû wú aq; hkâsu mù gâ le, sâ-nhik shí nám lé, Aram hkóhkâm gi, nang lé lé dum htim râ nghut lhê.” ga taî ri.
23 Haú u, Aram hkóhkam é zaugun wuì gi, yhang lé, “Yhángmòq é hparà pé gi, bum mau pé mâ é hparà pé nghut ri. Hau é yánmai, yhángmòq gi, ngá-nhûng é matú wum gyaí htan akô nghut ri. Nghut kôlhang, ngá-nhúng gi, yhángmòq lé pá pé má majan zân é nghut jáng, yhángmòq lé hkyak wó ûng râ za nghut lhê. 24 Shí dông kut àq; hkóhkam pé bànshoq lé, yhángmòq é wò mai lhoqhkyô pyám byi mù, yhángmòq é hkô má, gótû gyèzau wuì lé htaî kat to aq. 25 Nàng sûm byùq é, myâng é matú myang, gyèlheng é matú gyèlhêng le, dum ho tsîng to ra râ nghut lhê; haú hkûn, ngá-nhúng gi, Isira-elaq byu pé lé pá pé má wó zan luî, yhángmòq lé hkyak zân ûng râ nghut lhê.” ga hpàqchyî byî akô nghut ri. Hkóhkâm hpó gi, yhángmòq é dang lé myìt hui mù, haû eq rajung za kut bê nghut ri.
26 Htang zàn haú yòq má, Ben Hadat gi, Aram byu pé lé ji tsîng yù mù, Isira-elaq byu pé lé majan zan râ matú, Ahpek wà shut dòq ê bekô nghut ri. 27 Isira-elaq byu pé le, byù tsîng yù luî, zoshuq hen lajâng chûng mù, Aram byu pé lé ê lhôm râ matú, yán htoq e ló akô nghut ri. Aram byu pé gi, ra-mau gón byíng zan to kô é u, Isira-elaq byu pé gi, yhángmòq é tû-tap má, bainám hpúng zo í hpúng su za wàp xuq tô akô nghut ri.
28 Haú hkûn, Garai Gasâng é byù gi, jé lé mù, Isira-elaq hkóhkâm lé, “Haû Yhûmsîng Garai shî su ga taî ri; ‘Aram byu pé gi, Yhûmsîng Garai lé, bùm mau pé mâ é hparà nghut mù, langhkaû pé mâ é hparà a nghut ga myìt yù kô é yánmai, Ngò gi, gyè hpúng mó shî lé, náng lòq má àp râ nghut luî, nàng gi, Ngò, Yhûmsîng Garai nghut é hkyô lé sé râ nghut lhê.’ gâ ri.” ga taî kyô ri.
29 Yhángmòq í hpúng gi, nyhit nyí yhang hé hpoq shí hpoq tû-tap má wàp xuq lhûm to kômù, nyhit nyí nyí má majan hpóng bekô nghut ri. Isira-elaq byu pé gi, ra-nyí má za, Aram byù hkyô so gyèzô pé rasen lé sat pyám bekô nghut ri. 30 Myìt gyó tô é bang gi, Ahpek wà shut hpang wang ló kô é nghut mù, wàhkûm gyòp gyó lô luî, yhángmòq mâ é í mûn nyhit hkyîng yùq lé nhê sat pyám bê nghut ri. Ben Hadat gi, wà shut hpang wang ló mù, ahte wàp hkaû ralhum má ló haq lúng tô ri.
31 Haú hkûn, yhâng é zaugun wuì gi, yhang lé, “Wú aq, Isira-elaq hkóhkâm pé gi, shogyo nhikmyin bang nghut ri gâ é hkyô lé, ngá-mòq wó gyô ri. Haû mù, ngá-nhûng é hpyidum má jimê baíyùp luî, ulhum má tui yup chûng mù, Isira-elaq hkóhkâm chyáng ê sháng. Yhang gi, náng é chyungxe lé lhom lhut byi âbe.” ga taî akô nghut ri.
32 Haû mù, yhángmòq gi, hpyidum má jimê baíyùp luî, ulhum má tui yup chûng mù, Isira-elaq hkóhkâm chyáng ê kôluî, “Náng é duìnhâng zoshâng Ben Hadat gi, ‘Jeju mai ngo lé chyungxe duì nhâng laq.’ gâ ri.” ga taî akô.
Isira-elaq hkóhkâm gi, “Yhang chyungxe dui nyi ashî lùq? Yhang gi, ngá é gu-mang nghut lhê.” ga taî ri.
33 Yhángmòq gi, haú hkyô lé ge é hkyô dông gùq yù kômù, yhâng é dang lé hân za hpuq tu kô é gi, “Nghut rô; náng é gu-mang Ben Hadat nghut ri.” gâ ri.
Haû jáng, hkóhkâm gi, “Yhang lé ê shuî lò keq.” ga taî ri. Ben Hadat htoq lé lô jáng, Ahap gi, yhâng é gyèlhêng má dòq wàng nhâng bê nghut ri.
34 Haú hkûn, Ben Hadat gi, “Náng wâ chyáng mai ngá wa lú yu tô é wà pé lé, ngò dum tau byi râ nghut lhê. Ngá wa gi, Samariq wà má wuìloq kut jowò hkyô é su, nàng le, Damasikuq wà mó má, náng é wuìloq kut jowò ge hkyó râ nghut lhê.” ga taî ri.
Ahap gi, “Myìt huî lhûm é hkyô má cháng mù, ngò gi, nang lé lhut kat râ nghut lhê.” ga taî ri. Haû mù, yhang gi, Ben Hadat eq myìt huî lhum hkyô tô to mù, yhang lé nhang pyám bê nghut ri.
Ahap Lé Myìqhtoi Rayùq Mara Hun É Hkyô
35 Haû myìqhtoi hpúng mâ é rayùq gi, haû Yhûmsîng Garaî é mungdang má cháng mù, yhâng é luzúm rayùq lé, “Ngo lé bàt àq.” ga taî ri; nghut kôlhang, haú yùq gi, he-ngìk pyâm ri.
36 Haû mù, myìqhtoi hpó haû gi, “Haû Yhûmsîng Garaî é dang lé nàng a gyo kut é yánmai, nàng gi, ngá chyáng mai htoq ló aq, hkanghkyi radu èq lhom ngàt sat pyâm é hui râ za nghut lhê.” ga taî ri. Yhang htoq é ló htâng má, hkanghkyi radu gi, yhang lé myàng mù, ngàt sat pyám bê nghut ri.
37 Myìqhtoi hpó haû gi, gótû rayùq lé myàng mù, “Jeju mai ngo lé bàt àq.” ga taí jáng, haú yùq gi, yhang lé bàt mù, dàm tap byi bê nghut ri. 38 Hau htâng, myìqhtoi hpó haû gi, ló mù, hkyô má yàp luî, hkóhkâm lé láng tô ri. Yhang gi, yhâng é uhtup èq myòqdong lé nghop mù, góyùq su kut tô ri. 39 Hkóhkâm laî ló nyi é u lé, myìqhtoi hpó haû gi, “Náng é duìnhâng zoshâng ngò majan mó hkaû má wang é nghut lhê; haú hkûn, byù rayùq gi, shúm byû rayùq eq ngá chyáng lé mù, ‘Shí yùq lé zúng aq. Yhang lé lhoqnhang kat é nghut jáng, yhâng é chyungxê é malaî, náng é chyungxe sum râ nghut lhê; haû a nghut jáng, ngùnhtung raxe rajoí kô xap ra râ nghut lhê.’ ga taî ri. 40 Nghut kôlhang, náng é duìnhâng zoshâng ngò, shí shut hé shut mú myô nyi é u, byù haú yùq byùq byùq bê nghut ri.” ga, yhang lé wùt taî kyô ri.
Haú hkûn, Isira-elaq hkóhkâm gi, “Náng gûng nàng taî htoq bê nghut mù, haú hkyô gi, nang lé mara hûn bê nghut ri.” ga taî ri.
41 Haú hkûn, myìqhtoi hpó haû gi, yhâng é myòqdong mâ é uhtup lé hân za hkyut pyám jáng, Isira-elaq hkóhkâm gi, yhang lé, myìqhtoî pé mâ é rayùq nghut é lé wú sé bê nghut ri. 42 Haú hkûn, myìqhtoi hpó haû gi, hkóhkâm lé, “Haû Yhûmsîng Garai shî su ga taî ri; ‘Sat pyám râ matú Ngò myìt hpyit to bê sû lé, nàng nhang pyám bê nghut é yánmai, yhâng é chyungxê é matú náng é chyungxe, yhâng é byu pê é matú náng é byu pé dùt byùq râ nghut lhê.’ gâ ri.” ga taî ri. 43 Isira-elaq hkóhkâm gi, myìt myo ûng wom é eq nhikjum yo mù, Samariq wà mâ é yhâng é hkóhkâm wâng shut ló byùq bê nghut ri.