Horep Bùm Shut Eliya Hpang E É Hkyô
19
Ahkuî, Ahap gi, Eliya kut é hkyô jung hkangmó lé le, yhang, myìqhtoî pé bànshoq lé sham èq hkâsu sat pyâm é hkyô lé le, Yezebela lé taî kyô ri. 2 Haû mù, Yezebela gi, Eliya lé, “Nàpmá shí ahkyíng má, náng é chyungxe lé, myìqhtoi haú bang mâ é rayùq é chyungxe lé su ngò a kut pyâm é nghut jáng, hparà pé gi, ngo lé je riyhang htân htân kut byi kó sháng gàq.” ga taí râ matú, lagyo rayùq lé nhang kat ri.3 Eliya gi, gyùq byùq mù, yhâng é chyungxe lùt râ matú hpâng bê nghut ri. Yhang gi, Yudaq mau Berasheba wà má jé jáng, yhâng é duìnhâng zoshâng lé haú má nyhi hkyô to hkó mù, 4 ra-nyí buì gyùm so hkyô nghut é, yòso hkaû shut yhang baú wang e ri. Yhang gi, sínmhá gâm má jé mù, agàm hau é a-ô má zùng luî, shî naù mù, “Yhûmsîng Garai ê, ngò gé bê; ngá é chyungxe lé wùp yu pyám byi àq hkoi; ngò gi, ngá é îchyí îwâ pê htoq je ge é sû a nghut.” ga kyûdûng ri. 5 Hau htâng, yhang gi, sínmhá gâm hau é a-ô má lèq mù, yhup ngón byùq bê nghut ri.
Haú hkûn, maumang lagyo rayùq gi, dàn lòq tung yhang lé záng luî, “Toq mù, zo aq.” ga taî ri. 6 Eliya gi, lhing wú kat le, yhâng é umhtúng yâm má, myigye htoq má bûng é mùk eq ûchyam rayambú zo jòq tô é lé myang ri. Yhang gi, zo shuq mù, dum lèq to bê nghut ri.
7 Haû Yhûmsîng Garaî é maumang lagyo gi, í dâm nghû râ dàm dum taû lé mù, yhang lé lé záng luî, “Náng é matú gyunghkyô gyai yhang we râ nghut é yánmai, toq mù, zo aq.” ga taî ri. 8 Haû mù, yhang gi, toq mù, zo shuq bê nghut ri. Yhang gi, zoshuq hau èq wum-o wó lhoqkîng yù luî, Garai Gasâng é bùm nghut é Horep Bùm jé shoq, myi xê nyí, myi xê myìn so bê nghut ri. 9 Yhang gi, bùm haú mâ é lùqhkyûng ralhum má wâng mù, haú myîn nô yù bê nghut ri.
Eliya Lé Yhûmsîng Garai Htoq Shit É Hkyô
Haú hkûn, haû Yhûmsîng Garaî é mungdang yhâng chyáng jé é gi, “Eliya, nàng shí má haî kut nyi lhê lhú?” gâ ri.
10 Eliya gi, “Wum-o a-tsam dìk shoq bò Sû Yhûmsîng Garai Gasâng é matú, ngò gyai yhang myìt zìng zùq é nghut lhê; hkâsu mù gâ le, Isira-elaq byu pé gi, Náng é dangshikaq lé he-ngìk pyám kôluî, Náng é hkungga gyàp pé lé hpyoq hpyi pyám kômù, Náng é myìqhtoî pé lé sham èq sat pyâm akô nghut ri. Ngò rayùq baú za nyi myìt tô é nghut lhê; nghut kôle, ahkuî, yhángmòq gi, ngo lé le sat pyám râ matú shi-kùt nyi akô nghut ri.” ga tû taî ri.
11 Haû Yhûmsîng Garai gi, “Htoq ê mù, haû Yhûmsîng Garaî é hí, bùm htoq má ê yàp to aq; hkâsu mù gâ le, haû Yhûmsîng Garai lai râ za nghut bê.” ga taî ri.
Haú hkûn, htan dik é laìdun mó lò mù, haû Yhûmsîng Garaî é hí má, bùm pé lé mùt hkoq hkyâm pyám mù, lùqgòk mó pé lé mùt hpyi mhun pyâm é nghut kôlhang, haû Yhûmsîng Garai gi, laìdun hkaû haú má a nyì nghut ri. Laìdun lo é htâng má layàng nún lô kôlhang, haû Yhûmsîng Garai gi, layàng nún é ahkaû haú má a nyì nghut ri. 12 Layàng nún é htâng má, myi nyé kôlhang, haû Yhûmsîng Garai gi, myi hkaû haú má a nyì nghut ri. Myi nyé é htâng má, nyhóm za gâ é dangsoq htê htoq lo ri. 13 Htê haú lé Eliya wó gyo jáng, yhang gi, yhâng é myòqdong lé mèbû èq nghop pyám luî, htoq ê mù, lùqhkyûng donghkun má ê yàp tô ri.
Haú hkûn, danghtê ralhum gi, “Eliya, nàng shí má haî kut nyi lhê lhú?” ga, yhang lé myî ri.
14 Eliya gi, “Wum-o a-tsam dìk shoq bò Sû Yhûmsîng Garai Gasâng é matú, ngò gyai yhang myìt zìng zùq é nghut lhê; hkâsu mù gâ le, Isira-elaq byu pé gi, Náng é dangshikaq lé he-ngìk pyám kôluî, Náng é hkungga gyàp pé lé hpyoq hpyi pyám kômù, Náng é myìqhtoî pé lé sham èq sat pyâm akô nghut ri. Ngò rayùq baú za nyi myìt tô é nghut lhê; nghut kôle, ahkuî, yhángmòq gi, ngo lé le sat pyám râ matú shi-kùt nyi akô nghut ri.” ga tû taî ri.
15 Haû Yhûmsîng Garai gi, yhang lé, “Nàng lé lo é hkyô shut taû ló mù, Damasikuq yòso hkyô shut ló aq. Nàng, haú má jé jáng, Haza-ela lé, Aram hkóhkâm kut râ matú, sô kat namngón xû bùt byi aq. 16 Hau htoq agó, Isira-elaq hkóhkâm kut râ matú Nimshi é yhang zo Yehu lé le, náng é myìqhtoi hkô má zùng râ matú, Abela Mehola wà mâ é Shahpat é yhang zo Elisha lé le, namngón xû bùt byi aq. 17 Yehu gi, Haza-ela é shâm mai hpang lùt é sû ó yùq lé le sat pyám râ nghut lhê. Elisha gi, Yehu é shâm mai hpang lùt é sû ó yùq lé le sat pyám râ nghut lhê. 18 Nghut kôlhang, Balaq hparà lé a noq é eq hparà haú lé bo-puq a puq wú é bang bànshoq nghut é, Isira-elaq byù 7000 yùq lé Ngò nyhi hkyô tô lhê.” ga taî ri.
Elisha Lé Ji Yu É Hkyô
19 Haû mù, Eliya gi, haú mai htoq e ló luî, Shahpat é yhang zo Elisha lé myàng bê nghut ri. Elisha gi, no raxe í zúm yò hpuq nyi é má lòm mù, ló htâng é raxe í zúm zúm nghû râ lé hpuq nyi ri. Eliya gi, yhâng chyáng dòq ê mù, yhâng é buhîng lé, Elisha ahtoq má dú ke byî ri. 20 Haû mù, Elisha gi, yhâng é no zúm lé nyhi pyâm to luî, Eliya é htâng má châng dìn mù, “Ngá nu eq ngá wa lé shi-kyám bo-puq ló puq nhâng shilaq; hau htâng, ngò, náng htâng cháng râ nghut lhê.” ga taî ri.
Eliya gi, “Taû ló aq; ngò, nang lé haî kut byî é lhú?” ga tû taî ri.
21 Haû mù, Elisha gi, yhâng chyáng mai taû ló mù, yhâng é no haú zúm lé kôn yù luî, sat bê nghut mù, yò hpuq zè pé lé myi mùt luî, sho chyoq yû mù, byu pé lé byi tsô é nghut luî, yhángmòq gi, zo bekô nghut ri. Hau htâng, yhang gi, Eliya htâng toq cháng luî, yhâng é duìnhâng zoshâng dùt byùq bê nghut ri.