Eliya Eq Obadi-a
18
Tsómra myáng byùq mù, mau a wo é sum zân nghû râ zàn má, haû Yhûmsîng Garaî é mungdang Eliya chyáng jé é gi, “Ê aq; náng gûng yhang, Ahap lé ê htoq shit àq. Ngò gi, myìdàm htoq má mau wô nhâng râ nghut lhê.” gâ ri. 2 Haû mù, Eliya gi, yhânggùng yhang, Ahap lé htoq shit râ ga ê bê nghut ri.Haú hkûn, Samariq mau má mùtmó gyó é gyai htan tô ri. 3 Haû mù, Ahap gi, yhâng é hkóhkâm wâng lé wú gon sû Obadi-a lé ji ri. (Obadi-a gi, haû Yhûmsîng Garai lé gyai gyùq hkúngga sû nghut ri. 4 Yhang gi, haû Yhûmsîng Garaî é myìqhtoî pé lé Yezebela èq sat pyâm nyi é u, myìqhtoi rashô yùq lé shuî yù luî, lùqhkyûng ralhum má ngo xê yùq yùq kut luî, lùqhkyûng í lhum má tsing haq nyì nhang to mù, zoshuq eq wuì dé byî ri.) 5 Ahap gi, Obadi-a lé, “Ra-mau gón mâ é wuìbúm pé eq langhkaû pé bànshoq lé ê hô aq. Myang pé eq loze pé chyungxe wó dui nyì râ matú mhan pé myang hô âbe; haû jáng, ngá-nhûng é shigu gaunyhaû pé lé sat pyám nó a ra lo râ nghut lhê.” ga taî ri. 6 Haû mù, yhángnhik gi, ê ho gôn wú râ matú haú mau lé gam hkoq mù, Ahap rashut, Obadi-a rashut kut, htoq e ló bekô nghut ri.
7 Obadi-a hkyô sô e ló nyi le, Eliya eq htûng huî ri. Haû mù, Obadi-a gi, Eliya lé wú sé luî, myigùng má ngóm gòp mù, “Nàng gi, ngá é yhûmsîng Eliya yhang nghut lhê lhú?” ga taî ri.
8 Eliya gi, “Nghut lhê ô; náng é yhûmsîng lé, ‘Eliya shí má nyi ri.’ ga taî ri nghû ló taí aq.” ga tû taî ri.
9 Obadi-a gi, “Náng é duìnhâng zoshâng ngo lé Ahap é lòq má àp byi mù, sat pyám nhâng râ matú gi, ngò haî wá kut shut bê lhú? 10 Náng é Garai Gasang nghut é, haû Yhûmsîng Garai rû dui nyi é eq rajung za dâkam lhê; nang lé hô râ matú, byù myû ra-myû chyáng le, mîngdán ralhum má le, ngá yhûmsîng mai byù a nhang kat é a jòq lo nghut ri. Nàng a nyì gâ é byù myû ra-myû lé nghut nghut, mîngdán ralhum lé nghut nghut, yhang gi, nang lé yhángmòq a myang hô ga dakâm nhâng nhâng kut ri. 11 Nghut kôlhang, ahkuî, nàng gi, ngo lé, ‘Eliya shí má nyi ri.’ nghû, ngá é yhûmsing chyáng ló taî kyo aq gâ ri. 12 Ngò, náng chyáng mai ló byùq jáng, haû Yhûmsîng Garaî é so èq nang lé hká shut shuî e ló râ lé ngò a sé. Ngò, Ahap lé ló taî kyo mù, yhang, nang lé a myang ho byùq jáng, yhang gi, ngo lé sat râ nghut lhê. Nghut kôlhang, náng é duìnhâng zoshâng ngò gi, zorâm pyàt mai, haû Yhûmsîng Garai lé noqkuq dójaú bê nghut lhê. 13 Ngá yhûmsîng ê, haû Yhûmsîng Garaî é myìqhtoî pé lé Yezebela èq sat pyâm nyi é u, ngò hkâsu kut é hkyô lé nàng a wó gyo lhú? Ngò gi, haû Yhûmsîng Garaî é myìqhtoi rashô yùq lé, lùqhkyûng ralhum má ngo xê yùq yùq kut luî, lùqhkyûng í lhum má tsing haq nyi to nhâng mù, zoshuq eq wuì dé byî é nghut lhê. 14 Ahkuî, nàng gi, ngo lé, ‘Eliya shí má nyi ri.’ ga ngá é yhûmsîng lé taî kyo nhang ri. Yhang gi, ngo lé lhom sat pyám râ nghut lhê!” ga taî ri.
15 Eliya gi, “Ngò dójaú nyi é, Wum-o a-tsam dìk shoq bò Sû, haû Yhûmsîng Garai rû dui nyi é eq rajung za, hkû-nyí, ngò gi, Ahap lé hkyak ngá gûng ngò htoq shit râ nghut lhê.” ga taî ri.
Hkarimela Bùm Htoq Má Eliya Kut É Hkyô
16 Haû mù, Obadi-a gi, Ahap lé ê hui mù, yhang lé taî kyo jáng, Ahap gi, Eliya lé hui râ matú e ri. 17 Ahap gi, Eliya lé myàng jáng, “Isira-elaq a-myû lé wuîhke jamjau byi sû ê, nàng nghut lhê lhú?” ga yhang lé taî ri.
18 Eliya gi, “Ngò, Isira-elaq a-myû lé wuîhke jamjau lhoqhtoq byî é a nghut. Nghut kôlhang, nàng eq náng wâ é yhûmbyù wuì shèq wuîhke jamjau lhoqhtoq byî akô nghut ri. Nàng gi, haû Yhûmsîng Garaî é hkunmó pé lé tô pyám luî, Balaq hparà pê htâng châng byùq bê nghut ri. 19 Ahkuî, Isira-elaq byù bànshoq bang lé, Hkarimela Bùm má ngò eq hui râ matú ji tsing nhâng mù, Yezebela é zangbó má zô é, Balaq hpara é myìqhtoi myí sho ngo xê yùq eq Ashera hpara é myìqhtoî pé myi shô lé, shuî tsîng to aq.” ga tû taî ri.
20 Haû mù, Ahap gi, Isira-elaq byù bànshoq bang lé jì nhâng mù, Hkarimela Bùm htoq má myìqhtoî pé lé zùp zing nhâng bê nghut ri. 21 Haú hkûn, Eliya gi, shiwa byu pê é hí má ê mù, “Núngmòq gi, hkâ-myháng jé shoq, hkyô í hkat má nhúngnhâng nyì kôrâ lhú? Haû Yhûmsîng Garai gi, Garai Gasang nghut é nghut jáng, Yhâng htâng cháng keq; nghut kôlhang, Balaq hparà gi, Garai Gasang nghut é nghut jáng, yhâng htâng cháng keq.” ga taî ri.
Nghut kôlhang, shiwa byu pé gi, haî le a taí kó nghut ri.
22 Hau htâng, Eliya gi, yhángmòq lé, “Haû Yhûmsîng Garaî é myìqhtoi nghû râ gi, ngò rayùq baú za ru nghut alô; nghut kôlhang, Balaq hpara é myìqhtoî pé gi, myí sho ngo xê yùq yhang bo ri. 23 Ngá-mòq é matú nohtó í du shê byi keq. Balaq hpara é myìqhtoî pé gi, radu lé hkyin yù mù, haú lé ajàp jàp ban hpyoq kôjáng, myi a tap é za htang bûm htoq má kê to kó sháng gàq. Ngò gi, gódu lé hpyoq mù, myi a tap é za, htang bûm htoq má kê to râ nghut lhê. 24 Hau htâng, núngmòq gi, núngmòq é hparà myìng lé wùt dung keq; ngò gi, haû Yhûmsîng Garaî é myìng lé wùt dung râ nghut lhê. Myi hkyó byî é sû gi, Garai Gasang nghut bê.” ga taî ri.
Haú hkûn, shiwa byù bànshoq bang gi, “Nàng taî é ge ri.” ga taî akô nghut ri.
25 Eliya gi, Balaq hpara é myìqhtoî pé lé, “Núngmòq byù je myo kô é yánmai, núngmòq hí nohtó radu lé hkyin yù mù, hen lajang keq. Núngmòq é hpara é myìng lé wùt dung keq; nghut kôlhang, myi hkâtap kó.” ga taî ri. 26 Haû mù, yhángmòq gi, yhángmòq lé byî tô é nohtó lé yù mù, hen lajang bekô nghut ri.
Hau htâng, yhángmòq gi, nàpsûn mai nyí gûng jé shoq, Balaq hpara é myìng lé, “Balaq ê, ngá-mòq lé tû taí laq!” ga wùt garû akô. Nghut kôlhang, hai htê le a wó gyo, tû taî é rayùq le a nyì nghut ri. Yhángmòq gi, yhángmòq saî tô é hkungga gyàp lhînghkyùq má, byam gó nyi bum akô nghut ri.
27 Nyí gûng tû jáng, Eliya gi, yhángmòq lé nyhap é dông, “Wum kat garu keq! Yhang gi, teng za hparà nghut ri nhung! Yhang gi, myìt zìng zùq nyi lhê âbe, a nghut jáng, mú myô nyi lhê âbe, a nghut jáng, gyung sô nyi lhê âbe. Yhang gi, yhup ngón nyi é nghut mù, yhup nhau ra râ nghut lhê âbe.” ga taî ri. 28 Haû mù, yhángmòq gi, wum kat je garu mù, yhángmòq é htûng jòq é eq rajung za, shâm eq lhâm pê èq suí yui htoq shoq, yhûmsing gùng yhûmsîng dûn yam dûn htau kut bum akô nghut ri. 29 Nyí gùng lai jáng, yhángmòq gi, myínhtang lhê é hkungga nhông ahkyíng jé shoq, myìqhtoi htoî nyì kôlhang, hai htê le a htoq lô, tu byî é sû le a nyì, tâm gyo byî é le rayùq a nyì nghut ri.
30 Hau htâng, Eliya gi, shiwa byù bànshoq lé, “Ngá chyáng lé lô keq.” ga taî ri. Yhángmòq gi, lé lo bùm kôjáng, yhang gi, lhoqhkyop pyâm to bê nghut é, haû Yhûmsîng Garaî é hkungga gyàp lé dum saî saî ri. 31 Eliya gi, “Náng é myìng lé Isira-elaq ga râ nghut lhê.” ga, haû Yhûmsîng Garaî é dang jé é sû, Yakup mai nyi gyó lo é a-myû up hkangmó é matú lùqgòk racham cham kut, raxe í cham gùq yu ri. 32 Yhang gi, Yhûmsîng Garaî é mying é matú, lùqgòk haú pê èq hkungga gyàp ralhum saí mù, haû hkungga gyàp lhînghkyùq má, kyô myui radù kô wang é hkyo dû ri. 33 Yhang gi, hau é ahtoq má htang zâng mù, nohtó hpyoq luî, a-túm túm hpyit mù, htang htoq má kê ri. Hau htâng, yhang gi, yhángmòq lé, “Yambú mó myî lhum má wuì hkam pyíng mù, wuì haú lé hkungga eq htang htoq má hut gyun keq.” ga taî ri.
34 Yhang gi, “Dum hut gyun shi keq.” ga taí jáng, yhángmòq gi, dum hut gyun bekô nghut ri.
Yhang gi, “Radàm dum hut gyun shi keq.” ga dangmó hkyó jáng, yhángmòq gi, sum dâm nghû râ dàm dum hut gyun bekô nghut ri. 35 Wuì gi, hkungga gyàp lhînghkyùq má yui gyó ló mù, wuì hkyo lháng byíng to bê nghut ri.
36 Hkungga nhông ahkyíng jé jáng, myìqhtoi Eliya gi, huî ê mù, “Abraham, Isak, Isira-elaq pê é Garai Gasang, Yhûmsîng Garai ê, Nàng gi, Isira-elaq a-myû má Garai Gasang nghut é lé le, ngò gi, Náng é duìnhâng zoshâng nghut mù, Náng é hkunmó eq rajung za shí hkyô pé bànshoq kut é hkyô lé le, hkû-nyí sé nhâng laq ô. 37 Yhûmsîng Garai ê, ngo lé tu byi aq, ngo lé tu byi aq; haú hkûn, Nàng, Yhûmsîng Garai gi, Garai Gasang nghut é hkyô lé le, Nàng gi, yhángmòq é i-myìt nhiklhum lé Náng shut dum taû lhing lò nhang é hkyô lé le, byù shí bang sé kôrâ nghut lhê.” ga kyûdûng ri.
38 Haú hkûn, haû Yhûmsîng Garaî é myi gyó lô mù, hkungga lé le, htang lé le, lùqgòk pé lé le, myi-tse lé le, nyhê hkyô pyám bê nghut é htoq agó, wuì hkyo mâ é wuì lé le lhoqkân pyám bê nghut ri.
39 Shiwa byu pé bànshoq bang gi, haú hkyô lé myàng kôjáng, ngóm gòp kômù, “Haû Yhûmsîng Garai gi, Garai Gasang nghut ri! Haû Yhûmsîng Garai gi, Garai Gasang nghut ri!” ga wùt garû taî bum akô nghut ri.
40 Hau htâng, Eliya gi, yhángmòq lé, “Balaq é myìqhtoî pé lé chyup keq. Rayùq lé lháng hkâ lhoqlhut kat kó!” ga hkunmó hkyô ri. Haû mù, yhángmòq gi, haú bang lé chyup yû bê nghut mù, Eliya gi, Kishon Langhkaû shut shuî gyó ló luî, haú má yhángmòq lé sat pyám bê nghut ri.
41 Hau htâng, Eliya gi, Ahap lé, “Ló mù, ló zo ló shuq àq; mau mó wo é htê lé ngò wó gyô ri.” ga taî ri. 42 Haû mù, Ahap gi, ló zo ló shuq râ matú, htoq ló bê nghut ri; nghut kôlhang, Eliya gi, Hkarimela Bùm nyuq má dòq ló mù, myigùng shut ngóm luî, yhâng é myòqdong lé hkyîhput gyoro má kat ri.
43 Eliya gi, yhâng é duìnhâng zoshâng lé, “Wuìshuq lung-aû shut ê wú kat àq.” ga taî é eq rajung za, yhang gi, dòq ê mù, ê wú kat bê nghut luî, “Haú má haî le a jòq nghut ri.” ga taî ri.
Eliya gi, “Ê dum wú aq.” ga nyhit dâm taî ri.
44 Nyhit dâm nghû râ dàm má, duìnhâng zoshâng haû gi, “Byu é lòq í za tiq é mhut, wuìshuq lung-aû mai toq lo nyi ri.” ga shit kyô ri.
Haû mù, Eliya gi, yhâng é duìnhâng zoshâng lé, “Dòq ló mù, Ahap lé, ‘Nàng gi, mau wo lò mù a wó lai a dùt shi-má, náng é gyèlhêng lé buí yû luî, gyó ló aq.’ nghû taí aq.” ga taî ri.
45 A myáng má, mhut èq mauhkûng noq lò mù, laì mut lô luî, mau mó wo lò bê nghut mù, Ahap gi, lhêng má dòq ji luî, Yezirela wà mó shut ló bê nghut ri. 46 Haû Yhûmsîng Garaî é a-tsam gi, Eliya chyáng jé é nghut mù, yhâng é buhîng lé hpyihit má tuî chyap chûng luî, Yezirela wà mó hkum jé shoq Ahap é hí má din ri.