Nghân A Gyó Mau A Wò Dùt Râ Ga Eliya Taî É Dang
17
Ahkuî, Gile-at mau mâ é Tishibi wà byù Eliya gi, Ahap lé, “Ngò dójaú nyi é Isira-elaq é Garai Gasang, haû Yhûmsîng Garai rû dui nyi é eq rajung za, ngò a taí jáng gi, shî í sum zân gyoro má, nghân le a gyó, mau le a wò dùt byùq râ nghut lhê.” ga taî ri.Eliya Lé Nghoqnòq Pé Zoshuq Byî É Hkyô
2 Hau htâng, Yhûmsîng Garaî é mungdang Eliya chyáng jé é gi, 3 “Shí mai htoq ló mù, buìhtoq hkyam shut lhîng luî, Yodan làng buìhtoq hkyam mâ é Kerit wuìlàng zo nàm má ló haq nyi to aq. 4 Nàng gi, wuìlàng zo haú mâ é wuì shuq râ nghut mù, Ngò gi, haú jowò má nang lé zoshuq lé byi râ matú, nghoqnòq pé lé nhang to bê nghut lhê.” gâ ri.
5 Haû mù, yhang gi, yhang lé haû Yhûmsîng Garai taî é eq rajung za kut bê nghut mù, Yodan làng buìhtoq hkyam mâ é Kerit wuìlàng zo nàm shut ê luî, haú má nyi to bê nghut ri. 6 Nghoqnòq pé gi, nàpsûn lé, yhâng chyáng mùk eq sho yu lé byi mù, myínhtâng lé le, mùk eq sho lé yu lé byi luî, yhang gi, wuìlàng zo haú mâ é wuì shuq bê nghut ri.
Eliya Eq Zarehpat Wà Mâ É Chuimó Myhí
7 Haú mau má mau a wo byùq é yánmai, hkâ myháng a myáng má wuìlàng zo haû kân byùq bê nghut ri. 8 Haú hkûn, Yhûmsîng Garaî é mungdang Eliya chyáng jé é gi, 9 “Toq aq, Sidon mau mâ é Zarehpat wà shut radá dâm ê mù, haú má ê nyî àq. Ngò gi, haú jowò má nang lé zoshuq lé byi râ matú, chuimó myhí rayùq lé nhang to bê nghut lhê.” gâ ri. 10 Haû mù, Eliya gi, Zarehpat wà shut ê bê nghut ri. Yhang wà wàng hkum má jé é hkûn, chuimó myhí rayùq gi, htang ho tsîng nyì láng ri. Yhang gi, myiwe myhí haú lé wùt yù mù, “Ngò shuq râ ûchyam gòm mai ra-tsuí byi laq mhaî.” ga dûng ri. 11 Myiwe myhí haû gi, ûchyam yu ló é hkûn, Eliya gi, “Jeju mai, ngo lé mùk rajàp zo yu lé byi laq.” ga châng garû taî kat ri.
12 Haú hkûn, myiwe myhí haû gi, “Náng é Garai Gasang nghut é, haû Yhûmsîng Garai rû dui nyi é eq rajung za, ngò mùk ralong le a wó lo; yambú má mún ra-tsup eq bòng má tsanlun xû ra-tsuí zo za ru bo alô. Ngò gi, ngò eq ngá zo yùqzô é matú zoshuq gaí râ nghû, yhûm má yu ló râ htang ra-tsuí ho tsîng nyi lhê; ngáme gi, zoshuq haû zo mù, shî berâ nghut lhê.” ga tû taî ri.
13 Eliya gi, myiwe myhí haú lé, “Myìt hkâchiq. Yhûm ló mù, nàng taî é eq rajung za ló kut àq. Nghut kôlhang, nàng wó é mâ é lé, ngá é matú, mùk long zo hí bung mù, yu lé byi aq; hau htâng má shèq, nàng eq nungzô é matú bung aq. 14 Hkâsu mù gâ le, Isira-elaq é Garai Gasang, haû Yhûmsîng Garai shî su ga taî ri; ‘Yhûmsîng Garai mai myìdàm htoq má mau wô nhang é buìnyì jé shoq, yambú mâ é mún ban chûng râ a nghut, bòng mâ é xû le ban byùq râ a nghut.’ gâ ri.” ga taî ri.
15 Myiwe myhí haû gi, ló mù, yhang lé Eliya taî kat é eq rajung za kut bê nghut ri. Haû mù, Eliya é matú le, myiwe myhí haû eq yhâng é yhûmbyù wui é matú le, nyí wuî zoshuq jòq nyì bê nghut ri. 16 Eliya dông Yhûmsîng Garai taî tô é dang lhoqdìk nyi é nghut mù, yambú mâ é mún le a ban byùq, bòng mâ é xû le a ban byùq nghut ri.
17 Hkâ-myháng a myáng má, yhûmsîng myhí hau é yhang zo gi, no lò mù, je riyhang nò mó gyó lô luî, ló htáng má kângsoq byìt byùq bê nghut ri. 18 Myiwe myhí haû gi, Eliya lé, “Garai Gasâng é byù ê, nàng, ngo lé haî mù shî su kut lhê lhú? Nàng gi, ngo lé, ngá é mara lhoqpun byi mù, ngá zo lé sat pyám râ matú lé é nghut lhê lhú?” ga taî ri.
19 Haú hkûn, Eliya gi, “Ngo lé nungzo byi aq.” ga tû taî ri. Yhang gi, yhâng nû é lòq mai zoshâng haú lé bún yû mù, yhang nyi é ahtoq pyâm wàp má bún dòq ló luî, yhâng é yhuphpyang má ló lheq tô ri. 20 Hau htâng, yhang gi, Yhûmsîng Garai lé, “Ngá Garai Gasang nghut é, Yhûmsîng Garai ê, ngò bíng nyi é chuimó myhí shi é yhang zo lé shî nhang é dông, yhâng chyáng haî mù ihkyùp shî she háng byî lhê lhú?” ga wùt dûng ngau ri. 21 Hau htâng, yhang gi, zoshâng hau é ahtoq má yhâng gùng lé sum dàm ngóm nghop mù, haû Yhûmsîng Garai lé, “Ngá Garai Gasang nghut é, Yhûmsîng Garai ê, yùqzo zoshâng shi é chyungxe lé, yhâng chyáng dum taû wâng nhâng laq ô!” ga wùt dûng ngau ri.
22 Haû Yhûmsîng Garai gi, Eliya wùt dûng ngau é htê lé gyo byî é nghut mù, yùqzo zoshâng hau é chyungxe gi, yhâng chyáng dum taû wâng bê nghut luî, yhang gi, chyungxe duì bê nghut ri. 23 Eliya gi, zoshâng haú lé bún toq yû mù, wàp haú mai bún gyó lô luî, yhúmhkaû má bún wang ló mù, yhâng nu lé zoshâng haû byi luî, “Wú aq, nungzo chyungxe duì bê nghut ri!” ga taî ri.
24 Haú hkûn, myiwe myhí haû gi, Eliya lé, “Nàng gi, Garai Gasâng é byù nghut é lé le, náng é nhut mâ é Yhûmsîng Garaî é dang gi, tengmán é nghut é lé le, ahkuî ngò sé bê.” ga taî ri.