16
Haú hkûn, Basha eq séng luî, Yhûmsîng Garaî é mungdang Hanani é yhang zo Yehu chyáng jé é gi, 2 “Ngò gi, nang lé, hpuílhup yò mai lhoqtoq yù mù, Ngá é Isira-elaq byu pé lé ùp nhang to bê nghut lhê; nghut kôlhang, nàng gi, Yerobo-am é hkyô pé má cháng mù, Ngá é Isira-elaq byu pé lé mara kut shut nhâng luî, yhángmòq é yubàk marâ é yánmai, Ngo lé nhikjum lhoqyo nhâng bê nghut ri. 3 Haû mù, Ngò gi, Basha eq yhâng é yhûmbyù wuì lé lhoqhtên pyám râ za nghut bê; Ngò gi, náng é yhûmhtu lé, Nebat é yhang zo Yerobo-am é yhûmhtu lé su kut pyám râ nghut lhê. 4 Hkui pé gi, wà mó hkaû má shi byùq é Basha eq sêng é bang lé zô pyám râ nghut mù, nghoq pé gi, pá pé má shi byùq é bang lé zô pyám râ nghut lhê.” gâ ri.5 Basha ùp é gótû hkyô pé, yhang kut laî lo é hkyô eq yhang wó ûngmyuq é hkyô pé lé gi, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí? 6 Basha gi, yhâng é îchyí îwâ pê chyáng ló bo bánnô byùq bê nghut mù, Tiriza wà má myhup yhûm pyâm é hui bê nghut ri. Haû mù, yhang zo Ela gi, yhâng é hkóhkâm hkô má zùng bê nghut ri.
7 Hau htoq agó, haû Yhûmsîng Garaî é mungdang gi, Hanani é yhang zo myìqhtoi Yehu dông Basha eq yhâng é yhûmhtu chyáng jé ri; hkâsu mù gâ le, Basha gi, Yerobo-am é yhûmhtu eq du lò mù, yhang yhûmhtu haú lé lhoqhtên pyâm é dông, haû Yhûmsîng Garaî é myòq hí má kut é agè ashop hkyô bànshoq é yánmai, haû Yhûmsîng Garai lé nhikjum lhoqyo mù jé é nghut ri.
Isira-elaq Hkóhkâm Ela
8 Yudaq hkóhkâm Asa hkóhkâm kut é í xe hkyuq zan zàn má, Basha é yhang zo Ela gi, Isira-elaq hkóhkâm dùt mù, Tiriza wà má í zân ùp ri.
9 Yhâng é zaugun wuì mâ é rayùq, gyèlhêng rawuí lé gon sû Zimri gi, yhang lé gumlau toq râ haq htung ri. Haú u, Ela gi, Tiriza wà má, hkóhkâm wâng lé gon sû Ariza é yhûm má î shuq wùt nyi ri. 10 Zimri gi, wang lé mù, Ela lé bàt sat pyâm ri. Haú hkyô gi, Yudaq hkóhkâm Asa ùp é í xe nyhit zan zàn má dùt é nghut ri. Hau htâng, Zimri gi, yhâng é hkóhkâm hkô má zùng bê nghut ri.
11 Zimri gi, hkóhkâm tángmyhâng má zùng mù, ùp hi ló eq yhang, Basha é yhûmbyù wuì lhúnglháng lé sat pyám bê nghut ri. Yhang gi, Basha é buìnùm ji-myi wuì mâ é le, luzúm wuî mâ é le, yùqgè rayùq lháng a nyhi to lo nghut ri. 12 Haû mù, Zimri gi, myìqhtoi Yehu dông mai Basha lé haû Yhûmsîng Garai htuqhtíng dang taî tô é dang eq rajung za, Basha é yhûmbyù wuì lhúnglháng lé sat pyám bê nghut ri; 13 Basha eq yhang zo Ela kut shut é yubàk mara bànshoq eq Isira-elaq byu pé lé mara kut shut nhang é yánmai, yhángmòq gi, yhángmòq é hpau a dàp é hparà alhô pé lé noq é dông, Isira-elaq é Garai Gasang, haû Yhûmsîng Garai lé nhikjum lhoqyô akô nghut ri.
14 Ela ùp é gótû hkyô pé eq yhang kut laî lo é hkyô bànshoq lé, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí?
Isira-elaq Hkóhkâm Zimri
15 Yudaq hkóhkâm Asa ùp é í xe nyhit zan zàn má, Zimri gi, Tiriza wà má nyhit nyí ùp bê nghut ri. Haú hkûn, Isira-elaq gyèzô pé gi, Hpilisiti mau mâ é Gibehton wà lé wàp xuq lhîng tô akô nghut ri. 16 Zimri mai hkóhkâm lé gumlau haq toq mù, sat pyám bê gâ é hkyô lé, wàp má nyi é Isira-elaq byu pé wó gyô bùm kôjáng, yhángmòq gi, haú nyí má yhang, wàp haú má, gyèzau mó Omri lé, Isira-elaq byu pê é hkóhkâm dáng byi bekô nghut ri. 17 Hau htâng, Omri gi, Isira-elaq byu pé bànshoq bang eq rahá Gibehton wà mai taû htoq mù, Tiriza wà lé ló lhom hkyuq to bekô nghut ri. 18 Zimri gi, wà haú lé zân ung yu ló bê hkyô lé myàng jáng, gingtíng hkóhkâm gyèwap hkaû shut wang ló luî, yhâng é lhînghkyùq mâ é hkóhkâm wâng lé myi tap kat mù, yhang le shi byùq bê nghut ri. 19 Haû Yhûmsîng Garaî é myòq hí má yhang kut shut é agè ashop é yubàk marâ é yánmai le, Yerobo-am é hkyô pé má cháng mù, Isira-elaq byu pé lé Yerobo-am kut shut nhang é mara shut é yánmai le, yhang shi byùq é nghut ri.
20 Zimri ùp é gótû hkyô pé lé le, yhang gumlau shuî toq é hkyô lé le, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí?
Isira-elaq Hkóhkâm Omri
21 Hau htâng, Isira-elaq byu pé gi, í hpúng gam hkoq ló byùq bê nghut ri; rahpúng gi, Ginat é yhang zo Tibini htâng cháng mù, yhang lé hkóhkâm kut nhang akô; rahpúng gi, Omri htâng châng akô nghut ri. 22 Nghut kôlhang, Omri htâng cháng bang gi, Ginat é yhang zo Tibini htâng cháng bang lé ung pyâm akô nghut ri. Haû mù, Tibini shi byùq bê nghut luî, Omri gi, hkóhkâm dùt bê nghut ri.
23 Yudaq hkóhkâm Asa ùp é súm xe razan zàn má, Omri gi, Isira-elaq hkóhkâm dùt mù, raxe í zân ùp é nghut luî, Tiriza wà má hkyuq zân ùp ri. 24 Yhang gi, Shemera chyáng mai ngùnhtung í xe í joí èq Samariq kong lé wui yù mù, kong haú má wà mó xuq ri. Wà haú lé gi, hí lhê é kong yhûmsîng Shemera gá su é myìng má cháng luî, Samariq ga myhîng tô ri.
25 Nghut kôlhang, Omri gi, haû Yhûmsîng Garaî é myòq hí má agè ashop é hkyô kut mù, yhâng é hí mâ é hkóhkâm bànshoq htoq má yubàk mara jé kut shut bê nghut ri. 26 Yhang gi, Nebat é yhang zo Yerobo-am é hkyô má bànshoq cháng mù, Isira-elaq byu pé lé mara kut shut nhang é Yerobo-am é mara eq roq kut shut ri. Haû mù, yhángmòq gi, yhángmòq é hpau a dàp é hparà alhô pé lé noq é dông, Isira-elaq é Garai Gasang, haû Yhûmsîng Garai lé nhikjum lhoqyô akô nghut ri.
27 Omri ùp é gótû hkyô pé lé le, yhang kut laî lo é eq yhang wó ûngmyuq é hkyô pé lé le, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí? 28 Omri gi, yhâng é îchyí îwâ pê chyáng ló bo bánnô byùq bê nghut mù, Samariq wà má myhup yhûm pyâm é hui bê nghut ri. Hau htâng, yhang zo Ahap gi, yhâng é hkóhkâm hkô má zùng bê nghut ri.
Ahap Isira-elaq Hkóhkâm Dùt É Hkyô
29 Yudaq hkóhkâm Asa ùp é súm xe shit zan zàn má, Omri é yhang zo Ahap gi, Isira-elaq hkóhkâm dùt mù, Samariq wà mai Isira-elaq byu pé lé, í xe í zân ùp ri. 30 Omri é yhang zo Ahap gi, yhâng é hí mâ é hkóhkâm yùq hkangmó htoq, haû Yhûmsîng Garaî é myòq hí má agè ashop é hkyô je kut bê nghut ri. 31 Yhang gi, Nebat é yhang zo Yerobo-am kut shut é yubàk mara hkyô lé châng kut shut é lé haî su a ngam é za, Sidon byu pê é hkóhkâm Ehtibalaq é byìzo Yezebela lé hâng yù mù, Balaq hparà lé noqkuq dójaú hî bê nghut ri. 32 Yhang gi, Samariq wà má yhang saî tô é Balaq hparà yhûm mâ é Balaq hpara é matú, hkungga gyàp ralhum saî to bê nghut ri. 33 Ahap gi, Ashera hparà zìng le saí mù, yhâng é hí mâ é Isira-elaq hkóhkam pé bànshoq htoq, Isira-elaq é Garai Gasang, haû Yhûmsîng Garai lé nhikjum je lhoqyô ri.
34 Ahap é i-pyàt má, Behtela wà byù Hi-ela gi, Yerihko wà lé dum saî xuq ri. Yhang gi, Nun é yhang zo Yoshuq dông haû Yhûmsîng Garai taî tô é eq rajung za, hau é a-pûn awang pé lé hkyô é hkûn, yhâng é zo-mún Abiram shi byùq mù, haú pê é hkum pé saî é hkûn, zohtáng Seguba shi byùq é hui zô ri.