Yudaq Hkóhkâm Abiya
15
Nebat é yhang zo Yerobo-am ùp é raxe shit zan zàn má, Abiya gi, Yudaq mau mâ é hkóhkâm dùt bê nghut ri. 2 Yhang gi, Yerusalem wà mó má sum zân ùp ri. Yhâng nu gi, Abishalom é yhang zo byìzo nghut mù, Mahka ga myhîng é sû nghut ri.3 Abiya gi, yhâng é hí má, yhâng wa kut laî lo é mara bànshoq lé xoq kut shut ri; yhâng é i-myìt nhiklhum gi, yhâng é Garai Gasang nghut é, haû Yhûmsîng Garai lé, yhâng é îchyí îwa Dawiq é i-myìt nhiklhum gúmjùp shoq àp nhông é su, gúmjùp shoq a àp nhông nghut ri. 4 Nghut kôlhang, Dawiq é yánmai, yhâng é Garai Gasang nghut é, haû Yhûmsîng Garai gi, yhang zo lé, yhâng é hkô má lhoqtoq yu é dông le, Yerusalem wà mó lé wum-o lhoqkíng byî é dông le, Yerusalem wà mó má yhang lé myibung ralhum byî to bê nghut ri. 5 Hkâsu mù gâ le, Dawiq gi, haû Yhûmsîng Garaî é myòq hí má jo têng é hkyô kut bê nghut mù, Hiti byù Uri-a é hkyô mai lai luî, yhâng é i-pyàt gón má, haû Yhûmsîng Garaî é hkunmó hkâ lé le a châng é a bò nghut ri.
6 Abiya eq Yerobo-am nhik é gyoro má, Abiya é i-pyàt gón majan htoq lhûm nyi ri. 7 Abiya ùp é gótû hkyô pé eq yhang kut laî lo é bànshoq lé gi, Yudaq hkóhkam pê é mhô-myi shindâm laiká bùk má kâ tô lhê, a nghut lhí? Abiya eq Yerobo-am nhik é gyoro má majan zân lhûm nyi ri. 8 Abiya gi, yhâng é îchyí îwâ pê chyáng ló bo bánnô byùq bê nghut mù, Dawiq é Wà má myhup yhûm pyâm é hui bê nghut ri. Haû mù, yhang zo Asa gi, yhâng é hkóhkâm hkô má zùng bê nghut ri.
Yudaq Hkóhkâm Asa
9 Isira-elaq hkóhkâm Yerobo-am ùp é í xê zan zàn má, Asa gi, Yudaq hkóhkâm dùt bê nghut ri; 10 yhang gi, Yerusalem wà mó má myí xe razàn ùp ri. Yhâng whoí gi, Abishalom é byìzo Mahka ga myhíng sû nghut ri.
11 Asa gi, yhâng é îchyí îwa Dawiq kut é su, haû Yhûmsîng Garaî é myòq hí má jo têng é hkyô kut ri. 12 Yhang gi, haú mau mai hparà noq jang mâ é shiwa hpô pé lé hkat htoq pyám mù, yhâng é îchyí îwâ pé saî tô é hparà alhô pé bànshoq lé hkyom pyâm ri. 13 Yhang gi, yhâng whoí Mahka mai Ashera lé noqkuq râ matú achaq achyut é alhô saî é yánmai, yhâng whoí lé hkóhkam yhâng nu ayá mai lhoqhkyô pyám byi luî, alhô haú lé zân lhêng yù mù, Kidron Langhkaû má nyhê hkyô pyâm ri. 14 Yhang gi, myhang é hparà noq jowò pé lé a huî sêng pyám kôlhang, yhâng é i-pyàt bànshoq má haû Yhûmsîng Garai lé yhâng é i-myìt bànshoq èq àp nhong nyi ri. 15 Yhang gi, yhang le, yhâng wa le àp nhong tô é ngùn, hîng eq zèhkoq pé lé, haû Yhûmsîng Garaî é noqkuq yhûm má kat tô ri.
16 Asa eq Isira-elaq hkóhkâm Basha ùp é ayòq abun bànshoq, yhángnhik é gyoro má majan htoq lhûm nyi ri. 17 Isira-elaq hkóhkâm Basha gi, Yudaq hkóhkâm Asa é mau má ó le htoq wâng a wó kut râ matú, Yudaq mau má ê dòq htim mù, Rama wà lé ê xuq gingtîng tô ri.
18 Haú hkûn, Asa gi, haû Yhûmsîng Garaî é noqkuq yhûm mâ é sùtdò eq yhâng é hkóhkâm wâng mâ é sùtdò má myìt gyó tô é ngùn eq hîng bànshoq lé yu htoq mù, yhâng é zaugun wuì lé haú pé àp luî, Damasikuq wà má zung é, Hezi-on é yhang shu, Tabrimon é yhang zo Aram hkóhkâm Ben Hadat chyáng hun kat byi nhâng mù, 19 “Náng wa eq ngá wâ é gyoro má dangshikaq tô é su, ngò eq náng é gyoro má le dangshikaq to gòq. Wú aq; ngò gi, náng chyáng ngùn eq hîng chyûnghuq hun kat lhê. Ahkuî, Isira-elaq hkóhkâm Basha gi, ngá chyáng mai taû ló byùq sháng gàq, yhang eq nàng tô tô é dangshikaq lé lhoqhtên pyám aq.” ga taí nhang kat ri.
20 Ben Hadat gi, Hkóhkâm Asa lé myìt hui byi mù, yhâng é gyèzaû pé lé, Isira-elaq byu pê é wà pé lé ê htim râ matú nhang kat luî, yhángmòq gi, Naphtali mau lé wó sing yu é htoq agó, Iyon wà, Dan wà, Abela Bet Mahka wà eq Hkineret mau bànshoq lé wó sing yù bê nghut ri. 21 Basha gi, haú hkyô lé wó gyo jáng, Rama wà xuq nyi é hkyô lé nô pyám mù, Tiriza wà mó shut ló byùq bê nghut ri. 22 Haú hkûn, Hkóhkâm Asa gi, Yudaq byu pé bànshoq rayùq lé lháng a myhit to loshoq, Basha mai Rama wà saî xuq hkûn chung é lùqgòk pé eq sik pé lé chôm wàq yù râ matú hkunmó hkyô ri. Hkóhkâm Asa gi, haú pé lé chûng mù, Ben-yamin mau mâ é Geba wà eq Mizipa wà lé lhoqkô myhâng bê nghut ri.
23 Asa ùp é gótû hkyô bànshoq, yhang wó ûngmyuq é hkyô bànshoq, yhang kut é hkyô bànshoq eq yhang xuq é wà pê é hkyô pé lé, Yudaq hkóhkam pê é mhô-myi shindâm laiká bùk má kâ to bekô, a nghut lhí? Nghut kôle, yhang chyungxe zànwut ko bê hkûn, yhâng é hkyî má dàm dap lo ri. 24 Hau htâng, Asa gi, yhâng é îchyí îwâ pê chyáng ló bo bánnô byùq bê nghut mù, yhángmòq eq rahá, yhâng wa Dawiq é Wà má myhup yhûm pyâm é hui bê nghut ri. Haû mù, yhang zo Yehoshahpat gi, yhâng é hkóhkâm hkô má zùng bê nghut ri.
Isira-elaq Hkóhkâm Nadap
25 Yerobo-am é yhang zo Nadap gi, Yudaq hkóhkâm Asa ùp é í zan zàn má, Isira-elaq hkóhkâm dùt mù, Isira-elaq byu pé lé í zân ùp ri. 26 Yhang gi, yhâng wâ é hkyô pé má châng é dông le, Isira-elaq byu pé lé mara shut nhang é yhâng wâ é mara eq roq za kut shut é dông le, haû Yhûmsîng Garaî é myòq hí má agè ashop é hkyô kut bê nghut ri.
27 Yisahka up mâ é Ahiya é yhang zo Basha gi, Nadap lé gumlau toq râ haq hên mù, Nadap eq Isira-elaq byu pé bànshoq bang, Hpilisiti mau mâ é Gibehton wà lé lóm to kô é u, wà haú má Nadap lé sat pyâm ri. 28 Basha gi, Yudaq hkóhkâm Asa ùp é súm zan zàn má Nadap lé sat pyám mù, yhâng é hkóhkâm hkô má zùng bê nghut ri.
29 Yhang gi, hkóhkâm kut hi ló eq yhang, Yerobo-am é i-kun byù lhúnglháng lé sat pyâm ri. Yhang gi, haû Yhûmsîng Garai mai yhâng é duìnhâng zoshâng Shilo wà byù Ahiya dông taî tô é dang eq rajung za, Yerobo-am é i-kun byù rayùq lé lháng kângsoq duì nhang tô é a bò lo nghut ri. 30 Haú hkyô dùt é gi, Yerobo-am kut shut laî lo é mara pé eq yhang mai Isira-elaq byu pé lé mara kut shut nhang é yánmai le, Isira-elaq é Garai Gasang, haû Yhûmsîng Garai lé nhikjum lhoqyô é yánmai le nghut ri.
31 Nadap ùp é gótû hkyô pé eq yhang kut laî lo é hkyô bànshoq lé gi, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí? 32 Asa eq Isira-elaq hkóhkâm Basha ùp é ayòq abun bànshoq, yhángnhik é gyoro má majan htoq lhûm nyi ri.
Isira-elaq Hkóhkâm Basha
33 Yudaq hkóhkâm Asa ùp é súm zan zàn má, Ahiya é yhang zo Basha gi, Tiriza wà mó má Isira-elaq byu pé bànshoq bâng é hkóhkâm dùt bê nghut ri; yhang gi, í xe myi zân ùp ri. 34 Yhang gi, Yerobo-am kut é hkyô pé má cháng mù, Isira-elaq byu pé lé Yerobo-am kut shut nhang é mara má châng kut shut nhâng luî, haû Yhûmsîng Garaî é myòq hí má agè ashop é hkyô kut bê nghut ri.