Ahiya Mai Yerobo-am Lé Htuqhtîng É Myìqhtoi Dang
14
Haú u lé, Yerobo-am é yhang zo Abiya gi, no lò mù, 2 Yerobo-am gi, yhâng é yhûmsîng myhí lé, “Nàng, Yerobo-am é yhûmsîng myhí nghut é lé ó a wú sé loshoq, náng gûng nàng haq mhôn chûng mù, Shilo wà má ê àq. Ngo lé, nàng, byù shí bâng é hkóhkâm dùt lò râ nghut lhê ga taí sû, myìqhtoi Ahiya haú má nyi ri. 3 Nàng gi, mùk long raxê, mùk pá ra-am eq byo-î rayambú yu chûng mù, yhâng chyáng ê àq. Yhang gi, zôshang chyáng haî dùt lò râ hkyô, nang lé lhom taî kyo râ nghut lhê.” ga taî ri. 4 Haû mù, Yerobo-am é yhûmsîng myhí gi, yhang taî é eq rajung za kut mù, Shilo wà mâ é Ahiya é yhûm má ê jé ri.Ahiya gi, chyungxe i-pyàt ko bê nghut é yánmai, myòq myhám myhám dùt byùq mù, a myàng lo nghut ri. 5 Nghut kôlhang, haû Yhûmsîng Garai gi, Ahiya lé, “Yerobo-am é yhûmsîng myhí gi, yhang zo yùqzo no nyi é yánmai, zoshâng haû eq séng luî nang lé myi râ matú, lé lo nyi ri. Nàng gi, yhang lé shî su su nghû tû taí ra râ nghut lhê. Yhang gi, lé jé é hkûn, myiwe góyùq su mhaû kut mhaú râ nghut lhê.” ga taî ri.
6 Haû mù, Ahiya gi, hkum má myiwe myhí haû wang lé lo é hkyîbyè htê lé wó gyo jáng, “Yerobo-am é yhûmsîng myhí ê, wang lé lô àq. Haî mù, haû su mhaû kut lhê lhú? Ngò gi, náng é matú yón hpo lùdang wun tô lhê. 7 Yerobo-am lé ló taî kyo aq; Isira-elaq é Garai Gasang, haû Yhûmsîng Garai shî su gâ ri; ‘Ngò gi, nang lé, shiwa byu pê chyáng mai lhoqtoq yû mù, Ngá é Isira-elaq byu pé lé ùp râ zau kut nhang to bê nghut lhê. 8 Ngò gi, Dawiq é yhûm mai mîngdán lé wùp yù luî, nang lé byi bê nghut lhê; nghut kôlhang, nàng gi, Ngá é hkunmó lé châng kut mù, yhâng é i-myìt nhiklhum bànshoq èq Ngá htâng cháng luî, Ngá é myòq hí má jo têng é hkyô za kut é, Ngá é duìnhâng zoshâng Dawiq su a dùt nghut ri. 9 Nàng gi, náng é hí má nyi laî lo é bang bànshoq htoq má, agè ashop hkyô je kut bê nghut ri. Nàng gi, Ngo lé nhik-yo nhâng shoq, hparà hpôlhô pé saí mù, jòqtoq wing shup tô é alhô pé saí bê nghut luî, Ngá chyáng mai nùnghtáng lhik pyám bê nghut ri.
10 Hau é yánmai, Ngò gi, Yerobo-am é yhûmhtu má byò dàn byò sho hkyô jé nhâng râ nghut lhê. Ngò gi, Isira-elaq mau mai, Yerobo-am up mâ é lùthkyô wó é a wó é yùqzo tiq ko bànshoq lé chyung hpyit pyám râ nghut lhê. Ngò gi, a-pyâng bùm lé nyhê hkyô pyâm é su, Yerobo-am é yhûmhtu lé chyut nyhê hkyô pyám râ nghut lhê. 11 Wà mó hkaû má shi byùq é Yerobo-am eq sêng é bang lé, hkui pé zô pyám râ nghut mù, pá pé má shi byùq é bang lé maulat nghoq pê èq zô pyám râ nghut lhê. Haû Yhûmsîng Garai taî to bê nghut ri!’ gâ ri.
12 Haû mù, nàng gi, toq luî, yhûm shut taû ló aq. Náng é wà mó má, nàng hkyî ló nâng kat é hkûn, zoshâng haû shi byùq râ nghut lhê. 13 Isira-elaq byù bànshoq bang gi, yhâng é matú iyon chôm yon mù, myhup yhûm pyám kôrâ nghut lhê. Yerobo-am eq sêng é yhûmbyù wuì má, yhang rayùq baú za rago myhup yhûm é hui râ nghut lhê; hkâsu mù gâ le, yhang rayùq baú za, Yerobo-am é yhûmbyù wuì má, Isira-elaq byu pê é Garai Gasang, haû Yhûmsîng Garaî é hí má, ge é myìt rajung jung bò sû nghut ri.
14 Haû Yhûmsîng Garai gi, Yerobo-am é yhûmbyù wuì lé chyung hpyit pyám râ sû nghut é, Isira-elaq byu pé lé ùp râ hkóhkâm rayùq Yhâng matú lhoqtoq râ nghut lhê. Ahkuî lháng, haú hkyô gi, dùt hî bê nghut ri. 15 Hau htoq agó, haû Yhûmsîng Garai gi, Isira-elaq a-myû lé bàt kyop râ nghut mù, haû gi, wuìlàng má jàm yang myû byôm é su dùt byùq râ nghut lhê. Yhángmòq gi, Ashera hparà zìng pé saî é dông, haû Yhûmsîng Garai lé nhikjum lhoqyo kô é yánmai, Yhang gi, Isira-elaq byu pé lé, yhángmòq é îchyí îwâ pé lé byî tô é maumyî gè shî mai nùt htoq pyám luî, Uhprat Wuìlàng lai shoq lhoqpyo pyám râ nghut lhê. 16 Yerobo-am gi, mara kut shut mù, Isira-elaq byu pé lé le mara kut shut nhang é, mara pê é yánmai, haû Yhûmsîng Garai gi, Isira-elaq byu pé lé tô pyám râ nghut lhê.” ga taî ri.
17 Haû mù, Yerobo-am é yhûmsîng myhí gi, toq mù, Tiriza wà shut ló bê nghut ri. Yhang gi, yhûm hkumtáng má jé nang eq yhang, zoshâng haû shi byùq bê nghut ri. 18 Haû Yhûmsîng Garai mai, Yhâng é duìnhâng zoshâng myìqhtoi Ahiya dông taî tô é eq rajung za, yhángmòq gi, zoshâng haú lé myhup yhûm pyám kômù, Isira-elaq byù bànshoq bang gi, yhâng é matú iyon yôn bum akô nghut ri.
19 Yerobo-am ùp é gótû hkyô pé nghut é, yhâng é majan hkyô pé eq yhang hkâsu kut ùp é hkyô pé lé gi, Isira-elaq hkóhkâm pê é múzó gôn kyô é mhô-myi shindâm laiká bùk má kâ tô lhê. 20 Yhang gi, í xe í zân ùp mù yhâng é îchyí îwâ pê chyáng ló bo bánnô byùq bê nghut ri. Haú hkûn, yhang zo Nadap gi, yhâng é hkóhkâm hkô má zùng bê nghut ri.
Yudaq Hkóhkâm Rehobo-am É Hkyô
21 Sholumon é yhang zo Rehobo-am gi, Yudaq mau má hkóhkâm kut ri. Yhang, hkóhkâm dùt lo é u, chyungxe zànwut myí xe razàn bò bê nghut ri. Yhang gi, haû Yhûmsîng Garai mai Yhâng é myìng tô to râ matú, Isira-elaq a-myû up bànshoq mai hkyin htoq yu é wà mó Yerusalem má raxe nyhit zân ùp ri. Yhâng nû é myìng gi, Nama gâ ri; yhang gi, Ammon byù nghut ri.
22 Yudaq mau mâ é byu pé gi, Yhûmsîng Garaî é myòq hí má agè ashop é hkyô kut bekô nghut ri. Yhángmòq gi, hí lhê é îchyí îwâ pê htoq, yhángmòq kut shut é marâ èq, haû Yhûmsîng Garai lé je riyhang nhikjum lhoqyô akô nghut ri. 23 Yhángmòq gi, yhûmsing é matú, myhang é kong hkangmó eq akoq hkyâm lam é sikgâm ô hkangmó má, myhang é hparà noq jowò pé, chyoiyúng lùqzìng pé eq Ashera hparà zìng pé lé tsing saî tô akô nghut ri. 24 Hparà noq jang mâ é shiwa hpô pé lháng haú mau má nyi ri; shiwa byu pé gi, haû Yhûmsîng Garaî èq Isira-elaq byu pê é hí mai hkat htoq pyám byî é byù myû wui é achaq achyut hkyô bànshoq lé châng kut bum akô nghut ri.
25 Rehobo-am hkóhkâm kut é ngó zan zàn má, Egutuq ming mâ é hkóhkâm Shishak gi, Yerusalem wà mó lé majan hpông ri. 26 Yhang gi, haû Yhûmsîng Garaî é noqkuq yhûm mâ é sùtzè pé eq hkóhkâm wâng mâ é sùtzè pé lé hkyom yu ló é htoq agó, Sholumon saî é hîng gòlong pé eq jung hkangmó lé le yu ló ri. 27 Haû mù, Hkóhkâm Rehobo-am gi, hîng gòlong pê é malaî gyi gòlong saí mù, hkóhkâm wâng hkum zúng bâng é zaugun wui é lòq má àp byî tô ri. 28 Hkóhkâm hpó, haû Yhûmsîng Garaî é noqkuq yhûm má wang ê hkangmó, hkum zúng bang gi, gòlong pé chung akô; hau htâng, hkum zúng wàp má gòlong pé lo dum kat to to kut akô nghut ri.
29 Rehobo-am ùp é gótû hkyô pé eq yhang kut é bànshoq lé gi, Yudaq hkóhkam pê é mhô-myi shindâm laiká bùk má tsing kâ tô lhê, a nghut lhí? 30 Rehobo-am eq Yerobo-am nhik é gyoro má majan htoq lhûm nyi ri. 31 Rehobo-am gi, yhâng é îchyí îwâ pê chyáng ló bo bánnô byùq bê nghut mù, Dawiq é Wà má yhángmòq eq rahá myhup yhûm pyâm é hui bê nghut ri. Yhâng nû é myìng gi, Nama gâ ri; yhang gi, Ammon byù nghut ri. Yhang zo Abiya gi, yhâng é hkóhkâm hkô má zùng bê nghut ri.