Yudaq Mau Mâ É Garai Gasâng É Byù
13
Yerobo-am gi, hkungga nhông byi râ matú hkungga gyàp nàm má yàp tô é hkûn, Yudaq mau mâ é Garai Gasâng é byù rayùq gi, haû Yhûmsîng Garai hkunmó hkyô tô é eq rajung za, Behtela wà má ê jé ri. 2 Yhang gi, haû Yhûmsîng Garaî é dang eq rajung za, “Hkungga gyàp ê, hkungga gyàp ê! Haû Yhûmsîng Garai shî su ga taî ri; ‘Dawiq é akoq má Yosi-a gâ é yùqzo rayùq hku lé râ nghut lhê. Yhang gi, shí má hkungga nhông byî é, myhang é hparà noq jowò pé mâ é hkyangjông pé lé, náng é ahtoq má sat nhông byi luî, byu é showui pé lé le, náng é ahtoq má nyhê hkyó râ nghut lhê.’ gâ ri.” ga hkungga gyàp lé htuqhtîng é dông taî ri. 3 Haú nyí má yhang, Garai Gasâng é byù gi, “Haû Yhûmsîng Garai tûn shit é alhô agàn gi, shí dông nghut ri; hkungga gyàp haû gi, gòq lò mù, hau é ahtoq mâ é myiwap shun gyó byùq râ nghut lhê.” gâ é alhô agàn byî tô ri.4 Hkóhkâm Yerobo-am gi, haû Garai Gasâng é byù mai Behtela má hkungga gyàp lé taî htuqhtíng garû é dang lé wó gyo jáng, hkungga gyàp mai yhâng é lòq lé lhâm kat mù, “Yhang lé chyup yù keq!” ga taî ri. Nghut kôlhang, haú yùq shut lhâm kat é yhâng é lòq gi, lòq jum shi byùq luî, a wó she taû yù lo nghut ri. 5 Hau htoq agó, haû Yhûmsîng Garaî é dang dông, Garai Gasâng é byù haú yùq mai tûn shit é alhô agàn má cháng luî, hkungga gyàp gòq byùq mù, haú mâ é myiwap shun gyó byùq bê nghut ri.
6 Haú hkûn, hkóhkâm gi, Garai Gasâng é byù lé, “Ngá é lòq wó dum ge lò âbe, náng é Garai Gasang nghut é, haû Yhûmsîng Garai lé, ngá é matú kyû bo dung byi laq.” ga taî ri. Haû mù, Garai Gasâng é byù haû gi, Yhûmsîng Garaî chyáng kyûdûng xoq byî é nghut mù, hkóhkam é lòq gi, ge byùq luî, hí lhê su roq dum dùt bê nghut ri.
7 Hkóhkâm gi, Garai Gasâng é byù haú lé, “Ngò eq rahá ngá yhûm má zoshuq ló zo gòq; ngò, nang lé chyûnghuq byi râ nghut lhê.” ga taî ri.
8 Nghut kôlhang, Garai Gasâng é byù haû gi, hkóhkâm lé, “Náng é sùtzè rawuí ngo lé byi râ nghut le lháng, ngò gi, nàng eq rahá cháng râ a nghut; shí jowò má mùk le a zo, wuì le a shuq râ nghut lhê. 9 Hkâsu mù gâ le, haû Yhûmsîng Garaî é dang mai, ‘Nàng mùk le ge zo râ a nghut, wuì le ge shuq râ a nghut é htoq agó, nàng lé lo é hkyô mai le ge dum taû ló râ a nghut.’ ga ngo lé hkunmó hkyô tô ri.” ga tû taî ri. 10 Haû mù, yhang gi, Behtela wà shut lé lo é hkyô dông a nghut é za, gótû hkyô dông taû ló bê nghut ri.
11 Haú u lé, Behtela wà má myìqhtoi mangzo rayùq nyi ri. Yhang zo yùqzô pé gi, Garai Gasâng é byù mai Behtela wà má haú nyí kut é hkyô bànshoq, yhang lé taî kyô akô. Hau htoq agó, yhángmòq gi, byù haú yùq hkóhkâm lé taî é dang lé le, yhang lé taî kyô akô nghut ri. 12 Yhángmòq é yhâng wa gi, yhángmòq lé, “Yhang, hká hkyô mai ló ri lhú?” ga myi jáng, yhang zô pé gi, Yudaq mau mai lé jé é Garai Gasâng é byù ló é hkyô lé tûn shit akô nghut ri. 13 Haû mù, yhang gi, yhang zô pé lé, “Ngá é matú loze buí byi keq.” ga taî ri. Yhángmòq gi, yhâng é matú loze buí byi kôjáng, yhang gi, haú má dòq ji luî, 14 Garai Gasâng é byù htâng châng hkat e ló mù, wàqmyòq gàm ô má zung tô é lé ê myâng luî, “Nàng gi, Yudaq mau mai lé lo é Garai Gasâng é byù nghut lhê lhú?” ga myi jáng, yhang gi, “Nghut lhê.” ga tû taî ri.
15 Haû mù, myìqhtoi haû gi, yhang lé, “Ngò eq rahá yhûm shut bo châng lò mù, zoshuq zo aq.” ga taî ri.
16 Garai Gasâng é byù haû gi, “Ngò, nàng eq rahá a wó bo châng taû ló; shí jowò má, nàng eq rahá mùk le a ge zo, wuì le a ge shuq râ nghut lhê. 17 Yhûmsîng Garaî é dang mai, ‘Haú jowò má nàng mùk ge zo râ a nghut, wuì le ge shuq râ a nghut é htoq agó, nàng lé lo é hkyô mai le ge dum taû ló râ a nghut.’ ga ngo lé taî ri.” ga taî kyô ri.
18 Myìqhtoi mangzo haû gi, “Ngò le, nàng eq rajung za myìqhtoi rayùq nghut lhê. Haû mù, maumang lagyo rayùq gi, Yhûmsîng Garaî é dang mai, ‘Yhang gi, mùk zo wuì wó shuq sháng gàq, nàng eq rahá yhang lé náng é yhûm má ê shuî taû lò àq.’ ga ngo lé taî ri.” ga tû taî ri. (Nghut kôlhang, myìqhtoi mangzo haû gi, yhang lé mhaû é nghut ri.) 19 Haû mù, Garai Gasâng é byù gi, yhang eq rahá bo taû lò mù, yhâng é yhûm má mùk zo wuì shuq kut bê nghut ri.
20 Yhángnhik zohpoq má zung nyì kô é u, haû Yhûmsîng Garaî é mungdang gi, yhang lé shuî taû lo é myìqhtoi mangzô chyáng jé ri. 21 Haû mù, yhang gi, Yudaq mau mai lé é Garai Gasâng é byù haú lé, “Haû Yhûmsîng Garai shî su ga taî ri; ‘Nàng gi, haû Yhûmsîng Garaî é dang lé lu lai mù, náng é Garai Gasang nghut é, haû Yhûmsîng Garai mai nang lé byî tô é hkunmó lé a cháng kut bê nghut ri. 22 Nàng gi, nang lé Yhang hkâzo hkâshuq nghu é jowò shî má dum taû lò mù, mùk zo wuì shuq kut bê nghut ri. Haû mù, náng é màng gi, náng é îchyí îwâ pê é lùp má myhup é hui râ a nghut.’ gâ ri.” ga wùt taî garû ri.
23 Garai Gasâng é byù haû bàn zo bàn shuq jáng, yhang lé shuî taû lo é myìqhtoi hpó haû gi, yhâng é matú loze lé buí byî ri. 24 Yhang hkyôwuì shut htoq ló é hkûn, hkanghkyi radu eq hui mù, yhang lé ngàt sat pyâm bê nghut ri; yhâng é màng gi, hkyô má lèq to mù, loze eq hkanghkyi gi, hau é ayàm má yàp tô ri. 25 Màng gi, hkyô má lèq to mù, hkanghkyi gi, hau é ayàm má yàp tô é lé, laî ló é bang ra-am myàng kômù, yhángmòq gi, myìqhtoi mangzo nyi é wà má ló shit kyô akô nghut ri.
26 Yhang lé gyunghkyô mai dum shuî taû yu é myìqhtoi hpó haú hkyô lé wó gyo jáng, yhang gi, “Haú yùq gi, Yhûmsîng Garaî é dang lé lu laî é, Garai Gasâng é byù nghut ri. Yhang lé haû Yhûmsîng Garaî é dang mai sidìq byî tô é eq rajung za, haû Yhûmsîng Garai gi, yhang lé, lhom ngàt myha sat pyám râ matú hkanghkyi lé àp byî pyám bê nghut ri nhung.” ga taî ri.
27 Myìqhtoi hpó haû gi, yhang zô pé lé, “Ngá é matú loze buí byi keq.” ga taí jang, yhángmòq gi, buí byi bekô nghut ri. 28 Haû mù, yhang jî htoq e ló le, hkyô má màng lèq tô é lé le, hau é ayàm má loze eq hkanghkyi yàp tô é lé le, ê myang ri. Hkanghkyi haû gi, màng lé le a zo, loze lé le a ngàt myhâ nghut ri. 29 Haû mù, myìqhtoi hpó haû gi, Garai Gasâng é byù màng lé wàq yù luî, loze htoq má hto mù, yhâng é matú iyon yon luî, yhang lé myhup pyám râ ga, yhûmsing é wà shut htô ló bê nghut ri. 30 Haû mù, yhang gi, màng lé yhâng é lùp má kat to mù, yhâng é matú yhángmòq iyon yon luî, “Goì ê, ngá é gu-mang ê!” ga taî akô nghut ri.
31 Màng myhup pyâm é htâng, yhang gi, yhang zô pé lé, “Ngò shî jáng, Garai Gasâng é byù lé myhup é lùp má myhup keq; ngá é showui pé lé, yhâng é showui nàm má tô to keq. 32 Hkâsu mù gâ le, Behtela wà mâ é hkungga gyàp lé le, Samariq wà pé mâ é myhang é hparà noq jowò pé mâ é hparà noq jang pé bànshoq lé le htuqhtîng é dang lé, haû Yhûmsîng Garaî é dang dông yhang taî pyo é gi, teng za dùt htoq râ nghut lhê.” ga taî ri.
33 Haú hkyô dùt htoq kôlhang, Yerobo-am gi, yhâng é agè ashop é hkyô pé lé a htaî lhik pyám shi nghut ri. Mâyû byu pé mâ é ó yùq lé nghut kôle, myhang é hparà noq jowò pé mâ é matú, hkyangjong wò dum masàt byî to bê nghut ri. Yhang gi, hkyangjong dùt nau é sû ó yùq lé nghut kôle, myhang é hparà noq jowò pé mâ é matú hkyangjong ayá byî ri. 34 Shí hkyô gi, Yerobo-am é yhûm lé gyòp gyó nhâng mù, myìdàm htoq mai lhoqhpyuq pyâm é hkûn jé shoq, yubàk mara dùt nyì bê nghut ri.