Rehobo-am Lé Isira-elaq Byu Pé Gumlau Toq É Hkyô
12
Rehobo-am gi, yhang lé hkóhkâm wò byi râ ga Isira-elaq byu pé bànshoq bang Shehkem wà shut dòq e ló bekô nghut é yánmai, yhang le Shehkem wà shut dòq e ló ri. 2 Nebat é yhang zo Yerobo-am gi, Hkóhkâm Sholumon chyáng mai hpâng luî, Egutuq ming má nyi nyi é u, haú hkyô lé wó gyo jáng, Egutuq ming mai dum taû lo ri. 3 Haû mù, yhángmòq gi, yhang lé ê ji lò nhang é nghut mù, Yerobo-am eq Isira-elaq byù bànshoq bang gi, Rehobo-am chyáng ê luî, yhang lé, 4 “Náng wa gi, ngá-mòq lé wòlai mó hun é nghut ri; nghut kôlhang, nàng, ahkuî, yhang hun tô é ngá-mòq chyáng mâ é wuîhkê é múzó eq wòlai mó lé lhoqsôm pyám byi laq; haú hkûn, ngá-mòq gi, nang lé dójaú râ nghut lhê.” ga taî akô nghut ri.5 Haú hkûn, Rehobo-am gi, “Sum nyí nyí lai jáng shèq ngá chyáng dum lé lô keq.” ga tû taî ri. Haû mù, shiwa byu pé gi, taû ló bekô nghut ri.
6 Haû mù, Hkóhkâm Rehobo-am gi, yhâng wa Sholumon é i-pyàt má yhang lé dójaú é sûwún wuî lé, “Byù shí bang lé tû taí râ matú, núngmòq, ngo lé hkâsû é hpàqchyî wó byi kôrâ lhú?” ga hpàqchyî dûng ri.
7 Yhángmòq gi, “Hkû-nyí, nàng, byù shí bâng é duìnhâng zoshâng dùt mù, yhángmòq lé dójaú luî, dang ngón dông tû taî kat é nghut jáng, yhángmòq gi, ayang náng é duìnhâng zoshâng wuì dùt nyì kôrâ nghut lhê.” ga tû taî akô nghut ri.
8 Nghut kôlhang, Rehobo-am gi, sûwún wuî hpàqchyî byî é lé he-ngìk pyám mù, yhang eq rahá nyi kô lo é, yhang lé dójaú nyi é zorâm wuì lé hpàqchyî dûng ri. 9 Yhang gi, yhángmòq lé, “Núngmòq hkâsû é hpàqchyî byi kôrâ lhú? ‘Náng wa ngá-mòq lé hun tô é wòlai mó lé lhoqsôm pyám byi aq.’ ga ngo lé taî é byù shí bang lé, ngò hkâsu nghû tû taí râ lhú?” ga myî ri.
10 Haú hkûn, yhang eq rahá nyi kô lo é zorâm wuì gi, yhang lé, “‘Náng wa ngá-mòq lé wòlai mó hun to kôlhang, nàng, ngá-mòq é wòlai lé lhoqsôm pyám byi laq.’ ga nang lé taî é byù shí bang lé, ‘Ngá é lòqhtángnyhui gi, ngá wâ é hpyidum htoq kô lhê. 11 Ngá wa gi, núngmòq lé wòlai hun to kôlhang, ngò gi, haú htoq má jàt hûn shirâ nghut lhê. Ngá wa gi, núngmòq lé nuìchûm hkat èq bàt é nghut ri; ngò gi, núngmòq lé gogok èq dam byi râ nghut lhê.’ nghû, yhángmòq lé ahkuî tû taí aq.” ga tû taî akô nghut ri.
12 Sum nyí lai jáng, Yerobo-am eq shiwa byu pé bànshoq bang gi, “Sum nyí lai jáng ngá chyáng dum taû lé keq.” ga hkóhkâm hpó taî é eq rajung za, Rehobo-am chyáng dum taû lé bekô nghut ri. 13 Hkóhkâm hpó gi, yhángmòq lé dang htân lom nyò mù, sûwún wuî hpàqchyî byî é lé he-ngìk pyám luî, 14 zorâm wuì hpàqchyî byî é dông cháng mù, “Ngá wa gi, núngmòq lé wòlai mó hun to bê nghut lhê; ngò gi, hau htoq má jàt hûn shirâ nghut lhê. Ngá wa gi, núngmòq lé nuìchûm hkat èq bàt é nghut ri; ngò gi, núngmòq lé gogok èq dam byi râ nghut lhê.” ga taî ri. 15 Haû mù, hkóhkâm hpó gi, shiwa byu pé lé a gyo byi nghut ri; haú hkyô gi, haû Yhûmsîng Garai mai Shilo wà byù Ahiya dông Nebat é yhang zo Yerobo-am lé taî é dang lé lhoqdìk râ matú, Yhûmsîng Garaî chyáng mai dùt htoq lo é nghut ri.
16 Isira-elaq byù bànshoq bang gi, yhángmòq lé hkóhkâm hpó lhom he-ngìk pyâm é lé myàng kôjáng, hkóhkâm hpó lé,
“Ngá-mòq, Dawiq chyáng hai gàmbùm wó lhê lhú?
Ngá-mòq, Yese é yhang zô chyáng hai silî wunlî lom lhê lhú?
Isira-elaq byu pé ê, yhûmsing yhûm má taû ló keq hkoi!
Dawiq ê, náng é yhûmsing yhûm lé wú gôn nyì lo àq hkoi!” ga tû taî akô nghut ri.
Haû mù, Isira-elaq byu pé bànshoq bang gi, yhûm taû ló bûm bekô nghut ri. 17 Nghut kôlhang, Yudaq mau mâ é wà pé má nyi é Isira-elaq byu pé lé gi, Rehobo-am ùp nyi ashî nghut ri.
18 Hkóhkâm Rehobo-am gi, mú zìk zui nhang é zau Adoniram lé nhang kat ri; nghut kôlhang, Isira-elaq byu pé gi, yhang lé lùqgòk èq lhom dú sat pyâm akô. Nghut kôle, Hkóhkâm Rehobo-am gi, yhâng é gyèlhêng má hân wó dòq wàng mù, Yerusalem wà mó shut hpang ló bê nghut ri. 19 Haû mù, Isira-elaq byu pé gi, hkû-nyí jé shoq Dawiq koq bang lé gumlau toq akô nghut ri.
20 Isira-elaq byù bànshoq bang gi, Yerobo-am dum taû lò bê hkyô lé wó gyo kôjáng, yhang lé shiwa hpong shut ê ji lò nhâng mù, Isira-elaq byù bànshoq lé ùp râ hkóhkâm kut nhang akô nghut ri. Dawiq é yhûmhtu lé sidìq zung é gi, Yudaq up ra-up baú za nyi myìt gyó tô alô nghut ri.
21 Rehobo-am gi, Yerusalem wà mó má jé ló jáng, Yudaq up eq Ben-yamin up mai, Isira-elaq byu pé lé majan ê zan mù, mîngdán haú lé Sholumon é yhang zo Rehobo-am chyáng dum lhoqhâng yù râ matú, gyèzo rasên shit mun lé wùt tsîng tô ri.
22 Nghut kôlhang, Garai Gasâng é byù Shemai-a chyáng Garai Gasâng é dang jé é gi, 23 “Yudaq hkóhkâm Sholumon é yhang zo Rehobo-am lé le, Yudaq mau eq Ben-yamin mau bang bànshoq lé le, myìt gyó tô é byu pé lé le, shî su nghû taí aq; 24 ‘Haû Yhûmsîng Garai taî le, “Núngmòq é gu-mang Isira-elaq byu pé lé majan hkâ-é dòq zan kó; shí hkyô gi, Ngò kut é nghut é yánmai, núngmòq yùq hkangmó yhûm taû ló keq.” gâ ri.’ nghû àq.” gâ ri. Haû mù, yhángmòq gi, haû Yhûmsîng Garai hkunmó hkyô é eq rajung za, haû Yhûmsîng Garaî é dang lé jì-no gyo mù, yhûm taû ló bekô nghut ri.
Behtela Eq Dan Jowò Mâ É Hîng No Zo Alhô
25 Haú hkûn, Yerobo-am gi, Ehprim bum mau má Shehkem wà mó lé lhoq gingtíng mù, nyi nyi ri. Yhang gi, wà mó haú mai htoq luî, Penu-ela wà xuq bê nghut ri.
26 Yerobo-am gi, yhânggùng yhang, “Mîngdán shî gi, Dawiq é yhûmhtu shut dum taû wang lò âbe. 27 Byù shí bang, Yerusalem wà mó mâ é Yhûmsîng Garaî é noqkuq yhûm má hkungga nhông byi râ matú dòq ê kô é nghut jáng, yhángmòq gi, yhángmòq é yhûmsîng, Yudaq hkóhkâm Rehobo-am eq dum xoq tuî yù mù, ngo lé sat pyám luî, Hkóhkâm Rehobo-am chyáng dum taû lhing ló bûm kôrâ nghut lhê.” ga myìt yu ri.
28 Hkóhkâm hpó gi, hpàqchyî dûng yu é htâng má, hîng no zo lhô í lhum saî ri. Yhang gi, shiwa byu pé lé, “Núngmòq Yerusalem wà mó shut dòq ló râ matú gyai hkyik hui nyi ri. Isira-elaq a-myû ê, núngmòq lé Egutuq ming mai shuî htoq lo é núngmòq é hparà pé gi, shî nghut bê.” ga taî ri. 29 Yhang gi, hîng no zo lhô ralhum lé, Behtela wà má tô to mù, gótû ralhum lé, Dan wà má tô tô ri. 30 Haû mù, shiwa byu pé gi, Behtela wà má jòq é no zo lhô lé, lé noq mù, Dan wà má jòq é no zo lhô jé shoq lháng ê noq kô é yánmai, haú hkyô gi, yubàk mara dùt byùq bê nghut ri.
31 Yerobo-am gi, myhang é hparà noq jowò pé má hparà noq jang saí mù, Lewiq byu pé a nghut kôlhang, mâyû byu pé lé hkyangjong wò byî tô ri. 32 Yerobo-am gi, Yudaq mau má kut é poî eq rajung za, lha-mó shit hkyap raxe ngo nyí nyí má poî buìnyì masàt to mù, hkungga gyàp htoq má hkungga nhong ri. Yhang gi, haú hkyô lé Behtela wà má kut mù, yhang saî tô é no zo lhô pê é matú hkungga nhông byî ri. Hau htoq agó, yhang gi, Behtela wà má, yhang saî é myhang é hparà noq jowò pé má hkyangjông pé nyhi tô ri. 33 Yhang gi, yhang yhang hkyin masàt tô é lha-mó shit hkyap raxe ngo nyí nyí lé, Behtela wà má yhang saî tô é hkungga gyàp htoq má hkungga pé nhông byî ri. Haû mù, yhang gi, Isira-elaq byu pê é matú poî masàt to byi mù, hkungga pé nhông râ ga hkungga gyàp shut dòq ló bê nghut ri.