Sholumon É Yhûmsîng Myhî Pé
11
Hkóhkâm Sholumon gi, Hpara-uq é byìzo mai lai luî, Moba, Ammon, Edom, Sidon eq Hiti mau mâ é gó-mîng myiwe myo myo lé chyitdàp ri. 2 Haú bang gi, haû Yhûmsîng Garai mai Isira-elaq byu pé lé, “Núngmòq gi, yhángmòq eq a wó hâng lhum râ nghut lhê; hkâsu mù gâ lé, yhángmòq gi, teng za, núngmòq é nhiklhum lé yhángmòq é hparà pê shut shuî nghoq wang ló râ nghut lhê.” ga taî tô é a-myû mâ é bang nghut ri. Nghut kôle, Sholumon gi, haú bang eq chyit tui kâng tui kut nyi ri. 3 Sholumon é yhang myî pé gi, hkóhkâm byìzô pé nyhit shô yùq eq myi-ngê sum shô yùq nghut ri; yhâng é yhûmsîng myhí pé gi, yhang lé hkyô shuî nghoq bum akô nghut ri. 4 Sholumon chyungxe zànwut kô byùq é hkûn, yhâng é yhûmsîng myhî pé gi, yhâng é i-myìt nhiklhum lé, gótû hparà pê shut hkyô shuî nghoq ló bekô; yhâng é i-myìt nhiklhum gi, yhâng wa Dawiq jujúm é su, yhâng é Garai Gasang nghut é, haû Yhûmsîng Garai Gasang lé a jujúm nghut ri. 5 Yhang gi, Sidon byu pê é hparà myhí Ashatoret eq Ammon byu pê é achaq achyut hparà nghut é Molek hparà htâng châng ri. 6 Haú dông mai, Sholumon gi, Yhûmsîng Garaî é myòq hí má agè ashop é hkyô kut bê nghut ri; yhang gi, yhâng wa Dawiq châng é su, haû Yhûmsîng Garaî htâng rago a cháng nghut ri.7 Sholumon gi, Yerusalem wà mó tû-tap buìhtoq hkyam bùm má, Moba byu pê é achaq achyut hparà nghut é Hkemosha matú le, Ammon byu pê é achaq achyut hparà nghut é Molek matú le, myhang é hparà noq jowò saî ri. 8 Yhang gi, haû eq rajung za, yhâng é gó-mîng yhûmsîng myhí bànshoq bâng é matú, yhángmòq é hparà pé lé, namngón jung nyhê nhám râ eq hkungga nhông byi râ jowò saí byî ri.
9 Sholumon gi, yhang lé í dâm htoq shit é, Isira-elaq byu pê é Garai Gasang, haû Yhûmsîng Garaî chyáng mai i-myìt lhing ló byùq é yánmai, haû Yhûmsîng Garai gi, yhang lé nhikjum yo bê nghut ri. 10 Yhang gi, gótû hparà pê é htâng a cháng râ matú Sholumon lé hkûm to bê nghut kôle, Sholumon gi, haû Yhûmsîng Garaî é hkunmó lé a cháng nghut ri. 11 Haû mù, haû Yhûmsîng Garai gi, Sholumon lé, “Nàng gi, haú su kut mù, Ngò, nang lé hkunmó hkyô bê nghut é Ngá é dangshikaq eq Ngá é târâ wàng hkunmó lé a cháng kut é yánmai, Ngò gi, teng za yhang, náng chyáng mai mîngdán lé lâng hkoq gam pyám mù, náng é zaugun wuì mâ é rayùq yùq lé àp byî pyám râ nghut lhê. 12 Nghut kôlhang, Ngò gi, náng wa Dawiq é yánmai, náng é i-pyàt má haú hkyô lé kut râ a nghut. Nungzô é lòq mai shèq mîngdán haú lé lâng hkoq gam pyám râ nghut lhê. 13 Nghut kôle, Ngò gi, yhâng chyáng mai mîngdán gón lé lâng hkoq gam pyám râ a nghut é za, Ngá é duìnhâng zoshâng Dawiq é yánmai le, Ngò hkyin yu tô é Yerusalem wà mó é yánmai le, yhang lé a-myû up ra-up byi râ nghut lhê.” ga taî ri.
Sholumon É Gyè Pé
14 Hau htâng, Yhûmsîng Garai gi, Sholumon lé gyè kut râ matú, Edom byù Hadat lé lhoqtoq tô ri. Haú yùq gi, Edom hkóhkâm wùt mâ é nghut ri. 15 Shí hkyô a dùt shi-má, Dawiq gi, Edom mau lé majan zân é hkûn, gyèzau Yo-ap gi, shi byùq bê bâng é màng pé lé myhup pyám râ ga ê mù, Edom mau mâ é yùqgè wuì bànshoq lé sat pyâm ri. 16 Yo-ap eq Isira-elaq byù bànshoq bang gi, Edom mau mâ é yùqgè wuì bànshoq lé wó sat pyám shoq lha-mó hkyuq hkyap haú má nyi nyi akô nghut ri. 17 Nghut kôlhang, Hadat gi, zoshâng zo za ru nghut ashî u, yhâng wâ a-ô mâ é Edom byù zaugun wuì ra-am eq rahá Egutuq ming shut hpang e ló akô nghut ri. 18 Yhángmòq gi, Midi-an mau mai htoq ló kômù, Paran mau má jé e akô. Hau htâng, yhángmòq eq rahá Paran mau mâ é byu pé lé ji chûng mù, Egutuq ming, Egutuq hkóhkâm Hpara-uq chyáng jé e akô nghut ri; hkóhkâm haû gi, Hadat lé, yhûm eq maumyî byi mù, zoshuq le htuqbáng byî ri.
19 Hpara-uq gi, Hadat lé gyai myìt nguì ô naù mù, yhâng é yhûmsîng myhí nghut é, Hkóhkâm Myhí Tahpene é yhang gu lé byi tsô ri. 20 Tahpene é yhang gu gi, Hadat é matú Genubat gâ é yùqzo rayùq hkû byî ri; Tahpene gi, zoshâng haú lé hkóhkâm wâng má baú kô ri. Genubat gi, Hpara-uq é yhang zo yùqzô pé eq rahá nyi kô lo é nghut ri.
21 Hadat gi, Egutuq ming má nyi nyi é u, Dawiq, yhâng é îchyí îwâ pé eq rahá yhup ngón byùq bê hkyô lé le, gyèzau Yo-ap shi byùq bê hkyô lé le, wó gyô ri. Haû mù, Hadat gi, Hpara-uq lé, “Ngo lé, ngá é yhummau shut ló râ ahkáng byi laq.” ga taî ri.
22 Hpara-uq gi, “Náng é yhummau shut taû ló naû shoq, nàng, shí má haî langhpyùt ri lhú?” ga myi jáng, Hadat gi, “Haî a ra; nghut kôlhang, ngo lé, ló râ ahkáng byi laq!” ga tû taî ri.
23 Hau htâng, Garai Gasang gi, Sholumon lé gyè kut râ matú, yhâng é yhûmsîng Zoba mau mâ é hkóhkâm Hadadezara chyáng mai hpang htoq ló é Eli-ada é yhang zo Rezon lé lhoqtoq tô ri. 24 Dawiq mai Zoba mau gyèzô pé lé sat hkyop pyâm é hkûn, Rezon gi, yhâng é lhînghkyùq mâ é byù mòqmó lé tsîng yù luî, haú bâng é ushuq dùt bê nghut ri; yhángmòq gi, Damasikuq wà má ló nyî kômù, haú má ùp nyì bekô nghut ri. 25 Hadat gunjâng é htoq agó, Rezon gi, Sholumon i-pyàt gón má Isira-elaq byu pé lé gyè kut nyi ri. Haû mù, Rezon gi, Aram mau lé ùp nyì mù, Isira-elaq a-myû lé a naù a wom kut ri.
Sholumon Lé Yerobo-am Gumlaû É Hkyô
26 Hau htoq agó, Nebat é yhang zo Yerobo-am le hkóhkâm lé gumlau toq ri. Yhang gi, Sholumon é zaugun wuì mâ é rayùq nghut mù, Zereda wà mâ é Ehprim byù nghut ri; yhâng nu gi, Zeru-a gâ é chuimó myhí nghut ri.
27 Yhang, hkóhkâm lé hkâsu kut gumlau toq é hkyô gi, shí dông nghut ri: Sholumon gi, Milo jowò lé saí mù, yhâng wa Dawiq é wà mó wàhkûm lé dum saî saî ri. 28 Ahkuî, Yerobo-am gi, a-tsam mó bo é byù rayùq nghut ri. Zorâm zo haû kut é múzó htàp htuk é hkyô lé Sholumon myàng jáng, yhang gi, Yosep up mâ é mú zui bang bànshoq lé ùp é zau kut nhang ri.
29 Haú ahkyíng má, Yerobo-am gi, Yerusalem wà mó mai htoq lo é hkûn, buhîng asik wùt tô é, Shilo wà mó mâ é myìqhtoi Ahiya gi, yhang lé hkyô má lhom huî ri. Yhángnhik baú pá má nyi tô akô nghut ri. 30 Haú hkûn, Ahiya gi, yhang wùt tô é buhîng asik lé hkyut yû mù, raxe í hkyam kut lâng cheq ri. 31 Hau htâng, yhang gi, Yerobo-am lé, “Náng é matú raxê hkyam yù àq; hkâsu mù gâ le, Isira-elaq byu pê é Garai Gasang, haû Yhûmsîng Garai shî su ga taî ri; ‘Wú aq, Ngò gi, Sholumon é lòq mai mîngdán haú lé lâng cheq pyám mù, nang lé raxê up byi râ nghut lhê. 32 Nghut kôlhang, Ngá é duìnhâng zoshâng Dawiq é yánmai le, Isira-elaq a-myû up bànshoq mai Ngò hkyin yu é Yerusalem wà mó é yánmai le, yhang gi, a-myû up ra-up wó râ nghut lhê. 33 Ngò, shî su kut râ hkyô gi, yhángmòq Ngo lé tô pyâm to kôluî, Sidon hparà myhí Ashatoret, Moba hparà Hkemosha eq Ammon hparà Molek pé lé noqkuq kômù, Ngá é myòq hí má jo têng é hkyô a kut kô é htoq agó, Ngá é jì-no a gyo kut kôluî, Sholumon é yhâng wa Dawiq châng é su, Ngá é târâ wàng hkunmó pé eq târâ pé lé a cháng kô é yánmai nghut lhê.
34 Nghut kôlhang, Ngò gi, haû mîngdán gón lé Sholumon é lòq mai yu pyám râ a nghut; Ngá é hkunmó pé eq târâ wàng hkunmó pé lé châng é, Ngò hkyin yù sû, Ngá é duìnhâng zoshâng Dawiq é yánmai, Ngò gi, yhang lé, yhâng é i-pyàt buìnyì bànshoq ùp nhang to bê nghut lhê. 35 Ngò gi, Sholumon é yhang zô é lòq mai mîngdán haú lé wùp yù mù, nang lé raxê up byi râ nghut lhê. 36 Ngò gi, Ngá é myìng tô tô râ matú Ngò hkyin yu é wà mó nghut é Yerusalem má, Ngá é duìnhâng zoshâng Dawiq, Ngá é hí má ayang myibung su wó ùp nyì râ matú, yhang zo lé a-myû up ra-up byi râ nghut lhê. 37 Nghut kôle, náng matú kúm, Ngò, nang lé hkyin yù râ nghut mù, nàng gi, myìt ô nau é eq rajung za bànshoq lé ùp râ nghut lhê; nàng gi, Isira-elaq a-myû wuì lé ùp é hkóhkâm dùt râ nghut lhê. 38 Nàng gi, nang lé Ngò hkunmó hkyô é jung hkangmó lé châng kut mù, jì-no gyô nyì luî, Ngá é duìnhâng zoshâng Dawiq kut é eq rajung za, ngá é cháng ra târâ pé eq târâ wàng hkunmó pé lé châng é dông, Ngá é myòq hí má jo têng é hkyô kut é nghut jáng, Ngò gi, nàng eq rahá nyì râ nghut lhê. Ngò gi, Dawiq é matú gingtîng é yhûmhtu xuq to byî é eq rajung za, náng é matú le xuq byi mù, nang lé Isira-elaq a-myû byi râ nghut lhê. 39 Ngò gi, Sholumon é mara shí hkyo é yánmai, Dawiq é awùt ashîn pé lé mara dam byi râ nghut lhê; nghut kôlhang, ayang byî nyì râ a nghut.’ gâ ri.” ga taî ri.
40 Haû mù, Sholumon gi, Yerobo-am lé sat râ matú shi-kùt ri; nghut kôlhang, Yerobo-am gi, Egutuq ming mâ é Hkóhkâm Shishak chyáng hpang ê mù, Sholumon shi byùq é buìnyì jé shoq, haú má nyi nyi ri.
Sholumon Shi Byùq É Hkyô
41 Sholumon ùp é gótû hkyô pé nghut é, yhang kut é hkyô bànshoq eq yhang shit é hpàqchyî byéng-yá hkyô lé gi, Sholumon é mhô-myi shindâm laiká bùk má kâ tô lhê, a nghut lhí? 42 Sholumon gi, Yerusalem wà mó mai Isira-elaq byù bànshoq bang lé myi xê zàn yhang ùp ri. 43 Hau htâng, yhang gi, yhâng é îchyí îwâ pê chyáng ló bo bánnô byùq bê nghut mù, yhâng wa Dawiq é Wà má myhup yhûm pyâm é hui bê nghut ri. Yhang zo Rehobo-am gi, yhâng é hkóhkâm hkô má zùng bê nghut ri.