Sholumon Lé Sheba Hkóhkâm Myhí Lé Huî É Hkyô
10
Sheba hkóhkâm Myhí gi, Sholumon myìng hû é hkyô eq, yhang, haû Yhûmsîng Garai eq xoq tuî é hkyô lé wó gyo jáng, yhang lé danglhîng dông chyam wú râ matú, Sholumon chyáng jé lé lo ri. 2 Yhang gi, yhâng htâng châng é ajùm ayò eq rahá, namngón jung, hîng myo myo eq lungsêng pé htô é gola-uk jûm le mù, Yerusalem wà mó má lé jé luî, yhâng é myìt má bo tô é bànshoq eq rajung za, Sholumon lé huî nyo ri. 3 Sholumon gi, yhang myî é dang bànshoq lé tû taí byî ri; yhang myî é dang bànshoq lé luì za tû taî pyám byî ri. 4 Sheba hkóhkâm myhí gi, Sholumon é hpàqchyî byéng-yá bànshoq lé myang é htoq agó, yhang saî tô é hkóhkâm wâng, 5 yhâng é zanggyap htoq mâ é zoshuq, yhâng é zaugun wuì zung tô é hkyô, yhâng é duìnhâng zoshâng wuì mèbu wùt yúng tô é hkyô, yhâng é tsibyiq wing jaú bang eq haû Yhûmsîng Garaî é noqkuq yhûm má yhang nhong é myi nyhé hkungga péa lé le myàng jáng, maú hong byùq bê nghut ri.6 Haû mù, yhang gi, hkóhkâm hpó lé, “Ngò, ngá é mîngdán má, nàng kut é múzó pé eq náng é hpàqchyî byéng-yá hkyô hû jé lo é lé wó gyô é gi, teng bê nghut ri. 7 Nghut kôlhang, ngò gi, lé jé mù, ngá myòq èq yhang wó myang é hkûn jé shoq, yhángmòq taî é dang lé a jíng é nghut lhê. Teng za ga jáng, rawuí gû lé lháng, yhángmòq ngo lé a taî kyo kó nhung; náng é hpàqchyî byéng-yá eq wó sùt é hkyô gi, ngò wó gyô é htoq je gyaú ri myhî-nhung! 8 Náng é byu pé gi, hkungsô yhang wó akô nhung! Náng é hí má ayang yàp nyì mù, náng é hpàqchyî byéng-yá lé wó gyô é zaugun wuì gi, hkungsô yhang wó akô nhung! 9 Nang lé myìt nguì ô naù luî, Isira-elaq é hkóhkâm tángmyhâng má nang lé zùng nhang tô é, náng é Garai Gasang nghut é, haû Yhûmsîng Garai gi, hkungsô wó nyî sháng gàq ô. Haû Yhûmsîng Garai gi, Isira-elaq byu pé lé ahtum abyùq chyitdàp é yánmai, târâ ràp-rá é eq díngmán é hkyô dông ùp nyì râ matú, nang lé hkóhkâm kut nhang to bê nghut ri.” ga taî ri.
10 Haû mù, yhang gi, hkóhkâm hpó lé, hîng rahkying súm sho í xê joí, namngón jung myo myo eq lungsêng pé byî ri. Sheba hkóhkâm myhí mai Sholumon lé byî é myhó myô é namngón jung gi, hkâ-nhám le dum a jòq wú é nghut lhê.
11 (Hiram é wuìsanghpo pé gi, Ohpira mai hîng htô lò kô é htoq agó, alagum sik myo myo eq lungsêng pé lé le haú mai htô lò byî akô nghut ri. 12 Hkóhkâm hpó gi, alagum sik lé, haû Yhûmsîng Garaî é noqkuq yhum é matú htuq râ zìng pé eq hkóhkâm wang é matú le, mahkôn hpúng bâng é matú, tíng eq tíng góng pé saí râ matú le chung ri. Haú nyí mai, haú myhó myô é alagum sik lé, hkâ-nhám le a myang wú wú lo nghut ri.)
13 Hkóhkâm Sholumon gi, Sheba hkóhkâm myhí lé, yhâng é hkóhkâm sùtdò mai yu htoq byî é mai lai luî, yhang ô nau é eq dûng é pé bànshoq lé byî ri. Hau htâng, hkóhkâm myhí gi, yhâng htâng cháng bang eq rahá, yhâng é mau shut taû ló bê nghut ri.
Sholumon É Hkìkhkâm Hkyô
14 Sholumon zàn wuì myang hàp yu é hîng gi, nyhit hkying nyhit sho í xe hkyuq joí nghut ri; 15 hau htoq agó, ung zo ung shuq bang eq wuìloq kut bang le, Arabi-a hkóhkam pé bànshoq bang eq ming zau wuì le, yu lé byî ashi kô nghut ri.
16 Hkóhkâm Sholumon gi, hîng lé, gòlong mó í shô long bàt htoq ri; gòlong ralong gi, hîng í joí èq raxe í rûng rûng bo ri. 17 Hau htoq agó, yhang gi, hîng lé, gòlong zo sum shô long le bàt htoq ri; gòlong zo haû ralong gi, hîng í xe myi rûng rûng bo ri. Hkóhkâm hpó gi, haú pé lé, Lebanon yòso mâ é Hkóhkâm Yhûm má kat tô ri.
18 Hau htoq agó, hkóhkâm hpó gi, xâng zuì lé hkóhkâm tángmyhâng saí mù, hîng gyíng èq shup tô ri. 19 Hkóhkâm tángmyhang é matú zùmhtâng hkyuq mhak bò mù, hau é ahpyo mâ é nùnghtáng shut gi, alíng mâ é nghut luî, zung é í yâm má gi, lòq ke jang ralhum lhum dàp mù, rayàm shut hkanghkyi lhô radu du tsung tô ri. 20 Zùmhtâng mhak hkangmó mâ é í htâng shut hkanghkyi lhô radu du shap tô é nghut mù, hkyuq mhak mâ é hkanghkyi raxe í du shap tô ri. Gótû hká mîngdán le haû su kut a saî wú kó nghut ri. 21 Hkóhkâm Sholumon é gòm bànshoq gi, hîng chyat nghut ri; Lebanon yòso mâ é Hkóhkâm Yhum é chûngzè bànshoq gi, hîng gyíng chyat nghut ri. Sholumon é pyàt má, ngùn gi, gù a bo é yánmai, ngùn lé saî é haî lháng a bò nghut ri. 22 Hkóhkâm hpó gi, Hiram é wuìsanghpo pé eq rahá, wuìloq kut é wuìsanghpob pé wó ri. Haú pé gi, hîng, ngùn, xângzuì, myùq mó pé eq û-tóng pé hto mù, sum zân má radàm taû lo ri.
23 Hkóhkâm Sholumon gi, myìdàm htoq mâ é gótû hkóhkâm bànshoq htoq má sùtzè je wó é eq hpàqchyî byéng-yá je bò sû nghut ri. 24 Myìdàm htoq mâ é bànshoq bang gi, Garai Gasâng èq Sholumon é i-myìt nhiklhum má kat byî é hpàqchyî lé wó gyô yù râ matú, yhang lé myàng nau bum akô nghut ri. 25 Razàn htâng razàn, chyûnghuq yu lé byî é bang gi, ngùn eq hîng zèhkoq pé, mèbu pé, shâm lhâm pé, namngón jung pé, myang pé eq loze pé lé yu lé byî akô nghut ri.
26 Sholumon gi, gyèlhêng pé eq myang pé lé tsîng yu ri; yhang gi, gyèlhêng rahkying myi shô cham eq myang ramûn í hkyîng du wó é nghut mù, haú pé lé, lhêng tô é wà mó pé eq Yerusalem wà mó má tô tô bum ri. 27 Hkóhkâm gi, Yerusalem wà mó má, ngùn lé lùqgòk pé su, kyám gâm sikhtung lé pá pé mâ é hkohúm gâm pé su lhoqmyô yu ri. 28 Sholumon é myang pé gi, Egutuq ming eq Ku-e jowò mai hâng yu é nghut ri. Hkóhkam é wuìloq kut bang gi, haú u lhê é gù má cháng luî, Ku-e jowò mai wui yù kô é nghut ri. 29 Yhángmòq wui yu é, Egutuq ming mâ é gyèlhêng racham gi, ngùnhtung í joí hkyuq rûng, myang radu gi, í xe rarùng gíng ri. Yhángmòq gi, Hiti byu pé eq Aram byu pê é hkóhkâm pé bànshoq lé le, ung byî akô nghut ri.