Sholumon Chyáng Yhûmsîng Garai Htoq Shit É Hkyô
9
Sholumon gi, haû Yhûmsîng Garaî é noqkuq yhûm eq hkóhkâm wâng lé ban saí mù, myìt má saí nau é pé lé bànshoq ban saí jáng, 2 Yhûmsîng Garai gi, Yhang Gibe-on wà mó má Sholumon lé htoq shit é su, í dâm nghû râ dàm yhang lé dum htoq shit ri. 3 Yhûmsîng Garai gi, Sholumon lé,“Ngò gi, nàng, Ngá é hí má kyûdûng é eq dûng tôngbán é dang lé gyo byi bê nghut lhê; Ngò gi, nàng saî tô é noqkuq yhûm shî má, Ngá é Myìng lé ahtum abyùq tô tô é dông, haú lé lhoqchyoi lhoqyúng to bê nghut lhê. Ngá é myòqjí eq Ngá é i-myìt nhiklhum gi, haú má ayang jòq nyì râ nghut lhê.
4 Nàng gi, náng wa Dawiq kut é su, i-myìt sansêng é eq díngmán é mai Ngá é hí má sô nyì mù, Ngò hkyô é hkunmó bànshoq lé châng kut luî, Ngá é târâ wàng hkunmó pé eq târâ pé lé châng nyi é nghut jáng, 5 Ngò gi, ‘Isira-elaq é hkóhkâm tángmyhâng htoq má, náng é awùt ashín mâ é rayùq ayang zung nyì râ nghut lhê.’ nghû náng wa Dawiq lé danghtum htûm to bê é eq rajung za, Isira-elaq a-myû lé ùp nyì râ matú, náng é hkóhkâm tángmyhâng lé ahtum abyùq lhoq gingtîng to byi râ nghut lhê.
6 Nghut kôlhang, núngmòq nghut nghut, núngmòq é awùt ashín pé nghut nghut, Ngá chyáng mai lhing ló byùq mù, Ngò, núngmòq lé byî tô é hkunmó pé eq târâ wàng hkunmó pé lé a cháng kô é za, gótû hparà pé lé ê dójaú noqkuq kô é nghut jáng, 7 Ngò gi, Isira-elaq a-myû lé Ngò byî tô é maumyî mai yhángmòq lé lhoqhtûm pyám mù, Ngá é mying é matú lhoqchyoi lhoqyúng tô é noqkuq yhûm shí lé le he-ngìk pyám râ nghut lhê. Haú hkûn, Isira-elaq a-myû gi, gótû byù myû wuì bànshoq chyáng gya dang taî kún hpo eq rhoî dang taî pyám hpo dùt byùq râ nghut lhê. 8 Noqkuq yhûm shî gi, shî í kô hkìk kôlhang, haú yâm mai laî ló é bang bànshoq gi, maú dan byùq kômù, ‘Haû Yhûmsîng Garai gi, shí mau eq noqkuq yhûm shî lé, haî mù shî su kut pyâm lhê lhâ?’ ga taí kôrâ nghut lhê. 9 Haú hkûn, byu pé gi, ‘Yhángmòq gi, yhángmòq é îchyí îwâ pé lé Egutuq ming mai shuî htoq lo é Sû, yhángmòq é Garai Gasang nghut é, haû Yhûmsîng Garai lé tô pyám kôluî, gótû hparà pé lé chôm po zìng kômù, haú pé lé noqkuq dójaú kô é yánmai, haû Yhûmsîng Garai gi, yhángmòq chyáng shî sû é ihkyùp pé bànshoq jé nhang é nghut ri.’ ga tû taí kôrâ nghut lhê.” ga taî ri.
Sholumon É Gótû Múzó Pé
10 Sholumon mai haû Yhûmsîng Garaî é noqkuq yhûm eq yhâng é hkóhkâm wâng lé, í xê zàn má shèq ban saí jáng, 11 Hkóhkâm Sholumon gi, Hiram mai yhang ô nau é kyám gâm sikhtung, htángmó gâm sikhtung pé eq hîng pé bànshoq lé htuqbáng byî é yánmai, Turuq hkóhkâm Hiram lé, Galile mau mâ é wà í xê wà lé byî ri 12 Nghut kôlhang, Hiram gi, yhang lé Sholumon mai byî tô é wà pé lé ê wú râ matú Turuq wà mó mai htoq e ló ri; yhang gi, wà haú pé lé a wú nguî nghut ri. 13 Haû mù, yhang gi, “Ngá gu-mang hpó ê, nàng gi, ngo lé hkâsû é wà pé byî é nghut lhê lhú?” ga myi luî, wà haú pé lé, hkû-nyí jé shoq jòq nyi é myìng Hkabulaa ga myhîng ri. 14 Ahkuî, Hiram gi, hkóhkâm hpó lé hîng 1320 joí hûn byî kat ri.
15 Hkóhkâm Sholumon mai mú zui byù lung shuî yù mù, Yhûmsîng Garaî é noqkuq yhûm, yhâng é hkóhkâm wâng, Milob jowò eq Yerusalem wàhkûm, Hazora wà, Megido wà eq Gezera wà pé lé saî é xuq é hkyô gi, a-ô mâ é eq rajung za nghut ri. 16 (Egutuq hkóhkâm Hpara-uq gi, Gezera wà mó lé wó zân ung yù mù, haû lé nyhê pyâm ri. Yhang gi, haú má nyi é Hkanan byu pé lé sat pyám mù, yhâng é byìzo nghut é Sholumon é yhang myi lé mòqshaú dông wà haû gàm byî ri. 17 Haû mù, Sholumon gi, Gezera wà lé dum saî xuq ri.) Yhang gi, A-ô Bet Horon lé saî ri. 18 Hau htoq agó, Balat wà, yhâng é mau hkaû mâ é yòso má Tamari wà lé le, 19 yhâng é sùtzè hkong to râ wà pé bànshoq, yhâng é gyèlhêng pé tô to râ eq myang ji ji bâng é matú wà pé lé le, Yerusalem wà mó, Lebanon bum mau eq yhang ùp é maumyî bànshoq má, yhang saí nau é haî lé le, saí bê nghut ri.
20 Amori byu pé, Hiti byu pé, Perizi byu pé, Hiwi byu pé eq Yebusi byu pé nyi myìt gyó tô ashî nghut ri. (Byù shí bang gi, Isira-elaq byu pé a nghut kó.). 21 Sholumon gi, Isira-elaq byu pé mai a wó sat htûm pyám mù, haú mau má nyi gyó tô é byù shí bâng é awùt ashîn pé lé ùp sing yù luî, hkû-nyí jé shoq nghut nyi bum é su jùn kut nhang to bê nghut ri. 22 Nghut kôlhang, Sholumon gi, Isira-elaq a-myû lé jùn a kut nhâng nghut ri. Yhángmòq gi, yhâng é gyè zan bang, zaugun wuì, zau wuî, gyèzaû pé, gyèlhêng pé eq myang ji ji bâng é zau wuî nghut bum akô nghut ri. 23 Sholumon é múzó jizó pé zui saí bang lé wú gôn é zaugun mó pé gi, 550 yùq nghut ri.
24 Hpara-uq é yhang zo byìzo, Dawiq é Wà mai, yhâng é matú Sholumon saî to byî é hkóhkâm wâng má htòt é htâng, Sholumon gi, Milo jowò lé saî ri.
25 Sholumon gi, Yhûmsîng Garaî é matú, yhang saî tô é hkungga gyàp má, razàn sum dá, myi nyhé hkungga pé eq zùmhkaû hkungga pé nhông byi mù, haú pé eq rahá, Yhûmsîng Garaî hí má namngón jung le nyhê nhong ri. Haû mù, yhang gi, noqkuq yhûm saî é múzó lé lhoqpân pyám bê nghut ri.
26 Hkóhkâm Sholumon gi, Edom mau mâ é Nhông Nè yàm mâ é Elat eq chyâng é Ezi-on Gebera jowò má, wuìsanghpo pé lé le tsuq tô ri. 27 Haû jáng, Hiram gi, wuimau hkyô sê é yhâng é wuìsanghpo kon bang lé, Sholumon é byu pé eq rahá wuìsanghpo mú wùn wàq râ matú nhang kat byî ri. 28 Yhángmòq gi, Ohpira jowò má jî ê kômù, hîng 4620 joí yu lò luî, Hkóhkâm Sholumon lé lo dé byî akô nghut ri.