Noqkuq Yhûm Má Sàksé Dò Wàq Hâng É Hkyô
8
Hau htâng, Sholumon gi, haû Yhûmsîng Garaî é dangshikaq sàksé dò lé, Zi-un nghut é Dawiq é Wà mai ê wàq dòq yù râ matú, Isira-elaq byu pê é sûwún wuî, a-myû up pé mâ é ushuq pé bànshoq eq Isira-elaq byu pê é yhûmhtu pé mâ é zau wuî lé, Yerusalem wà mó má ji tsîng yu ri. 2 Haû mù, Isira-elaq byù bànshoq bang gi, lha-mó nyhit hkyap hkyap nghut é Ehtanim lhôhkyap má kut é poîa má, Hkóhkâm Sholumon chyáng lé chôm zùp bum akô nghut ri.3 Isira-elaq byu pê é sûwún wuî bànshoq bang lé jé kô é hkûn, hkyangjông pé gi, sàksé dò lé wàq toq yû kômù, 4 haû Yhûmsîng Garaî é sàksé dò lé le, zùphpong zúm lé le, zúm haú mâ é chyoiyúng chûngzè bànshoq lé le, wàq toq akô nghut ri. Hkyangjông pé eq Lewiq byu pé gi, haú pé lé wàq toq yu akô; 5 Hkóhkâm Sholumon eq yhâng chyáng lé zîng bum é Isira-elaq byù hpúng gón gi, sàksé dò hí má nyi to kômù, a ung nghap loshoq nghut é sau pé eq no pé lé, hkungga nhông byî akô nghut ri.
6 Haú hkûn, hkyangjông pé gi, haû Yhûmsîng Garaî é dangshikaq sàksé dò lé, Chyoiyúng Htâng é Jowò nghut é, noqkuq yhûm mâ é ahtê pyâm sân-yúng jowò, hkerubim é dùng ô má lo wàq tô akô nghut ri. 7 Hkerubim haû í lhûm é dùng pé gi, sàksé dò hau é ahtoq má pyo tô é nghut mù, sàksé dò lé le, haú lé wàq é gán-yang pé lé le, nghop tô ri. 8 Gán-yang haú pé gi, lûm hîng mù, ahtâng lé ahtê pyâm sân-yúng jowò hí mâ é Chyoiyúng Jowò mai byu myang ri; nghut kôlhang, Chyoiyúng Jowò shinggan mai gi, haú lé a myàng nghut ri; haú pé gi, hkû-nyí jé shoq haú má jòq tô ri. 9 Sàksé dò haú má gi, Isira-elaq byu pé Egutuq ming mai htoq lo é htâng, haû Yhûmsîng Garai mai yhángmòq eq dangshikaq tô é jang, Horep bùmb má Mosheq kat tô é lùqlong í long mai lai luî, gótû haî le a bò nghut ri.
10 Hkyangjông pé Chyoiyúng Jowò mai htoq lò kôjáng, haû Yhûmsîng Garaî é noqkuq yhûm má mhut htup to bê nghut ri. 11 Hkyangjông pé gi, mhut hau é yánmai, yhángmòq dójaú é múzó a wó kut lo kó nghut ri; hkâsu mù gâ le, haû Yhûmsîng Garaî é hpungwup shingkang gi, Yhâng é noqkuq yhûm má byíng zan tô ri.
12 Haú hkûn, Sholumon gi, “Haû Yhûmsîng Garai gi, tîng tîng nòq é mhut hkaû má nyì râ nghut lhê ga taî é nghut ri; 13 ngò kúm gi, Náng é matú, Nàng ahtum abyùq nyì râ nghut é maú nhô zâ é noqkuq yhûm lé saí bê nghut lhê.” ga taî ri.
14 Isira-elaq byù hpúng gón gi, haú má yàp tô bum é u lé, hkóhkâm hpó gi, lhîng luî, yhángmòq lé shimân byî ri. 15 Haú hkûn, yhang gi,
“Ngá wa Dawiq lé, Yhâng é nhut mai danghtum htûm to luî, Yhâng é lòq èq lhoqdìk byî é Sû, Isira-elaq byu pê é Garai Gasang, haû Yhûmsîng Garai gi, hkungsô wó nyî sháng gàq. Hkâsu mù gâ le, Yhang gi, 16 ‘Ngò, Ngá é byu pé lé Egutuq ming mai shuî htoq lo é hkûn mai, Ngá é myìng jòq nyì râ matú, Isira-elaq a-myû up mâ é wà hká wâ má le noqkuq yhûm jòq râ matú a hkyin yu é nghut lhê; nghut kôlhang, Ngò gi, Ngá é Isira-elaq byu pé lé ùp râ matú Dawiq lé hkyin yù bê nghut lhê.’ ga taî ri.
17 Ngá wa Dawiq gi, Isira-elaq é Garai Gasang, haû Yhûmsîng Garaî é Mying é matú noqkuq yhûm saí râ myìt bo é nghut lhê. 18 Nghut kôlhang, haû Yhûmsîng Garai gi, ngá wa Dawiq lé, ‘Nàng, Ngá é mying é matú noqkuq yhûm saí râ myìt bo é hkyô gi, gyaí ge é nghut ri. 19 Nghut kôle, nàng gi, noqkuq yhûm saí râ sû a nghut; náng é suisho yhang nghut é nungzo shèq, Ngá é mying é matú noqkuq yhûm saí râ sû nghut lhê.’ ga taî ri.
20 Haû Yhûmsîng Garai gi, Yhang danghtum htûm tô é lé lhoqdìk bê nghut ri. Ngò gi, ngá wa Dawiq é hkô má zùng mù, haû Yhûmsîng Garai danghtum htûm tô é eq rajung za, Isira-elaq é hkóhkâm tángmyhâng má zùng luî, Isira-elaq é Garai Gasang, haû Yhûmsîng Garaî é Mying é matú noqkuq yhûm saí bê nghut lhê. 21 Ngá-nhûng é îchyí îwâ pé lé, Egutuq ming mai haû Yhûmsîng Garai shuî htoq lo é hkûn, Yhang, yhángmòq eq tô tô é dangshikaq bo é sàksé dò é matú, Ngò, haú má jowò hen to byi bê nghut lhê.” ga taî ri.
Sholumon É Ap Nhông Kyûdung Dang
22 Hau htâng, Sholumon gi, Isira-elaq byù hpúng gón é hí mâ é, haû Yhûmsîng Garaî é hkungga gyàp hí má yàp to mù, mauhkûng shut yhâng é lòq lam kat ri. 23 Haû mù, yhang taî é gi,
“Isira-elaq é Garai Gasang, Yhûmsîng Garai ê, mauhkûng htoq má le, myigùng htoq má le, Nàng su dùt é Garai Gasang a nyì; Nàng gi, i-myìt nhiklhum bànshoq èq Náng é hkyô châng é, Náng é duìnhâng zoshâng wuì lé, Náng é chyitdàp dangshikaq lhoqdìk byi Sû nghut ri. 24 Nàng gi, Náng é duìnhâng zoshâng ngá wa Dawiq lé danghtum htûm tô é eq rajung za lhoqdìk byi bê nghut ri; Nàng gi, Náng é nhut mai danghtum htûm to luî, hkû-nyí lhê su, Náng é lòq èq haú lé lhoqdìk bê nghut ri.
25 Ahkuî, Isira-elaq é Garai Gasang, Yhûmsîng Garai ê, Nàng gi, ‘Nàng, Ngá é hí má sô nyi é eq rajung za, náng é zodù wuì le Ngá é hí má jujúm myìt mai rago za châng nyì kô é nghut jáng, Isira-elaq ming mâ é hkóhkâm tángmyhâng má, náng é awùt mâ é byù rayùq Ngá é hí má ayang zung nyì râ nghut lhê.’ ga, Náng é duìnhâng zoshâng ngá wa Dawiq lé danghtum htûm tô é eq rajung za lhoqdìk byi aq. 26 Isira-elaq é Garai Gasang, Yhûmsîng Garai ê, Náng é duìnhâng zoshâng ngá wa Dawiq lé, Nàng htûm tô é danghtum, ahkuî dìk byùq sháng gàq.
27 Nghut kôlhang, Garai Gasang gi, myìdàm htoq má gè gè yhang nyì râ nghut lhê lhú? Haû mauhkûng, myhang htâng é mauhkûng lháng Nang lé a wó lhûng é nghut lhê. Haû jáng, ngò saî é noqkuq yhûm shî gi, Náng é matú hkâ-í yhang tiq râ nghut lhê! 28 Nghut kôlhang, ngá é Garai Gasang nghut é, Yhûmsîng Garai ê, Náng é duìnhâng zôshang é kyûdung dang eq shogyo nhikmyîn yù râ matú dûng tôngbán é dang lé tâm gyo byi laq. Hkû-nyí, Náng é hí má, Náng é duìnhâng zoshâng kyûdûng é dang eq wùt dûng ngau é dang lé gyo byi laq. 29 ‘Ngá é myìng haú má jòq nyî râ nghut lhê.’ ga Nàng taî é jowò nghut é noqkuq yhûm shî lé, nyí myín Nàng wú nyî àq. Haú hkûn, shí jowò shut hû mù Náng é duìnhâng zoshâng kyûdûng é dang lé, Nàng tâm gyo byi râ nghut lhê. 30 Náng é duìnhâng zoshâng eq Náng é Isira-elaq byu pé mai shí jowò shut hû mù, dûng tôngbán é dang lé gyo byi laq. Náng é nyì jowò nghut é mauhkûng mai gyo byi laq; Nàng gyo byî é hkûn, mara hkyut pyám byi laq ô.
31 Byù rayùq yùq, yhâng é yhûmkyochang lé shut pyám mù, dakâm râ hkyô htoq luî, noqkuq yhûm shî mâ é Náng é hkungga gyàp hí má lé dâkam é nghut jáng, 32 mauhkûng mai gyô yù byi mù, Náng é duìnhâng zoshâng wuì lé târâ jéyáng byi aq; shut é sû lé, yhâng é mara eq rajung za yhâng é ulhum má lató hpuq byi mù, díngmán é sû lé, díngmán é sû dông lhoqpyô byi luî, yhang díngmán é eq rajung za jeju byi aq.
33 Náng é Isira-elaq byu pé gi, Nang lé mara shut luî, gye pê é lòq má sûm byùq kômù, Náng chyáng myìt lhing lò luî, Náng é myìng lé yín yû mù, noqkuq yhûm shî má Nang lé kyûdung luî, dûng tôngbán kô é nghut jáng, 34 mauhkûng mai gyo byi mù, Náng é Isira-elaq byu pê é mara hkyut pyám byi luî, Nàng mai yhángmòq é îchyí îwâ pé lé byî tô é mau má yhángmòq lé dum shuî taû lò byi aq.
35 Náng é byu pé, Nang lé mara kut shut kô é yánmai, mauhkûng myhî byùq luî, mau a wò dùt byùq é nghut mù, yhángmòq gi, Nàng, yhángmòq lé hpu zo nhang é yánmai, shí jowò shut hû mù, kyûdung luî, Náng é myìng lé yín yû luî, yhángmòq é mara mai lhing lò kô é nghut jáng, 36 mauhkûng mai gyo byi luî, Náng é Isira-elaq byù, Náng é duìnhâng zoshâng wuì lé mara hkyut pyám byi laq. Yhángmòq châng nyì râ ge é hkyô lé mhoq byi mù, silî wunlî dông Náng é byu pé lé Nàng byî tô é mau má, mau wô nhâng laq.
37 Haú mau má mùtmó gyó é, wúm gyó é, gùqsûn sun é, gùqji zô é, dinggám nê eq dinggám nyuî lo é nghut jáng le, yhángmòq é wà rawà wà lé gye pê èq lóm pyâm é nghut jáng le, byò dàn byò sho eq nòlì nòjàng haî jé é nghut jáng le, 38 Náng é Isira-elaq byù mâ é rayùq yùq, yhûmsîng hpu zô é hkyô eq no hpû é hkyô é lé sé mù, noqkuq yhûm shí shut hû luî, yhâng é lòq tû mù, kyûdûng tôngbán é nghut jáng, 39 Náng é nyì jowò nghut é mauhkûng mai gyo byi laq. Nàng gi, byu é i-myìt lé sé Sû nghut é yánmai, mara hkyut byi luî, yùq hkangmó kut é múzó bànshoq má cháng luî, taû kut byi aq. Byu é i-myìt lé sé sû gi, Nàng za nghut lhê. 40 Haú hkûn, yhángmòq gi, Nàng mai yhángmòq é îchyí îwâ pé lé byî tô é mau má chyungxe dui nyi é ahkyíng bànshoq má, Nang lé gyùq hkúnggâ nyì kôrâ nghut lhê.
41-42 Hau htoq agó, mau we mâ é byu pé gi, Náng é kô myhang é mying é yánmai le, Náng é hpungwup a-tsam bo é lòq eq Nàng lhâm tô é lòqbú é yánmai le, Náng é Isira-elaq byù a nghut kôlhang, mau we mai lé mù, noqkuq yhûm shí shut hû luî, kyûdung kô é nghut jáng, 43 Náng é nyì jowò nghut é mauhkûng mai gyo byi mù, byù bíng hpó haû dûng é bànshoq kut byi laq; haú hkûn, myìdàm htoq mâ é byù bànshoq bang gi, Náng é Isira-elaq byu pé su, Náng é myìng lé wó sé mù, Nang lé gyùq hkúngga luî, Náng myîng jòq nyi é, ngò saî é noqkuq yhûm shî lé wó sé kôrâ nghut lhê.
44 Náng é byu pé gi, yhángmòq é gye pé lé majan zan râ ga e ló kô é hkûn, Nàng, yhángmòq lé hká shut nhang kat kôle, Nàng hkyin yu tô é wà mó shî eq Náng é mying é matú ngò saî é noqkuq yhûm shí shut hû mù, Nang lé kyûdung kôjáng, 45 mauhkûng mai yhángmòq é kyûdung dang eq yhángmòq dûng tôngbán é dang lé gyo byi mù, yhángmòq lé ûngmyuq nhâng laq.
46 Byù hká yùq le, mara a kut shut é a nyi é yánmai, yhángmòq, Nang lé mara kut shut luî, Nàng, yhángmòq lé nhikjum yo mù, gye pê é lòq má àp byi luî, gye pé gi, wê é mau má nghut nghut, chyâng é mau má nghut nghut, yhángmòq lé shúm zûng nhang é hkûn, 47 yhángmòq gi, yhángmòq shúm zung nyi é mau má myìt lhîng mù, ‘Ngá-mòq gi, mara kut shut bê; ngá-mòq gi, agè ashop hkyô kut mù, shut bê nghut ri.’ ga yhángmòq lé shúm kut yû bâng é mau má dûng tôngbán kô é nghut jáng le, 48 yhángmòq gi, yhángmòq lé shuî jé ló é, yhángmòq shúm zung é mau má, yhángmòq é i-myìt nhiklhum bànshoq eq i-myìt sô bànshoq èq Náng chyáng lhing lò mù, yhángmòq é îchyí îwâ pé lé Nàng byî é mau, Nàng hkyin yu é wà mó eq Náng é mying é matú ngò saî tô é noqkuq yhûm shut hû luî, kyûdung kô é nghut jáng le, 49 Nàng nyi é jowò nghut é mauhkûng mai, yhángmòq é kyûdung dang eq yhángmòq dûng tôngbán é dang lé gyo byi mù, yhángmòq lé ûngmyuq nhâng laq. 50 Nang lé mara kut shut é Náng é byu pé lé mara hkyut pyám byi aq; yhángmòq târâ lu laî pyâm é mara bànshoq lé hkyut pyám byi mù, yhángmòq lé shúm kut yu é bang lé, yhángmòq ahtoq má shogyo nhikmyin nhâng laq; 51 hkâsu mù gâ le, yhángmòq gi, Egutuq mau mâ é jòqtoq myi htum mai she yu é, Náng é byu pé eq Náng é silî wunlî nghut ri.
52 Náng é duìnhâng zoshâng ngò le, Náng é Isira-elaq byu pé le wùt dûng tôngbán é dang lé, Náng myòq hpóng luî wú byi mù, Nang lé yhángmòq wùt dûng ngaù hkangmó tâm gyo byi laq. 53 Hkâsu mù gâ le, Nàng, Ahko Ahkáng lhúnglháng wó Sû Yhûmsîng Garai mai ngá-mòq é îchyí îwâ pé lé Egutuq ming mai shuî htoq lo é hkûn, Náng é duìnhâng zoshâng Mosheq dông Nàng taî htoq tô é eq rajung za, Náng é silî wunlî dùt râ matú, Nàng, mingkan htoq mâ é byù myû bànshoq mai yhángmòq lé hkyin masàt to bê nghut ri.” ga kyû dûng ri.
54 Sholumon gi, haû Yhûmsîng Garai lé kyûdûng é eq dûng tôngbán é hkyô bànshoq bàn jáng, yhang hkyîhput htuq mù, mauhkûng shut yhâng é lòq lhâm é jang, haû Yhûmsîng Garaî é hkungga gyàp hí mai toq yàp tô ri. 55 Yhang gi, yàp to mù, zùp zîng nyi é Isira-elaq byù lhúnglháng lé htê mó èq shimân byî ri; shimân dang haû gi,
56 “Yhâng é Isira-elaq byu pé lé danghtum htûm tô é eq rajung za, nguì ngón hkyô byî é Sû, haû Yhûmsîng Garai lé hkya-on kúngtôn keq. Yhâng é duìnhâng zoshâng Mosheq dông ge é danghtum htûm tô é bànshoq mâ é ralhum lé lháng a lhoqdìk é a bò nghut ri. 57 Ngá-nhûng é Garai Gasang nghut é, haû Yhûmsîng Garai gi, ngá-nhûng é îchyí îwâ pé eq rahá nghut nyi é su, ngá-nhúng eq le rahá nghut nyî sháng gàq; Yhang gi, ngá-nhúng lé hkâ-nhám le a tô pyám a kâng pyám sháng gàq ô. 58 Yhâng é jì-no gyo râ matú le, ngá-nhûng é îchyí îwâ pé lé Yhang byî tô é hkunmó pé, târâ wàng hkunmó pé eq târâ pé lé cháng râ matú le, Yhang, ngá-nhûng i-myìt nhiklhum lé lâng lhing yù sháng gàq. 59 Haû Yhûmsîng Garaî é hí má ngò kyûdûng é dang shí pé gi, nyí wuî râ é má cháng luî, Yhâng é duìnhâng zoshâng eq Yhâng é Isira-elaq byu pê é mú lé wú magûm byî nyì râ matú, ngá-nhûng é Garai Gasang nghut é, haû Yhûmsîng Garaî chyáng nyí myín jòq nyì sháng gàq; 60 haú hkûn, haû Yhûmsîng Garai gi, Garai Gasang nghut é hkyô lé le, Yhang mai lai luî gótû a nyì lô é hkyô lé le, myìdàm htoq mâ é byù lhúnglhâng bang wó sé kôrâ nghut lhê. 61 Haû mù, hkû-nyí kut nyî bekô eq rajung za, Yhâng é târâ wàng hkunmó pé dông chyungxe dui nyì mù, Yhâng é hkunmó pé lé jì-no gyô nyì râ matú, ngá-nhûng é Garai Gasang nghut é, haû Yhûmsîng Garaî chyáng núngmòq é i-myìt nhiklhum bànshoq wó àp nhông kó sháng gàq ô.” gâ ri.
Noqkuq Yhûm Lé Àp Nhong É Hkyô
62 Hau htâng, hkóhkâm le, yhang eq rahá nghut nyi é Isira-elaq byù bànshoq bang le, haû Yhûmsîng Garaî é hí má hkungga pé nhông byî bekô nghut ri. 63 Sholumon gi, haû Yhûmsîng Garai lé, zùmhkaû hkungga pé dông, no í mûn í hkyîng eq sau bainám rasên í mun nhông byî ri. Haû mù, hkóhkâm eq shiwa byù bànshoq bang gi, Garai Gasâng é noqkuq yhûm lé àp nhông yhûmwàng wàng bekô nghut ri.
64 Haú buìnyì má yhang, hkóhkâm gi, Yhûmsîng Garaî é noqkuq yhûm yhûmhkun mâ é wânghkaû gunggûng má, lhoqchyoi lhoqyúng mù, haú má myi nyhé hkungga pé, gùqzò hkungga pé eq zùmhkaû hkungga pê é xû lé nhông byî ri; hkâsu mù gâ le, haû Yhûmsîng Garaî é hí má jòq tô é gyi hkungga gyàp gi, myi nyhé hkungga pé, gùqzò hkungga pé eq zùmhkaû hkungga pê é xû lé tô le, jowò a lùq nghut ri.
65 Haû mù, Sholumon gi, haú hkûn, mautsûng Lebo Hamat wà mai maupyî Egutuq ming mâ é Wuìlàng jé shoq mai lé jé é Isira-elaq shiwa byù hpúng mó eq rahá poî kut ri. Yhángmòq gi, ngá-nhûng é Garai Gasang nghut é, haû Yhûmsîng Garaî é hí má, í bàt yhang, bànshoq buìnyì raxe myi nyí poî kut akô nghut ri. 66 Shit nyí nyí má, yhang gi, shiwa byu pé lé nhang kat bê nghut ri. Yhángmòq gi, hkóhkâm lé shimân byi mù, Yhâng é duìnhâng zoshâng Dawiq é matú le, Yhâng é Isira-elaq byu pê é matú le, haû Yhûmsîng Garai kut byî é jeju bànshoq é yánmai, gabú nhik dìk é myìt mai yhûm taû ló bûm bekô nghut ri.