Sholumon Yhâng É Hkóhkâm Wâng Saî É Hkyô
7
Sholumon gi, yhâng é hkóhkâm wâng lé raxe sum zân yhang saí mù, wó saî pán bê nghut ri. 2 Yhang gi, Lebanon Yòso mó mâ é Hkóhkâm Wâng lé saî ri; hau é hîng hpyang rashô dúng, làm hpyang ngo xê dúng eq myhâng hpyang sum xê dúng bo ri. Haú má, kyám gâm sik zîng myi yán xuq mù, kyám gâm sik dangbàt pé kyâng tô ri. 3 Dangbàt pê htoq má hkyâng myí xe ngo hkat lé raxe ngo hkat rayán yán kut lhang luî, hau é ahtoq má, kyám gâm siklong pê èq maû tô ri. 4 Xêwâm í shut má hkohot sum tsáng tsáng tap mù, tsáng hkangmó é dong gi, díng díng za hu lhûm tô ri. 5 Hkúmdong bànshoq eq hkum zîng pé gi, làm hpyang tot mù a-tsûng shut hing é azòng nghut luî, sûm hkum hkum díng za hu lhûm tô ri.6 Yhang gi, hîng hpyang ngo xê dúng eq làm hpyang sum xê dúng bo é zìng xuq gyám tam tô ri. Hau é hí má laìshînhtâng bò mù, hau é hí má dum nghut jáng, zìng mó pé xuq tô é eq dùp xuî kat tô ri.
7 Yhang gi, yhang târâ jéyáng râ jowò, Târâ Ràp-rá Hkyô hpyit râ Wàp mó nghut é, tángmyhâng tsûng wàp mó lé le saí mù, hpyang mai yhûmhkûng jé shoq kyám gâm siklong hkâng tap tô ri. 8 Sholumon gi, yhang nyì râ hkóhkâm yhûm wàng lé, wàp mó hau é nùnghtáng má azòng rajung za kut saî tô ri. Yhang gi, yhang hâng yu é Hpara-uq é byìzô é matú, wàp mó haû eq rajung zâ é hkóhkâm yhûm ralhum lé le saí byî ri.
9 Haû yhûm bànshoq lé, shinggan mai wânghkaû jé shoq le, a-pûn awang mai chyap htâng a-ô jé shoq le, kyûng kê gè mù, í shut é yik chyut yúng tô é, tiq é kô é hpaudap lùqgòk èq saî pân tô ri. 10 Haú pê é a-pûn awang gi, gyai réng é lùq cham mó pé nghut mù, ra-am gi, raxê dúng kô bò luî, ra-am gi, shit dúng kô bo ri. 11 Ahtoq shut má, kyûng kê tô é hpaudap lùqgòk pé eq kyám gâm sik dangbàt pé kat tô ri. 12 Yhûmwàng mó hau é awui ayàm má gi, laìshînhtâng bo é, haû Yhûmsîng Garaî é noqkuq yhum é wânghkaû eq rajung za, chyut yúng tô é lùqgòk sum pyâm eq kyám gâm sik dangbàt ra-pyâm pyâm kut wam hkyuq tô ri.
Noqkuq Yhûm Má Kat É Zè Pé
13 Hkóhkâm Sholumon gi, Turuq wà mó shut byù nhâng mù, Huram lé ê ji lò nhang ri. 14 Huram é yhâng nu gi, Naphtali up mâ é chuimó myhí nghut mù, yhâng wa gi, Turuq wà mó mâ é gyi bàt zo kung sû nghut ri. Huram gi, gyi bàt é múzó jung hkangmó wó kut é hpàqchyî, sê gyô é u-nuq eq hpàqchyî byéng-yá byíng é sû nghut ri. Yhang gi, Hkóhkâm Sholumon chyáng jé mù, yhang lé zui saí nhang é múzó bànshoq lé zui saí bê nghut ri.
15 Yhang gi, myhâng hpyang raxe shit dúng eq líng hpyang raxe í dúng bo é gyi zîng í zîng nyhê yuì mù saî htoq yu ri. 16 Dum, yhang gi, gyi zîng hpyo má ke râ matú, myhâng hpyang ngo dúng dúng bo é zìng nyuq í lhum lé le saî ri 17 Zìng hpyo mâ é zìng nyuq má, gùn su dùt é toqjâng tui lé, razìng má nyhit hkat hkat kut zìng nyuq hkangmó má mhôn lhâng tô ri. 18 Yhang gi, gyi lungshi cham pé saî yù mù, haû zìng í zing é ahpyo mâ é zìng nyuq má rajung za í yán yán kut saî mhôn tap lhîng tô ri. 19 Laìshîhtâng mâ é zìng pé mâ é zìng nyuq pé gi, myi dúng dúng myhâng mù, htupbó ban su dùt é nghut ri. 20 Haû í zing é zìng nyuq má, gùn su dùt é toqjâng tui nâm mâ é hkoq zông su dùt é ahtoq má lungshi í shô cham cham kut í yán saî tap lhîng tô ri. 21 Huram gi, zìng haû í hkat lé noqkuq yhûm mâ é laìshînhtâng má xuq tô ri; maupyî shut xuq tô é zìng lé gi, Yahkina ga myhíng mù, mautsûng shut xuq tô é zìng lé gi, Bu-aqb ga myhîng tô ri. 22 Haû zìng nyuq pé gi, htupbó ban lhô nghut ri. Haû mù, zìng í hkat saî é hkyô bàn bê nghut ri.
23 Huram gi, alíng mâ é gyi lànghkang mó saî é nghut mù, hau é hé yâm shí yâm gyoro raxê dúng làm luî, ngo dúng nìk mù, ayàm lhînghkyùq sum xê dúng hing ri. 24 Hau é ayàm a-ô má gi, gyi lànghkang mó eq ralong za kut, radúng má ûmshi raxê cham cham kut í yán saî lhîng tap tô ri.
25 Lànghkang mó haû lé gi, gyi nohtó raxe í dû é ahtoq má tsung tô é nghut mù, nohtó sûm du gi, mautsûng shut hû, sûm du gi, buìwàng shut hû, sûm du gi, maupyî shut hû, sûm du gi, buìhtoq shut hu tô é nghut luî, chûhtâng hkyúm dùt tô ri. 26 Lànghkang mó gi, lòqwa rahup htu ri; hau é adúng gi, gòm nhut su dùt mù, htupbó ban sû é mhôn tap tô ri. Haú má ûchyam ramûn í hkying ngo shô chyóng kô wang ri.
27 Huram gi, wó dûn huî é gyi lé saî é tsûngjang raxê lhum lé saî ri; tsûngjang ralhum gi, hîng hpyang myi dúng, làm hpyang myi dúng eq myhâng hpyang sum dúng dúng bo ri. 28 Tsûngjang haú pê é zòng lé gi, shí dông tsing saî ri; azòng eq xoq mù siklong pé lé saî tap tô é ayàm adúng pé bo ri. 29 Adúng má le, azòng pé má le, hkanghkyi lhô pé, nohtó lhô pé eq hkerubim lhô lé kyûng tap tô ri. Hkanghkyi lhô pé eq nohtó lhô pê é ahtoq a-ô má, ban hkóng pé lé tap byaû hkyô lhâng tô ri. 30 Tsûngjang hkangmó má, gyi lhêngchap myî lhum eq gyi lhêngdum pé bo ri; lhum hkangmó má lànghkang zo bò mù, hau é a-ô má htuq é hkyî myî lhum lhum dàp luî, hkyî mâ é myî hkyam shut ban hkóng pé tsing tap tô ri. 31 Haû tsûngjang ahkaû má, radúng nìk é, alíng mâ é azòng bo ri. Azòng hau é ahtoq má gi, rahtô ze htoq tô ri. Azòng hau é a-nhut lhînghkyùq má gi, alíng mâ é a nghut é za, myi chyûn bo é alhô pé tsing kyûng tap tô ri. 32 Haû lhêngchap myî lhum lé gi, tsûngjang achyûn a-ô má tap to mù, lhêngdum pé lé gi, tsûngjang má tap tô ri. Lhêngchap lhum hkangmó é myhâng hpyang gi, radúng èq rahtô bo ri. 33 Lhêngchap pé gi, gyèlhêng lhêngchap pé su dù shoq saî tô ri; hau é lhêngdum pé, lhênggóng pé, lhêngkíng pé eq lhêngkáng pé bànshoq gi, jòqtoq èq saî é chyat nghut ri.
34 Tsûng râ hkyî hkangmó mâ é myi chyûn má ahkyî zo tsing tap tô ri. Haú pé lé tsûng râ hkyî eq ralhum za kut tap tô ri. 35 Tsûng râ hkyî hau é ahpyo má gi, radúng nìk é agóng ralhum tap tô ri. Pyî long pé eq adúng pé gi, tsûngjang ahpyo jé shoq tap tô bum ri. 36 Yhang gi, pyî long pé eq adúng pé mâ é mân tô é jowò bànshoq má, hkerubim alhô, hkanghkyi alhô pé eq byùm gàm alhô pé tsing kyûng tap to mù, lhînghkyùq má ban hkóng pé tsing kyûng tap tô ri. 37 Yhang gi, haú dông mai tsûngjang raxê lhum lé saí bê nghut ri. Lhum hkangmó gi, saî tsuq é hkyô, kê é hkyô eq azòng rajung za nghut ri.
38 Hau htâng, yhang gi, tsûngjang hkangmó má ralhum lhum ke râ matú gyi lànghkang zo raxê lhum saî ri; lànghkang lhum hkangmó gi, myi dúng dúng làm mù, wuì 240 chyóng kô wang ri. 39 Yhang gi, tsûngjang pé lé, noqkuq yhum é maupyî shut ngo lhum, mautsûng shut ngo lhum kut tô tô ri. Yhang gi, lànghkang mó lé le, maupyî buìhtoq hkyam achyûn nghut é maupyî shut tô tô ri. 40 Yhang gi, au pé, gòt zè pé eq hkoq mó pé lé le saî tô ri.
Haû mù, Huram gi, Hkóhkâm Sholumon é matú, Yhûmsîng Garaî é noqkuq yhûm mâ é múzó ban saî to bê nghut ri. Hau pé gi,
41 zìng mó í zîng;
zìng haû í zing é ahpyo mâ é hkoq zông zìng nyuq;
zìng haû í zing é ahpyo mâ é hkoq zông zìng nyuq lé mhôn é tuijâng í jâng;
42 zìng haû í zing é ahpyo mâ é hkoq zông zìng nyuq má mhôn é tuijâng í jáng má, rajàng í yán yán, rayán má rashô cham cham kut tap râ matú, lungshi myi shô cham;
43 lànghkang zo pé raxê eq haú pé tsûngjang raxê;
44 lànghkang mó eq hau é a-ô mâ é nohtó raxe í du;
45 au pé, gòt zè pé eq hkoq mó pé nghut ri.
Huram gi, Hkóhkâm Sholumon é matú, haû Yhûmsîng Garaî é noqkuq yhûm mâ é chûngzè pé bànshoq lé, chyut chyut é gyî èq chyat saî to byî ri. 46 Hkóhkâm hpó gi, zè haú pé lé, Yodan Làng langhkaû mâ é Suhkut eq Zarehtan gyoro má tso nyhaq azòng saí mù gyî èq shup yû nhang ri. 47 Sholumon gi, zè haú pé lûm myô é yánmai, a chín lô é za tô tô ri; haû mù, gyi hkâ myhó joí nghut é lé a wó taí kó nghut ri.
48 Sholumon le, Yhûmsîng Garaî é noqkuq yhûm mâ é chûngzè bànshoq lé saî ri; haú pé gi, hîng hkungga gyàp; Tô Shit é Mùk kê é hîng mùkgyàp; 49 hîng gyíng myi-kok tsûngjang pé (ahte pyâm sân-yúng jowò hí má, lòqyo hkyam shut ngo lhum, lòqpaî hkyam shut ngo lhum kut tô tô ri); hîng gyíng pé lé chyat saî é myishi ban pé, myi-kok pé eq nyàp pé; 50 hîng gyíng lé saî é, lànghkang zô pé, nyàp pé, hkoq mó pé, gòmhtung pé eq namngón shôm nyhé myihkoq pé; Chyoiyúng Htâng é Jowò nghut é, je ahtê wàp é hkum pê é matú le, noqkuq yhum é wàp mó mâ é hkum pê é matú le, hîng hkum kyin pé nghut ri.
51 Hkóhkâm Sholumon gi, haû Yhûmsîng Garaî é noqkuq yhum é matú, yhang kut é múzó bànshoq lé ban jáng, yhâng wa Dawiq àp nhông byî tô é ngùn, hîng eq gótû chûngzè pé lé yu háng mù, Yhûmsîng Garaî é noqkuq yhûm mâ é sùtdò má tsing kat tô ri.