Sholumon Noqkuq Yhûm Saî É Hkyô
6
Isira-elaq byu pé, Egutuq ming mai htoq lo é htâng zànwut myí sho shit xê zan zàn, Isira-elaq ming má Sholumon hkóhkâm kut é myí zan zàn, Ziwa nghu é lha-mó í hkyap hkyap má, Sholumon gi, haû Yhûmsîng Garaî é noqkuq yhûm lé saî hî bê nghut ri.2 Yhûmsîng Garaî é matú Hkóhkâm Sholumon saî é noqkuq yhûm gi, hîng hpyang 60 dúng, làm hpyang 20 dúng, myhâng hpyang 30 dúng nghut ri. 3 Noqkuq yhûm wàp mó hí mâ é laìshînhtâng gi, noqkuq yhûm làm hpyang lhám bò mù, làm hpyang 20 dúng, hîng hpyang 10 dúng bo ri. 4 Yhang gi, noqkuq yhûm xêwâm má hkohot zo pé le saî tô ri. 5 Hau htoq agó, yhang gi, wàp mó é shinggan xêwâm pé eq sân-yúng wàp shinggan xêwâm lhînghkyùq má, wàp a-pyâm pyâm saî tô ri. 6 A-ô pyâm wàp pé gi, ngo dúng lam ri; gyorô pyâm wàp pé gi, hkyuq dúng lam ri; ahtoq pyâm wàp pé gi, nyhit dúng lam ri. Yhang gi, noqkuq yhûm xêwâm má haî le a wó saî tap sháng gàq ga, haû noqkuq yhum é shinggan shut mâ é xêwâm dangbàt gyám tam tô ri.
7 Noqkuq yhûm saî é hkûn chung é lùqgòk pé gi, lùqgòk hkoq jang mai yu é lùqgòk pé chyat nghut mù, noqkuq yhûm saî é u má, bàtdù, wazung eq gótû jòqtoq zè pé mying é htê pé haî lháng a wó gyo nghut ri.
8 Je ló nyhum é a-pyâm mâ é hkúmdong gi, noqkuq yhum é maupyî hkyam shut hpông tô ri; gyorô pyâm jé shoq zùmhtâng htung toq to mù, haû mai sum pyâm pyâm jé shoq dum htung toq tô ri. 9 Haú dông, Sholumon gi, noqkuq yhûm lé saí mù, ban saí jáng, dangbàt pé eq kyám siklong pê èq yhûmhkûng saî tap tô ri. 10 Yhang gi, noqkuq yhûm ayàm cháng luî wàp pé lé saî tap tô ri. Wàp lhum hkangmó é myhâng hpyang gi, ngo dúng dúng bo ri; wàp haú pé lé kyám gâm sik dangbàt pê èq noqkuq yhûm má kyâng tap tô bum ri.
11 Haú hkûn, haû Yhûmsîng Garaî é mungdang Sholumon chyáng jé é gi, 12 “Nàng, noqkuq yhûm shî lé saî nyi é eq rajung za, Ngá é târâ wàng hkunmó pé cháng mù, Ngá é târâ pé lé châng kut luî, Ngá é hkunmó pé bànshoq lé châng kut nyi é nghut jáng, Ngò, náng wa Dawiq lé, danghtum htûm tô é lé nàng dông mai lhoqdìk râ nghut lhê. 13 Ngò gi, Isira-elaq byu pé eq rahá nyi nyì râ nghut mù, Ngá é Isira-elaq byu pé lé tô pyâm to râ a nghut.” ga taî ri.
14 Haû mù, Sholumon gi, noqkuq yhûm haú lé ban saî pán bê nghut ri. 15 Yhang gi, noqkuq yhûm hau é ahkaû xêwâm shut kyám gâm siklong tap tô ri; noqkuq yhûm mâ é hpyang mai yhûmhkûng kyô long jé shoq siklong tap to mù, noqkuq yhûm mâ é hpyang gûng lé gi, htángmó gâm siklong hkâng tô ri. 16 Yhang gi, Chyoiyúng Htâng é Jowò nghut é, noqkuq yhûm ahkaû mâ é sân-yúng wàp lé, htâng mâ é xêwâm mai í xê dúng wê é má, hpyang mai yhûmhkûng kyô long jé, kyám gâm siklong pê èq kyâm hkoq yu tô ri. 17 Wàp shí lhûm é hí mâ é wàp mó gi, myi xê dúng hing ri. 18 Noqkuq yhûm ahkaû má gi, ûmtaú shi alhô eq banbó alhô pé kyûng tap tô é kyám gâm siklông èq wam tô ri. Haú mâ é jung hkangmó gi, kyám gâm sik chyat nghut mù, lùqgòk lé le a myàng nghut ri.
19 Yhang gi, haû Yhûmsîng Garaî é dangshikaq sàksé dò kat to râ matú, noqkuq yhûm ahtê pyâm sân-yúng jowò saî tô ri. 20 Ahtê pyâm sân-yúng jowò haû gi, hîng hpyang í xê dúng, làm hpyang í xê dúng eq myhâng hpyang í xê dúng bo ri. Yhang gi, wàp haú lé hîng gyíng èq shup to mù, kyám gâm sik hkungga gyàp má le shup tô ri. 21 Sholumon gi, noqkuq yhûm ahkaû lé hîng gyíng èq shup to luî, hîng shup tô é ahtê pyâm sân-yúng jowò hkum hí má, hîng tuijâng pé tuî gyân tô ri. 22 Haû mù, yhang gi, ahkaû bànshoq má le, ahtê pyâm sân-yúng jowò eq sêng é hkungga gyàp má le, hîng shup tô ri.
23 Sholumon gi, ahtê pyâm sân-yúng jowò má, tsanlun gàm sik èq, raxê dúng dúng myhang é hkerubim í lhum saî tô ri. 24 Sânghî lhum hkerubim rahkyam shut mâ é dùng gi, ngo dúng hîng mù, góhkyam shut mâ é dùng le, ngo dúng hing ri; dùng hpyo í hpyô é gyoro gi, raxê dúng bo ri. 25 Haû hkerubim gódû é dùng le, raxê dúng bo ri; haû hkerubim í lhûm é tiq ko azòng gi, rajung za nghut nyi ri. 26 Hkerubim haû í lhûm é myhâng hpyang gi, raxê dúng dúng bo ri. 27 Sholumon gi, haû hkerubim í lhum lé, je ahkaû mâ é wàp má tsung tô é nghut mù, haû í lhûm é dùng pyo tô ri. Hkerubim ralhûm é dùng gi, rahkyam shut mâ é xêwâm má tân to mù, gólhûm é dùng gi, góhkyam shut mâ é xêwâm má tân tô ri. Haû í dûng gi, wàp gyoro má ralhum eq ralhum tân lhûm tô ri. 28 Yhang gi, haû hkerubim í lhum lé hîng shup tô ri.
29 Yhang gi, noqkuq yhûm xêwâm mâ é ahkaû shut shinggan shut lhînghkyùq bànshoq má, hkerubim alhô, byùm gàm alhô eq banbó bó tô é ban alhô pé kyûng tap tô ri. 30 Yhang gi, noqkuq yhûm mâ é ahkaû wàp eq shinggan wàp pé mâ é hpyang pé má le hîng shup tô ri.
31 Yhang gi, ahtê pyâm sân-yúng jowò wàng hkum má, tsanlun gàm sik eq saî é hkum pé saî tap tô ri; hkum ralhum gi, sân-yúng wàp é làm hpyang ngo tú mâ é ratú í lam é chyat nghut ri. 32 Yhang gi, tsanlun gàm sik hkum í long má, hkerubim alhô, byùm gàm alhô pé eq banbó bó é ban alhô pé lé kyûng tap to mù, hkerubim eq byùm gàm alhô pé má hîng shup tô ri. 33 Haû eq rajung za, wàp mó má wang é hkum lé le, tsanlun gàm sik èq hkum zông saî tô ri; hkum zông ralhum gi, wàp mó é làm hpyang myi tú mâ é ratú bo ri. 34 Yhang gi, htángmó gâm sik èq, wó nghuq é hkum razúm lé le saî to mù, 35 haú má, hkerubim alhô, byùm gàm alhô eq abó bó é ban alhô pé kyûng tap luî, rawuí wuí za hîng tsing shup tô ri.
36 Yhang gi, ahkaû mâ é wânghkaû lé, kyûng yúng tô é lùqgòk sum pyâm má kyám gâm sik ra-pyâm pyâm kut saî tô ri.
37 Sholumon hkóhkâm kut é myí zan zàn, Ziwa lhôhkyap má, haû Yhûmsîng Garaî é noqkuq yhûm a-pûn awang lé hkyó bê nghut ri. 38 Hkóhkâm kut é raxe razan zàn, shit hkyap nghut é Bula lhôhkyap má, noqkuq yhûm haú lé, jíhkúm nùqgùq sang kyô tô é eq rajung za ban saí bê nghut ri. Yhang gi, noqkuq yhûm haú lé nyhit zân ahkyíng yù mù saî é nghut ri.