Noqkuq Yhûm Saí Râ Matú Hen Lajâng É Hkyô
5
Sholumon gi, yhâng wa Dawiq é hkóhkâm hkô má zùng râ matú, sô kat namngón xû bùt byî é hui bê nghut é hkyô lé, Turuq hkóhkâm Hiram wó gyo jáng, yhang gi, ayang Dawiq eq buìnùm nghut gyó lo é yánmai, Sholumon chyáng yhâng é lagyô pé lé nhang kat ri. 2 Sholumon gi, Hiram chyáng shî su ga danglù dé kat ri.3 “Ngá wa Dawiq gi, yhâng é awui ayàm lhînghkyùq mâ é bâng èq yhang lé majan zân nyi é yánmai, yhâng é gyè pé lé, haû Yhûmsîng Garaî èq, yhâng é hkyî ô má tô tô é hkûn jé shoq, yhâng é Garai Gasang, haû Yhûmsîng Garaî é Mying é matú, noqkuq yhûm a wó saí shi nghut é hkyô lé, nàng sê nyi lhê. 4 Nghut kôlhang, ahkuî, ngá é Garai Gasang nghut é, haû Yhûmsîng Garai gi, ngo lé, lhînghkyùq mai nguì ngón yùqyò nhang to bê nghut mù, gyè kut é bang le a nyì, ihkyùp mó le a jòq nghut ri. 5 Haû mù, Yhûmsîng Garai mai ngá wa Dawiq lé, ‘Náng é hkô nghut é, hkóhkâm tángmyhâng má, Ngò zùng nhâng râ sû nghut é nungzo gi, Ngá é Mying é matú noqkuq yhûm saí râ nghut lhê.’ ga taî tô é eq rajung za, ngò gi, ngá é Garai Gasang nghut é, haû Yhûmsîng Garaî é Mying é matú noqkuq yhûm saí râ nghû myìt lhê.
6 Haû mù, ngá é matú Lebanon bùm mâ é kyám gâm pé htuq byi râ dangmó hkyó laq. Ngá é byu pé gi, náng é byu pé eq rahá mú chôm zui râ nghut lhê; ngò gi, zuihpau lé nàng hkâ-myhó hpyit byî le hkâ-myhó, náng é byu pé lé byi râ nghut lhê. Sidon byu pé su, sik htuq kûng é byù rayùq le, ngá-mòq chyáng a nyi é hkyô lé, nàng sê ri.” gâ ri.
7 Sholumon dé kat é danglù haú lé Hiram lhom wó gyo jáng, yhang gi, gyai yhang gabú luî, “A-myû mó shî lé ùp râ matú, Dawiq lé, hpàqchyî byéng-yá bo é zo byî é, haû Yhûmsîng Garai gi, hkû-nyí hkungsô wó nyi ri ô.” ga taî ri.
8 Haû mù, Hiram gi, Sholumon chyáng,
“Nàng, ngá chyáng dé kat byî é danglù lé ngò lhom myang hàp yù bê nghut mù, ngò gi, nàng yù byi nhâng nau é bànshoq nghut é, kyám gâm sik eq htángmó gâm sik pé lé hen lajang byi râ nghut lhê. 9 Ngá é byu pé gi, sik túm pé lé, Lebanon bùm mai Medihteri-an Wuimau jé shoq she hkyó râ nghut mù, ngò gi, haú pé lé paû tsuq luî, nàng taî tô é jowò jé shoq, wuì mai myhû hkyô kat râ nghut luî, paû pé lé hpyoq byi jáng, nàng gi, sik htung pé lé lhom wó ge yu lhê. Nàng le, ngò myìt ô nau é eq rajung za, ngá é hkóhkâm wâng mâ é byu pê é matú, zoshuq htuqbáng byi ra râ nghut lhê.” ga dang hun kat ri.
10 Haú dông mai, Hiram gi, Sholumon o é eq rajung za, kyám gâm sikhtung eq htángmó gâm sikhtung pé bànshoq, yhang lé byî ri. 11 Haû mù, Sholumon gi, Hiram é hkóhkâm wâng mâ é byu pê é matú, zoshuq dông súngsô raxê sên èq hkyuq mun joí, jèt é tsanlun xû rasên í mun chyóng htuqbáng byî ri. Sholumon gi, Hiram é matú, razan htâng razàn haú dông htuqbáng byî nyi ri. 12 Haû Yhûmsîng Garai gi, Sholumon lé, Yhang danghtum htûm tô é eq rajung za hpàqchyî byéng-yá byi bê nghut ri. Hiram eq Sholumon gi, dangshikaq chôm tô to kô é nghut mù, yhángnhik é gyoro má nguì ngón yùqyo nyì bê nghut ri.
13 Hkóhkâm Sholumon gi, mú zui byù kut râ matú, Isira-elaq mau gón mai byù sûm mun lé lung yu ri. 14 Yhang gi, haú bang lé, lha-mó rahkyap má byù ra-mun mun mú zui râ matú gàm luî, Lebanon bùm shut nhang kat ri. Yhángmòq gi, Lebanon bùm má lha-mó rahkyap ê nyî mù, yhûm má lha-mó í hkyap lo nyì nyì kut akô. Adoniram gi, mú zui bang lé wú gôn é wò yù sû nghut ri. 15 Sholumon gi, zè wàq byù nyhit mun eq bùm pé má lùqgòk hkoq bang shit mun wó ri; 16 hau htoq agó, yhang gi, htung tô é múzó lé hkyô shit râ byù eq mú zui bang lé wú gon râ byù súm hkying sum shô yùq le wó ri. 17 Yhángmòq gi, hkóhkâm hkunmó hkyô é eq rajung za, noqkuq yhûm mâ é a-pûn awang hkyó râ lùqgòk kut râ matú, kyûng yúng tô é lùqgòk mó pé mai hkoq yu akô nghut ri. 18 Haû mù, Sholumon eq Hiram nhik é lòqmú kung bang le, Gebali byù myû mú zui bang le, noqkuq yhûm saí râ matú, sik pé hpyit é mû eq lùqgòk pé lé kyûng lajâng é mû kut bum akô nghut ri.