Sholumon É Zaugun Sûwún Wuî
4
Hkóhkâm Sholumon gi, Isira-elaq mîngdán gón lé ùp bê nghut ri. 2 Yhâng é zaugun sûwún mó pé gi, a-ô mâ é eq rajung za nghut ri;Zadok é yhang zo Azari-a gi, hkyangjong;
3 Shisha é yhang zô nhik, Elihorep eq Ahiya gi, hkóhkâm wâng mâ é mûsing nhik;
Ahiluda é yhang zo Yehoshahpat gi, kâ xûm sû;
4 Yehoi-ada é yhang zo Benai-a gi, gyèzau mó;
Zadok eq Abi-ahta gi, hkyangjông nhik;
5 Nahtan é yhang zo Azari-a gi, mau zau wui é zau hpó;
Nahtan é yhang zo Zabuda gi, hkyangjong eq hkóhkâm lé hpàqchyî byi sû;
6 Ahishara gi, hkóhkâm wânghkaû lé ùp sû;
Apda é yhang zo Adoniram gi, mú zìk zui nhâng huî é langchyâng pé lé wú gon sû nghut ri.
7 Dum, Sholumon gi, Isira-elaq mîngdán gón má, mau zau raxe í yùq hkyin nyhi tô ri. Yhángmòq gi, razàn ahkaû má, hkóhkâm eq hkóhkâm wâng yhûmbyù wui é matú, lha-mó rahkyap rayùq zoshuq htuqbáng byî akô nghut ri. 8 Mau zau haú bâng é myìng gi, a-ô mâ é eq rajung za nghut ri;
Ehprim bum mau má gi, Ben Hura;
9 Makaza wà, Shalabim wà, Bet Shemesha wà eq Elon Bet Hanan wà pé má gi, Ben Dekera;
10 Arubot wà má gi, Ben Heset (yhang gi, Sohko wà eq Hehpera mau bànshoq lé ùp nyi ri);
11 Nahpot Dora mau má gi, Ben Abinadap (yhang gi, Sholumon é byìzo Tahpat lé hâng yù sû nghut ri);
12 Tanak wà, Megido wà, Yezirela langhkaû a-ô mâ é Zarehtan wà eq xoq tô é Bet Shan jowò bànshoq, Bet Shan mai Yokmam laî byìt mù, Abela Mehola jé shoq má gi, Ahiluda é yhang zo Bana;
13 Ramot Gile-at mau má gi, Ben Gebera (yhang gi, Gile-at mau mâ é Manase é yhang zo Ya-ira sing é wà mó pé le, Bashan mau mâ é Arigoba jowò eq haú mâ é gyi hkumtáng pé bo é, wàhkûm kyâm lhîng tô é wà mó hkyuq xê lé le ùp ri);
14 Mahana-im wà má gi, Ido é yhang zo Ahinadap;
15 Naphtali mau má gi, Ahimazi (yhang gi, Sholumon é byìzo Basemat lé hâng yù sû nghut ri);
16 Asheri eq Alot mau má gi, Hushai é yhang zo Bana;
17 Yisahka mau má gi, Paru-a é yhang zo Yehoshahpat;
18 Ben-yamin mau má gi, Ela é yhang zo Shimi;
19 Amori hkóhkâm Sihon é mau eq Bashan hkóhkâm Oga é mau eq sêng é Gile-at mau má gi, Uri é yhang zo Gebera; mau gón lé yhang rayùq baú za ùp é zau nghut ri.
Sholumon Nyí Wuî Myang Hap Yu É Htuqbáng Zê Pé
20 Yudaq byu pé eq Isira-elaq byu pé gi, wuimau yàm mâ é se-muî su yhang myo bekô; yhángmòq gi, zo zo shuq shuq gabú nguì ngón nyi bum akô nghut ri. 21 Sholumon gi, haû Uhprat Wuìlàng mai Hpilisiti byu pê é mau jé mù, Egutuq maukyo lháng jé shoq mâ é hkóhkâm mîngdán bànshoq lé ùp bê nghut ri. Hkóhkâm mîngdán haú pé gi, Sholumon é i-pyàt gón, yhâng é ùphkang é a-ô má nyì kômù, yhang lé hkán kat byî akô nghut ri.
22 Sholumon é hkóhkâm wâng má, nyí wuî ban nyi é zoshuq gi, nú é súngsô mùn rahkying hkyuq sho ngo xê joí kô eq a nú é súm hkying sum shô joí kô; 23 tsô xu tô é no raxê du, mhan nú yô má zúng tsô é no í xê du, sau bainám rashô du eq gótû chochî, xat pé, yo pé, rém tô é pyet eq hkyángmó pé nghut nyi ri. 24 Sholumon gi, Tihpasa mai Gaza jé shoq nghut é, Uhprat Wuìlàng buìwàng hkyam shut mâ é hkóhkâm mîngdán bànshoq lé ùp mù, awui ayàm mâ é mau bànshoq eq le nguì ngón shoq nyi ri. 25 Sholumon é i-pyàt má, Dan wà mai Berasheba wà jé shoq mâ é Yudaq byu pé eq Isira-elaq byu pé gi, ó le ó sing é tsibyiq hkyâm eq hkohúm gâm ô má, gau shoq myang nyi bum akô nghut ri.
26 Sholumon gi, gyèlhêng she é myang pê é matú hkup myî mun eq myang ji gyèzo ramûn í hkyîng yùq wó ri.
27 Mau zau wuì gi, yhûmsîng âng é lhôhkyap má, Hkóhkâm Sholumon é matú le, hkóhkam é zohpoq má bo zô é bànshoq bâng é matú le, zoshuq htuqbáng byî akô. Yhángmòq gi, haî le a langhpyùt loshoq byî nyi akô nghut ri. 28 Yhángmòq gi, gyèlhêng she é myang pê é matú le, gótû myang pê é matú le, tô to âng é jowò má, râ é myhó mùk-yó gùq eq hkówá pé lé dé byî bum akô nghut ri.
Sholumon É Hpàqchyî Byéng-yá
29 Garai Gasang gi, Sholumon lé, hpàqchyî byéng-yá eq nìk dik hkyô lé sê gyô hkyang é u-nuq lé le, wuimau yàm mâ é se-muî su myô é, gúmjùp é myìt lé le, byî ri. 30 Sholumon é hpàqchyî byéng-yá gi, buìhtoq hkyam mâ é byù bànshoq é hpàqchyî byéng-yá htoq le, Egutuq ming mâ é hpàqchyî byéng-yá bànshoq htoq le, je kô hkìk nyi ri. 31 Yhang gi, byù bànshoq htoq má hpàqchyî byéng-yá je bo é nghut mù, Ezirahi byù Ehtan eq, Mahola é yhang zo yùqzô pé nghut é, Heman, Hkalahkola, Darada pê htoq má lháng je bo ri. Awui ayàm mâ é mîngdán pé bànshoq má, yhâng é myìng hû jam ló bê nghut ri. 32 Yhang gi, sânghkyang sum hkyîng hkun taî ri; yhâng é mahkôn pé gi, rahkying ngo hkat bo ri. 33 Yhang gi, Lebanon bùm mâ é kyám gâm mai, xêwâm pé má yùq é husop gàm pé lòm shoq, agàm pê é hkyô lé le, gaunyhaú pé, nghoqzô pé, dô yê jung pé eq ngozô pê é hkyô lé le, taî tô ri. 34 Sholumon é hpàqchyî byéng-yá lé wó gyô wú é, mingkan htoq mâ é hkóhkâm bànshoq bang gi, yhâng é hpàqchyî byéng-yá dang lé gyô yù râ matú, byù myû bànshoq mâ é byu pé lé nhang kat bum akô nghut ri.