Sholumon Hpàqchyî Byéng-yá Dûng É Hkyô
3
Sholumon gi, Egutuq hkóhkâm Hpara-uq eq mùng mòq dù mù, Hpara-uq é byìzo lé hâng yu ri. Yhang gi, byìzo haú lé, Dawiq é wà má yu to mù, yhâng é hkóhkâm wâng lé le, haû Yhûmsîng Garaî é noqkuq yhûm lé le, Yerusalem wà mó lhînghkyùq mâ é wàhkûm lé le, ban saî é hkûn jé haû má nyhi tô ri. 2 Haú hkûn jé shoq, Yhûmsîng Garaî é Mying é matú noqkuq yhûm a saí shi nghut é yánmai, shiwa byu pé gi, myhang é hparà noq jowò pé má hkungga nhông byî nyi ashi kô nghut ri. 3 Sholumon gi, myhang é hparà noq jowò pé má, hkungga pé nhông byî é eq namngón jung nyhê nhông byi kut é mai lai luî, yhâng wa Dawiq mhoq kyô tô é hkyô pé lé châng kut é dông, haû Yhûmsîng Garai lé yhâng é chyitdàp myìt shit ri.4 Hkóhkâm gi, hkungga pé nhông byi râ matú, ahkyàk dik é myhang é jowò nghut é Gibe-on wà mó má ê mù, haú mâ é hkungga gyàp htoq má, myi nyhé hkungga rahkyîng nhông byî ri. 5 Gibe-on wà má, haû Yhûmsîng Garai gi, myín lé, Sholumon é yhupmòq má yhang lé htoq shit ri; Garai Gasang gi, “Ngò, nang lé haî byi râ, dung aq.” ga taî ri.
6 Sholumon gi, “Náng é duìnhâng zoshâng, ngá wa Dawiq gi, Náng hí má, jujúm é, tengmán é eq i-myìt díng é sû nghut é yánmai, Nàng gi, yhang lé shogyo nhikmyin myìt mó tûn shit bê nghut ri; Nàng gi, ngá wa lé, shogyo nhikmyin myìt mó haû xoq tûn shit nyî mù, hkû-nyí yhang, yhâng é hkóhkâm tángmyhâng má zùng râ yùqzo rayùq, yhang lé byi bê nghut ri.
7 Ahkuî, ngá é Garai Gasang nghut é, Yhûmsîng Garai ê, Nàng gi, ngá wa Dawiq é jowò má, Náng é duìnhâng zoshâng ngo lé, hkóhkâm kut nhang to bê nghut ri. Nghut kôlhang, ngò gi, zoshâng zo za ru nghut ashî mù, ngá é wò pé lé hkâsu kut wùn wàq râ lé a sé nghut lhê. 8 Náng é duìnhâng zoshâng ngò gi, byù myû mó dông Nàng hkyin yu to mù, a ung nghap loshoq myô é byù shí bâng chyáng nyi tô é nghut lhê. 9 Haû mù, ge é eq a ge é lé sê gam hkoq luî, haû Náng é a-myû lé sê ùphkâng râ hpàqchyî byéng-yá bo é i-myìt nhiklhum, Náng é duìnhâng zoshâng ngo lé byi laq. Haû a nghut jáng, shî Náng é byù myû mó lé, ó yùq wá wó ùphkâng râ nghut lhê lhú?” ga tû taî ri.
10 Yhûmsîng Garai gi, Sholumon haú hkyô lé dûng é yánmai, wú myìt nguì bê nghut ri. 11 Haû mù, Garai Gasang gi, yhang lé, “Nàng gi, chyungxe hîng râ matú le, sùtzè wó râ matú le, náng é gyè pé lé sat pyám byi râ matú le, a dûng é za, târâ ràp-rá é dông wó ùphkâng râ matú hpàqchyî byéng-yá lé dung bê nghut é yánmai, 12 nàng dûng é eq rajung za, Ngò byi râ nghut lhê. Náng é hí má le, ó a wó wú, náng é htâng má le, ó wó râ a nghut é, hpàqchyî byéng-yá eq sê gam hkoq é i-myìt nhiklhum lé, Ngò, nang lé byi râ nghut lhê. 13 Hau htoq agó, nàng a dûng lhôm é sùtzè eq xânghpoq nge wó hkyô lé le, Ngò, nang lé byi râ nghut lhê; haú hkûn, náng é i-pyàt gón má, hkóhkam pê chyáng nàng eq wó whuî é byù nyì râ a nghut. 14 Nàng gi, náng wa Dawiq su, hkunmó pé eq Ngá é târâ wàng hkunmó lé châng kut mù, Ngá é jì-no gyô nyi é nghut jáng, Ngò gi, nàng lé chyungxe hîng nhâng râ nghut lhê.” ga taî ri. 15 Haú hkûn, Sholumon gi, yhup bûn lò mù, yhupmòq rahkat myang é hkyô lé sé kat bê nghut ri.
Yhang gi, Yerusalem wà mó shut taû ló mù, haû Yhûmsîng Garaî é dangshikaq sàksé dò hí má yàp luî, myi nyhé hkungga pé eq zùmhkaû hkungga pé lé nhông byi bê nghut ri. Hau htâng, yhang gi, yhâng é hkóhkâm wâng mâ é zaugun wuì bànshoq é matú zoshuq poî kut byi bê nghut ri.
Hpàqchyî Bo É Dông Ùp É Hkyô
16 Hau htâng, shiwa myhí í yùq gi, hkóhkam chyáng lé mù, yhâng é hí má yàp tô akô nghut ri. 17 Yhángnhik mâ é rayùq gi, “Ngá yhûmsîng ê, hkyâmsa byi laq ô; ngò eq myiwe myhí gi, rayhûm má za nyi lhê. Yhûm haú má, yhang, ngò eq rahá nyi tô é u má, ngò gi, yùqzo rayùq hku é nghut lhê. 18 Ngá zo nyheqnú hku é htâng sum nyí má, myiwe myhí shî le zo hkû bê nghut ri. Yhûm haú má, ngá-nhik mai lai luî ó le a nyi é nghut mù, ngá-nhik baú nyi e nghut lhê.
19 Myiwe myhí shî gi, myín lé yhup é hkûn, zoshâng lé záng nhê pyet é yánmai, yhang zo shi byùq bê nghut ri. 20 Haû mù, yhang gi, myín gùnggàm má toq luî, náng é duìnhâng zoshâng ngò yhup ngón tô é u, ngá é yùqzo lé ngá é nàm mai bún yû mù, yhâng é naúwang má shup to luî, shi byùq bê nghut é yhâng é zoshâng lé gi, ngá é naúwang má lheq to byî ri. 21 Htang nàpkyó, zoshâng lé naú huq râ matú, ngò toq lo é hkûn, zoshâng haû gi, shi to láng bê nghut ri! Nghut kôlhang, ngò gi, htang nàpkyó maubó soq má, rago dum saî wú kat le, haû zoshâng gi, ngò hku é zoshâng a nghut to láng é lé, ngò myang ri.” ga taî kyô ri.
22 Hau htâng, myiwe myhí góyùq gi, “A nghut ô! Kângsoq dui é zoshâng gi, ngá zo nghut lhê; shî byùq bê zoshâng gi, nungzo nghut ri.” ga taî ri.
Nghut kôlhang, sânghî yùq gi, “A nghut ô! Shi byùq bê zoshâng gi, nungzo ru nghut ri; chyungxe dui é zoshâng gi, ngá zo nghut lhê.” ga taî ri. Haú dông, yhángnhik gi, hkóhkam é hí má dangnyhin nyhîn lhûm nyi akô nghut ri.
23 Haú hkûn, hkóhkâm gi, “Shí yuq, ‘Ngá zo gi, chyungxe duì sû nghut lhê; nungzo gi, shi byùq sû nghut ri.’ ga taî é u, góyùq gi, ‘A nghut! Nungzo gi, shi byùq bê, ngá zo gi, chyungxe dui nyi lhê.’ ga taî ri.” ga taî ri.
24 Hau htâng, hkóhkâm gi, “Shâm rahkyam yu lé lô keq.” ga taî ri. Haû mù, yhángmòq gi, hkóhkam é matú, shâm rahkyam yu lé lô byi bekô nghut ri. 25 Haû mù, hkóhkâm gi, “Kângsoq dui nyi é zoshâng lé, í hkyam byáng hkoq mù, haû myiwe í nhik lé, rayùq lé rahkyam hkyam byi keq.” ga hkunmó hkyô ri.
26 Kângsoq dui nyi é zoshâng é yhâng nu gi, yhang zo lé gyai yhang shogyo chyitdàp luî, hkóhkâm lé, “Ngá é yhûmsîng ê, jeju mai, yhang lé, chyungxe dui nyi é zoshâng byî pyám aq! Zoshâng haú lé hkâsat pyám!” ga taî ri.
Nghut kôlhang, góyùq gi, “Zoshâng haû gi, náng é le a dùt, ngá é le a dùt sháng gàq. Yhang lé í hkyam byáng hkoq pyám keq!” ga taî ri.
27 Haú hkûn, hkóhkâm gi, “Kângsoq dui é zoshâng zo lé, hkâsat pyám lo kó; sânghî yùq myiwe myhí lé byi keq. Myiwe myhí haû gi, yhâng nu a-kyîng nghut ri.” ga hpyit byî ri.
28 Isira-elaq byù bànshoq bang gi, hkóhkam mû haû su kut hpyit é hkyô lé wó gyo kôjáng, hkóhkâm lé gyùq kyum bùm bekô nghut ri; hkâsu mù gâ le, yhang gi, târâ ràp-rá é dông ùp râ matú, Garai Gasâng chyáng mâ é hpàqchyî byéng-yá wó yu tô é hkyô lé, yhángmòq myàng kô é yánmai nghut ri.