Sholumon Lé Dawiq Taî É Madàt Dang
2
Dawiq gi, yhang shî râ yàm chyâng lo é u má, yhang zo Sholumon lé madàt dang taî ri.2 Yhang taî é gi, “Ngò, myìdàm htoq bànshoq bang so âng é hkyô sô ló râ za nghut bê. Haû mù, nàng, wum-o lhoqkíng luî, wàqngân wum lhoqhtoq aq. 3 Náng é Garai Gasang nghut é, haû Yhûmsîng Garai kut nhâng nau é hkyô haî lé le châng nyì mù, yhâng é jì-no gyô nyì àq. Nàng zui saî é hkyô hkat hkangmó eq nàng e ló é jowò hkangmó má, wó ûngmyuq sháng gàq, Mosheq é târâ má kâ tô é eq rajung za, Yhâng é târâ wàng hkunmó pé, gótû hkunmó pé, Yhâng é târâ pé eq cháng ra târâ pé lé châng nyì àq. 4 Haú hkûn, ‘Náng é awùt ashín pé gi, chyungxe dui é hkyô má sidìq nyì mù, yhángmòq é i-myìt nhiklhum bànshoq eq i-myìt sô lhum gón èq, Ngá é hí má jujúm nyî kô é nghut jáng, nàng gi, Isira-elaq é hkóhkâm tángmyhâng má zùng râ byù hkâ-nhám le langhpyùt râ a nghut.’ ga haû Yhûmsîng Garai mai ngo lé danghtum htûm tô é lé, Yhang lhoqdìk byi râ nghut lhê.
5 Hau htoq agó, Zerui-a yhang zo Yo-ap gi, Isira-elaq gyèzau mó nhik nghut é Nera é yhang zo Apna eq Yehtera é yhang zo Amasa lé sat pyâm é dông, ngo lé hkâsu kut laî lo é hkyô lé, nàng yhang sê nyi lhê. Yhang gi, nguì ngón nyi é u má, majan pé má su haú nhik lé sat pyám mù, sui lhoqhtoq pyám bê nghut ri. Yhâng é hpyidum mâ é hpyihit má le, yhâng é hkyî mâ é hkyî-tsung má lé, sui haû lhoqtap to bê nghut ri. 6 Náng chyáng bo é hpàqchyî eq rajung za, yhang lé kut àq; nghut kôlhang, yhang uhpyû daúdam mâ é gi, ngón za mosumhkung shut hkâgyó ló nhâng.
7 Nghut kôlhang, Gile-at wà byù Barazilai é yhang zô pé lé gi, shogyo nhikmyin hkyô tûn shit mù, náng é zohpoq má zô é bâng chyáng bo lhóm aq. Yhángmòq gi, ngò, nungmang Apsalom chyáng mai hpang wún é hkûn, ngo lé lhom hkûlum yu é bang nghut akô.
8 Dum, Bahurim wà mâ é Ben-yamin a-myû, Gera é yhang zo Shimi le, nàng eq rahá nghut nyi é lé myìtbun aq. Yhang gi, ngò, Mahana-im wà shut gyó ló é buìnyì má, ngo lé kyî kyî hko shoq nhing tsô é sû nghut ri. Yhang, ngo lé hui râ ga, Yodan làng má jé gyó lo é hkûn, ngò gi, ‘Nang lé, sham èq sat pyám râ a nghut.’ nghû, haû Yhûmsîng Garaî é myìng lang luî, yhang lé dâkam tô é nghut lhê. 9 Nghut kôlhang, ahkuî, yhang lé mara a bò sû dông hkâ-nyhi to. Nàng gi, hpàqchyî bò sû nghut mù, yhang lé hkâsu kut râ hkyô nàng sé râ nghut lhê. Yhang lé, uhpyû daúdam mâ é, sui mai mosumhkung shut gyó ló nhâng àq.” ga taî ri.
10 Hau htâng, Dawiq gi, yhâng é îchyí îwâ pê chyáng ló bo bánnô byùq bê nghut mù, Dawiq é Wà má myhup yhûm pyâm é hui bê nghut ri. 11 Yhang gi, Isira-elaq byu pé lé, Hebron wà mó má nyhit zân, Yerusalem wà mó má súm xe sum zân, bànshoq myi xê zàn ùp bê nghut ri. 12 Haû mù, Sholumon gi, yhâng wa Dawiq é hkóhkâm tángmyhâng má xoq zung nyì mù, yhang ùphkang é hkyô lé lhoq gingtíng bê nghut ri.
Sholumon É Hkóhkâm Tángmyhâng Lhoqging Tîng É Hkyô
13 Haú hkûn, Hagit é yhang zo, Adoniya gi, Sholumon é yhâng nu, Batsheba chyáng ê jé ri. Batsheba gi, yhang lé, “Nguì ngón hkyo é matú jé lé é nghut lhê lhú?” ga myî ri.
Yhang gi, “Nguì ngón hkyo é matú jé lé é nghut lhê.” ga tû taî ri. 14 Hau htâng, yhang gi, “Ngò, nang lé taí râ rajung jòq ri.” ga xoq taî ri.
Batsheba gi, “Taí aq.” ga tû taî ri.
15 Haú hkûn, yhang gi, “Nàng sê é eq rajung za, mîngdán shî gi, ngá é mîngdán nghut lhê. Isira-elaq byù bànshoq bang le, ngo lé, yhángmòq é hkóhkâm dông wú nyi bùm kô é nghut lhê. Nghut kôlhang, haú pé bànshoq htaî byùq mù, mîngdán shî gi, ngá gû chyáng jé byùq bê nghut ri; haú hkyô gi, haû Yhûmsîng Garaî chyáng mai lo é nghut ri. 16 Ahkuî, ngò, nang lé dúng nau é hkyô rahkat jòq ri. Ngo lé, hkâ he-ngìk pyám.” ga taî ri.
Batsheba gi, “Taí aq.” ga taî ri.
17 Haû mù, yhang gi, “Shunam byù Abishaga lé, ngá é yhûmsîng myhí kut râ matú, ngo lé byi tso sháng gàq, jeju mai Hkóhkâm Sholumon lé bo taí byi laq; yhang gi, nang lé lhom he-ngìk pyám râ a nghut.” ga xoq taî ri.
18 Batsheba gi, “Ge ri; náng é matú hkóhkâm lé ngò bo taí byi râ nghut lhê.” ga tû taî ri.
19 Haû mù, Batsheba gi, Adoniya é matú, Hkóhkâm Sholumon lé taí râ ga yhâng chyáng ê jé é hkûn, hkóhkâm hpó gi, yhâng nu lé te yù râ ga toq yàp mù, yhâng nû é hí má ngóm gòp luî, yhâng é hkóhkâm tángmyhâng má zung ri. Yhang gi, yhâng nû é matú hkóhkâm tángmyhâng ralhum wàq lé nhang é nghut mù, yhâng nu gi, yhâng é lòqyò hkyam má zung ri.
20 Haú hkûn, yhâng nu gi, “Ngò, nang lé dung râ hkyô rahkat jòq ri. Ngo lé, hkâ he-ngìk pyám.” ga taî ri.
Hkóhkâm hpó gi, “Ânu ê, taí aq; ngò, nang lé he-ngìk pyám râ a nghut.” ga tû taî ri.
21 Haû mù, yhâng nu gi, “Shunam byù Abishaga lé, nungmang Adoniya lé byi tsô pyám gòq.” ga taî ri.
22 Hkóhkâm Sholumon gi, “Nàng, haî mù, Adoniya é matú Shunam myhí Abishaga lé za dung byî lhê lhú? Nàng gi, yhâng é matú, mîngdán jâng dung byi aq mhaî. Yhang gi, ngá mang nghut é yánmai, yhâng é matú le, hkyangjong Abi-ahta eq Zerui-a é yhang zo Yo-ap nhik matú le, jâng dung byi âng é nghut lhê!” ga yhâng nu lé tû taî ri.
23 Hau htâng, Hkóhkâm Sholumon gi, “Adoniya gi, haú hkyô lé dûng é yánmai, yhâng é chyungxe sûm pyâm é a nghut jáng, Garai Gasang gi, ngo lé hau htoq je htan é dam byi sháng gàq! 24 Haû Yhûmsîng Garai gi, ngá wa Dawiq é tángmyhâng htoq má ngo lé lhoq gingtíng nhang to bê nghut é htoq agó, Yhang danghtum htûm tô é eq rajung za, ngá matú hkóhkâm mîngdán xuq to byi bê nghut ri. Haû mù, Yhûmsîng Garai rû dui nyi é eq rajung za, Adoniya gi, hkû-nyí sat pyâm é hui râ nghut lhê!” ga, haû Yhûmsîng Garaî é myìng lang luî, dâkam ri. 25 Haû mù, Hkóhkâm Sholumon gi, Yehoi-ada é yhang zo Benai-a lé, hkunmó hkyô é nghut mù, yhang gi, Adoniya lé sat pyám bê nghut ri.
26 Hau htâng, hkóhkâm gi, hkyangjong Abi-ahta lé, “Anahtot wà mâ é, náng é yhummau shut taû ló aq. Nàng, shî gíng sû nghut ri; nghut kôlhang, nàng gi, ngá wa Dawiq é hí má, Ahko Ahkáng lhúnglháng wó Sû Yhûmsîng Garaî é sàksé dò lé wàq mù, ngá wâ é wuîhke hkyô bànshoq má bo hpû é sû nghut é yánmai, ahkuî, ngò, nang lé a sat naû shî é nghut lhê.” ga taî ri. 27 Haû mù, Sholumon gi, haû Yhûmsîng Garai mai Shilo wà má Eli é yhûmbyù wuì eq sêng é hkyô taî é dang lé lhoqdìk é dông, Abi-ahta lé, haû Yhûmsîng Garaî é hkyangjong ayá mai lhoqhkyô pyám byi bê nghut ri.
28 Yo-ap gi, danglù haú lé wó gyo jáng, Apsalom é hkyô má a bo cháng kôlhang, Adoniya é hkyô má bo cháng bê nghut mù, haû Yhûmsîng Garaî é zúm shut hpang wàng luî, hkungga gyàp mâ é hkyuî pé má zuî zing tô ri. 29 Yo-ap gi, haû Yhûmsîng Garaî é zúm shut hpang wàng mù, hkungga gyàp nàm má nyi tô ri ga Hkóhkâm Sholumon lé taî kyo kôjáng, yhang gi, Yehoi-ada é yhang zo Benai-a lé, “Yhang lé ê sat pyám aq!” ga hkunmó hkyô ri.
30 Haû mù, Benai-a gi, haû Yhûmsîng Garaî é zúm má wang ê luî, Yo-ap lé, “‘Htoq lô àq!’ ga hkóhkâm taî ri.” ga taî ri.
Nghut kôlhang, Yo-ap gi, “A htoq ô; ngò gi, shî má shî râ nghut lhê.” ga tû taî ri.
Haû mù, Benai-a gi, hkóhkam chyáng ló luî, “Haû gi, ngo lé Yo-ap hkâsu ga tû taî é hkyô nghut bê.” ga ló shit kyô ri.
31 Haú hkûn, hkóhkâm gi, Benai-a lé, “Yhang taî é eq rajung za kut àq. Mara a bo é sui lé, Yo-ap lhoqshun pyâm é mara gi, ngò eq ngá wâ é yhûm mai lhoqhuî sêng pyám sháng gàq, yhang lé sat mù, myhup pyám aq. 32 Yhang gi, ngá wa Dawiq a sê é za, byù í yùq lé htim mù, sham èq sat pyâm é yánmai, haû Yhûmsîng Garai gi, yhang sui lhoq shun pyâm é mara dam byi râ nghut lhê. Haú nhik gi, Isira-elaq gyèwap mâ é zau mó, Nera é yhang zo Apna eq, Yudaq gyèwap mâ é zau mó, Yehtera é yhang zo Amasa nghut akô. Yhángnhik gi, Yo-ap htoq je gè je díngmán é su nhik nghut akô nghut ri. 33 Haû mù, haú nhik é sui mara gi, Yo-ap é u htoq má le, yhâng é awùt ashín pê é u htoq má le, ahtum abyùq ru joq nyî sháng gàq. Nghut kôlhang, Dawiq eq yhâng é awùt ashín, yhâng é yhûmbyù wuì eq yhâng é hkóhkâm tángmyhâng ahtoq má gi, haû Yhûmsîng Garaî é nguì ngón hkyô ahtum abyùq ru joq nyî sháng gàq ô!” ga hkunmó hkyô ri.
34 Haû mù, Yehoi-ada é yhang zo Benai-a gi, dòq ê mù, Yo-ap lé bàt sat pyám luî, yòso mâ é yhâng é yhûm má myhup pyâm to bê nghut ri. 35 Hkóhkâm gi, Yo-ap é jowò má, Yehoi-ada é yhang zo Benai-a lé, gyèzau wò byi mù, Abi-ahta é jowò má, hkyangjong Zadok lé wò byi bê nghut ri.
36 Hau htâng, hkóhkâm gi, Shimi lé jì nhâng mù, yhang lé, “Nàng gi, Yerusalem wà mó má yhûm ralhum saí mù nyì àq; nghut kôlhang, gó jowò hká má le hkâ-ê. 37 Nàng, Kidron Langhkaû laî byìt htoq ló é buìnyì má gi, teng za shî râ nghut lhê; náng é sui mara gi, náng é u htoq má jé râ nghut lhê.” ga taî ri.
38 Haú hkûn, Shimi gi, hkóhkâm lé, “Nàng taî é ge ri. Ngá é yhûmsîng hkóhkâm nàng taî é eq rajung za, náng é duìnhâng zoshâng ngò kut râ nghut lhê.” ga tû taî ri. Haû mù, Shimi gi, Yerusalem wà mó má myáng myáng nyi nyì bê nghut ri.
39 Nghut kôlhang, sum zân myáng é htâng má, Shimi é jùn í yùq gi, Gat hkóhkâm, Mahka é yhang zo Ahkisha chyáng hpang e byùq akô nghut ri. Haû mù, “Náng é jùn nhik gi, Gat wà má nyi tô akô.” ga Shimi lé taî kyo bekô nghut ri. 40 Haú hkûn, Shimi gi, yhâng é loze lé buí chûng mù, yhâng é jùn nhik lé châng hô râ ga, Gahta wà mâ é Ahkisha chyáng e ri. Haû mù, Shimi gi, htoq ê luî, yhâng é jùn nhik lé, Gat wà mai shuî taû lò bê nghut ri.
41 Shimi gi, Yerusalem wà mó mai Gahta wà shut ê mù, dum taû lò bê nghut é hkyô lé, Sholumon lé taî kyo bekô nghut ri. 42 Haû jáng, hkóhkâm gi, Shimi lé ji yù mù, yhang lé, “Ngò, nang lé, haû Yhûmsîng Garaî é myìng lang mù dakâm nhâng luî, ‘Nàng, htoq mù, gó jowò shut e é buìnyì má gi, teng za shî râ nghut lhê.’ nghû sidìq byî to bê a nghut lhí? Haú hkûn, nàng gi, ngo lé, ‘Nàng taî é ge ri. Ngò cháng râ nghut lhê.’ ga taî é nghut lhê. 43 Haú su nghut le nhîng, nàng gi, haû Yhûmsîng Garaî é myìng lang luî dâkam tô é dang lé le, nang lé ngò hkyô tô é hkunmó lé le, haî mù a cháng kut lhê lhú?” ga taî ri.
44 Hau htoq agó, hkóhkâm gi, Shimi lé, “Nàng gi, ngá wa Dawiq lé nàng kut shut é hkyô bànshoq lé, náng é i-myìt hkaû má sê ri. Ahkuî, haû Yhûmsîng Garai gi, nàng kut shut é marâ é matú, nang lé dam byi râ nghut lhê. 45 Nghut kôlhang, Hkóhkâm Sholumon gi, hkungsô wó nyî râ nghut lhê; Dawiq é hkóhkâm tángmyhâng gi, haû Yhûmsîng Garaî é hí má ahtum abyùq jòq gîng nyì râ nghut lhê.” ga taî ri.
46 Hau htâng, hkóhkâm gi, Yehoi-ada é yhang zo Benai-a lé hkunmó hkyô é nghut mù, yhang gi, htoq e ló luî, Shimi lé bàt sat pyám bê nghut ri.
Haû mù, hkóhkâm mîngdán gi, Sholumon é lòq má gingtîng nyì bê nghut ri.