Eliya Mauhkûng Shut Shuî Toq Yû Huî É Hkyô
2
Haû Yhûmsîng Garai gi, Eliya lé, laìlhíng dông mauhkûng shut shuî toq yû râ u má, Eliya eq Elisha gi, Giligala wà mai yhángnhik é hkyôwuì shut htoq e ló akô nghut ri. 2 Eliya gi, Elisha lé, “Nàng shí má nyi to hkó aq; haû Yhûmsîng Garai gi, ngo lé, Behtela wà mó shut nhang kat ri.” ga taî ri.Nghut kôlhang, Elisha gi, “Haû Yhûmsîng Garai le, nàng le, rû dui nyi é eq rajung za, ngò gi, nàng eq gang râ a nghut.” ga taî ri. Haû mù, yhángnhik gi, Behtela wà mó shut gyó e ló bekô nghut ri.
3 Behtela wà mó má nyi é myìqhtoî pé gi, Elisha chyáng htoq lé lô kômù, “Haû Yhûmsîng Garai gi, hkû-nyí yhang, náng é yhûmsîng lé, náng chyáng mai shuî yu ló râ nghut é hkyô lé, nàng sê lhê lhú?” ga myî akô.
Elisha gi, “Ngò sê lhê; zim za nyì keq.” ga tû taî ri.
4 Hau htâng, Eliya gi, yhang lé, “Elisha ê, shí má nyi to hkó aq; haû Yhûmsîng Garai gi, ngo lé, Yerihko wà mó shut nhang kat ri.” ga taî ri.
Haû jáng, Elisha gi, “Haû Yhûmsîng Garai le, nàng le, rû dui nyi é eq rajung za, ngò gi, nàng eq gang râ a nghut.” ga tû taî ri. Haû mù, yhángnhik gi, Yerihko wà mó shut e ló bekô nghut ri.
5 Yerihko wà mó má nyi é myìqhtoî pé gi, Elisha chyáng dòq ê kômù, yhang lé, “Haû Yhûmsîng Garai gi, hkû-nyí yhang, náng é yhûmsîng lé, náng chyáng mai shuî yu ló râ hkyô lé, nàng sê lhê lhú?” ga myî akô.
Elisha gi, “Ngò sê lhê; zim za nyì keq.” ga tû taî ri.
6 Hau htâng, Eliya gi, Elisha lé, “Shí má nyi to hkó aq; haû Yhûmsîng Garai gi, ngo lé Yodan làng shut nhang kat ri.” ga taî ri.
Elisha gi, “Haû Yhûmsîng Garai le, nàng le, rû dui nyi é eq rajung za, ngò gi, nàng eq gang râ a nghut.” ga tû taî ri. Haû mù, yhángnhik gi, rahá sô e ló akô nghut ri.
7 Myìqhtoi hpúng mâ é byù ngo xê yùq gi, ê mù, Yodan làng yàm má Eliya eq Elisha nô yàp tô é jowò shut hû luî, we we má ê yàp tô akô nghut ri. 8 Eliya gi, yhâng é buhîng lé yu dîng lhum luî, hau èq wuì má bàt kat ri. Haú hkûn, wuì gi, lòqyò lòqpai shut gam hkoq byùq mù, yhángnhik gi, kyuq huî é myigùng htoq mai sô laî byìt e ló bekô nghut ri.
9 Yhángnhik wó laî byìt é hkûn, Eliya gi, Elisha lé, “Ngo lé náng chyáng mai a shuî yù shi-má, náng é matú ngò haî kut byi râ taí aq.” ga taî ri.
Elisha gi, “Náng é sô í tú, ngo lé wó nhâng laq.” ga tû taî ri.
10 Eliya gi, “Nàng gi, wuî é hkyô lé dung bê nghut ri; nghut kôlhang, náng chyáng mai ngo lé shuî yu é hkûn, nàng, ngo lé myang é nghut jáng, haû lé nàng wó râ nghut lhê; haû a nghut jáng, haû lé nàng wó râ a nghut.” ga taî ri.
11 Yhángnhik gi, hkyô so uchyang, taî lhûm nyì kô é hkûn, myi lhêng racham eq myi myang pé gi, a bûn nùng má htoq lé lô mù, yháng í yùq lé gam hkoq pyám luî, Eliya gi, laìlhíng mai mauhkûng shut dòq ló bê nghut ri. 12 Elisha gi, haú lé myàng mù, “Ngá wa ê! Ngá wa ê! Isira-elaq é gyèlhêng pé eq myang ji ji bang nghut ri nhung ô!” ga wùt garû ngaù kôle, Eliya lé a myang byùq lo nghut ri. Hau htâng, Elisha gi, yhâng é buhîng yù mù, haú lé í hkyam byáng lâng cheq pyám bê nghut ri.
13 Hau htâng, Elisha gi, Eliya chyáng mai gyùt gyó tô é buhîng lé gùq yù luî, dum taû ló mù, Yodan làng gin-gau htoq má ló yàp tô ri. 14 Yhang gi, Eliya chyáng mai gyùt gyó tô é buhîng lé yù mù, hau èq wuì lé bàt ri; hau htâng, yhang gi, “Eliya é Garai Gasang, haû Yhûmsîng Garai gi, ahkuî hká má lhú?” ga myî ri. Yhang wuì lé bàt kat jáng, wuì haû gi, lòqyò lòqpai í hkyam shut gam hkoq ló byùq mù, yhang gi, haú mai laî byìt ló bê nghut ri.
15 Yhang lé wú nyî kô é Yerihko wà mó mâ é myìqhtoî pé gi, “Eliya é sô gi, Elisha chyáng nyi to bê nghut ri.” ga taî bum akô. Hau htâng, yhángmòq gi, Elisha lé hui râ matú e ló kômù, yhâng é hí, myigùng má ngóm gòp akô nghut ri. 16 Yhángmòq gi, “Wú aq, shî wum-o htan é náng é duìnhâng zoshâng wuì ngo xê yùq bo lhê. Yhángmòq gi, náng é yhûmsîng hpó lé ê hô kó sháng gàq. Haû Yhûmsîng Garaî é Sô gi, yhang lé bún toq yû mù, bùm htoq má, a nghut jáng, langhkaû má nyhi pyâm tô lhê âbe.” ga taî akô nghut ri.
Elisha gi, “Yhángmòq lé hkâ-é hô nhâng kó.” ga tû taî ri.
17 Nghut kôlhang, yhángmòq gi, Elisha he-ngìk râ matú gùng yui byùq shoq chôm taî shi-kùt akô nghut ri. Haû mù, yhang gi, “Ê hô nhâng keq.” ga taî ri. Haú hkûn, yhángmòq gi, byù ngo xê yùq lé nhang kat kô é nghut luî, haú bang gi, sum nyí yhang ho wú kôle, Eliya lé a myang hô kó nghut ri. 18 Yhángmòq gi, Yerihko wà mó má nyi tô é Elisha chyáng dum taû lò kôjáng, yhang gi, yhángmòq lé, “Ngò, núngmòq lé hkâ-ê kó nghû taí bê, a nghut lhí?” ga taî ri.
Wuì Lé Lhoqngham Byî É Hkyô
19 Haû wà mâ é byu pé gi, Elisha lé, “Ngá-mòq é yhûmsîng ê, wú aq, nàng myang é eq rajung za, wà shî gi, ngón za xuq tô é wà nghut ri; nghut kôlhang, wuì a gè mù, maumyî mâ é kyôshi sun byùq byùq dùt ri.” ga taî akô nghut ri.
20 Yhang gi, “Hkoq asik rahkyap má xo kat luî, ngá chyáng yu lé keq.” ga taî ri. Haû mù, yhángmòq gi, haú lé yu ê byi bekô nghut ri.
21 Haû mù, yhang gi, wuìbúm shut htoq ê mù, haú má xo ê dú kat luî, “Haû Yhûmsîng Garai shî su ga taî ri; ‘Ngò, wuì shî lé lhoqngham byi bê. Ahkuî mai gi, maumyî shî má, shi byùq é hkyô, a nghut jáng, kyôshi sun byùq é hkyô, a htoq lo râ nghut lhê.’ gâ ri.” gâ taî ri. 22 Elisha taî é dang eq rajung za, wuì haû gi, hkû-nyí jé shoq sân-yúng to bê nghut ri.
Elisha Nyhap Pyám Huî É Hkyô
23 Elisha gi, wà haú mai Behtela wà shut dòq ló ri. Yhang hkyô sô laî ló nyi é u, zorâm wuì ra-am wà mai htoq lé lô kômù, yhang lé nyhap é dang taí kô é gi, “Uchyuí mó ê, shî mai htoq ló byùq àq! Uchyuí mó ê, shî mai htoq ló aq!” gâ ri. 24 Yhang gi, yhángmòq shut lhing wú kat mù, haû Yhûmsîng Garaî é myìng mai yhángmòq lé nhîng pyâm ri. Haû mù, wàm zìng í du yòso mai htoq lò luî, yùqgè zo wuî myí xe í yùq lé ngàt sat pyám bê nghut ri. 25 Yhang gi, Hkarimela Bùm shut dòq ló mù, haú mai Samariq wà shut dum taû ló bê nghut ri.